1, 2. (a) Jesu wakabhuyenyi no vajiji vake pa usiku acito afa? (Vonanyi pikica yo kutanga.) (b) Ngenyi zvinosisira kwatiri kuceukija zvinotiitisa kuti ticumaere? (c) Tinozobhuya ngo pamusoro penyi?

PA USIKU acito afa, Jesu wakabhuya maningi no vapostori vake. Wakavabvunja kuti anovada maningi. Wakavabvunjazve muezaniso wo muti, wotakabhuyaya pa musoro wakapera. Jesu waida kuvangisa vajiji vake kuti varambe ‘vacibara mucero yakawanda,’ kuitira kuti vacungirire pa kucumaera masoko o Umambo.—Johani 15:8.

² Asi, Jesu aazivi kubvunja vajiji vake basi zvavanodikana kuita asi wakavabvunjavo kuti ngenyi vanodikana kuzviita. Wakavapa mathangwe o kuti ngenyi vanodikana kwenderera mberi vacicumaera. Zvinosisiravo kwatiri kuceukija kuti ngenyi tinodikanavo kwenderera mberi tecicumaera. Kurangarira ngo pamusoro pazvo, zvinotikwevejera kuti ticungirire patinonga ‘teciita ufakazi ku vandhu vese.’ (Mateu 24:13, 14) Pa musoro uno, tinozobhuya ngo mathangwe marongomuna o mu Matahwa anotiitisa kuti ticumaere. Cimwenizve, tinozobhuyazve  ngo zvipo zvirongomuna zva Jehovha zvinotibesera kuti tirambe tecibara mucero.

3. (a) Mukuzwirana na Johani 15:8, ngorapi thangwe rinosisira maningi rinotiita kuti ticumaere? (b) Uvha jo muezaniso wa Jesu jinoimirirenyi zve ngenyi kuezanisira uku kunofanera?

³ Thangwe rinosisira maningi rinotiita kuti ticumaere ngo ro kuti tinoda kukuja Jehovha no kucenesa zina rake. (Verenganyi Johani 15:1, 8.) Jesu paakananga ngo muezaniso wo muti, wakaezanisira Jehovha no murimi, uwo anokotora uvha. Jesu wakananga kuti iyena pacake wainga muti zve vateveri vake vainga matavi. (Johani 15:5) Ngokudaro, pa muezaniso uwu, uvha jinoimirira mucero jinobahwa ngo vajiji va Jesu, kana basa ro kucumaera ro vanoita. Jesu wakabvunja vapostori vake kudari: “Baba wangu vanozokojwa mukabara mucero yakawanda.” Muti paunobara uvha jakanaka, unokuja murimi wawo. Mu njira yakafanana, patinoita zvatinokwanisa pa kucumaera masoko o Umambo, tinopa nderemejo kana kukuja Jehovha.—Mateu 25:20-23.

4. (a) Tingacenesa kudini zina ra Mwari? (b) Munozwa kudini ngo mukana wamunawo wo kucenesa zina ra Mwari?

⁴ Zina ra Mwari rakacena. Apana catingaita kuti ricenesese. Waro, tingacenesa kudini zina ra Mwari patinonga tecicumaera? Vonanyi zvakananga muporofita Isaia: ‘Jehovha wo hondo—ndiyena anodikana kuita wakacena.’ (Isaia 8:13, Shanduro yeNyika Itsva) Tinocenesa zina ra Mwari, Jehovha, patinorivona inga rakakura pa mazina ese zve patinobesera vamweni kuti vazwisise kuti rakacena. (Mateu 6:9) Inga muezaniso, patinojijisa vamweni ngo pamusoro po mugariro jinoshamaisa ja Jehovha no cidisiso cake kuno vandhu kuti vapone kwenda no kwenda mu Paradhiso, tinovabesera kuvona kuti zviro zvese zvakashata zvakananga Sathana ngo pamusoro pa Jehovha ngo zvokunyepa. (Genesi 3:1-5) Tinocenesazve zina ra Mwari patinobesera vamweni kuti vazive kuti Jehovha anofanera “kuaxira goja, nderemejo no simba.” (Apokalipsi 4:11) Rune, uwo wakashanda inga piyona ko 16 o makore, wakati: “Kuziva kuti ndino mukana wo kuva capupu co Musiki wo mudenga no pasi zvinondidakajisa maningi. Zvinondipa cido co kuramba ndecicumaera.”

5. (a) Ngorapi thangwe rinotiitisa kuti ticumaere rakanangwa pana Johani 15:9, 10? (b) Jesu wakabeseresa kudini vajiji vake kuti vazwisise dikano yo kucungirira?

