1, 2. Pedhru naapeja usiku hwese acitanda, wakawana cijijo capi?

VAJIJI vanomwe va Jesu vapeja usiku hwese vacitanda mu Jombe ro Garireya. Asi avazivi kubata no hove imwe hayo. Waro kwainga kwaeja, Jesu wainga wapera kumuswa zve wakaima mu mbhiripiri mo jombe, ecivasota. Tevere yena wakati: “‘Wisiranyi juya ngo divi ro mukono muho ro ngarava, munozobata.’ Vakariwisira, avazivibze kukona kurikweva ngo ndava yo kuwanda ko hove.”—Johani 21:1-6.

² Jesu wakaperekera pau no hove ku vajiji vake kuitira kubata mukanwa co manwanani. Tevere wakahwirira kuna Simoni Pedhru, womubvunjisa kudari: “Simoni, mwana wa Johani, unondida kupinda” iji? Jesu waiziva kuti Pedhru waida maningi kutanda. Zvingaita kuti Jesu waibvunjisa Pedhru kuti waida maningi Jesu no zvaaijijisa kupinda madire aaita nyagoso yake yo hove. Pedhru wakadavira Jesu kudari: “Tenji, munobziziva kuti ndinomuda.” (Johani 21:15) Kubvira pa njiku yondhoyo, Pedhru wakakhombija kuti zvaakanangari zvairevenyi. Wakakhombija rudo hwake kuna Kristu ngo kuramba wakabatikana pa basa ro kucumaira, zve wakava mundhu anosisira mu ungano yo ciKristu.

3. MaKristu anodikana kuzivenyi?

 ³ Tinojijenyivo ngo masoko akabvunjwari Pedhru ndi Jesu? Tinodikana kungwarira kuti titame kusiya kuti rudo hwedu kuna Kristu hurembe. Jesu waiziva kuti upenyu mu nyika ino hwaizova hunocamwisa zve taizowanana no kuthimwa-thimwa no zvineso. Pa mufananijo wa Jesu wo mukusi, wakananga kuti vandhu vamweni vaizodavira “izwi ro Umambo” zve pakutanga vaizova vanovangisira. Asi pa kufamba ko nguva, “kucengejwa ko upfumi” kwaizopsinya “izwi,” vandhu vondhovo vaizoruza kuvangisira kwavo. (Mateu 13:19-22; Marco 4:19) Kudari tikatama kungwarira, kuthimwa-thimwa ko muupenyu kunghwinira kushandira kwedu Jehovha. Ngo iyo ndava kuti Jesu wakangwaja vajiji vake kudari: “Basopanyi! Mwoyo yenyu icaremehwa ngo ndava yo kuhisa, kurejera no kuthimwa-thimwa ko pasi.”—Luka 21:34.

4. Icinyi cinozotibesera kuziva kuti rudo hwedu kuna Kristu hwakavanga kana haiwa? (Vonanyi pikica to kutanga.)

⁴ Mukufanana na Pedhru, tinokhombija kuti tinoda Kristu ngo kudira pa kutanga basa ro kucumaira mu upenyu hwedu. Tingava kudini no gwinyiso rokuti tiri kuenderera mberi tecizviita? Tingajibvunjisa kudari: ‘Ngocapi condinoda maningi mu upenyu hwangu? Ndinodakara ngo kushandira Jehovha kana ngo kuita mabasa amweni?’ Kuti tibesereke kudavira mubvunjo iji, ngatipopore mativi matatu o muupenyu angarembesa rudo hwedu kuna Kristu. Mativi aya ngo o basa ro kunyama, mabungaijo no zviro zvo kunyama.

