1. Ngenyi kubhabhatijwa kwakadari inga mudanyu unosisira? (Vonanyi pikica yo kutanga.)

MAKORE ese zviuru zvo mazana zvo vajiji vo Bhaibheri zviri kubhabhatijwa. Vazinji vavo majaha no vasikani, vaaruki pikija vaya vaciri vadoko kamare. Zvingaita kuti ivona vakabahwa mu cokwadi. Uri umwe wavo here? Kudari umwe wavo, wakaita ciro caushoni. MuKristu wese anodikana kubhabhatijwa. Zve rubhabhatijo unodiwa kuitira kuwana ruponeso no kurarama nokucingaperi.—Mateu 28:19, 20; 1 Pedru 3:21.

2. Ngenyi amudikani kuthya kuzvipira kuna Jehovha?

² Pamunobhabhatijwa, Jehovha anotanga kumukomborera mu njira zinji. Asi imwimwi munovavo no muthwaro mupsa. Muthwaro wapi? Mu njiku yo kubhabhtijwa kwenyu, hama yakaita hurukuro yo rubhabhatijo hwenyu, yakamubvunjisa kudari: “Makacijikira pa muripo wa Jesu Kristu, makakhauya ku zvishaishi zvenyu, mozvipira kamare kuna Jehovha kuti muite kuda kwake here?” Makadavira kuti hina. Makagondisa  kuda Jehovha zve moita kuti kumushandira kwenyu kuve ciro cinosisira maningi mu upenyu hwenyu. Munodikana kukhauya ngo kuita cigondiso cikuru ici here? Zvokadi kamare haiwa! Narini amudikani kukhauya ngo kusia kuti Jehovha atungamirire upenyu hwenyu. Vese vaya vacikazivi Jehovha vari ku divi ro nyika ya Sathana. Dhiabhu aavataji nee aatomutajivo. Zvokadi kamare, iyena waizodakara maningi kudari imwimwi mukaruza vetero yenyu yo kupona kwenda no kwenda ngokuti maakudivi rake zve maramba Jehovha.

3. Jehovha anomukomboreresa kudini ngo ndava yo kujipira kwenyu kwaari?

³ Rangariranyi ngo pamusoro po makomborerere ari kuita Jehovha ngo pamusoro po kujipira kwenyu no kubhabhatijwa. Makapa upenyu hwenyu kuna Jehovha, ngokudaro mungananga no kuthemba kwese kuti: “Tenji Mwari ana inini: andizothi narini! Mundhu angandiitira cinyi?” (Nduyo 118:6) Akuna rukujo hukuro kupinda kuva ku divi ra Mwari no kuziva kuti iyena anodada ndimwi.

4, 5. (a) Ngenyi tingananga kuti kuzvipira ndi muthwaro wo mundhu ega? (b) MaKristu o mupira wese vanosongana no muejo japi?

⁴ Inga muKristu wakabhabhatijwa, ushamwari hwenyu na Jehovha auzivi kudari inga ndhaka yo ukama kana kupuwa utaka wo ndau. Pikija kudari muciri kurarama no vabari venyu, ushamwari hwenyu na Jehovha i muthwaro wenyu mwega. Ngenyi zvinosisira kuceukija izvi? Apana na umwe wedu anonasa kuziva kamare zvinozoitika no gonda redu kumbejiyo. Inga muezaniso, zvingaita kuti makabhabhatijwa mucito mava muaruki. Asi wari maamuaruki, maano mazwiro amweni no zvineso zvipsa. Umwe musikane waamuaruki wakati: “Kazinji mwana angaramba kuva Capupu ca Jehovha basi ngokuti aazowani runyararo kudari pa njiku yo kubahwa wotama kuva no bhoro ku cikora. Asi, makore paanonga ecipera, panozovanga muejo wo kuita zvo vatano, iyena anodikana kuva anokhohwa kamare kuti kuzwira mutemo ja Jehovha nguva jese kwakanaka maningi.”