⁵ Verenganyi Johani 15:9, 10. Thangwe rocipiri rinotiitisa kuti ticumaere masoko o Umambo ngo rokuti tinoda Jehovha na Jesu. (Marco 12:30; Johani 14:15) Jesu wakabvunja vajiji vake kuti vanodikana ‘kugara mu rudo hwake.’ Ngenyi Jesu wakananga izvi? Ngokuti iyena waizviziva kuti vateveri vake vaizodikana kucungirira kuti vararame inga maKristu okadi-kadi. Zvokadi kamare, pana Johani 15:4-10, tinovona kuti Jesu wakashandisa gama rokuti “garanyi”  kazinji kuti abesere vajiji vake kuzwisisa dikano yo kucungirira.

6. Tingatatijisisa kudini kuti tinoda kugara mu rudo hwa Kristu?

⁶ Tingatatijisisa kudini kuti tinoda kugara mu rudo hwa Kristu no kuva tinotendehwa ndiyena? Ngo kumuzwira. Jesu ari kutikumbira basi kuti tiite zvaakaita. Iyena wakati: “Inini ndakateveja mupango ya Baba wangu no kuva mu rudo hwavo.” Jesu wakatigajira muezaniso.—Johani 13:15.

7. Kuzwira kwakabatana kudini no rudo?

⁷ Jesu wakajekesa kuti kuzwira kwakabatana kamare no rudo, paakati: “Ndiani anopurukira mupango yangu no kuiteveja, ngaanondida bzokadi.” (Johani 14:21) Mupango ja Jesu jaibva ka Baba wake, ngo kudaro, patinozwira mupango wa Jesu wo kucumaera, tinotajijavo kuti tinoda Jehovha. (Mateu 17:5; Johani 8:28) Zve patinotatija Jehovha na Jesu kuti tinovada, vanozotiita kuti tirambe tiri mu rudo hwavo.

8, 9. (a) Ngorapi thangwe rimweni rinotiitisa kuti ticumaere? (b) Magama a Jehovha anowanika pana Ezekieli 3:18, 19 no 18:23 anotikwevejeresa kudini kuti tirambe tecicumaera?

⁸ Thangwe rocitatu rinotiita kuti tirambe tecicumaera ngo rokuti tinoda kungwaja vamweni ngo kuvia ko njiku ya Jehohva. Mu Bhaibheri, Nowa anosananguhwa inga ‘mucumaeri.’ (Verenganyi 2 Pedru 2:5, Shanduro yeNyika Itsva.) Ndambi icito yavia, masoko a Nowa ku vandhu aidikana kubatanija ngwajo ngo pamusoro po kuparajwa kwaizoviya. Ngenyi tinonanga kudaro? Ngokuti Jesu wakati: “Kudari inga mazuva ao, usore hucito hwakaza, vandhu vaiha, vaimwira, vairovorana ngocavo, mbhera njiku ya Noa yaakanghwina mu ngarava huru, ivona avazivi kubziziva mbhera kuguma ko usore hwakakukuta vese: ngo maitiro o bzinozoita pa kuvia ko Mwana wo Mundhu.” (Mateu 24:38, 39) Pikija vandhu vazinji avacaipurukira zvainangwa ndi Nowa, iyena no kugondeka kwese wairamba ecicumaira masoko o ngwajo aakapuwa ndi Jehovha.

⁹ Nyamasi uno, tinocumaera masoko o Umambo anopa mukana vandhu kuti vajije ngo zvinozoita Mwari kumbejiyo kuitira vandhu vese. Inga Jehovha, tinoda kuti vandhu vateye jeve pa masoko atiri kucumaera zve ‘vawane uhomi.’ (Ezekieli 18:23) Patinocumaera nyumba ngo nyumba no pa ndau yakawanda vandhu, tinongwaja vandhu vazinji vatinokwanisa kuti Umambo hwa Mwari  uri kuviya zve unozoparaja nyika ino yakashata.—Ezekieli 3:18, 19; Danieli 2:44; Apokalipsi 14:6, 7.

10. (a) Ngorapi thangwe rinotiitisa kuti ticumaere rakanangwa pana Mateu 22:39? (b) Pauro na Sira vakabesera kudini mungwariri wo mu kadheya ku Firipo?

