1, 2. (a) Isaia 60:22 yakakwanirisika kudini mu njiku jino jo kupejisira? (b) Divi ro pasi ro sangano ra Jehovha rina dikano yapi wari?

“MUDOKO wavo unozova ciuru; wokurembejeka wavo unozova jinja rakavanga.” (Isaia 60:22) Magama aya ari kukwanirisika wari mu njiku jino jo kupejisira. Mu gore ro 2015, kwaenga no vashandiri va Jehovha vanoita 8.220.105 vaicumaira masoko akanaka mu nyika yese. Mwari wakananga kudari ngo pamusoro po kunyengejereka ko vandhu vake: “Inini, [Jehovha], mu mukuvo wabzo, ndinozoita ibzi ngo kukasika.” Ngo kufamba ko nguva, kucazova no basa wakawanda rokuti tese tiriite. Tiri kuita zvese zvotinokwanisa kuti ticumaire no kujijisa masoko akanaka? Hama zinji no hambzaji jakashanda inga mapiyona o nguva jese no mapiyona obesero. Hama jimweni jakaenda ku ndau imweni kuti jibesere ngo basa ro kucumaira, zve hama jimweni jaishanda ngo simba kuti jivake Nyumba jo Umambo.

² Kwakaumbwa ungano imbza jinoita 2.000 gore rese ro 2015. Ungano iji jinoda vakuru no vabatiri vanoshandira. Gore rimwe na rimwe, zviuru no zviuru zvo vabatiri  vanoshandira vanodikana kuti vave vakuru, zviuru no zviuru zvo hama jinodikana kuti jive vabatiri vanoshandira. Zvakajeka kuti pana zvakawanda zvo kuita mu basa ra “Tenji,” zve basa iri asipi ro hama basi, asi hambzaji jinodikavo.—1 VaKorinto 15:58.

3, 4. Zvinoda kunangenyi komuri kukura kumujimu?

³ Verenganyi 1 Timoti 3:1. Mupostori Pauro wakasimba hama ‘jaida kuita’ vavonereri. Kuti mundhu apsake ciro ciri ndhambo, waizodikana kuti avangisire, kangaije kutotambanuja mukono wake kuti aciwane. Waro rangariranyi basi ngo hama iri kuda kukwanirisa inga mubatiri anoshandira. Iyona inozviziva kuti inodikana kuvangisira kuti iitise nane mugariro jayo jo ciKristu. Perpo, ikashanda inga mubatiri anoshandira, inozoenderera mberi icishanda ngo simba kuitira kuti iwane zvikwaniriso kuti ive muvonereri.

⁴ Hama jimweni no hambzaji jinoita cinjo jojinoda kuti jiite zvakawanda mu basa ra Jehovha. Inga muezaniso, jingada kuita mapiyona, kooshandira ku Bheteri kana koobesera kuvaka Nyumba jo Umambo. Ngativone kuti Bhaibheri ringabeseresa kudini tese kuti tirambe ticikura.

5. Vocidoko vangashandisisa kudini simba ravo pa basa ro Umambo?

⁵ Vocidoko vangaita zvakawanda mu basa ra Jehovha ngokuti vana simba no uhomi hwushoni. (Verenganyi Mazwi Akangwara 20:29.) Majaha mamweni anobesera kudhindha no kunasirira mabhuku no maBhaibheri ku Bheteri. Hama zinji no hambzaji jo cidoko jinovaka Nyumba jo Umambo kana kubesera pa kujinasirira-nasirira. Vamweni vanozvipira kuti vabesere pakaitika ngozi. Zve mapiyona mazinji o vocidoko vanojija ndimi imweni kana kuenda ku ndau imweni kuitira kocumaira masoko akanaka.

6-8. (a) Mujaha umweni wakacinjisa kudini mavonero aaita basa ra Mwari, zve zvakava no muviyo wenyi? (b) Tingaejesa kudini no ‘kuvona unaki hwa [Jehovha] Mwari’?

⁶ Tinoda Jehova zve tinoda kumushandira mbhera panoperera simba redu. Pikija zvakadaro, tingava no mazwiro akava no hama inodanijwa kuti Aaroni. Iyena waida kushandira Mwari, asi aacaengepi no mudakaro. Pikija Aaroni waienda ku musongano no koocumaira kubvira pa ujaha hwake, iyena wakati, “musongano no basa ro kucumaira zvaindifindha.” Waro, wakazoitenyi?

