RANGARIRANYI kuti muri kufamba pakati po usiku. Ngo cibvumbu movona kuti kuna mundhu ari kumutevera. Pomunoima, iyena woimavo. Pomunofambisira, iyena wofambisiravo. Motanga kugogoma kuenda ku nyumba yo shamwari yenyu iri phedo. Shamwari yenyu poinomuashira no kumunghwinisa mumba, masujunuka ngokuti muri kuziva kuti mangwaririka.

Kangaije amuzivi kuwanana no mugariro wanangwari panyezuru apa. Asi zvingaita kuti muno zviri kumuita kuti muthimwe-thimwe mu upenyu hwenyu. Inga muezaniso, muri kuhwisana no marembo o maizoda kumanyisa asi muri kuramba mucindoitazve kuposa kondhoko? Maana nguva yakareba no mabuda basa zve amuripi kuwana rimweni pikija pikija mecivangisira kupsaka basa rimweni here? Muri kuthya ngo pamusoro po kuita musharuka no kuhwisana no zvineso zvo uhomi kumbejiyo here? Kana pana ciro cimweni ciri kumukayakayisa?

Pikija cineso cakadini comungawanana naco, zvakanaka kuva no shamwari yomunobvunja kuthya kwenyu no inoda kumubesera. Munayo shamwari yo phedo yakadaro here? Hina, munayo! Jehovha wakaita inga shamwari komuri, kudari ngo zvaenga kuna mugondeki Abhirahama, inga zvinonangwa pa Isaia 41:8-13. Pa mavhesi 10 no 13, Jehovha wakapikira umwe na umwe wedu kudari: “Ucathya, ngokuti ndinewe, ucatetemera, ngokuti ndiri Mwari wako; ndinokuvangisa, hina, ndokubesa, ndokuimisa ngo mukono wangu wo muho unoruramisa. Ngo bzokadi, inini, Tenji, Mwari wako, ndinozokubata ngo nyara yako yo muho, ndozokubvunja kuti: ‘Ucathya, inini ndinokubesa.’”

Masoko a Jehovha anoembejera maningi. Ejanyi kurangarija zvaari kutipikira kamare Jehovha. Vhesi iyi ainangi kuti muri kufamba pamutivi pa Jehovha no makabata nyara yakanaka. Kudari maifamba pamutivi pake, mukono muho wa Jehovha waizobata mukono boshwe wenyu. Kunja kwa izvi, Jehovha anotambanuja “mukono [wake] wo muho unoruramisa” wobata “nyara yako yo muho,” inga waizomukweva kubva pa mugariro unonesa. Jehovha paanobata mukono muho wenyu, iyena anomuvangisa ngo kumubvunja kudari: “Ucathya, inini ndinokubesa.”

Munovona Jehovha inga Baba wenyu vana rudo no Shamwari here? Munotenda kuti anozomubesa pomunowanana no zvineso here? Jehovha anomutaja kamare zve anoda kumubesera. Pomunova no zvineso no matambujiko, Jehovha anoda kuti muzwe kungwaririka. Ngenyi? Ngokuti anomudanyi maningi. Iyena “anotibesa ngo kukasika pa nyatwa” kamare.—Nduyo 46:2.

Vamweni vanogara vacirangarira zvovakaposa kare vacida kuziva kuti Mwari wavaregereradi  kana kuti haiwa. Kudari munojizwa kudaro, rangariranyi ngo mugondeki Jobe. Iyena wakatenda kuti waishaisha paaenga aciri mujaha. (Jobe 13:26) Mutari wo nduyo Dhavhidhi waijizwavo kuti ana ndava zve wokumbira kuna Jehovha kudari: “Mucacereceja bzokuposa bzo ujaha hwangu.” (Nduyo 25:7) Ngokuti atizivi kukwana, tese ‘takaxaixa, tokonehwa goja ra Mwari.’—VaRoma 3:23.

Masoko anoembejera ari pa Isaia cipauko 41 akatarihwa vaIziraeri. Zvishaishi zvavo zvaikura zvokuti Jehovha wakananga kuti waizovapanica ngo kuvaitisa shoko ku Bhabhironi. (Isaia 39:6, 7) Pa mukuvo wondhowo, Mwari wakapikira kuti waizosujunura mu ushoko vaya vaizokhauya no kuhwirira kwaari! (Isaia 41:8, 9; 49:8) Jehovha anotatija rudo hwakadarovo no unyasha ku vaya vanotatija kukhauya ngo mwoyo wese no vanoda kumudakajisa.—Nduyo 51:3.

Vonanyi zvakaitikira Takuya, * uwo waieja kunyisa zvirovejeso zvakasvipa zvo kuvona zvoumitu-umitu no kuita cinyamundundu. Kazinji ecinyiswa ngo cirovejeso cake. Waijizwa kudini? “Ndaijizwa kuti andishandi ciricese, asi pondakaita mukumbiro kuna Jehovha ndicikumbira kuti andiregerere, iyena waizondiboja kubva pa mugariro wangu wo kuwa.” Jehovha wakazviitisa kudini zvondhozvo? Vakuru vo mu ungano ya Takuya vakamubvunja kuti avafonere pa nguva iri yese yaiizoitazve cirovejeso cakeco. Iyena wakati: “Azvicairerukepi kuvafonera, asi pondaivafonera, ndaivangiswa.” Perepo vakuru vakaita nasiriro kuti muvonereri wo ndharaundha abvakacire Takuya. Muvonereri wo ndharaundha wakamubvunja kudari: “Azvizivi kuitika zvoga kuti ndiviye pano. Ndiri pano ngokuti vakuru waida kuti ndive pano. Ivona vakheta kuti tibvakacire iwewe.” Takuya wakati: “Inini ndaenga mushaishi, asi Jehovha, acishandisa vakuru, wakandibesera.” Pakupejisira, Takuya wakazoregera zvirovejo zvake zvakashata, wova mupiyona wo nguva jese, zve wari ari kushandira ku hofisi yo cine. Kudari ngo zvaakabeserari hama iyi, Mwari anoda kumubesera pomunoposa.

