1, 2. (a) Ngenyi tinovangiswa ngo hama no hambzaji jinoramba jecicumaera mu ndima yo kuti avapurukihwi? (Vonanyi pikica yo kutanga.) (b) Jesu wakanangenyi ngo pamusoro po kucumaera mu ndima yo ku ‘muzi kwake’? (Vonanyi masoko o pasi.)

HAMA SERGIO na hambzaji Olinda i varovorani o mapiyona ari ku Estadhus Unidhus. Vovaviri vano makore anodarika 80. Pa mukuvo waperari, vakava no cineso cikuru co kufamba. Asi, inga zvavanondoita kubvira kare, vanoenda pa parajhi yo mashibhomba ku dhorobha ravo pa nguva nomwe jo mangwanani. Ivona vanopsaka ndau phedo no parajhi yo mashibhomba vecipekeja mabhuku vanofamba ndipona. Vandhu vazinji avaashiri, asi hama Sergio na hambzaji Olinda vanoramba vakagara vecinyemwererera vese vanovasota. Comasikati, vanofamba padoko-padoko vecihwirira ku muzi. Mangwanani anotevera pa nguva nomwe, vanohwirirazve pa parajhi yo mashibhomba. Ivona vanoramba vecicumaera mangwanani matandhatu pa vhiki, mbhera kupera ko gore.

² Inga ndi hama Sergio na hambzaji Olinda, kuno hama no  hambzaji zinji jakagondeka jinoramba jecicumaera mu ndima iri phedo no muzi wavo ko makore mazinji, pikija vandhu vazinji avapurukiri. Kangaije muri kutocumaeravo mu ndima yakadari. Kudari ndizvona, tinomusimba, ngokuti muri kucungirira zve muri kuramba mucicumaera pikija no cineso. * (Vonanyi masoko o pasi.) Muezaniso wenyu unovangisa hama no hambzaji zinji, pikija vaya vari kuita basa iri ko makore. Vonanyi zvakananga vavonereri vo ndharaundha vazinji: “Pandinoshanda no hama no hambzaji iji jakagondeka mu mushando, ndinomusijihwa simba ngo muezaniso wavo.” “Kugondeka kwavo kunondivangisa kuti ndicungirire zve zvinondivangisa mu mushando wangu.” “Muezaniso javo jinovangisa mwoyo wangu.”

3. Ngojapi mubvunjo mutatu jaticazodavira zve ngenyi?

³ Pa musoro uno, tinozodavira mubvunjo mutatu: Ngenyi nguva jimweni tingasuruvara? Kubara mucero kunorevenyi? Zvicinyi zvinozotibesera kuramba tecibara mucero no kucungirira? Kuziva mupinguro jo mubvunjo iji kunozotivangisa kuti tirambe teciita basa ro kucumaera rotakapuwa ndi Jesu kuti tiite.

4. (a) Kuramba kupurukira kwakaita vaJudha vazinji, kwakaita kuti Pauro ajizwe kudini? (b) Ngenyi Pauro wakajizwa kudaro?

⁴ Makambosuruvara ngokuti vandhu vo mu ndima yenyu avadi kupurukira masoko o Umambo here? Kudari zvakamuitikira, munozozwisisa mazwiro akava no mupostori Pauro. Iyena wakapeja 30 o makore acicumaera no kubesera vandhu vazinji kuti vave maKristu. (Maitiro o Vapostori 14:21; 2 VaKorinto 3:2, 3) Pikija zvakadaro, aazivi kukwanisa kubesera vaJudha vazinji kuti vave maKristu. Kusiapo izvo, vazinji vakaramba kumupurukira zve vamweni vakatomuteverera. (Maitiro o Vapostori 14:19; 17:1, 4, 5, 13) Pauro wakajizwa kudini ngo kuramba kwavo? Iyena wakati: “Ndinopsa mwoyo no kuhwajihwa njiku jese.” (VaRoma 9:1-3) Ngenyi wakajizwa kudaro? Ngokuti waida kamare kucumaera zve waida vandhu. Zvokadi kamare, Pauro waineseka ngo ndava yo vaJudha zve wakasuruvara ngo kuramba kwavo unyasha hwa Mwari.

5. (a) Zvicinyi zvinotikwevejera kuti ticumaere? (b) Ngenyi nguva jimweni tingatosuruvara?

