NDHOROVONDHO YO UPENYU
Kuva no Mandondo Akuzivi Kundiphingaija Kujijisa Vamwen
Ndakabhabhatijwa mu gore ro 1941, pandainga no 12 o makore o kubahwa. Asi ndaijizwa ndicito. Mbhera mu gore ro 1946 pandakazozwisisa cokwadi co Bhaibheri. Ngenyi ndiri kunanga kudaro? Ndiri kuda kumuverengera ndhorovondho yangu.
MU MAKORE o 1910, vabari vangu vakacinja kubva ku Tbilisi, Georgia, kwenda ku Kanadhaa, vairaramira mu cinyumba cainga mu farma ku Pelly, Saskatchewan, ku mavira zuva ko Kanadhaa. Ndakabahwa mu gore ro 1928, zve ndainga cigumaura pa vana vavo vatandhatu. Pandainga no mweji mutandhatu jo kubahwa baba vakatamika, tevere mai vakatamikavo vondisiya ndiri mudoko kamare. Papera nguva shomani, yayangu va Lucy vakatamikavo no 17 ro makore o kubahwa. Ngo kudaro, cekuru Niky, vainga hama ya mai, vakatitora kogara nesu.
Njiku imweni, pandainga ndecitanga kufamba kamare, vokanyiyo vakandivona ndecikakatira murenje haci yo kanyio. Ivona vakathya kuti haci iya yaizondicwanya, ngo kudaro vakakhuwa vecindirambija. Ndainga ndakavafuratira, andizivi kutozwa kukuwa kovaiitaya. Zvinodakajisa ngo zvo kuti andizivi kukhuvazika. Asi apo ndipona pakafumbhura ukama hwangu kuti ndainga no mandondo.
Umwe wainga shamwari yo ukama hwedu wakapa zano ro kuti zvainga zviri nani kundinghwinisa mu cikora co vano mandondo. Ngo zvakaita cekutu Nick. Vakandiendesa ku cikora co vano mandondo, ku Saskatchewan. Cikora ici cainga ndhambo no ku muzi, ngo kudaro ndakathya maningi ngo kuti ndainga no makore mashanu basi o kubahwa. Ndaienda ku muzi mu maferia no mu cirimo basi. Ndakazokwanisavo kuziva ndumi yo kuvereketa ngo nyara, zve ndainga ndokwanisa kutamba no vana vamweni.
NDAKAJIJA COKWADI CO BHAIBHERI
Mu gore ro 1939, yayangu va Marion vakarovohwa mbha Bill Danylchuck, pasure pazvo vakatora inini no hambzaji yangu Frances, kogara nesu. Yaya na mwaramu ngovakatanga kujija no Zvapupu zva Jehovha. Pandaiviya kubva ku cikora mu cirimo, ivona vaiyeja ngo manera ese kundibvunjavo zvavaijiswa kubva mu Bhaibheri. Zvainesa maningi kuti tibhuisane ngokuti avacaiziva ndumi yo kuvereketa ngo nyara. Asi vaikwanisa kuzwisisa kuti ndaidakarira maningi zvavaindijijisa ngo pamusoro pa Jehovha. Ndakazwisisa kuti zvavaiita zvainga zvakabatana no zvainanga Bhaibheri, ngo kudaro ndakatanga kwenda navo kocumaera. Pasure pazvo ndakada kubhabhatijwa, zve pa njiku 5 ya Cikumiyana wo 1941 mwaramu vaBill vakandibhabhatija, mu zibhokiso ro simbi raizara ngo kumwa yo mu sime, yaitondhora zvo kuti izanyi muzozwa!
Pandainga pamwepo no cikwata co vandhu vo mandondo, pa gungano ku Cleveland, Ohio, mu gore ro 1946
Mu gore ro 1946, pandakahwirira ku muzi mu cirimo, takaenda ku gungango ro mutundhu ku Cleveland, Ohio, Estadhos Unidhos. Pa njiku yo kutanga yo gungano, hambzaji yangu yaiinditarira zvainangwa pa gunganopo, kuti ndikwanise kuteverera urongwa. Asi pa njiku yo cipiri, ndakadara maningi ngo kuziva kuti pa gunganopo painga no cikwata co ndumi yo kuvereketa ngo nyara cainga no muturukiri. Apo waro, ndaikwanisa kuzwa zvese zvaibhuya pa urongwa hwo gungano zve ndipona pandakatanga kuzwisisa zvakajeka jijiso jo Bhaibheri!
