1. Fananijanyi kuti ngenyi zvinosisira kuva vanozwisisa kuti iyi i nguvenyi zve zvicinyi zviri kuitika patinonga tiri. (Vonanyi pikica yo kutanga.)

URONGWA hwo gungano ro mutundhu wainga woda kutanga. Mutungamiriri wakaenda pa civanje woti kwavia wakanaka kuno vese. Mumbo woda kutanga. Vapurutani vakaziva kuti yaenga nguva yo kugara mu ndau javo. Ivona vaida kupurukira mumbo unodakaja vecivetera hurukuro jaizoitwa. Asi, kangaije paenga no vamweni vacikazivi kupurukira mutungamiriri wo gungano kana avazivi kuzwa kuti mumbo uri kurijwa. Ngokudaro, avacaizvizivepi kuti gungano riri kutanga, zve ivona vaenga vacafamba-famba kana vacabhuya no shamwari javo. Mugariro uu unotatija zvingaitika kudari tikatama kuzwisisa kuti iyi i nguvenyi kana zvicinyi zviri kuitika patinonga tiri. Ici i cijijo cinosisira maningi kotiri ngokuti sasambi kamare, ciitiko cinosisira maningi cinozotanga, zve tinodikana kuva takanasirira. I ciitika capi?

2. Ngenyi Jesu wakabvunja vajiji vake kuti vagare ‘vakarinda’?

² Jesu wakangwaja vajiji vake ngo pamusoro po kudikana ko kugara vakangwara no kuva vakanasirira kuitira “kupera  ko nyika.” Iyena wakavabvunja kudari: “Rindanyi no kunamata [kana kukumbira], ngokuti amuzivi mukuvo wabzo.” Naapera kunanga izvo, wakanangazve kazinji kudari: “Rindanyi.” (Mateu 24:3; verenganyi Marco 13:32-37.) Zvinonanga tsamba ya Mateu zvinotatijazve kuti Jesu wakangwaja vajiji vake ngo pamusoro pazvo. Iyena wakavabvunja kudari: “Rindanyi, ngokuti amuzivi ngari yo kuzovia muno wo nyumba.” Zve wovabvunjazve kudari: “Garanyivo makanasirika, ngokuti Mwana wo Mundhu anozovia ngo nguva yo mucingamuveteri.” Perepo wakaphinda kudari: “Rindanyi; ngokuti amuzivi njiku no mukuvo.”—Mateu 24:42-44; 25:13.

3. Ngenyi tinopurukira ngwajo ya Jesu?

³ Itusu Zvapupu zva Jehovha tinopurukira ngwajo ya Jesu. Tinoziva kuti tiri kurarama mu “mukuvo wokupejisira” zve kuti ‘dambujiko guru’ rinozotanga sasambipo! (Danieli 12:4; Mateu 24:21) Kudari ngo zvakananga Jesu, vandhu va Jehovha vari kucumaira masoko akanaka ngo pamusoro po Umambo mu nyika yese. Pa nguva yondhoyo, tiri kuvona hondo, ndhendha, kuzungunyika ko nyika no njara mu ndau zinji. Kuno kutama kuzwa mu zviara, uphanga no ugevenga, zviri kunyaya kupinda kare. (Mateu 24:7, 11, 12, 14; Luka 21:11) Wari tiri kuvetera ngo cidaka-daka mukuvo waanozoviya Jesu no kukwanirisa cidisiso ca Baba wake.—Marco 13:26, 27.

4. (a) Tingathembesa kudini kuti Jesu wari woiziva njiku inozoitika Harmagedhoni? (b) Pikija kuti atizvizivi kuti dambujiko guru rinozotanga rini, tingava no gwinyiso renyi?

⁴ Potinoenda ku gungano ro mutundhu, tinoziva nguva inozotanga divi rimwe na rimwe. Asi, zvinonesa maningi kuziva kamare kuti dambujiko guru rinozotanga rini. Paaenga pasi pano, Jesu wakati: “Njiku no nguva apana anobziziva, nokuti ngirozi jo mugore. Anobziziva ndi Baba.” (Mateu 24:36) Hina, zvecivoneka kuti Jesu ndiena anozotungamirira hondo yo Harmagedhoni, zvingaita kuti iyena ari kuzviziva kuti hondo iyo inozotanga rini. Asi, itusu atito taziva njiku kana nguva inozoviya magumo. Ngo iyo ndava kuti zvinosisira maningi kotiri kuti tigare takarinda. Jehovha wakagaja kamare kuti dambujiko guru rinozotanga rini, zve panjiku imwe na imwe riri kukhwedera maningi phedo. ‘Arizononoki’! (Verenganyi Habakuki 2:1-3.) Tingava kudini no gwinyiso nazvo?

