1, 2. (a) Masoko a Jesu ari pa Mateu 24:12 anoshandisihwa kuna iyani? (b) Bhuku ro Maitiro o Vapostori rinotatijisa kudini kuti maKristu mazinji o kutanga akaramba ano rudo hwakavanga? (Vonanyi pikica o kutanga.)

PAAINGA pasi pano, Jesu wakadurujira vandhu citatijo co “kupera ko nyika.” Pakati po zviro zvimweni, Jesu wakanaga kuti “hunozopera rudo hwo vazinji.” (Mateu 24:3, 12) VaJudha vo muzana ro kutanga ro makore vainanga kuti vainga vandhu va Mwari asi vakatendera kuti rudo hwavo hupere kana kutondhora.

² Asi maKristu mazinji o pamukuvo wondhowo ainga no murangariro wakasiana. Iona aicuamaira ngo kuvangisira ‘acitokotesa’ masoko akanaka ngo pamusoro pa Kristu, zve aikhombija rudo kuna Mwari, vatendi doni, zve vaitova no rudo ku vandhu vacito vaziva cokwadi. MaKristu aya akaramba ano rudo hwakavanga kuna Mwari. (Maitiro o Vapostori 2:44-47; 5:42) Asi zvinosuruvarisa ngo zvokuti rudo hwo maKristu amweni o kutanga hwakapera. Tinozvizivisa kudini izvo?

3. Ngozvapi kangaije zvakaitisa kuti rudo hwo maKristu amweni hupere?

 ³ Jesu wakabvunja maKristu airarama ku Efeso kudari: “Wakarega rudo hwako hwokutanga.” (Apokalipsi 2:4) Zvingaita kuti maKristu o ku Efeso aikwevejehwa ngo vandhu vaiatendeneja, vokuti vaida maningi kujidakajisa. (VaEfeso 2:2, 3) Dhorobha ro ku Efeso raikhupuka maningi zve vandhu vemo vaibatikana maningi pa kupsaka upfumi no kugarika. Vazinji mu Efeso vaengazve no mufambiro wakashata zve avacaireremeja mutemo ja Mwari. Ivona vaibatikana maningi ngo kujidakajisa kusiyapo kukhombija rudo hwo kujiramba kuna Mwari no ku vamweni.

4. (a) Rudo huri kuperesavo kudini mu njiku jino? (b) I mativi api matatu otinodikana kuramba tecikhombija rudo hwakavanga?

⁴ Masoko a Jesu ngo pamusoro po kupera ko rudo anoshandavo mu njiku jedu jino. Vandhu nyamasi uno vano rudo padoko maningi na Mwari. Kunja ko kupsaka Mwari kuti apeje zvineso zviri wari mu nyika, mamiriau o vandhu ari kusota zvikwata zvo vandhu kuti zvipeje zvineso izvi. Rudo hwavo huri kuramba hucindopera. Pikija rudo hwo vashandiri va Jehovha hungaperavo, inga zvakaitika mu ungano yo ku Efeso yokare. Ngokudaro, ngatibhuisane ngo mativi matatu otinodikana kuramba tina rudo hwakavanga: (1) rudo kuna Jehovha, (2) rudo ku cokwadi co Bhaibheri, no (3) rudo ku hama jedu.

5. Ngenyi tinodikana kuda Mwari?

⁵ Ndiani wotinodikana kuda maningi? Jesu wakati: “Unozodisa Tenji Mwari wako, ngo mwoyo wako wese, ngo mwiha wako wese, ngo hwiru hwako hwese. Uu ngo mupango mukuru no wokutungamira.” (Mateu 22:37, 38) Rudo hwedu kuna Mwari hunotibesera kuti tizwire mupango jake, tivangirire zve tinyenye zvakashata. (Verenganyi Nduyo 97:10, Baiberi Mazwi Akacena aMwari.) Asi Sathana no nyika yake anoeja kurembesa no kuparaja rudo hwedu kuna Mwari.