¹⁰ Thangwe ro cirongomuna rinotiitisa kuti tirambe tecicumaera ngo ro kuti tinoda vandhu. (Mateu 22:39) Rudo wondhowo unotibesera kuti tirambe tecicumaera ngokuti tinoziva kuti kangaije ivona vangacinja murangariro apo mugariro wavo ukacinja. Inga muezaniso, vavengi vakadira Pauro na Sira mu kadheya ku dhorobha ro Firipo. Asi, pakati po usiku, kwakaitika mudhuma ngo pasi wakaita kuti musuvo jo kadheya jifununguke. Mungwariri wakathya maningi, ecirangarira kuti vasungwi vatiza zvokuti waida kuzviuraya. Asi, Pauro wakamukamisa zve wokhuwa eciti: “Ucajiuraya.” Mungwariri wakabvunjisa kudari: “Ndoitenyi kuti ndiponeswe?” Pauro na Sira vakamubvunja kudari: “Tendai Tenji Jesu Kristu, unozoponeswa.”—Maitiro o Vapostori 16:25-34.

11, 12. (a) Ndhorovondho yo mungwariri wo mu kadheya, inotijijisenyi ngo pamusoro po mushando wedu? (b) Ngenyi tinoda kuramba tecicumaera?

¹¹ Ndhorovondho yo mungwariri wo mu kadheya inotijijisenyi ngo pamusoro po basa ro kucumaera? Vonanyi kuti mungwariri uwo wakacinja murangariro wake no kukumbira besero pasure po kuitika mudhuma ngo pasi. Mu njira yakafanana, vandhu vamweni vacikadi kupurukira masoko o mu Bhaibheri vangacinja murangariro wavo no kupsaka besero panoitika ciri cese cakashata mu upenyu hwavo. Inga muezaniso, vamweni vangabatika ngokuti varuza basa kana varambana. Vamweni vangasuruvara ngokuti vari kunesana no dhendha inonesa kana ari wese wo vanoziva wafa. Panoitika zviro izvi, vandhu vangatanga kuzviita mubvunjo jo mu upenyu, mubvunjo jo kuti cingozvo avazivi kumbojirangarira. Vangatorangarira kudari: ‘Zvicinyi zvandinodikana kuita kuti ndiponeswe?’ Ivona vangada kupurukira masoko edu o vetero pa bvaza yo kutanga mu upenyu hwavo.

¹² Kudari tikaramba tecicumaera no kugondeka kwese, tinozowanika takanasiririka, vandhu pavanonga vecida kuashira embezero yatinopa. (Isaia 61:1) Charlotte, uwo wakashanda inga piyona ko 38 o makore, wakati: “Vandhu nyamasi uno, vari kupsejeka. Ivona vanodikana kuva no mukana wo kuzwa masoko akanaka.” Ejvor, uwo wainga piyona ko 34 o makore, wakati: “Kupinda kare, nyamasi uno, vandhu vazinji vanojizwa vakacamwa. Ndinoda maningi kuvabesera. Izvo zvinondikwevera kuti ndicumaere.” Zvakajeka kuti, rudo ku vandhu ndi thangwe rakanaka maningi rinotiitisa kuti tirambe tecicumaera!

13, 14. (a) Ngocapi cipo cakanangwa pana Johani 15:11? (b) Tingavisa kudini no mudakaro inga wakava na Jesu? (c) Mudakaro unotibesera kudini mu mushando wedu?

¹³ Pa usiku Jesu acito afa, wakanangavo ngo zvipo zvaizobesera vapostori vake kuti varambe vacibara mucero. Ngozvapi zvipo zvondhozvo zve zvingatibesera kudini nyamasi uno?

¹⁴ Cipo co mudakaro. Kucumaera i muthwaro here? Haiwa. Jesu naapera kunanga muezaniso wo muti, wakananga kuti patinocumaera tinozowana mudakaro wake.  (Verenganyi Johani 15:11.) Zvinokwanisika kudini? Ceujanyi, pa muezaniso wa Jesu, iyena wakazviezanisira pacake kuva muti zve vajiji vake kuva matavi. Matavi anoashira kumwa no zvinodiwa basi akaramba ari pa muti pawo. Mu njira yakafanana, tingava no mudakaro inga wakava na Jesu kudari tikaramba takabatana na iyena no kutevera ngo phedo mudanyu jake. Tinozova no mudakaro waanawo, mudakaro unovepo ngo kuita kuda ka Mwari. (Johani 4:34; 17:13; 1 Pedru 2:21) Hanne, uwo wakashanda inga piyona ko 40 o makore, wakati: “Mudakaro wandinowana nguva jese mu mushando unondiita kuti ndirambe ndiri mu basa ra Jehovha.” Mudakaro, unozotipa simba ro kuramba tecicumaira pikija vandhu vazinji avatipurukiri.—Mateu 5:10-12.

15. (a) Ngocapi cipo cakanangwa pana Johani 14:27? (b) Runyararo unotibeseresa kudini kuti tirambe tecibara mucero?