5. Musoro jo mbhuri jina mutoro wenyi?

⁵ Pedhru aacaidakajiwa basi ngo kutanda. Raenga basa raaita kuti aponese mbhuri yake. Nyamasi unovo, Jehovha wakapa musoro jo mbhuri mutoro wo kusapota mbhuriya jajo. (1 Timoti 5:8) Ijona jinodikana kushanda ngo simba kuti jizviite. Asi, basa ro kunyama rinoviisa kuthimwa-thimwa kuzinji, mu njiku jino jo kupejisira.

6. Ngenyi basa ro kunyama ringacamwisa?

⁶ Kazinji kunowanika mabasa mashoma, kuveni kuna vandhu vakawanda vari kupsaka mabasa. Ngo iyo ndava, vandhu vanophikizana kuti vawane basa. Vazinji vanojizwa kuti vanodikana kushanda kupindirija nguva jobasa, kazinji kuti vazowane mare shoma. Impereza jakawanda jiri kueja kuita zviro zvakawanda zvaushoni no vashandi vashoma kupinda kare. Ngokudaro, vashandi vazinji vanocamwa, kupera simba, pikija kutohwaja. Vazinji vanothya kuperehwa ngo basa kudari vakatama kuita zviri zvese zvovanobvunjwa ndi patarau wavo.

7, 8. (a) Tinodikana kuva takagondeka kuna iyani? (b) Hama imwe yo ku Tairandia yakajijenyi ngo pamusoro po basa rayo?

⁷ Inga maKristu, takagondeka maningi kuna Jehovha kuciripi kuna ariwese hake, kubatanijavo na patarau wedu. (Luka 10:27) Basa redu ro kunyama rinotiita kuti tikwanise kuwana zvotinotama no kubesera basa redu ro kucumaira. Kudari tikatama  kungwarira, mutoro jedu jo kubasa jinonghwinira ushamwari hwedu na Jehovha. Tinowana cijijo ngo zvakaitikira hama imwe yo ku Tairandia. Iyona yakati: “Basa rangu ro kugejerera komputadhori raidakajisa maningi, asi raida kuti ndishande nguva jakawanda. Inga muviyo, zvakadondisiya ndicina nguva kuitira zviro zvo kumujimu. Pakupejisira ndakazovona kuti ndidire zvinodiwa zvo umambo pa kutanga, ndaidikana kucinja basa rangu.” Hama iyi yakazoitenyi?

⁸ Iyona yakadurujira kudari: “No ndapera gore ndeciita mazano, ndakatema civaringo co kufamba mu makwanja ndecitengesa sorvheti. Pakutanga zvakandinesa kuwana mare zve ndakavora mwoyo. Pondakawanana no vondaishanda navo, vaizondiseka no kundibvunjisa kuti ngenyi wakarangarira kuti kutengesa sorvheti kuri nane kupinda kushanda no komputadhori pa ndau ina ari-kondisionadho zvese. Ndakaita mukumbiro kuna Jehovha kuti andibesere kuhwisana no mugariro uu zve ndikwanise cido cangu co kuwana nguva yakawanda kuti ndiite mabasa o kumujimu. Zviro zvakatanga kuita nane ngo kukasika. Ndakaguma pa kunasa kuziva sorvheti inodakarihwa ngo makirienti angu, zve ndakakwanisavo ushoni kuita sorvheti. Ngokukasika, ndakakwanisa kutengesa sorvheti yese, njiku ngo njiku. Kunasa kunanga, ndainga no mare kupinda mukuvo wondaigejereya komputadhori. Zvaindidakajisa ngokuti andicaivora mwoyo no kuthya, zvondaengaya nazvo ngo ndava yo basa rangu ro kare. Zve cinosisira maningi ngo zvo kuti wari ndiri kujizwa kuva phedo na Jehovha.”—Verenganyi Mateu 5:3, 6, Shanduro yeNyika Itsva.