6. Zvicinyi zvinoitika vandhu povanoruza rudo hwavo kuna Mwari?

⁶ Nyika ino mavonero akapeama ngo pamusoro po rudo. Vandhu vazinji ‘vanojida’ maningi, kusiyapo kuda Mwari. (2 Timoti 3:2, BMAA) Vanosotesesa maningi “madisiro o muviri, ruyemuro hwo majiso no kujikuja ko upfumi.” (1 Johani 2:16) Mupostori Pauro wakangwaja ngo pamusoro po zvingaitika kudari tikatanga kujidakajisa. Iyena wakati: ‘Kudira murangariro pa zviro zvo kunyama zvinoreva rufu.’ Ngenyi? Ngokuti vanozviita vanova vavengi va Mwari kamare. (VaRoma 8:6, 7, Shanduro yeNyika Itsva) Vandhu vanopeja mukuvo wavo vakasotesesa pa kupsaka mare kana kuita zvo vatano, vanozopejisira ngo kusuruvara.—1 VaKorinto 6:18; 1 Timoti 6: 9, 10.

7. I murangariro wapi wo ngozi ungapsasa maKristu nyamasi uno?

⁷ Vazinji vo vacikatendi kuti Mwari ariyo, vanokana-kana kuvepo kwake no vanotenda muphindu-muphindu vanoeja kukhohwesa vamweni kuti vatame kuda Mwari, kana vatame kutenda kuti ariyo. Vanoita zvivoneke inga kuti rethe basi kana mundhu acizivi kujija ngaanotenda kuti Musiki ariyo. Mukuengejera, vandhu vazinji vanoreremeja maningi uzivi hwo vandhu  kuciripi Musiki. (VaRoma 1:25) Pikija maKristu, angapsaswavo ngo murangariro iji. Ushamwari hwedu na Jehovha ungaremba, zve rudo hwedu hungapera.—Vaheberi 3:12.

8. (a) Mugariro japi jingarembesa vandhu va Jehovha? (b) Nduyo 136 inotiembejeresa kudini?

⁸ Paticararama mu nyika yakashata ya Sathana, paciri no mathangwe akawanda otingajizwa ndiona kurembejeka nguva jimweni. (1 Johani 5:19) Asi kudari tikatendera kuti tirembejeke maningi, gonda redu ringaremba zve rudo hwedu kuna Mwari hungapera. Inga muezaniso, tingawanana no zvineso ngokuti tiri kuita musharuka, tohwaja kana tiri kuva varombo. Kana tingacamwa ngokuti atiripi kukwanisa kuita zviri zvese inga zvotaida kuti tizviite. Tingasuruvara ngokuti zviri zvese mu upenyu azvizivi kuitika inga zvotaivetera. Azvinenyi kuti zvineso zvapi zvotiri kusongano nazvo, atibviri kujizwa kuti Jehovha watisiya. Rangariranyi ngo pamusoro po masoko anoembejera anowanika pa Nduyo 136:23, okuti: ‘Yena wakaticereceja mu [‘kuderera’, Shanduro yeNyika Itsva] kwedu, ngokuti rudo hwake ahuzoperi.’ Tingava no gwinyiso rokuti Jehovha anozwa ‘izwi redu ro kupota’ zve anozoridavira. —Nduyo 116:1; 136:24-26.

9. Icinyi cakapa Pauro simba rokuti arambe ano rudo hwakavanga kuna Jehovha?

⁹ Mupostori Pauro waenga mushandiri wa Mwari wairangarijisisa ngo pamusoro pokuti Jehovha wakamubesa maningi, zve izvo zvakamuitisa kuti arambe wakavanga. Iyena wakatara kudari: “Tenji anondibesa, apana co ndinothya. Vangandiitira cinyi vandhu?” (Vaheberi 13:6) Kuthemba Jehovha ka Pauro kwakamubesera kuti ahwisane no zvineso zvo mu upenyu. Paakawanana no mugariro jinonesa, Pauro aazivi kuruza kuthemba kwake Jehovha. Pikija paaenga mujere, waibesera maKristu doni ngo kutara karata jo kuvangisa acijitumira ku jiungano. (VaEfeso 4:1; VaFilipi 1:7;  Filemoni 1, 2a) Azvinenyi kuti zvineso zvapi zvaakawanana nazvo, Pauro wakaramba ano rudo hwakavanga na Jehovha. Iyena wakathemba “Mwari wo unyarajo hwese, anotinyaraja mu matambujiko ese.” (2 VaKorinto 1:3, 4) Tingatevejeresa kudini Pauro?

