1, 2. (a) Zvicinyi zviri kubesera majaha no vasikane kuti vawine pa kuhwa na Sathana no madhimoni? (Vonanyi pikica yo kutanga.) (b) Tinozobhuya ngo pamusoro penyi?

Mupostori Pauro wakaezanisira maKristu no masoca. Tiri pa hondo zve muvengi wedu ngo wokadi kamare! Asi hondo yedu asipi no vandhu, asi tinohwisana na Sathana no madhimoni. Ivona ndi masoca ko zviuru zvo makore zve vanokwanisa ushoni kuhwa. Zvingavoneka inga kuti atikwanisi kuwina pa hondo iyi, maningi-ningi kudari tiri majaha kana vasikane. Majaha no vasikane vangakwanisa kunyisa vavengi ava vano simba here? Hina vangakwanisa zve vari kutowina! Ngenyi? Ngokuti ivona vanoashira simba rinobva kuna Jehovha. Cimwenizve, inga musoca wakanasa kurovejwa, ivona ‘vanosimira bzijito bzo hondo bza Mwari’ kuti vave vakanasirika kuitira kuhwa.—Verenganyi VaEfeso 6:10-12, Shanduro yeNyika Itsva.

² Pauro paakashandisa muezaniso uwu, zvingaita kuti iyena  wairangarira ngo pamusoro po zvijito zvaisimihwa ngo masoca o ciRoma. (Maitiro o Vapostori 28:16) Pa musoro uno, tinozopopora muezaniso uwu wakanakisisa. Tinozobhuya ngo zvakanangwa ngo majaha no vasikane vamweni ngo pamusoro po zvineso no kubesereka kovakawana ngo kusimira zvijito zvedu zvo hondo yo kumujimu.

3, 4. Cokwadi co Bhaibheri cakaezana kudini no bhande ro musoca wo ciRoma?

³ Verenganyi VaEfeso 6:14. Bhande ro musoca wo ciRoma rainga no zvimatimbu zvo utare zvaimubvikira cihunu no kucijikira kuti muthavo wake wairemaya, utame kumbhwera. Mabhande amweni aingavo no zvibato kuitira kunghwinisira banga no cipanga. No bhande iri rakanasa kusungwa, musoca wo ciRoma waienda ku hondo ecithemba.

⁴ Inga bhande, cokwadi catinojija kubvira mu Soko ra Mwari cinotijivirira ku majijisiro o manyepo. (Johani 8:31, 32; 1 Johani 4:1) Patinoramba tecijijira kuda Soko ra Mwari, zvinozotirerukira kuti tipone mukuzwirana no ndhungamiro ja Jehovha, kana kusimira “muthavo” wedu. (Nduyo 111:7, 8; 1 Johani 5:3) Kusiapo zvondhozvo, patinonasa kuzwisisa zvokadi izvi, tinozokwanisa kujijivirira pamberi po vavengi vedu.—1 Pedru 3:15.

5. Ngenyi nguva jese tinodikana kubhuya cokwadi?

⁵ Zvecivoneka kuti zvokadi zvo mu Soko ra Mwari zvinosisira maningi kwatiri, tinozwira zvinonangwa mu Bhaibheri zve nguva jese tinobhuya cokwadi. Kunyepa ndi imwe yo nvuti jinobudirira maningi jinoshandiswa ndi Sathana. Kunyepa kunokhuvaza anonangaya manyepowo no mundhu anomatendaro. (Johani 8:44) Pikija atizivi kukwana, tinoeja kuita zvatinokwanisa kuti titame kunyepa. (VaEfeso 4:25) Izvi zvinganesa. Abigail wo 18 o makore o kubahwa, wakati: “Kuvereketa cokwadi nguva jimweni kungavoneka inga kuti akushandi, maningi-ningi patinovonaya kuti kunyepa kungatibvisa pa nyatwa.” Waro ngenyi iyena anoeja kubhuya cokwadi mukuvo wese? Iyena wakati: “Pandinobhuya cokwadi, ndinova no hana yakacena pamberi pa Jehovha. Zve vabari vangu no shamwari jangu vangandithemba.” Victoria wo 23 o makore o kubahwa, wakati: “Pamunobhuya cokwadi no kujivirira zvitendwa zvenyu, imwimwi mungatoshohwa. Asi, mungatova no muviyo jakanakisisa: Mungathembwa, mungajizwa kuti muri phedo na Jehovha zve mungareremejwa ngo vaya vanomuda.” Mavona kuti ngenyi zvinosisira nguva jese ‘kusunga mu cihunu medu ngo zvokadi’ here?