5. Ipanyi muezaniso unotatija kuti zviphorofita zva Jehovha zvaikwanirisika nguva jese zvaikwanirisika pa nguva kwayo kamare.

⁵ Zviphorofita zva Jehovha zvaikwanirisika nguva jese pa nguveyo kamare! Inga muezaniso, rangarijanyi ngo njiku yaakasujunura vandhu vake kubva Ejipita. Maenga mu njiku 14 ya Nisani yo gore ro 1513 Kristu acito waviya. Mosi wakazotara ngo pamusoro po njiku yondhoyo kudari: “Ngo njikuyo yokupejisira yo mazana marongomuna na makumatatu o makore, bzikwata bza [Jehovha]  Mwari bzakabuda mu nyika yo Ejipiti.” (Exodo 12:40-42) Mu njiku 14 ya Nisani yo gore ro 1513 Kristu acito waviya, 430 o makore vaIziraeri vacito vasujunuhwa, Jehovha wakagondesa kuti waizokomborera mubarihwana wa Abhirahama, zvondhozvo zvakaitika. (VaGalàsia 3:17, 18) Nguva imweni, Jehovha wakazobvunja Abhirahama kudari: “Zivai kuti vana vako vanozogara mu nyika yo vahedeni, iciripi yavo. Kondhoyo vanozoitwa varanda no kupfinyirihwa, pa mazana marongomuna o makore.” (Genesi 15:13; Maitiro o Vapostori 7:6) 400 o makore akatanga mu gore ro 1913 Kristu acito waviya, Ishumaeri paakatanga kushaisha kutaja Izaki. Akazopera pa njiku yaakazosujunura ndiyona Jehovha va Iziraeri kubva mu Ejipita. (Genesi 21:8-10; VaGalàsia 4:22-29) Hina, Jehovha wakagaja njiku iyona kamare yaaizosujunura ndiyona vandhu, pacina mazana o makore zvicito zvaitika!

6. Ngenyi tingava no gwinyiso rokuti Jehovha anozoponesadi vandhu vake?

⁶ Joshua waenga umwe wo vaIziraeri vakasujunuhwa mu kubva mu Ejipita. Nopakhirira makore mazinji wakazoceuja vandhu kudari: “Zivanyi ngo mwoyo yenyu yese no ngo mwiha yenyu yese kuti bzigondiso bzese bzaakamuitira [Jehovha] Mwari wenyu, bzakatevejwa bzese; apana cakaposa.” (Joxwa 23:2, 14) Jehovha wakagondesa kuponesa vandhu vake pa dambujiko guru no kuvapa upenyu hucikaperi mu nyika imbza. Zve itusu tingava no gwinyiso kuti cigondiso cake ico cicazoitikadi kamare. Kudari tinoda kuzova mu nyika imbza yondhoyo, tinodikana kugara takarinda.

7, 8. (a) Ngorapi raenga basa ro varindiri mu nguva jo kare, zve izvo zvinotijijisa cijijo capi? (b) Ipanyi muezaniso wo zvingaitika varindiri povanovata pa basa.

⁷ Tingajija cijijo ngo varindiri vaingwaririra madhorobha mu nguva jo kare. Madhorobha mazinji, kubatanija no Jerusarema, aitendenejwa ngo mufimbiji jakareba kuitira kuti vavengi vakonehwe kunghwina mukati mo dhorobha. Varindiri vaiima ngo nyezuru ko mufimbiji iji, ngo pondhopo, vaizokwanisa kuvona musanga wo mudhorobhemo mwese. Varindiri vamweni vaiima ngo pamusuvo mukuru jo dhorobha. Vandhu avo vaigara vakarinda usiku no masikati, kudari vakavona kuti vavengi vari kuviya, waingwaja vandhu vari mu dhorobha. (Isaia 62:6) Ivona vaiziva kusisira ko kuramba vakamuka no kusotesesa ushoni zvaikhirira kana zvaiitika. Kudari no vacairindirepi, vandhu vazinji vaizofa.—Ezekieli 33:6.

⁸ Josefo, uwo wakatara ngo ndhorondho yo vaJudha, wakasanangura kuti vaRoma vakakwanisisa kudini kunghwina mu Jerusarema mu gore ro 70 Kristu naaviya. Varindiri vaingwarira divi ro dhorobha vaenga vakavata. Inga muviyo, masoca o vaRoma akakwanisa kunghwina mu dhorobha. Ivona vakaenda ku temberi, voipisa ngo muriro, vophwanya-phwanya Jerusarema rese. Iro rakava divi ro kupejisira ro dambujiko guru maningi ro matambujiko ese akawanana no jinja ro vaJudha.