10. Tingarambisa kudini tina rudo hwakavanga kuna Jehovha?

¹⁰ Pauro wakadurujira njira imwe yotingaramba tina rudo hwakavanga kuna Mwari paakatara kudari: ‘Kumbiranyi mucikaregeri.’ Wakazotarazve kuti ‘vangiriranyi kukumbira.’ (1 VaTesalònika 5:17; VaRoma 12:12, BMAA) Ngenyi mukumbiro unotikhwedeja phedo na Mwari? Potinoita mukumbiro, tinobhuya na Jehovha. Zvotiita kuti tive no ushamwari hwakanaka nae. (Nduyo 86:3) Potinobvunja Baba wedu vo mugore mazwiro edu o mukati no murangariro jedu, tinokhwedera kovari. (Nduyo 65:3) Zve, rudo hwedu kuna Jehovha hunokura potinovona madaviriro aanoita mukumbiro jedu. Tinothemba kuti Jehovha “ari phedo po vese vanomudanija.” (Nduyo 145:18) Kuthemba kotinoita rudo no besero ra Jehovha zvinotibesera kuhwisana no zvineso zviri zvese zvotingawanana nazvo wari no kumbejiyo.

11, 12. Tingaengejeresa kudini kuda kotinoita cokwadi co Bhaibheri?

¹¹ Inga maKristu, tina rudo no cokwadi. Mu Soko ra Mwari ngo motinowana cokwadi. Jesu wakabvunja Baba wake kuti “Izwi renyu ndhakadi.” (Johani 17:17) Kuti tide cokwadi co Bhaibheri, tinodikana kuziva zviri mukati mwaro. (VaKolosi 1:10) Asi kuna zvimwenizve. Vonanyi kuti mutari wo Nduyo 119 anotibesesa kudini kuzwisisa zvotinodikana kuita. (Verenganyi Nduyo 119:97-100.) Pa njiku yese, tinodikana kurangarijisisa zvotinoverenga mu Bhaibheri. Potinorangarijira kuti tingabesereka kudini ngo kushandisa cokwadi co Bhaibheri mu upenyu hwedu, tinozoridavo maningi.

¹² Mutari wo nduyo wakanangazve kudari: “Cigondiso cenyu, kutapira kwaco, mu muromo wangu! Cinonyanya kutapira kupinda uci!” (Nduyo 119:103) Mabhuku akacijikira mu Bhaibheri anonasirihwa ngo sangano ra Mwari akaezana no zvokuha zvinonaka. Potinoha zvokuha zvotinodakarira, tinoda kutora mukuvo wakareba ticizviha. Ngo njira yakafanana, tinodikanavo kutora mukuvo wakareba ticijija. Tikadaro, tinozobusa “mazwi anodakajisa” o cokwadi, zve zvinozoreruka kuceuja zvotaverenga no kuzvishandisa kuitira kubesera vamweni.—Mucumaeri 12:10.

13. Icinyi cakabesera Jeremia kuti ade masoko a Mwari? Zvondhozvo zvakamupsasa kudini?

¹³ Muphorofita Jeremia waida masoko a Mwari. Iyena wakati: “Apo mazwi enyu aza kondiri, inini ndaimaha; mazwi enyu aiita kondiri kudakara no kutamba. Ngokuti ndaidanwa ngo Zina renyu, Tenji Mwari wo Simba rese.” (Jeremia 15:16) Jeremia wairangarijisisa ngo pamusoro po masoko ano mutengo mukuru a Mwari zve waimada. Iyena waidakarira kuva muimiriri wa Jehovha no kutokotesa masoko ake. Kudari tinoda cokwadi, tinoziva kuti i rudakajiso hukuru kuva Zvapupu zva Jehovha no kucumaira ngo pamusoro po Umambo mu njiku jino jo kupejisira.