6, 7. Ngenyi urungami unoezaniswa no muthavo?

⁶ Muthavo wo musoca wo ciRoma kazinji waiitwa ngo matimbu o simbi akapambhama aikwakwatija diti rake. Matimbu o simbi ondhowo ainga no zvinghwinisiro zvo utare  zvaishandiswa kuitira kunghwinisira zvitovo zvaisunginijira dimbu ro simbi rimwe kuti ribatane no rimweni. Mapfuji ake aifukijwa ngo matimbu o simbi akawanda aisunganijihwavo rimwe kuno rimweni ngo zvitovo. No muthavo, musoca aacaijizwa akanasa kusujunuka zve waidikana kugara ecisota nguva jese kuti matimbu o simbi ayana ainga pa ndau pawo kana kuti haiwa. Asi pikija zvakadaro, muthavo uu waibvikira mwoyo wake no mativi amweni o pa muviri, kuti atame kutemwa ngo banga!

⁷ Ndhungamiro jakaruruma ja Jehovha, ndijona jinojivirira “mwoyo” wedu kana mundhu watiri ngo mukati, watingaezanisira no muthavo. (Mazwi Akangwara 4:23) Musoca acaizotendera kucinja muthavo wake wo simbi kuti ashandise wakaitwa ngo utare ucizivi kuvanga. Mu njira yakafanana, aticaizotenda kucinja ndhungamiro ja Jehovha ngo pamusoro po zvakanaka kuti tishandise zvatinovona kuva zvakarungama. Itusu atizivi kungwara maningi kuti tikwanise kujivirira mwoyo wedu. (Mazwi Akangwara 3:5, 6) Ngo iyo ndava, nguva jese tinodikana kunasa kusotesesa “muthavo” wedu, dangani uciri kujivirira mwoyo wedu.

8. Ngenyi tinodikana kuzwira ndhungamiro ja Jehovha?

⁸ Makambojizwa kuti ndhungamiro ja Jehovha jiri kumubvisira rusujunuko hwenyu kana kumurambisa kuita zvamunoda here? Daniel wo 21 o makore o kubahwa, wakati: “Mapirisori no vajiji doni vaindiseka ngokuti ndinopona mukuzwirana no ndhungamiro jo Bhaibheri. Ndakazoguma pa kutama kujithembazve zve ndaisuruvara maningi.” Asi wari ari kujizwa kudini? Iyena wakati: “Mu kufamba ko nguva ndakavona muviyo wo kupona mukuzwirana no ndhungamiro ja Jehovha. ‘Shamwari’ jangu jimweni jakatanga kumwa mutombo jinodhakwisa; vamweni vakatosia kujija. Zvinosuruvarisa kuvona macinjire akaita upenyu hwavo. Zvokadi kamare Jehovha anotijivirira.” Madison wo 15 o makore o kubahwa, wakati: “I cineso kwandiri kuramba ndecibatisisa ndhungamiro ja Jehovha zve ndoramba kuita zvinovoniwa ngo vadoni vangu kuva zvinodakajisa.” Waro, anoitenyi? “Ndinozviceukija ndega kuti ndinotora zina ra Jehovha zve muejo wondhowo ndi njira inoshandisa Sathana kuti andibvisire zina iro. Pandinokwanisa kuhwa, ndinojizwa ushoni pacangu.”

9-11. (a) Ngoapi magwada okufananijira anosimihwa ngo maKristu? (b) Zvicinyi zvinozotibesera kuti tijizwe ushoni patinonga tecicumaera?

⁹ Verenganyi VaEfeso 6:15. Musoca o ciRoma aacaienda ku hondo acina magwada ake. Iwona aitwa ngo matovo matatu akabatanijwa, ngo kudaro aivanga maningi kamare. Asi magwada awo aipfava zvokuti musoca waitofamba wakagajana zve wotama kuwa.