9. Tingarambisa kudini tina mavonero akaezanana ngo pamusoro po basa ro kunyama?

⁹ Jehovha anodakara maningi potinoshanda ngo simba. Kushanda ngo simba kunoviisa muviyo. (Mazwi Akangwara 12:14) Asi tinodikana kuva no gwinyiso rokuti basa redu ro kunyama ariripi kuva rinosisira maningi kotiri kupinda kushandira kwedu Jehovha. Jesu acibhuya ngo pamusoro po zvinodiwa zvikuru zvo kunyama, wakati: “Ambanyi kupsanga Umambo hwa Mwari no urungami hwavo. Bzimweni munozopuwa ngo kuengejehwa.” (Mateu 6:33) Waro tingazvizivisa kudini kuti tina mavonero akaezanana ngo pamusoro po basa ro kunyama kana haiwa? Tingajibvunjisa kudari: ‘Ndinovona kuti basa rangu rinodakajisa no kunyaukirisa asi ndovona basa ra Mwari inga basavo riri rese haro kana kuti rinotocamwisa here?’ Kurangarijira mubvunjo iji kunotibesera kuvona zvakajeka kuti tiri kudisisenyi.

10. Jesu wakatijijisa cijijo capi cinosisira?

¹⁰ Jesu wakatijijisa cinodikana kuva pa kutanga mu upenyu hwedu. Hwendo humweni, Jesu wakabvakacira pamuzi pa yaya no munukuna. Marta wakatanga kumunasiririra zvokuha ngo kukasika, asi Maria wakagara pasi phedo na Jesu acipurukira zvaaijijisa. Marta wakan’gun’guta ngokuti Maria acaimubesa. Jesu wakabvunja Marta kudari: “Maria wasana mbzakadi divi  rauxoni raacingazotorehwi.” (Luka 10:38-42) Apawari, Jesu wakatijijisa cijijo cinosisira. Tinodikana kukheta “divi rauxoni” kuti titame kukangaijwa ngo zvinodiwa zvedu, zve kuitira kuti tikhombije rudo hwedu kuna Kristu. Izvi zvinoreva kuti ushamwari hwedu na Jehovha, mukuvo hunodikana kuva ciro cinosisira maningi mu upenyu hwedu.

11. Bhaibheri rinonangenyi ngo pamusoro po kuzorora no kuva takasujunuka?

¹¹ Upenyu hwedu hwakabatikana maningi zvokuti pa mukuvo no mukuvo tinodikana kuzorora no kuva takasujunuka. Mu Bhaibheri tinoverenga kudari: “Kudakara ko mundhu: kuha no kumwira, ecibusa ngo mucero wo basa rake.” (Mucumaeri 2:24) Jesu waiziva kuti zvaisisira kuti vajiji vake vazorore. Inga muezaniso, povainga vashanda ngo simba pa basa ro kucumaira, Jesu wakavabvunja kudari: “Vianyi mega pa ndau icina vandhu, muzorore padoko.”—Marco 6:31, 32.

12. Ngenyi tinodikana kungwarira ngo pamusoro po mabungaijo no mutambo? Ipanyi muezaniso.

¹² Mabungaijo no mutambo zvingatibesera kuti tizorore no kuva takasujunuka. Asi tinodikana kungwarira kuti kujidakajisa kutame kuva ciro cinosisira maningi mu upenyu hwedu. Mu zana ro kutanga ro makore, vazinji vainga no murangariro wokuti, “ngatihe no kumwa, ngokuti tinozofa mangwana.” (1 VaKorinto 15:32) Vazinji varivo no murangariro wondhowo nyamasi uno. Inga muezaniso, mujaha umwe wo Kumavirira ko Europa, wakatanga kuenda ku musongano. Asi waida maningi mabungaijo zvokuti wakaregera kuenda kosonganira no Zvapupu zva Jehovha. Asi pa kufamba ko nguva, wakazovona kuti kubatikana kwake maningi ngo mabungaijo kwakamuviisira zvineso zvizinji. Iyena wakatangazve kujija Bhaibheri, zve wakazokwanisa kutanga kucumaira masoko akanaka pa kufamba ko nguva. Naapera kubhabhatijwa, wakananga kudari: “Kukhauya kumwe basi kondakava nako ngo kokuti ndakaruza nguva yakawanda maningi ndicito ndaziva kuti kushandira Jehovha kunoviisa mudakaro mukuru maningi, kupinda kuteverera mabungaijo otinopuwa ngo nyika ino.”