⁷ Aaroni wakavangisira kuti averenge Bhaibheri njiku jese, kunasirira musongano no kudavira pa musongano. Iyena wakatangazve kuita mukumbiro kazinji. Zvese izvi zvakamubesera kuti akure kumujimu. Wakaguma pa kuziva ushoni Jehovha zve wakatanga kumuda maningi. Inga muviyo, Aaroni wakazwa mudakaro. Iyena wakaita upiyona, waibesera vamweni pakaitika ngozi zve wakaenda koocumaira mu nyika imweni. Wari waamukuru zve ari kushandira pa Bheteri. Ari kujizwa kudini ngo upenyu hwake? Aaroni wakati: “Inini ‘ndakaeja, ndovona unaki hwa [Jehovha].’ Ngo makomborero ake, ndakajizwa kuti ndina zigava nae zve zvaindikwevejera kuti ndiite zvakawanda mu basa rake, zve izvi zvakandiviisira makomborero mazinji.”

⁸ Mutari wo nduyo wakati: “Ejanyi, munozovona unaki hwa [Jehovha] Mwari.”  Wakaengejera kudari: “Vaya vanopsaka [Jehovha] Mwari vanozoguta ngo bzese.” (Verenganyi Nduyo 34:9-11.) Hina, potinoshandira Jehovha mbhera panoperera simba redu, tinojizwa kudakara kamare ngokuti tinoziva kuti tiri kumudakajisa. Iyena anozokwanirisa cipikihwa cake co kutisapota.

9, 10. Ngenyi zvinosisira komuri kuva no mugariro wo ‘kuvetera’?

⁹ Tingada kuita zvakawanda mu basa ra Jehovha. Asi tingati kudini kudari zvecidiwa kuti tivetere nguva yakatikuti kuti tizowanevo cidajiso ciri cese mu ungano kana kuti mugariro wedu ucinje? Zvingada kuti tive vanosengerera. (Mikeya 7:7) Zve pikija kuti Jehovha angatendera mugariro wotiri waro urambe uripo, tingava no gwinyiso rokuti iyena anotibesera mukuvo wese. Tingajija ngo muezaniso wa Abhirahama. Jehovha wakamugondesa kuti waizova no mwana, asi iyena waidikana kuvetera makore mazinji Izaki aacito abahwa. Pa mukuvo wondhowo, Abhirahama waivetera ngo kusengerera zve aazivi kuruza gonda rake kuna Jehovha.—Genesi 15:3, 4; 21:5; Vaheberi 6:12-15.

¹⁰ Zvokadi kamare, kuvetera azvizivi kureruka. (Mazwi Akangwara 13:12) Asi kudari tikaramba ticirangarira ngo pamusoro po mugariro no macamwiro otakaita, tinozojizwa kurembejeka. Kunja kwa izvi, taizoshandisa nguva iyi kuti tiengejere mugariro jotinozoda kuti tiite mabasa ari ese mu ungano.

11. Mugariro japi jo kumujimu jotingadikana kushanda kuti tiengejere, zve ngenyi jinosisira?

¹¹ Engejeranyi mugariro no zvikwaniriso zvinodiwa. Ngo kuverenga Bhaibheri no kurangarijira zvomunoverenga, mungawana uzivi, kurangarira no kuvona zviro ngo maitiro akajeka, zve kutema zvivaringo zvakanaka. Zvokadi, hama jinodikana kuva no mugariro no zvikwaniriso izvo waro kuti jikorondhe ungano. (Mazwi Akangwara 1:1-4; Tito 1:7-9) Potinojija Bhaibheri, tingawana majizwiro a Jehovha ngo pamusoro po shwiro zinji. Perepo, tingashandisa zvotinojija njiku no njiku kuti titeme zvivaringo zvinodakajisa Jehovha. Inga muezaniso, tinozoziva matajiro otingaita vamweni, mashandisiro otingaita mare no makhetero otingaita mubungaijo no zvokusimira.