KUJIJISA COKWADI
Mu nguva yondhoyo, Hondo yo Cipiri yo Nyika Yese yainga yecibva kupera, zve vandhu vaidisisa maningi kukhombija kuti vaigondeka ku nyika yavo. Asi pandakabva ku gungano kuti ndihwirire ku cikora, ndainga ndakasunga kuramba ndakagondeka kuna Jehovha. Ngo kudaro, ndakasiya kutora rutivi pakukuja bandera, pa kuimba ino nasionari, no cereceja feriadho. Ndakasiyazve kwenda ku gerejha no vadoni vangu vo kucikora. Vo pacikorepo avazivi kudakara ndizvona, ngo kudaro vakatanga kundishora no kundinyepera kuti ndicinje murangariro wangu. Vajiji doni vangu vaizvivona zvaiitikaro zve izvi zvakandipa mukana jakawanda jo kuvacumaera. Vamweni vavo vakadari inga Larry Androsoff, Norman Dittrick na Emil Schneider, vakazogumisira ngo kunghwina mu cokwadi, zve vaciri kushandira Jehovha.
Pandaibvakacira madhorobha amweni, nguva jese ndaiita simba kuti ndicumaere vano mandondo. Inga muezaniso, ku Montereal, ndakaenda pa ndau imweni yaiungana vandhu vano mandondo. Pondhopo ndakacumaera mufana umwe wainga mu cikwata co mabhandidhu, waizwi Eddie Tager. Mbhera kufa kwake gore raperari, wainga mu ungano yo vanovereketa ngo nyara yo ku, Kebheki. Ndakabhuyazve no mufana umweni waizwi Juan Ardanez. Mukufanana no vaBhereya vo kare, iyena wakapsakisisa kuitira kuva no cokwadi co kuti zvaaijijaro zvainga zvakacijikiradi mu Bhaibheri kana kuti haiwa. (Maitiro o Vapostori 17:10, 11) Wakazogumavo pa kunghwina mu cokwadi, wozoguma pa kuva mukuru wo ungano ku Ottawa, Ontario, mbhera pa kufa kwake.
Ndecipa ucapupu mu citaka ku matangiro ko makore o 1950
Mu gore 1950, ndakacinja kwenda ku Vancouver. Pikija ndaida maningi kucumaera vandhu vo mandondo, andikanganwi zvandakasongana nazvo pandakacumaera umwe mwanakaji acainga no mandondo waidanijwa Chris Spicer, mu citaka. Iyena wakatendera kuashira marevhista nguva jese, zve ndaida kusongana no mwanuma wake waizwi Gary. Ndakaguma pa muzi pavo, ndobhuya navo ko nguva yakareba ngo kuita ngo kutarirana zvimaphepha. Kubvira pondopo atizivi
kuzosonanganazve. So ndakazoita ngo kukahamara pavakaviya kuzondicungamija ku gungano ku Toronto, Ontario. Gary wainga abhabhatijwa pa njiku yondhoyo kamare. Ciitiko ici cakandiceukija kuti, tinodikana kuramba tecicumaera, ngokuti ativizi dangani ari wese watinocumaera anozogumisira ngo kuviya mu cokwadi kana kuti haiwa.Pa kufamba ko nguva, ndakahwirira ku Saskatoon. Kondhono ndakaziva mwanakaji umweni wakandikumbira kuti ndijije no vana vake vokaji vainga manyambiri, umwe waizwi Jean Rothenberger umweni Joan Rothenberger. Vaijija ku cikora co ndumi yo kuvereketa ngo nyara kwiyana kwandakajijayavo. Ngo nguva shomani vasikane vayani vakatanga kubvunja vajiji doni vavo ngo pamusoro po zvavaijija. Inga muviyo, vajijidoni vavo vashanu vakaguma pakuva Zvapupu zva Jehovha. Umwe wavo wainga Eunice Colin. Ndakaziva Eunice mugore randaipejisa cikora co vanovereketa ngo nyara. Pa mukuvo wondhowo, iyena wakandipa suwithi, wondikumbira kuva shamwari yake. Iyena wakava divi rinosisira mu upenyu hwangu. Wakava mukaji wangu!
Na Eunice mu gore ro 1960 zve 1989
Make Eunice pavafumbhura kuti iyena wainga ecijija Bhaibheri, vakakumbira mutungamiriri wo cikora kuti amukhohwese kuti asiye. Mutungamiriri wondhowo wakaeja kuita zvese, waitomutorera mabhuku aaishandisa pa jijoyo. Asi Eunice wainga wakatema civaringo co kuramba akagondeka kuna Jehovha. Paakananga kuti waida kubhabhatijwa, vabari vake vakamudavira kudari: “Ivai Capupu, wopeja wobva pamuzi pano!” Ngo kudaro paainga no 17 ro makore o kubahwa, wakabuda pa muzi woenda korarama no mbhuri imweni yainga Zvapupu. Wakaenderera mberi ecijija Bhaibheri wozobhabhatijwa. Patakaita mucadho mu gore ro 1960, vabari vake avazivi kuviya pa mucadho wedu. Asi makore paiinga ecidarika, vakatanga kutireremeja ngo ndava yo zvataitenda no makujire ataiita vana vedu.