13. (a) Ipanyi mufananijo unokhombija kuti kuda maningi mabungaijo no mutambo azvizivi kunaka. (b) Zvicinyi zvingatibesera kuti tive no mavonero akaezanana ngo pamusoro po mabungaijo no mutambo?

¹³ Mabungaijo anodikana kutibesera kuti tive takasujunuka no kuwanazve simba. Waro tinodikana kupeja nguva yakadini tiri pa mabungaijo? Kuti tibesereke kudavira, tingarangarira ngo njira iyi. Vandhu vazinji vanodakarira kuha mabhoro no madosi. Asi kudari tikazviha mukuvo wese, zvinozokhuvaza uhomi hwedu. Kudari tinoda kuva no uhomi hwaushoni, tinodikana kuha zvokuha zvaushoni kotiri. Mu njira yakafanana, kudari tikapeja nguva yakawanda tiri pa mabungaijo no mutambo, zvinozopsasa ushamwari hwedu na Jehovha. Icinyi cingatibesera kuziva kuti tina mavonero akaezanana ngo pamusoro po mabungaijo kana kuti haiwa? Ciro cimwe cotingaita ngo cokukheta bviki rimwetotara nguva jatinonga tapeja teciita mabasa edu ko kushandira Jehovha, akadari inga musongano jo ciKristu, basa ro kucumaira no kujija Bhaibheri. Tevere tingatarazve nguva jotinopeja pa bviki rondhoro tiri pa mabungaijo, akadari inga mutambo, terevhizau kana vhidhio gemi. Potinoezanisa zviverengo zviviri izvi zvo nguva, tinovona  kudini? Tinodikana kuita cinjo here?—Verenganyi VaEfeso 5:15, 16.

14. Icinyi cingatibesera kuti tikhete mabungaijo no mutambo jaushoni?

¹⁴ Jehovha anotitendera kuti tikhete mabungaijo edu, zve musoro jo mbhuri jingakheteravo mbhuri jajo mabungaijo. Mu Bhaibheri, Jehovha anotipa zviambi zvinokhombija marangaririro otingaita. Zviambi izvi zvinotibesera kuti titeme zvivaringo zvaushoni. * (Vonanyi masoko o pasi.) Mabungaijo aushoni ndi “cipuo ca Mwari.” (Mucumaeri 3:12, 13) Izvokadi kuti vandhu vakasiyana vanodavo mukhaindi jakasiana jo mabungaijo. (VaGalàsia 6:4, 5) Asi, azvinenyi mabungaijo api atingakheta, tinondodikana kungwarira basi. Jesu wakananga kuti “pano upfumi hwako ngo pano mwoyo wako.” (Mateu 6:21) Rudo hwedu kuna Jesu Mambo wedu, hunotindundira kuti tirangarire, tivereketa no kuita ngo njira inokhombija kuti Umambo hunosisira maningi kotiri kupinda ciricese haco.—VaFilipi 1:9, 10.

15, 16. (a) Zviro zvo kunyama zvingava kudini muravo kotiri? (b) Ingwajo yapi yakapa jesu ngo pamusoro po zviro zvo kunyama?