⁵ Inga ndi Pauro, tinocumaera ngokuti tinoneseka ngo vandhu zve tinoda kuvabesera. (Mateu 22:39; 1 VaKorinto 11:1) Tinozviziva pacedu kuti kushandira Jehovha i njira yakanakisisa yo kurarama. Zve tinodavo kubesera vamweni kuti vavone kunaka kungaita upenyu hwavo. Ngo iyo ndava, tinoramba tecivavangisa kuti vajije cokwadi ngo pamusoro pa Jehovha no cidisiso cake kuitira mushovo wese wo vandhu. Zvinoita inga kuti tiri kuvapa cipo cakaseja maningi zve tovabvunja kuti: ‘Tapota ashiranyi izvi.’ Pavanoramba cipo ici, zvinoitika kuzwa ‘kuhwajihwa mwoyo,’ inga zvakaita Pauro. Tinohwajihwa kudaro, asipi ngo ndava yo kutama gonda, asi ngo ndava yo kuti tino rudo no vandhu. Pikija nguva jimweni tingasuruvara, tinoramba tecicumaera. Tinotenderana na Elena, umwe piyona ano makore anokwana kuita 25, uwo wakati: “Ndinovona kuti basa ro kucumaera rinonesa. Pikija zvakadaro,  apana basa rimweni randinoda kuita kuciripi iri.”

6. Ngowapi mubvunjo watinoda kudavira wari?

⁶ Ngenyi tingava no cokwadi co kuti tingabudirira mu mushando wedu azvinenyi kwatinonga tecicumaera? Kuti tidavire mubvunjo uwu, ngatibhuye ngo muezaniso muviri ja Jesu, jaakabhuya ngo pamusoro po dikano yo ‘kubara mucero.’ (Mateu 13:23) Muezaniso wo kutanga ngo wo muti.

7. (a) Pa muezaniso wa Jesu, ndiani anoimirira “murimi,” “muti” no “matavi”? (b) Ngowapi mubvunjo waticandoda kudavira?

⁷ Verenganyi Johani 15:1-5, 8. Pa muezaniso uwu, Jesu wakasanangura kuti Jehovha ndi “murimi,” Jesu pacake ndi “muti,” zve vajiji vake ndi “matavi.” * (Vonanyi masoko o pasi.) Perapo Jesu wakati kuna vapostori vake: “Baba wangu vanozokojwa mukabara mucero yakawanda; ngokudaro munozoita vajiji vangu.” Waro, kubara mucero kunorevenyi? Pa muezaniso uwu, Jesu aazivi kunanga kuti mucero wainga cinyi kamare, asi iyena wakatipa zano rinozotibesera kuti tiwane mupinguro wo mubvunjo uwu.

8. (a) Pa muezaniso wa Jesu, ngenyi “kubara mucero” akurevi kuita vajiji vapsa? (b) Ngocapi cokwadi ngo pamusoro po zvese zvaanotikumbira Jehovha kuti tiite?

⁸ Jesu wakananga kudari ngo pamusoro pa Baba wake: “Davi rese ricikabari mucero mondiri, ivona vanozoritema.” Ngo magama amweni, tingava vashandiri va Jehovha basi tikabara mucero. (Mateu 13:23; 21:43) Pa muezaniso uwu, kubara mucero akuripi kureva kuita vajiji vapsa. (Mateu 28:19) No zvaidaro, Zvapupu zvakagondeka zvicikazivi kumbobesera ari wese kuti ave mujiji wa Jesu zvaizova inga matavi acikabari mucero. Asi, andizvopi. Ngenyi? Ngokuti ativangiriji vandhu kuti vave vajiji. Jehovha i rudo. Iyena aatikumbiri kuti tiite ciro cokuti atikwanisi kuita. Anotikumbira basi kuti tiite zvatinokwanisa.—Deuteronòmio 30:11-14.

9. (a) Tingabarisa kudini mucero? (b) Tinoda kubhuya ngo muezaniso wapi?

⁹ Waro, kubara mucero kunorevenyi? Cinodikana kuva ciro cingaithwa ndisu tese. Ngorapi basa rakapa Jehovha ku vashandiri vake vese? Kucumaera masoko akanaka o Umambo hwa Mwari. * (Vonanyi masoko o pasi.) (Mateu 24:14) Muezaniso wa Jesu ngo pamusoro po mukusi unojekesa izvi. Ngatibhuye ngo muezaniso wondhowo.

10. (a) Icinyi mbeu no mavhu o pa muezaniso wa Jesu? (b) Musonjoti wo tirigo unobarenyi?