⁵ Asipi basi majaha no vasikane vanozosongana no zvineso zvipsa. Pikija vaya vanobhabhatijwa vaamadhodha gonda ravo rinoejwavo mu njira yovacikaveteri. Muejo javo jingavha mu mucadho wavo, uhomi hwavo kana ku basa ravanoita. Azvinenyi takura zvakadini, umwe na umwe wedu tinozodikana kuva takagondeka mu njira zinji jakasiana.—Jakobo 1:12-14.

6. (a) Kunanga kuti kuzvipira kwenyu kuna Jehovha akuezanisihwi, zvinoda kunangenyi? (b) Zvicinyi zvatingajija kubvira pa VaFilipi 4:11-13?

⁶ Kuitira kumubesera kuti murambe makagondeka, ceukijanyi kuti cigondiso comakaita kuna Jehovha aciezanisihwi. Izvi zvinoreva kuti makagondisa ku Mukuru-kuru wo Zvese kuti munozomushandira azvinenyi zvinozoitika, pikija shamwari kana vabari vangu vakatama kuzviita. (Nduyo 27:10) Pa mugariro jese iji, kumbiranyi besero ra Jehovha kuti mukwanirise cigondiso cake.—Verenganyi VaFilipi 4:11-13.

7. Zvinorevenyi kubatira ruponeso hwenyu “mecitetemera no kuthya”?

⁷ Jehovha anoda kuti tive shamwari jake. Asi zvinoda kuvangisira kuti ushamwari uwu urambe wakavanga zve tibatire ruponeso hwedu. Ngo iyo ndava, VaFilipi 2:12 inoti: “Batiranyi ruponeso hwenyu, mecitetemera  no kuthya.” Izvi zvinoreva kuti tinodikana kunasa kusotesesa ngo pamusoro po kuti tingakhwederesa kudini phedo na Jehovha zve tingarambisa kudini takagondeka azvinenyi zvinozoitika. Azvikwani basi kunanga kuti tinozozviita. Ceukijanyi kuti pikija vaya vakashandira Jehovha ko makore mazinji avazivi kuramba vakagondeka. Zviro zvapi zvinoshanda zvingamubesera kuti mubatire ruponeso hwenyu?

8. Jijo yo mundhu ega inobatanijenyi? Zve ngenyi inosisira?

⁸ Kuti tive shamwari ya Jehovha, tinodikana kumupurukira zve no kuvereketa naye. Njira zinji jatingapurukira Jehovha i kujija Bhaibheri. Izvi zvinobatanija kuverenga no kurangarijisisa Soko ra Mwari no mabhuku akacinjikira mu Bhaibheri. Asi kujija Bhaibheri asipi kuviga masoko mu musoro basi inga zvaungaita pa kunasirira kuitira ezami kucikora. Mukusiana, kwakadari inga hwendo hwamunoita mokwanisa kuvona zviro zvizinji ngo pamusoro pa Jehovha. Munozokwedera kuna Mwari zve iyena anokwederavo kwamuri.—Jakobo 4:8.

9. Ngoapi mathurusi ari kumubesera pa jijo yenyu yo mundhu ega?

⁹ Sangano ra Jehovha rinopa mathurusi mazinji angamubesera mu urongwa hwenyu yo kujija. Inga muezaniso, kuno mutevejwana unodanijwa kudari “Nyaya dzomuBhaibheri Dzokudzidza” mu divi rinoti “Vari kuyaruka” divi ro mu jw.org kuti rimubesere kushandisa zvamunojija mu ndhorondho jo Bhaibheri. Mu jw.org, mungawanazve ndhungamiriro kuitira kujija pa divi rinoti “Bhaibheri Rinojijisenyi Kamare?”  Izvi zvingamubesera kuti muvake gonda renyu no kusanangura zvitendhwa zvenyu ku vamweni. Mungawanazve mazano amweni kuitira jijo yo mundhu ega mu musoro unoti “Vechiduku Vanobvunza Kuti . . . Ndingaita Sei Kuti Ndinakidzwe Nokuverenga Bhaibheri?” mu mujeura wa Mukai! wa Nyahwiriri wo 2009 kuujija no kuurangarijisisa kunosisira kuitira kubatira ruponeso hwenyu.—Verenganyi Nduyo 119:105.