Vamweni vanojizwa kukaya-kaya ngokuti vakaruza basa ravo zve avacakwanisi kuwana rimweni. Rangariranyi kuti i cineso cakadini kurambihwa kubata pa basa no mabvazve kurambihwa pa basa rimweni. Vamweni potinowanana no mugariro uu unonesari, vanojizwa kuti avashandi ciri cese. Jehovha angamubeseresa kudini? Jehovha aangamupi pondhopo no pondhopo basa raushoni, asi angamubesera kuti murangarije masoko a Dhavhidhi okuti: “Kubvira udoko, mbhera uharahwa hwangu andizivi kuvona mururami wakasiiwa, nokuti vana vake vecipembha bzokuha.” (Nduyo 37:25) Jehovha anomuvonanyi inga muna mutengo mukuru, zve anomupa “mukono [wake] wo muho unoruramisa” kuitira kuti muwane zvomunoda kuti murambe mucimushandira.

Sara, anoraramira ku Korombia, wakavona makwanisiro aakaita Jehovha kumubesera. Iyena waiwana mare zinji acishanda mangwanani no madeko pa koponi yaizivika no kureremejwa maningi. Asi Sara waida kuita zvizinji mu basa ra Jehovha, ngokudaro wakaregera basa rake wotanga kuita upiyona. Asi, zvaimunesera kuwana basa ricikabatwi mangwanani no madeko raaida. Iyena wakaita  cirojha co kutengesa sorvheti asi padoko ngo padoko mare yake yakapera, wofunga nyagoso yake. Iyena wakati, “pakapera makore matatu, asi ndinobonga kuna Jehovha, ngokuti ndakakwanisa kucungirira.” Sara wakaziva zviro zvaaidisisa kamare no majiviririro aaizoita kukaya-kaya ngo pamusoro po njiku yo mangwana. (Mateu 6:33, 34) Pakupejisira, patarau wake vokare vakamudanija vomubvunja kuti abatezve basa raaibataya kare. Sara wakananga kuti waizodavira kushanda kudari vakamutendera kushanda mangwanani kana madeko basi, zve kudari vaizomutendera kukama kushanda woenda kumusongano, ku magungano o ndharaundha no magungano o mutundhu. Nyamasi uno, Sara aaripizve kuwana mare kudari ngo zvaaiiwana kare, asi ari kukwanisa kuenderera mberi aciita upiyona. Iyena wakananga kuti pa mukuvo uwo unonesa, waizwa nyara yo rudo ya Jehovha.

Vazinji vanojizwa kukaya-kaya ngokuti vari kuita musharuka zve sasambi vanozoregera kubata basa. Ivona vanoda kuziva kudari vanozova no mare kuti vararame zvaushoni. Ivona vanothya ngo pamusoro zvineso zvo uhomi zvovangazowanana nazvo kumbejiyo. Izvo kangaije ngo iyo ndava Mambo Dhavidhi wakakumbira kuna Jehovha kudari: “Mucandiramba mu mukuvo wo uharahwa hwangu, mucandisia apo simba rangu rikapera.”—Nduyo 71:9, 18.

Vasharuka vangathembesa kudini ngo pamusoro po kumbeji? Vanodikana kuramba vacivangisa gonda ravo kuna Mwari no kugonda kuti iyena anozovapa zvese zvovanoda. Asi, vamweni vainga no zviro zvo mutengo mukuru povaenga no mare yakawanda, ngokudaro, vangatodikana kujija kurarama upenyu hwakareruka no kukwana ngo zvishoma zvovanazvo. Ivona kangaije vangazwisisa kuti kuha “ndiro yo murivo wo masakani” kungapinda maningi kunaka ku upenyu hwavo kuciripi kuha ‘nʼgombe yakakora’! (Mazwi Akangwara 15:17) Kudari mukabatikana pa kushandira Jehovha, anozova no gwinyiso rokuti munazvo zvese zvomunoda pomunonga maamusharuka.

Rangariranyi ndi José na Rose, wakashandira Jehovha mu nguva yakazara ko makore anodarika 65. Pa mukuvo wondhowo, vakasongana no zvineso zvizinji. Ivona vaikorondha baba wa Rose, ngokuti vaida besero usiku no masikati. José waidikanazve kucungirira kuoperahwi kanseri no kurapwa. Jehovha wakapekejesa kudini mukono kuho wake ku varovorani vokugondeka ava? Iyena wakashandisa varovorani vamweni vo ciKristu, Tony na Wendy. Ivona vaenga no nyumba yovaida kupekeja mapiyona aya o nguva yakazara vacikavapagarisi. Tony wairangarira kuti paaenga mu painga ecijija ku cikora cikuru, waisota pa jhanera acivona José na Rose vacicumaira mu nguva jese. Tony waidakarira maningi kuvangisira kuvangisira kwavo, zve kwamushamaisa maningi. Ngokuti José na Rose vakapeja upenyu hwavo hwese vacishandira Jehovha, Tony na Wendy vakavapa nyumba. Pa makore 15 aperari, vaibesera José na Rose, avo vaano makore 85 o ndanga. José na Rose vanovona kuti Tony na Wendy i cipo cinobva kuna Jehovha kovari.

Jehovha ari kumupikira kudari: “Ucathya, inini ndinokubesa.” Iyena ari kumupekejavo “mukono [wake] wo muho unoruramisa.” Munozomubata ngo nyara yenyu?