¹⁵ Cipo co runyararo. (Verenganyi Johani 14:27.) Pakutanga ko usiku Jesu acito afa, iyena wakati kuno vapostori vake: “Ndinomupa runyararo hwangu.” Runyararo hwa Jesu unotibesera kudini kuti tirambe tecicumaira? Patinoramba tecicumaira, tinova no runyararo ngokuti tinoziva kuti tiri kuita kuti Jehovha na Jesu vadakare. (Nduyo 149:4; VaRoma 5:3, 4; VaKolosi 3:15) Ulf, uwo wakashanda inga piyona ko 45 o makore, wakati: “Basa ro kucumaera rinondirembesa, asi rinondipa mudakaro wokadi-kadi no revo yokadi ku upenyu hwangu.” Tinodakara ngo kuva no runyararo ucikaperi!

16. (a) Ngocapi cipo cakanangwa pana Johani 15:15? (b) Vapostori vaizorambisa kudini vari shamwari ja Jesu?

¹⁶ Cipo co ushamwari. Jesu naapera kubvunja vapostori vake kuti waida kuti vave no mudakaro, wakasanangura kuti zvaisisira maningi kuti ivona vatatije rudo wo kujiramba. (Johani 15:11-13) Perapo wakati: “Ndamudana xamwari.” Cipo cinosisira cakadini co kuva shamwari ja Jesu! Asi, vapostori vaizorambisa kudini vari shamwari jake? Jesu wakasanangura kudari: ‘Endanyi zve rambanyi mucibara mucero.’ (Verenganyi Johani 15:14-16, Shanduro yeNyika Itsva.) Ngo magama amweni, ngatirambe tecicumaera. Ko makore maviri Jesu acito wananga izvi, iyena wakananga kudari kuno vapostori vake: “Pomunopinda ndipona, ‘tokotesanyi kuti Umambo hwo mugore huri phedo.’” (Mateu 10:7) Ngo iyo ndava, pa  usiku acito afa, Jesu wakavangisa vajiji vake kuti vacungirire mu basa ro kucumaira. (Mateu 24:13; Marco 3:14) Zvokadi kamare, Jesu waizviziva kuti kuzwira mupango wake akucaizoreruka. Asi, vaidikana kuzviita no kuramba vari shamwari jake. Kuitisa kudini? Vaizobesereka ngo cipo cimweni.

17, 18. (a) Ngocapi cipo cakanangwa pana Johani 15:7? (b) Cipo condhoco cinobesera kudini vajiji va Jesu? (c) Ngozvapi zvipo zvinotibesera nyamasi uno?

¹⁷ Cipo co kudavihwa mukumbiro jedu. Jesu wakati: “Kumbiranyi bzomunoda, munozopuwa.” (Johani 15:7, 16) Cigondiso ca Jesu cakavangisa maningi vapostori vake! * (Vonanyi masoko o pasi.) Vapostori avacainasa kuzwisisa kuti Jesu ngo kukasika waizofa. Asi, kufa kwake akucairevepi kuti ivona avacaizova no besero. Jehovha wainga wakanasirika kuti adavire mukumbiro javo no kuvabesera mu basa ro kucumaira. Iyena wakaita kudaro kamare. Pasure po kufa kwake, vapostori vakadeketerera Jehovha kuti avape cicunge zve Jehovha wakadavira mukumbiro javo.—Maitiro o Vapostori 4:29, 31.

¹⁸ Ndizvonavo zvondhozvo na nyamasi. Patinocungirira mu basa ro kucumaera, tinoramba tiri shamwari ja Jesu. Zve tinova no cokwadi co kuti Jehovha wakanasirika kuti adavire mukumbiro jedu kuitira besero patinosongana no cineso pa kucumaera. (VaFilipi 4:13) Tinobonga maningi ngokuti Jehovha anodavira mukumbiro jedu zve tino Jesu inga shamwari yedu. Zvipo izvi zvinobva ka Jehovha, zvinotivangisa kuti tirambe tecibara mucero.—Jakobo 1:17.

19. (a) Ngenyi tinoramba tecicumaera? (b) Zvicinyi zvinotibesera kuti tipejise basa rotakapuwa ndi Mwari kuti tiite?

¹⁹ Pa musoro uno, tajija ngo pamusoro po mathangwe marongomuna anotiita kuti tirambe tecicumaera: Kuti tikuje Jehovha no kucenesa zina rake, kuti titatije rudo hwedu kuna Jehohva na Jesu, kuti tingwaje vandhu no kutatija kuti tinovada. Tajijazve ngo zvipo zvirongomuna: Mudakaro, runyararo, ushamwari no kudavihwa mukumbiro jedu. Zvipo izvi zvinotivangisa kuti tipejise basa rotakapuwa ndi Mwari kuti tiite. Jehovha anodakara maningi paanotivona kuti tiri kuita no patinokwanisa kuti tirambe ‘tecibara mucero’!