¹⁰ Verenganyi Luka 8:5-8, 11-15. Pa muezaniso wo mukusi, Jesu wakasanangura kuti mbeu ndi “izwi ra Mwari,” kana masoko o Umambo hwa Mwari. Mavhu i mwoyo jo vandhu. Mbeu yakawira pa mavhu akanaka yobara muji, yotumbuka zve wova muti. Perapo, muti ‘unobara mucero yakawanda.’ Kudari muti wondhowo wainga musonjoti wo tirigu, waizobara mucero womushovonyi? Waizobara musonjoti dokowane jo tirigu here? Haiwa, unozobara mbeu, iyo inozokura ngo kufamba ko nguva zve yova musonjoti wo tirigu. Pa muezaniso uu, mbeu  imwe inobara mbeu jakawanda. Waro izvi zvinotijijisenyi ngo pamusoro po basa ro kucumaera?

11. (a) Muezaniso wo mukusi unotijijisenyi ngo pamusoro po mushando wedu? (b) Tingabarisa kudini mbeu imbza?

¹¹ Vabari vedu vo ciKristu kana Zvapupu zvimweni pozvakatanga kutijijisa ngo pamusoro po Umambo hwa Mwari, zvakadari inga mbeu yasimwa pa mavhu aushoni. Vakadakara maningi pavakavona kuti tatendera kuashira cokwadi. Mbeu yakaramba icikura no kukura mbhera yobara mucero. Kudari inga musonjoti wo tirigo wanangwaya pakutanga aubari musonjoti mupsa, asi mbeu imbza, itusu atibari vajiji vapsa asi mbeu imbza. * (Vonanyi masoko o pasi.) Tinozviitisa kudini? Nguva jese patinobvunja vamweni ngo pamusoro po Umambo hwa Mwari, zvinodari inga tiri kuengejera no kukusa mbeu yakasimwa mu mwoyo mwedu. (Luka 6:45; 8:1) Ngokudaro, patinoramba tecicumaera masoko o Umambo hwa Mwari ‘tinobara mucero no kuvangirira.’

12. (a) Tinojijenyi kubvira ku muezaniso wa Jesu wo muti no mukusi? (b) Cijijo condhoco cinomuita kuti muzwe kudini?

¹² Tinojijenyi ngo muezaniso wa Jesu ngo pamusoro po muti no mukusi? Tajija kuti “kubara mucero” akufiri pa kupurukira kunoita vandhu masoko o Umambo. Zvinofira pa kuti tiri kwenderera mberi kana kuti haiwa pa kucumaera. Pauro wakananga zvakafanana paakasanangura kuti: “Umwe nga umwe anozopocera kudari ngo basa rake.” (1 VaKorinto 3:8) Jehovha anozotipfupa ngo basa redu, haiwa ngo muviyo wo basa redu. Matilda, uwo wakashanda inga piyona ko 20 o makore, wakati: “Zvinondidakajisa kuziva kuti Jehovha anozopfupa kuvangisira kwedu.”

13, 14. Mukuzwirana na VaRoma 10:1, 2, Shanduro yenyika Itsva, ngozvapi zvakaitisa kuti Pauro atame kuregera kucumaera?

¹³ Zvicinyi zvinozotibesera kuti ‘tibare mucero ngo kuvangirira’? Ngatisotesese ngo phedo muezaniso wa Pauro. Tinozviziva kuti Pauro waisuruvara ngokuti vaJudha vakaramba masoko o Umambo. Asi, Pauro aazivi kuregera kuvacumaerira. Iyena wakasanangura mazwiro aainga nawo ngo vaJudha  vondhovo, paakati: ‘Hama, zvandinoda mu mwoyo mwangu no zvandinokumbira kuna Mwari ngo pamusoro pavo, zvokadi ngo zvokuti ivona vaponeswe. Ngokuti ndinovaitira ucapupu wo kuti vanovangisira pa kushandira Mwari, asi avazviiti mukuzwirana no zivo yokadi-kadi.’ (VaRoma 10:1, 2, Shanduro yeNyika Itsva) Waro, ngenyi Pauro wakaramba ecicumaera?