14. Tingaitenyizve kuti tiengejere rudo hwedu ku cokwadi co Bhaibheri?

 ¹⁴ Icinyivo cinozotibesera kuti tijikise rudo hwedu ku cokwadi co Bhaibheri? Tinodikana kuenda ku musongano jo ungano mukuvo wese, kotinojijisihwa ndi Jehovha. Jijo yo Bhaibheri yo bviki ngo bviki kucishandiswa Murindiri ndi imwe yo njira huru jotiri kujijiswa ndijona. Kuti tinase kubesereka ngo musongano uu, tinodikana kunasirira nguva iciripo. Inga muezaniso, tingaverenga mavhesi ese akatahwemo. Nyamasi uno, mungaverenga kana kubhashari Murindiri mu cimucini cenyu, azvinesi; ngokuti unowanika ngo ndimi jakawanda mu saite jw.org no mu apirikativho JW Library. Manasiririhwo amweni owakaitwa kuitira zvimucini, anotitendera kuti tiwane mavhesi akatahwemo ngo kukasika. Asi potinorangarijira kana kuverenga matahwa ngo ubhasopa no kurangarijisisa ngo pamusoro pao, tinokheta kujija musoro umwe na umwe. Tikaita kudaro, rudo hwedu ku cokwadi co Bhaibheri hunozokura.—Verenganyi Nduyo 1:2.

15, 16. (a) Mukuzwirana na Johani 13:34, 35, Jesu wakatipa mupango wapi? (b) Rudo hwedu kuna Mwari no ku Bhaibheri hunozwirana kudini no rudo hwedu ku hama jedu?

¹⁵ Pa usiku hwake hwo kupejisira pasi pano, Jesu wakabvunja vajiji vake kudari: “Ndinomupa mupango mupsa: kuti mudisane ngocenyu, kuti kudari ngo bzo ndakamuda, imwimwivo mudisane ngo cenyu. Mukaita kudaro vese vanozoziva kuti muri vajiji vangu: mukadisana ngo cenyu.”—Johani 13:34, 35.

¹⁶ Kuda hama no hambzaji jedu kunozwirana no kuda Jehovha. Kudari atina rudo na Mwari, atikwanisi kuda hama jedu. Zve kudari atina rudo no hama jedu, atizokwanisi kuda Mwari. Mupostori Johani wakatara kuti, wiya anovenga “hama yake yaanovona, angadisa kudini Mwari waacikavoni?” (1 Johani 4:20) Rudo hwedu  kuna Jehovha no ku hama hunozwiranavo no rudo hwedu ku Bhaibheri. Ngenyi? Ngokuti kudari tinoda zvotinojija mu Bhaibheri, tinozodavo mupango jotinowanemo jo kuda Mwari no hama jedu.—1 Pedru 1:22; 1 Johani 4:21.

17. Ngojapi njira jimweni jotingatatija ndijona rudo?

¹⁷ Verenganyi 1 VaTesalònika 4:9, 10. Ngojapi njira jimweni jotingatatija ndijona rudo kuna vaya vari mu ungano yedu? Hama kana hambzaji yaa musharuka ingada besero kuti iyende kumusongano no kuviya. Noni ingada besero ro kunasirira ciricese kunyumba kwayo. (Jakobo 1:27) Hama no hambzaji jakarembejeka, kusuruvara, kana jiri kuwanana no zvineso zvimweni jinoda kupurukihwa, kuvangiswa no kuembejehwa. (Mazwi Akangwara 12:25; VaKolosi 4:11) Tinotatija kuti tinoda “vatendidoni” ngo zvotinobhuya no zvotinoita.—VaGalàsia 6:10.

18. Zvicinyi zvinozotibesera kuti tipeje kutama kuzwana no hama jedu?

¹⁸ Bhaibheri rinonanga kuti mu “njiku jokupejisira” jo nyika ino yakashata, vandhu vazinji vanozova no umbau kana makaro no kujikuja. Inga maKristu, tinodikana kushanda ngo simba kuti tirambe tecikura mu rudo kuna Jehovha, Soko rake, no ku umwe no umweni. Zvecivoneka kuti atizivi kukwana, nguva jimweni tingatama kuzwana padoko no hama jedu. Ngokuti tinodisana, tinozoeja kupeja mapope ariese ngo kunaka mwoyo zve ngokukasika pazvinokwanisikaya. (VaEfeso 4:32; VaKolosi 3:14) Ticadotendera kuti rudo hwedu hupere. Kunja kwa izvo, ngatirambe tina rudo hwakavanga kuna Jehovha, Soko rake no ku hama jedu.