¹⁵ Vandhu vazinji nyamasi uno vanovona kuti vanodikana kuwana nguvo, foni, komputadhori no zviro zvimweni zvabuda wari. Ivona vari kupsaswa ngo kudisisa zviro zvo kunyama, muraramiro wokuti zviro no mare zvinosisira maningi kupinda ciri cese haco. Icinyi cinosisira maningi komuri inga muKristu? Jibvunjisenyi kudari: ‘Ndinopeja nguva yakawanda ndicirangarira ngo pamusoro po karu kana muthapa wo  musimiriro wabuda wari kusiyapo kunasirira musongano jo ungano here? Ndaakubatikana maningi ngo mabasa o njiku ngo njiku zvokuti ndopeja nguva shoma ndeciita mukumbiro kana kuverenga Bhaibheri here?’ Kudari tikatama kungwarira, rudo hwedu ku zviro zvo kunyama hunozova hunosisira maningi kupinda kuda kotinoita Kristu. Tinodikana kurangarira magama a Jesu okuti: “Basopanyi muemuro yese!” (Luka 12:15) Ngenyi wakananga kudaro?

¹⁶ Jesu wakananga kuti “apana anokwanisa kubatira vandhu vaviri.” Wakaengejera kudari: “Amukwanisi kubatira Marure pamwepo no upfumi.” Azvikwanisiki kushandira Jehovha mbhera panoperera simba redu, tosotesesazve zviro zvo kunyama pa mukuvo wondhowo. Jesu wakadurujira kuti “anozonyenya umwe woda umweni” kana “anozobatira umwe, ecizonyenya umweni.”(Mateu 6:24) Ngokuti atizivi kukwana, tinodikana kuramba tecihwa no “kuda” ko muviri, kubatanijavo no zviro zvo kunyama.—VaEfeso 2:3.

17. (a) Ngenyi vamweni vanovona kuti zvinonesa kuva no murangariro wakaezanana ngo pamusoro po zviro zvo kunyama? (b) Icinyi cinotibesera kuhwisa kudisisa zviro zvo kunyama?

¹⁷ Vandhu vazinji vanosotesesa maningi zvovanoda no zvinovadakajisa zvokuti vanotovona kuti zvinonesa kuva no mavonero akaezanana ngo pamusoro po zviro zvo kunyama. (Verenganyi 1 VaKorinto 2:14.) Ngokuti avarangariri zvakajeka, zvingavanesera kurangarira musiyano wo cakanaka no cakashata. (Vaheberi 5:11-14) Kuda kwavo zviro zvo kunyama kungazovanga maningi. Zve povanoguma pa kuwana zvizinji, vanondodazve zvimweni. (Mucumaeri 5:9) Asi kuna ciro cimwe cotingaita kuti tihwise marangaririro aya. Kuverenga Soko ra Mwari mukuvo wese kunozotivangisa kuti tikwanise kuramba zviro zvo kunyama. (1 Pedru 2:2) Jesu wakabesereka kuti arambe muejo ja Dhiabho ngokuti wairangarijira ungwaru hwa Jehovha. (Mateu 4:8-10) Kudari tinoda kuramba zviro zvo kunyama nyamasi unovo, tinodikana kushandisa ungwaru hwa Jehovha mu upenyu hwedu. Izvi ngo zvinozokhombija kuna Jesu kuti tinomuda maningi kupinda zviro zvo kunyama.

18. Matema civaringo co kuitenyi?

¹⁸ Jesu paakabvunjisa Pedhru kuti, “unondida kupinda” iji? waimujijisa kuti waidikana kusotesesa kushandira Jehovha mu upenyu hwake. Zvinodakajisa kuziva kuti zina ra Pedhru rinoreva “Bwendu ro Buwe.” Mugariro jaushoni ja Pedhru jingaezaniswadi no buwe. (Maitiro o Vapostori 4:5-20) Itusu tinodavo kuti rudo hwedu kuna Kristu huve hwakavanga nyamasi uno. Ngokudaro, tinova no gwinyiso rokuti basa ro kunyama, mabungaijo no zviro zvo kunyama zvive pa ndau kwayo mu upenyu hwedu. Perepo tinozoita inga ndi Pedhru, uwo wakati: “Tenji, munobziziva kuti ndinomuda.”