JEHOVHA WAKANDIKORONDHA
Mwana wangu Nicholas no mukaji wake, Deborah, vari kushandira pa Bheteri ro Rondoni
Ngo kuva kwedu no mandondo, zvainesa kwatiri kurera vana vacina mandondo. Asi, takavajijisa ndumi yo kuvereketa ngo nyara kuti tikwanise kubhuya ushoni navo tecitovajijisa cokwadi. Hama no hambzaji mu ungano jakatibesera maningi. Inga muezaso, umwe mubari wakatitarira ciphepha ecitibvunja kuti mwana wedu wainga ecivereketa zvicikashandi mu Nyumba yo Umambo. Takakwanisa kumubesera ciriporipoco. Vana vedu varongomuna—James, Jerry, Nicholas zve Steven—ndi vakuru zve vari kushandira Jehovha vakagondeka no mbhuri javo. Zve Nicholas no mukaji wake, Deborah vari kubesera pa kusanduja ndumi yo kuvereketa ngo nyara ku hofise yo cine ku Gra-Bretanya, zve Steven no mujimai wake Shannan, vari kutora divi pa cikwata co kusanduja ku hofise yo cine ku Estadhos Unidhos.
Vana vangu James, Jerry, na Steven no vakaji vavo vari kubesera basa ro kucumaera ngo ndumi yo kuvereketa ngo nyara mu njira jakasiyana-siyana
Zvinorusuruvarisa ngo zvo kuti, pacisara mweji umwe kuti ticereceje 40 o makore, Eunce wakatamika ngo ndava yo kanser. Pa mukuvo uwo wo kunesa, gonda rake ngo pamusoro po rumuko kwakamuita kuti arambe akavanga. Ndiri kuvetera no cido cese njiku yandinozomuvonazve.
Faye na James, Jerry na Evelyn, Shannan na Steven
Nduyo 10:14) Ndinobonga maningi kuno vese vaya vaibhuya neni ngo kutara zviphepha, kujijira ndumi yo kuvereketa ngo nyara, zve kubesera kuturukira zvaibhuiwaya kuti ndizwevo.
Mu mweji wa Musekwa wo 2012, ndakawa ndogurika mbhata. Ngo kudaro, ndainga ndoda kubeswa ngo iyo ndava ndakaenda kopona no mwana wangu no mukaji wake. Wari tiri mu ungano yo Ndumi yo Kuvereketa ngo Nyara yo Kalgari, kwandiciri kushandira inga mukuru. Kunasa kunanga, iyi i bvaza yo kutanga kamare mu upenyu kuva mu ungano yo ndumi yo kuvereketa ngo nyara. Waro ndaitisa kudini kuti ndirambe ndino ushamwari hwakavanga na Jehovha ko makore ese andaingaya mu ungano yo Cingezi? Jehovha wakandibesa. Iyena wakakwanirisa cigondisa cake co kukorondha vana vacina baba. (Ndiri pa cikora co mapiyona cakaitwa mu ndumi yo kuveretera ngo nyara no makore 79 o kubahwa
Kwainga no nguva jo kuti andicaikwanisa kuzwisisa zvainga zvecibhuiwa kana nguva yandaivona kuti apana ari kukwanisa kundibesera. Pa mukuvo wakadaro ndaicamwa ndoda kuramwija, asi ndairangarira magama a Pedhru kuna Jesu o kuti: “Tingazoenda kwaani, Tenji? Imwimwi muno mazwi o uhomi hucingaperi.” (Johani 6:66-68) Mukufanana no hama kana hambzaji jimweni jino mandondo, jaano nguva yakareba mu cokwadi, ndakajijiravo kuva mundhu anosengerera. Ndakajija kuthemba Jehovha no sanangano rake, zve kuita kudaro kuri kundiviisira mabesero akawanda maningi. Wari kwaana mabhuku akwanda maningi mu ndumi yangu kamare, zve ndiri kudakara ngo kuti ndinoendavo ku musongano no magungano anoizwa ngo Ndumi yo Kuvereketa ngo Nyara yo Amerika. Zvokadi, ndino upenyu hunodakajisa zve uno cinangwa ngo kushandira Mwari wedu mukuru, Jehovha.