12. Vo ungano vangavonesa kudini kuti vanothembeka?

¹² Shandanyi ngo simba pa basa rese ramunopuwa. Vandhu va Mwari povaivakisa temberi, Nehemia waida vandhu kuti vaite mabasa akasiana-siana. Iyena wakakheta vamweni vainga no mufambiro jaushoni. Iyena waiziva kuti vandhu vondhovo vaida Mwari zve kuti vaizoshanda ngo simba pa basa riri rese ro vaizopuwa. (Neemia 7:2; 13:12, 13) Mu njira yondhoyo, nyamasi uno vaya vakagondeka no vanoshanda ngo simba vanozova no  nduma yakanaka zve vangaengejehwa mutoro. (1 VaKorinto 4:2) Pikija tiri hama no hambzaji, tinodikana nguva jese kushanda ngo simba rese pa basa riri rese rotinopuwa.—Verenganyi 1 Timoti 5:25.

13. Mungatevejeresa kudini muezaniso wa Jasefa kudari vamweni vakashaisha kumutaja?

¹³ Nyindanyi Jehovha. Munodikana kuitenyi kudari vamweni vakashaisha kumutaja? Imwimwi mwaizokwanisa kuvabvunja kuti munozwa kudini. Asi kudari mukaramba mecijibvikira no kuvonesa kuti ndimwi muno razawe, kangaije mwaizoinyanyisa zviro. Tingajija zvakawanda ngo muezaniso wa Jasefa. Hama jake jakashaisha kumutaja. Vandhu vaimunangira zvakashata, zve wakadihwa mujeri ngo ndava yaacaiziva. Asi Jasefa wakanyinda Jehovha. Iyena wakarangarira ngo pamusoro po zvipikihwa zva Jehovha zve wakaramba wakagondeka. (Nduyo 105:19) Mu mukuvo uwo wokunesa, wakaengejera mugariro jakazomubesera, paakazogajwa kuita basa rinosisira. (Genesi 41:37-44; 45:4-8) Kudari vamweni vakashaisha kumutaja, kumbiranyi ungwaru kuna Jehovha. Iyena anozomubesera kuti murambe makathiva no kuvataja ngo kunaka mwoyo pomunobhuya navo.—Verenganyi 1 Pedru 5:10.

14, 15. (a) Ngenyi tinodikana ‘kurindira’ kana kusotesesa njira yatinocumaera ndiyona? (b) I cinjo japi jamungaita kuti muzwirane no magariro? (Vonanyi pikica yo kutanga no bhokiso rina musoro unoti “ Muri Kuda Kueja Maitiro Amweni?”)

¹⁴ Pauro wakabvunja Timoti kuti arambe  aciitisa nane masanangurire ake Matahwa. Pauro wakati: “Jirindirei no rindai majijisiro.” (1 Timoti 4:13, 16) Timoti wainga waano makore mazinji acicumaira. Waro, ngenyi waidikana kuita nane? Timoti waiziva kuti vandhu no mugariro zvinocinja. Iyena waida kuti vandhu varambe vacimupurukira, ngokudaro, waidikana kuramba aciitisa nane no kucinja njira yaivajijisa ndiyona. Patinocumaira nyamasi uno, tinodikana kuitavo kudaro.

¹⁵ Mu ndau jimweni, potinocumaira nyumba ngo nyumba, atiwani vandhu mu mamuzi. Mu ndau jimweni, vandhu vangava pamuzi, asi atikwanisi kuguma pa musuvo wavo, kangaije ngokuti atikwanisi kunghwina pa nyumba yovanogararo. Kudari ngozvinoitika mu ndharaundha menyumo, mungaeja maitiro amweni kuti muwane vandhu here?

16. Ucapupu hwo pambhene hungatatijisa kudini kuva hunobudirira?

¹⁶ Hama zinji no hambzaji jinodakarira kuita ucapupu hwo pambhene. Inga muezaniso, ijona jinoenda munoimira zvitima, mu maparajhi, mu mabazari no mu parki kuti vawane vandhu vo kubhuya navo. Kupa ucapupu mundhu kungatanga ngo kubhuya naye ngo pamusoro po masoko o zvabva kuitika sambi-sambi. Kana hungatanga ngo kunanga ciro cakanaka ngo pamusoro po vana vo mundhuwo kana kumubvunjisa ngo pamusoro po basa rake. Kudari iyena akatatija kudakarira mabhuyowo, mucumairi angananga fundo ro mu Bhaibheri no kumubvunjisa kuti anorangariravo kudini ndizvona. Kazinji, vandhu vanoda kuziva zvizinji ngo pamusoro po Bhaibheri.