¹⁴ Cokutanga, Pauro wakananga kuti waikwevejehwa kuti acumaere vaJudha ngo kuti ‘ngozvaaida mu mwoyo mwake.’ Zvokadi kamare waida kuti vaponeswe.(VaRoma 11:13, 14) Cocipiri, iyena wakananga kuti ‘wakakumbira kuna Mwari ngo pamusoro pavo.’ Pauro wakadeketera kuti Jehovha abesere muJudha umwe nga umwe kuti aashire masoko o Umambo. Cocitatu, Pauro wakati: ‘Ivona vaivangisira pa kushandira Mwari.’ Pauro waivona zvaushoni pa vandhu zve zvavaikwanisa kuita kuti vashandire Jehovha. Waizviziva kuti vaJudha vaivangisiraya, kangaije vaizoguma pa kuva vajiji vanovangisira va Kristu, inga ndiyena.

15. Tingatevejeresa kudini Pauro? Ipanyi muezaniso.

¹⁵ Tingatevejeresa kudini Pauro? Cokutanga, tinodikana kuda kupsaka vaya ‘vano cido cakanaka co kuva no upenyu ucikaperi.’ Cocipiri, kudeketerera Jehovha kuti abesere vandhu vano mwoyo unoda kuti vapurukire, patinoenda kuvacumaerira. (Maitiro o Vapostori 13:48, Shanduro yeNyika  Itsva; 16:14) Izvo ndizvona zvakaita Silvana, uwo wakashanda inga piyona ko makore anokwana kuita 30. Iyena wakati: “Ndicito ndaenda koocumaera nyumba jo mu ndima yangu, ndinoita mukumbiro kuna Jehovha, ndecikumbira kuti andipe murangariro wakanaka.” Tinodikanavo kukumbira kuti ngirozi jitibesere kuti tiwane vandhu vano cido cokuda kuzwa. (Mateu 10:11-13; Apokalipsi 14:6) Robert, uwo wakashanda inga piyona ko makore anodarika 30, wakati, “Kushanda pamwepo no ngirozi ijo jinoziva zviri kuitika no veno vo muzi zvinodakajisa maningi.” Cocitatu, ngatieje kuvona zvakanaka ku vandhu no kukwanisa kwavo kushandira Jehovha. Umwe mukuru anozwi Carl, wakabhabhatijwa ko makore anodarika 50, wakati: “Ndinoeja kusota ciri cese cinotatija kuti mundhuwo ndi mudakariri, cakadari inga kunyemwerera, mavonekero ake kana mubvunjo waanoita unobva pasi po mwoyo.” Kudari tikaita izvi, ‘tingabara mucero ngo kuvangirira,’ inga ndi Pauro.

16, 17. (a) Tingajijenyi kubvira pa Mucumaeri 11:6? (b) Macumairiro atinoita, anopsasa kudini vaya vanotivona?

¹⁶ Atidikani kukanganwa kuti kucumaera kwatinoita kunobaya mwoyo jo vandhu, pikija zvecivoneka inga kuti apana ari kutipurukira. (Verenganyi Mucumaeri 11:6.) Vandhu vari kutivona. Ivona vanovona kuti takanasa kusimira, takareremera zve tinovonesa ushamwari. Izvo zvingavashamaisa zve mu kufamba ko nguva, pikija vaya avacaitivona mu njira kwayo, vangatanga kutivona ushoni. Hama Sergio na hambzaji Olinda vakavona kuti izvi ndizvonadi.

¹⁷ Hama Sergio vakati: “Ngo ndava yo kuhwaja takagara mazuva ticizivi kwenda pa parajhi. Potakahwirira, vandhu vazinji vakatibvunjisa kudari: ‘Zvicinyi zvakaitika? Taanomazuva ticikamuvoni.’” Vecinyemwerera hambzaji Olinda vakati: “Vafambisi vo karu vaitimusira mukono zve vamweni vaikhuwa veciti, ‘Shandanyi ushoni!’ Vaitokumbira marevhista edu.” Hama Sergio na hambzaji Olinda vakakahamara maningi povakavona mwanarume aciviya pa cikarinya cavo co ucapupu, wovapa mafirori zve wovabongesera ngo basa ravaiita.

18. Ngenyi masunga ‘kubara mucero ngo kuvangirira’?

¹⁸ Mungaita kuti ‘nyara jenyu jitame kuzorora’ ngo kubvunja vamweni ngo pamusoro po Umambo hwa Mwari, imwimwi muno divi rinosisira maningi pa “kuita ufakazi ku vandhu vese.” (Mateu 24:14) Pa musoro pa zvese, mungadakara maningi ngokuti munoziva kuti muri kudakajisa Jehovha. Iyena anoda vese ‘vanobara mucero ngo kuvangirira’!