¹⁰ Inga magwada o musoca o ciRoma awo aimubesera kuti abudirire pa hondo,  magwada okufananijira angatibeseravo kuti ‘titokotese vangeri ro rugarisiko.’ (Isaia 52:7; VaRoma 10:15) Nguva jimweni zvinoda kucunga kamare kuti ticumaere. Bo, wo 20 o makore o kubahwa, wakati: “Ndaithya maningi kucumaera ku vadoni vangu vo kucikora. Ndinovona kuti ndainyowejeka. Ndakazvirangarira weya wari, andizvizivi ngenyi ndaiita kudaro. Wari, ndinodakara maningi ngo kucumaera ku vadoni vangu.”

¹¹ Majaha no vasikane vazinji vo ciKristu vakavona kuti vanojizwa ushoni kudari vakatanga vanasirira vacito vaenda kocumaera. Mungazvinasiriravo kudini? Julia, wo 16 o makore o kubahwa, wakati: “Ndinodira mabhuku mu pasta yangu yo kucikora zve ndinopurukira zvinonangwa no zvinotenda vadoni vangu. Ngokudaro ndinokwanisa kuvona zvingavabesa. Pandinonga ndanasiririka, ndinobhuya navo ngo pamusoro po zviro zvingavabesera.” Makenzie, wo 23 o makore o kubahwa, wakati: “Kudari ukava wakanaka mwoyo zve mupurukiri waushoni, unozokwanisa kuziva zvineso zvavo. Ndinova no cokwadi co kuti ndakaverenga zvese zvakabudiswa kuitira majaha no vasikane.  Ngo njira iyi ndingabesera vadoni vangu ngo kushandisa Bhaibheri kana jw.org.” Kunasa kunasirira kuitira kucumaera zvakadari inga kusimira “magwada” anokwana ushoni.

12, 13. Ngojapi mupasha jimweni jinobwaka ja Sathana?

¹² Verenganyi VaEfeso 6:16. Musoca wo ciRoma waithwara mubviko mukuru wakapambhama. Waimufukija kubvira mu mapfuji mbhera mu makokobvi kuitira kumubvikira kuti atame kutemwa ngo banga, kubaiwa ngo mukhondo zve kufuhwa ngo mupasha.

¹³ Waro, ‘mupaxa jinobhakwa’ jingakhandira Sathana kwamuri, i cinyi? Iyena anomuhwisa ngo kushandisa manyepo ngo pamusoro pa Jehovha. Sathana anoda kuti imwimwi murangarire kuti Jehovha aamudi zve aamukorondhi. Ida, wo 19 o makore o kubahwa, wakati: “Kazinji ndinojizwa inga kuti Jehovha aaripi phedo neni zve aadi kuva shamwari yangu.” Zvicinyi zvaanoita paanojizwa kudaro? “Musongano jinondibesera maningi kuti ndivangise gonda rangu. Ndaindoguma kumusongano ndogara zve andicaidavira, ndairangarira kuti apana anoda kuzwa zvandinoda kunanga. Wari, ndinonasirira musongano zve ndinoeja kudavira kaviri kana katutu. Zvinonesa, asi ndinojizwa ushoni pandinozviita. Zve hama no hambzaji jinondivangisa maningi. Nguva jese ndinobva ku musongano ndeciziva kuti Jehovha anodida.”

14. Tinojijenyi kubvira ku muezaniso wa Ida?

¹⁴ Mubviko wo musoca unogara nguva jese pa ndau yondhoyo. Asi, inga zvatavona pa muezaniso wa Ida, gonda redu arizivi kuita kudaro. Gonda redu ringakura kana kutopunguka, roguma pa kuvanga kana kuremba. Tinosana ndisu. (Mateu 14:31; 2 VaTesalònika 1:3) Kuti ‘muviko wedu wo rutendo’ utibvikire, tinodikana kuramba teciuvangisa!

15, 16. Vetero yedu yakaezana kudini no cigoko?

¹⁵ Verenganyi VaEfeso 6:17. Musoca wo ciRoma waisimira cigoko kuti ajivirire musoro wake, musipa no mu meso mwake. Nguva jimweni cigoko cainga no cibato caiita kuti musoca acibate mu nyara.

¹⁶ Kudari inga cigoko cinojivirira musoro wo musoca, “cigoko co ruponeso” wedu cinongwarira murangariro wedu. (1 VaTesalònika 5:8; Mazwi Akangwara 3:21) Vetero inotibesera kuti tisotesese zvigondiso zva Mwari kuciripi kurembejeka ngo pamusoro po zvineso zvedu. (Nduyo 27:1, 14; Maitiro o Vapostori 24:15) Asi tikada kuti vetero yedu itingwarire, inodikana kuva yokadi kwatiri. Tinodikana kusimira “cigoko” mu musoro, haiwa kucibata mu nyara!

