DANIEL NA MIRIAM vakacadha mu mweji wa Cikumiyana wo 2000 zve vainga no upenyu hwo kugarisika ku Bharserona, Shipanya. Daniel wakadurujira kudari: “Basa redu raititendera kwende koha mu restaurante jaushoni, kuenda kovona nyika jimweni no kusimira nguvo jina mutengo. Zve taienda kocumaira mukuvo wese.” Asi kwakazoitika ciro cimwe.

Daniel naari pa gungano ro mutundhu mu gore ro 2006, wakazwa hurukuro yaibvunjisa kudari: “Muri kuita zvese zvomunokwanisa kuitira kubesera vaya ‘vonokweviwa kourawa’ kuti vawane gwanja ro kuupenyu hucikaperi here?” (Mazwi Akangwara 24:11) Hurukuroyo yakadurujira kuti itusu tina mutoro wo kucumaira masoko ari mu Bhaibheri ngokuti ngaanoponesa vandhu. (Maitiro o Vapostori 20:26, 27) Daniel anoceuja kudari: “Ndakajizwa kuti Jehovha waibhuya na inini kamare.” Hurukuro yondhoyo yakananga kuti tinowana mudakaro potinoita zvizinji mu basa ra Jehovha. Daniel wakavona kuti izvo ndizvonadi ngokuti Miriam wainga watanga upiyona pa mukuvowo, zve waidakaradi maningi.

Daniel wakapsaswa maningi ngo hurukuro iyi zvokuti wakatosunga kuti iyi ndiyo nguva yo kuita cinjo huru mu upenyu hwake. Iyena wakatanga kushanda padoko kubasa kwake, votangazve kucumaira no kurangarira madakariro aaizoita na Miriam kudari vaishandira kunodiwa maningi vacumairi vo Umambo.

Mu mweni wa Mauwe wo 2007, Daniel na Miriam vakasiya basa ravo voenda Panama, nyika yovainga vaenda kobvakacira. Ndima yavo yaiumbwa ngo zvirundu zvakawanda, zviri mu cikwata co zvirundu cinozwi Bocas del Toro ciri mu Jombe ro Karibhe. Kwainga no va Guaymi vairarameyo. Daniel na Miriam vakarangarira kuti vaizogara mweji musere ku Panama no mare yo vainga vakaviga.

Vaifamba mu zvirundu izvi ngo gazirina no bhasikoro. Vacaceuja kuti hwendo hwo kutanga hwo vakacovha bhasikoro ravo pa mumango wo 30 o makiromita vacikhwira matundhu pa mukuvo unopisa maningi. Daniel wakapera simba maningi zvokuti wainga woda kutozirika. Asi mbhuri jo ku Guaymi jovakasongana najo jaiashira ushoni vafambi, maningi-ningi povakaziva magama amweni o ndimi yo munyikemo. Ngokukasika vakava no vajiji vo Bhaibheri 23.

Zvicinyi zvakaitika povakapeja mbuva yavo? Daniel wakati: “Takatanga kurangarira kuhwirira no tina musoji pa matama. Taisuruvara maningi ngo kusiya vajiji vedu vo Bhaibheri.” Asi, vakazoashira masoko anodakajisa pa mweji wakazotevera. Miriam wakati: “Takakokwa kuti tishande inga mapiyona anosisira. Zvinodakajisa maningi kukwanisa kugara tiri mu basa rotakagajwa.”

Daniel na Miriam vakasiya kushanda inga mapiyona anosisira mu gore ro 2015 ngo ndava yo cinjo jakaitika mu sangano. Waro vaizoitenyi? Ivona vakathemba cigondiso cinowanika pa Nduyo 37:5, cokuti: “Ipai kuna Tenji Mwari njira yako, gondai naye: anozopeja mabasa ako.” Vakawana basa kuitira kuti vakwanise kujisapota vacishanda inga mapiyona o guva jese, zve nyamasi uno vari kushandira mu ungano iri ku provhinsia yo Vheraguas, Panama.

Daniel wakati: “Ticito tabva Shipanya, aticaenga no gwinyiso rokuti taizokwanisa kurarama upenyu hwakareruka. Nyamasi uno tiri kuzviita, zve apana cinosisira maningi cotinotama.” Ngowapi mudakaro wavo mukuru? Ivona vakati: “Kubesera vandhu vanojidodokesa kujija ngo pamusoro pa Jehovha i mudakaro ucikaezaniswi kamare!”