10. Ngenyi muKristu wakabhabhatijwa anodikana kuita mukumbiro?

¹⁰ Patinojija Bhaibheri, tinopurukira Jehovha zve patinoita Mukumbiro, tinobhuya naye. Atidikani kuvona mukumbiro inga cirovejeso haco kana kuti ‘mavonero aushoni’ kuti tikwanise kubudirira. Mukumbiro i kubhuisana kokadi-kadi no Musiki wedu. Rangariranyi basi: Jehovha anoda kuti tizwe zvaanonanga! (Verenganyi VaFilipi 4:6.) Ngokudaro pamunovona kuti muri kuthyimwa-thyimwa ngo tanghwe riri rese, Bhaibheri rinotibvunja kudari: “Thurai muthwaro wako kuna Tenji Mwari.” (Nduyo 55:23) Zviuru no zviuru zvo hama zvingamubvunja kuti mbhangiro iyi yakavabesera kamare. Ingatomubeseravo!

11. Ngenyi nguva jese tinodikana kubonga Jehovha?

¹¹ Asi, atidikani kuita mukumbiro basi patinoda besero ra Jehovha. Bhaibheri rinoticeukija kuti: “Itanyi vandhu vanobonga.” (VaKolosi 3:15) Nguva jimweni, tinokayakaya maningi ngo zvineso zvedu zvotiita kuti titame kuvona zviro zvese zvaushoni zvatinazvo. Ngokudaro, ejanyi kuita izvi basi: Njiku jese, rangariranyi ngo pamusoro po zviro zvitatu zvaushoni zvamunovona kuti zvinofanera kubonga zve bonganyi Jehovha ngo pamusoro pazvo. Umwe muaruki anodanwa Abigail, uwo wakabhabhatijwa paainga no 12 o makore, wakati: “Ndinozwa kuti Jehovha anofanera kubonga kwedu kupinda mundhu umweni hake mudenga no pasi. Tinodikana kumubonga ngo zvese zvaanotipa mazuva ese.” Nguva jimweni Abigail anozviita mubvunjo uwu waakazwa wokuti: “Kudari ndikamuka mangwana ndobonga Jehovha basi ngo zviro zvaandiitira nyamasi, zvicinyi zvandinozowana?” * (Vonanyi masoko o pasi.)

12, 13. Makaejesa kudini pacenyu kuti Jehovha wakanaka zve ngenyi zvinosisira kurangarira mabesere akamuita Jehovha?

¹² Jehovha wakabesera Mambo Dhavhidhi kuti acungirire pa zvineso zvizinji. Ngokudaro, Dhavhidhi wakavereketa kubvira mu zvakamuiitikira kamare paakati: “Ejanyi, munozovona unaki hwa Tenji Mwari; anomucena mundhu anojiviga mwaari.” (Nduyo 34:9) Vhesi iyi inovonesa kuti tinodikana kueja kuti tivone unaki hwa Jehovha pacedu. Pamunoverenga Bhaibheri no mabhuku edu zve moenda kumusongano, munojija kuti Mwari ari  kubesera kudini vamweni kuti varambe vakagondeka. Asi, kuti ushamwari hwenyu na Jehovha ugume pakuvanga, munodikana kuvona kuti Jehovha ari kumubesera kudini. Imwimwi pacenyu makamboejesa kudini kuti muvone unaki hwa Jehovha?