17, 18. (a) Sathana anoticengejesa kudini kuti tibvise cigoko cedu? (b) Tingatatijisa kudini kuti atiripi kucengejwa ndi Sathana?

¹⁷ Sathana anoticengejesa kudini kuti tibvise cigoko cedu? Rangariranyi ngo zvaakaeja kuitira Jesu basi. Sathana waizviziva kuti Jesu waizova mutongi wo nyika yese. Asi pakutanga, Jesu waidikana kutambujika zve wofa. Zve waidikana kuvetera mbhera nguva ya Jehovha igume kuti ave Mambo. Ngo kudaro, Sathana wakamupekeja mukana wokutonga ngo kukasika. Sathana wakagondisa kuti Jesu naakamunata basi, iyena waizova mutongi wo nyika ngo kukasika. (Luka 4:5-7) Sathana anozivazve kuti  Jehovha wakangodisa kutipekeja zviro zvinoshamaisa mu nyika imbza. Asi tinodikana kuvetera kuti cigondiso ici cikwanirisike zve zvicito zvaitika tingasongana no zvineso zvakawanda. Ngokudaro Sathana ari kutipekeja mukana wo kuva no upenyu unodakajisa wari. Iyena anoda kuti tidire upenyu unodakajisa pakutanga zve Umambo hwa Mwari po cipiri.—Mateu 6:31-33.

¹⁸ Majaha no vasikane vakawanda avazivi kucengejwa ndi Sathana. Inga muezaniso, Kiana, wo 20 o makore o kubahwa, wakati: “Ndinozviziva kuti vetero imwe basi yo kupeja zvineso zvedu, ndi Umambo hwa Mwari.” Vetero yake inopsasa kudini murangariro no maponero ake? Izvi zvinomubesera kuceukija kuti zviro zvo mu nyika ino ngo zvo nguva shoma. Kusiapo kupejera simba rake pa mabasa o nyika ino, Kiana anoshandisa nguva yake kuti ashandire Jehovha.

19, 20. Tingagumisa kudini pa kuitisa nane kuziva kwedu pa kushandisa Soko ra Mwari?

¹⁹ Masoca o ciRoma aishandisa banga rainga no meya metro yo urebu. Ivona vairiziva ushoni ngokuti vairishandisa njiku jese.

²⁰ Mupostori Pauro wakananga kuti Soko ra Mwari rakadari inga banga. Jehovha wakatipa Soko rake. Asi, tinodikana kunasa kurijija kuti tikwanise kujivirira gonda redu kana kutoitisa nane murangariro wedu. (2 VaKorinto 10:4, 5; 2 Timoti 2:15) Mungaitisa kudini nane kuziva kwenyu? Sebastian, wo 21 o makore o kubahwa, wakati: “Ndinotara vhesi imwe pa cipauko cimwe nga cimwe pa kuverenga kwangu ko Bhaibheri. Ndiri kuita rista yo mavhesi andinodakarira maningi.” Izvi zvinomubesera kuzwisisa ushoni murangariro ja Jehovha. Daniel wakaengejera eciti: “Pandinonga ndeciverenga Bhaibheri, ndinosana vhesi yandinovona kuti inozobesera vandhu vandinosongana navo mu mushando. Ndakavona kuti vandhu vanonasa kudakarira pavanovona kuti munoda Bhaibheri kamare zve munoita zvamunokwanisa kuti muvabesere.”

21. Ngenyi atidikani kuthya Sathana no madhimoni?

²¹ Inga zvotapera kujija ngo muezaniso jo majaha no vasikane pa musoro uno, atidikani kuthya Sathana no madhimoni. I zvokadi kuti ivona vano simba, asi avana simba rinopinda ra Jehovha. Zve ivona avazoponi kwenda no kwenda. Vanozonghwiniswa mu jere zve avazokwanisizve kukhuvaza ari wese hake mukati mo Ciuru co Makore o Kutonga kwa Kristu zve pasure pazvo vanozoparajwa. (Apokalipsi 20:1-3, 7-10) Tinomuziva muvengi wedu, macengejero ake no cido cake. No besero ra Jehovha, tingaramba takavanga pa kuhwisana naye!