9. Vandhu vazinji nyamasi uno avazwisisi cinyi?

⁹ Utongi huzinji nyamasi uno hunongwarira mu mugano mo nyika yaho ngo masoca no zvokujivira ndizvona zvakaumbwa ngo uzivi hwo siensia wa wari. Utongi uhu hunovonerera  ariwese kana ciricese cinodira pa ngozi kujiviririka ko nyika yahwo. Asi ihona ahuzvizivi kuti kumatenga kuna utongi huna simba maningi hunotongwa ndi Jesu Kristu. Utongi uhu hucazoita hondo sasambi kuhwisana no umambo hwese hwo panyika. (Isaia 9:5, 6; 56:10; Danieli 2:44) Tinovetera ngo cidaka-daka cese kuti njiku iyi igume zve tinoda kuva takainasiririra. Ngokudaro, tinoteya njeve ciphorofeti co Bhaibheri no kuramba ticishandira Jehovha no takagondeka.—Nduyo 130:6.

10, 11. (a) Tinodikana kungwarirenyi, zve ngenyi? (b) Icinyi cinomukhohwesa kuti Dhiabhu ari kukwevejera vandhu kuti vareruse ciphorofeti co Bhaibheri?

¹⁰ Rangariranyi murindiri wapeja usiku hwese wakamuka. Pa nguva nganani jo kupejisira jo kurindira kwake, zvinomunesera maningi kuti arambe wakamuka ngokuti waremba maningi. Mu njira yakafanana, tiri kurarama mu njiku jo kupejisira jo nyika ino. Zve tiri kuguma ku magumo, anozonesa maningi kotiri kuti tirambe takamuka. Zvaizova zvinosuruvarisa kudari tikatama kugara takarinda! Ngatende tibhuye ngo zviro zvitatu zvingaita kuti titame kuramba takamuka.

¹¹ Dhiabhu anocengeja vandhu. Iyena ndi “mambo wo nyika” ino. Jesu naa phedo kuti afe, wakaceuja katatu vajiji vake ngo cokwadi ici. (Johani 12:31; 14:30; 16:11) Dhiabhu anoshandisa ciara co kunyepa kuti acengeje vandhu. Ngo ndava yondhoyo inoitisa kuti vazinji nyamasi uno vareruse zviphorofita zvo Bhaibheri zvinotatija pambhene kuti magumo o nyika ino aaphedo kamare. (Sofonia 1:14) Zvakajeka kuti “vacikatendi, . . . vakadihwa cidima mumusoro” ndi Sathana. (2 VaKorinto 4:3-6) Inga muviyo, potinoeja kuvabvunja kuti magumo o nyika ino aaphedo zve Kristu ari kutonga, vazinji vakona vanoramba kupurukira. Kazinji vanonanga kuti, “andizvidakariri.”

12. Ngenyi atidikani kutendera kuti Dhiabhu aticengeje?

¹² Pikija vazinji avadakariri zviphorofita zvo Bhaibheri, atidikani kutendera kuti mugariro wavo utirembese. Itusu tinoziva kuti ngenyi zvinosisira kugara  takarinda. Pauro wakabvunja hama jake kudari: “Munobziziva uxoni kuti njiku ya [Jehovha] inozoguma.” Wakanyengejera kudari: “Inga magumiro o inoita mbava, usiku.” (Verenganyi 1 VaTesalònika 5:1-6.) Jesu wakatingwaja kudari: “Garanyi makanasirika, ngokuti ngo ngari yo mucingaveteri ngo yaanozoguma Mwana wo mundhu.” (Luka 12:39, 40) Sathana sasambi anozocengeja vandhu ngo kuvaita kuti varangarire kuti munyika muna “kunyarara no kugarisika.” Perepo, njiku ya Jehovha inozoguma ngo cibvumbu, zve ivona vanozokanjamuswa. Tingativo kudini ndisu? Kudari tinoda kuva vakanasiririra njiku yondhoyo no kutama kucengejwa kudari ngo zvinoitwavo vamweni, “ngatirinde no kujibata.” Ngo iyo ndava tinodikana kuverenga Soko ra Mwari njiku jese no kurangarijisisa zvaanotibvunja Jehovha.