17, 18. (a) Mungaengejeresa kudini pa kuvereketa makacunga mu ucapupu hwo pambhene? (b) Pamunonga muri mu mushando, ngenyi kuva no cido co kusimba Jehovha cakadari inga ca Dhavhidhi, zvinosisira maningi?

¹⁷ Kangaije mungazvivona zvicinesa kutanga mabhuyo mu zvitaka zvina vandhu vo mucikazivi. Izvo ngo zvaaijizwa Eddie, mupiyona wo ku Dhorobha ro Novha Yorki. Asi iyena wakawana ciro cakamubesera kuti averekete ngo kuthemba. Iyena wakati: “Pa kunamata kwedu ko mbhuri, inini no mukaji wangu takapsakisira kuti tiwane mupinguro jo vandhu vanophikiza no vanonanga mavonero avo. Takakumbirazve mazano o Zvapupu zvimweni.” Eddie ari kudisisa maningi kuita ucapupu wo pambhene.

¹⁸ Potinodakarira maningi mushando wedu no kuitisa nane mabhuiro otinoira no vandhu ngo pamusoro po masoko akanaka, kukura kwedu ku mujimu kunozovoneka ngo vamweni. (Verenganyi 1 Timoti 4:15.) Zve tingatobesera mundhu kuti ave mushandiri wa Jehovha. Dhavhidhi wakati: “Ndinokomborera [Jehovha] Mwari mukuvo wese, kusimba kwake kuri mu muromo wangu njiku jese; ndinojikuja mwa [Jehovha] Mwari: varombo vazwe, vadakare.”—Nduyo 34:2, 3.

19. Ngenyi mushandiri wakagondeka wa Jehovha anodikana kudakara, pikija acirarama pa mugariro unobzinyirira?

¹⁹ Dhavhidhi wakanangazve kudari: “Bzisikwa bzenyu bzese bzimusimbe, [Jehovha] Mwari vatendi venyu ngavamukomborere; ngavanange goja ro umambo hwenyu, ngavaverekete ngo bziito bzenyu bzikuru.  Kuti vatokotese bziito bzenyu bzikuru ku vana va Adamu [kana vo vandhu], no goja rakakurisisa ro umambo hwenyu.” (Nduyo 145:10-12) Vese vaya vanoda Jehovha zve vakagondeka kwaari vano cido cakavanga co kubvunja vamweni ngo pamusoro pake. Asi tingati kudini kudari ngo ndava yo kuhwaja kana usharuka, amucakwanisi kupeja nguva yakawanda inga yomwaida pa kucumaera nyumba ngo nyumba? Zivanyi kuti nguva iri yese yamunobhuya ngo zva Jehovha no murapi kana dhokodheya ngo pamusoro pa Jehovha munonga mecimusimba. Kudari muri mu jere ngo ndava yo gonda renyu, kangaije muri kuramba mecibvunja vamweni ngo zva Jehovha, zve izvi zviri kudakajisa mwoyo wake. (Mazwi Akangwara 27:11) Zve, Jehovha ari kudakara maningi, kudari muri kuramba mecimushandira pikija muri pa mbhuri yo kuti vamweni avaripi kumushandira. (1 Pedru 3:1-4) Pikija pa mugariro jinonesa maningi, mungakwanisa kusimba Jehovha, kuramba mecimukhwederera no kukura ku mujimu.

20, 21. Kudari makapuwa mabasa mazinji mu sangano ra Jehovha, mungava kudini makomborero kuno vamweni?

²⁰ Jehovha anozomukomborera kamare kudari mukaramba mucikhwedera kwaari no kumushandira mbhera panoperera simba renyu. Kangaije ngo kuita cinjo jimweni jo urongwa hwenyu no mararamiro enyu, munozowana mukana jakawanda jo kubesera vandhu kujija ngo pamusoro po zvigondiso zvake zvinodakajisa. Imwimwi mungabeserazve maningi hama jenyu. Zve zivanyi kuti hama no hambzaji jenyu jinozomuda maningi pojinomuvona mecishandira ungano ngo simba!

²¹ Azvinenyi kuti tashandira Jehovha mukuvo wakarebesa kudini, tese tingaenderera mberi ticikhwedera kwaari no kukura kumujimu. Pa jijo inotevera, ticazobhuya ngo mabesero otingaita vamweni kuti vakurevo.