13. Mujimu wo nyika uri kupsasisa kudini mushovo wese wo vandhu, zve tingatizisa kudini ngozi jo kukwevejehwa uku?

¹³ Mujimu wo nyika unokwevejera marangaririro o vandhu. Vazinji nyamasi uno vanojizwa kuti avana dikano yokuti vazive Mwari. (Mateu 5:3) Kunja kwa izvi, ivona vanoshandisa nguva yavo zinji no simba ravo kuti vawane mare no zviro zvo nyika. (1 Johani 2:16) Cimwenizve ngo co kuti wari, kwaano mubungaijo jakawanda, kupinda kareko, jinovakwevejera no kuvavangisa kuti vade kudakajihwa no kugutisa zvido zvavo. (2 Timoti 3:4) Zviro izvi zvinokangaija vandhu kuti vacabatikana pa zviro zvinosisira maningi, zve avarangariri ngo pamusoro po ushamwari hwavo na Mwari. Ngo iyo ndava kuti Pauro wakaceukija maKristu kuti aidikana “kumuka mu hope” ngo kutama kusotesa upenyu hwavo pa kugutisa zvido zvao.—VaRoma 13:11-14.

14. I ngwajo yapi yotinowana pa Luka 21:34, 35?

¹⁴ Itusu tinoda kuti mujimu wa Mwari ukwevejere marangaririro edu, kuciripi mujimu wo nyika. Jehovha ari kutibesera ngo mujimu wake kuti tizwisise zvakajeka kuti zvicinyi zviri kuda kuitika. (1 VaKorinto 2:12) ^[1] (Vonanyi masoko o kupejisira.) Asi tinodikana kungwarira. Pikija zvatinoita pa upenyu hwo njiku ngo njiku zvingatikangaija pa kushandira Jehovha. (Verenganyi Luka 21:34, 35.) Vamweni vangatibvunja kuti tiri marethe ngo kutenda kuti tiri kurarama mu njiku jo kupejisira jo nyika ino. (2 Pedru 3:3-7) Atibviri kutendera kuti vatirembese. Itusu tina citatijo cakajeka cokuti magumo ari kuguma sasambi. Kudari tinoda kuti mujimu wa Mwari utikwevejere, tinodikana kuenda kosonganira nguva jese no hama jedu.

15. Zvicinyi zvakaitikira Pedhru, Jakobe na Johani, zve zvingatiikiravo kudini?

¹⁵ Marembo edu anoita kuti zvinese kugara takangwara. Jesu waizwisisa kuti vandhu avazivi kukwana zve vakaremba. Rangariranyi ngo zvakaitika pa usiku hwaenga acito wafa. Pikija Jesu waenga wakakwana, waizviziva kuti waidikana kuita mukumbiro kuna Baba wake vamubesere kuti arambe wakagondeka kwavari.  Jesu wakakumbira vapostori Pedhru, Jakobe na Johani kuti varambe vakamuka paaiita mukumbiro. Asi vapostori avacaizviziva kuti kuramba vakamuka kwaisisira zvakadini kovari. Ivona vaenga varemba, zve vaida kuvata. Jesu waengavo waremba, asi wakaramba wakamuka no kuita mukumbiro kuna Baba wake. Vapostori vaidikanavo kuita mukumbiro pa mukuvo wondhowo.—Marco 14:32-41.

16. Kuzwirana na Luka 21:36, Jesu wakatijijisisa kudini kuti titigare ‘takarinda’?

¹⁶ Icinyi cinozotibesera kuti ‘tirinde mukuvo wese’ no kugara takanasiririka kuitira njiku ya Jehovha? Tinodikana kuva no cido cakavanga co kuramba ticiita zvakanaka. Asi izvo azvikwani. Njiku nganani Jesu acito wafa, wakabvunja vajiji vake kuti vaidikana kuramba vaciita mukumbiro kuna Jehovha kuti avabesere. (Verenganyi Luka 21:36.) Kuti tirambe takarinda mu mukuvo uno vo kupejisira, tinodikanavo kuita mukumbiro kuna Jehovha ticikaregeri.—1 Pedru 4:7.

17. Tingavisa kudini no gwinyiso rokuti takanasiririkadi kuitira zviri kuzari sasambi uno?

¹⁷ Jesu wakananga kuti magumo anozoguma ‘ngo nguva yo mucingaveteri.’ (Mateu 24:44) Ngo iyo ndava kuti tinodikana kuva takanasirira pa mukuvo wese. Wari asipizve nguva yokuti tieja kuva no mararamiro anonangwa ngo nyika ya Sathana kuti ngaanoviisa mudakaro. Uku kungatova kurotavo hako. Kunja kwa izvi, Jehovha na Jesu vakatibvunja ngo Bhaibheri kuti tingagarisa kudini takarinda. Waro, ngatipurukire zviphorofita zvo Bhaibheri no makwanirisikiro o zviri kuita. Dangani tingakhwedera phedo na Jehovha no kudira Umambo pa kutanga mu upenyu hwedu. Ngokudaro, tinozova vakanasiririka panozoviya magumo. (Apokalipsi 22:20) Upenyu hwedu honofira pa zvondhozvo!