¹³ MaKristu ese akaeja unaki hwa Jehovha mu njira imwe inosisira. Iyena wkatikoka kuti tikhwedere kwaari no ku Mwana wake. Jesu wakati: “Akuna anoza kondiri acakakwevehwa ndi Baba vakandituma.” (Johani 6:44) Munozwa kuti Jehovha wakamukwevera kwaari here? Kana kuti, munorangarira kudari, ‘Jehovha wakakwevera majibaba angu kwaari zve inini ndirikuvatevera basi’? Ceukijanyi kuti pomakajipira kuna Jehovha zve mobhabhatijwa, makava no ushamwari hwenyu pacenyu unosisira naye. Bhaibheri rinotibvunja kudari: “Ndiani anoda Mwari, anozivika ndi Mwari.” (1 VaKorinto 8:3) Ngokudaro mazuva ese reremejanyi ndau yamakapuwa ndi Jehovha mu sangano rake.

14, 15. Basa renyu ro kucumaera ringamubesera kudini kuti muve no gonda rakavanga?

¹⁴ Munovonazve unaki hwa Jehovha paanomupa cicunge kuti mubhuye ngo pamusoro po gonda renyu ku vamweni, azvinenyi dangani ndi mu mushando kana ku cikora. Zvinganesa kucumaera vadoni vo kucikora. Munganeseka ngo pamusoro po madavirire avangaita. Zvingatothyisa kusanangura zvitedhwa zvenyu pano vandhu vazinji. Zvicinyi zvingamubesera?

¹⁵ Rangariranyi ngo pamusoro po kuti ngenyi munotenda zvamunotenda. Kudari Zvinhu Zvinobatsira Pakudzidza pa mutevejwana wo mu jw.org unowanika mu ndumi yenyu, ivanyi no cokwadi co kuti muri kuzvishandisa. Iwona ungamubesera kuti murangarire ngo pamusoro po zvitendhwa zvenyu, ngenyi munozvitenda zve mungazvisanangurisa kudini kuna vamweni. Pamunova no cokwadi co kuti munozvithemba kamare zve makanasa kunasiririka, munozoda kupa ucapupu ngo pamusoro pa Jehovha.—Jeremia 20:8, 9.

16. Zvicinyi zvingamupa cicunge kuti mubhuye ngo pamusoro po zvitendhwa zvenyu?

¹⁶ Pikija makanasa kunasiririka kamare, mungabatika ngo pamusoro po kusanangura zvitendhwa zvenyu. Imwe hambzaji ina makore 18, iyo yakabhabhatijwa no 13 o makore, yakati: “Ndinozviziva zvandinotenda, asi nguva jimweni zvinodinesa maningi kuita kuti murangariro wangu uve magama.” Ngokudaro iyona inoeja kubhuya ngo pamusoro po cokwadi mu njira yo cibarihwe zve yakasujunuka. Iyona yakati: “Vadoni vangu vo cikora vanobhuya ngo zvavanoita vakasujunuka. Ndaidikanavo kuita zvondhozvo. Ngokudaro, ndinoda kunanga zvakaitika, zviro zvakadari inga, ‘njiku imweni ndainga ndecijijisa Bhaibheri, zve . . . ’ Ndinoenderera mbheri no ndhorovondho yangu. Pikja hazvo kuti fundo rakona aricaengepi ro Bhaibheri, vamweni vanodakarira zvizinji ngo pamusoro po zvandinojijisa ngo pamusoro po Bhaibheri. Nguva jimweni vanoita mubvunjo ngo pamusoro pazvo. Pandinoramba ndicishandisa maitiro awo, zvinova zvecireruka. Pasure pazvo, nguva zinji ndinojizwa ushoni!”

17. Zvicinyi zvingamubeserazve kuti mubhuye no vamweni?

 ¹⁷ Vamweni pavanozwa kuti munovataja zve munovareremeja, zvinozova zvakareruka kuti ivona vanozomureremejevo zve vanoreremeja zvitendhwa zvenyu. Olivia, uwo ana 17 o makore zve wakabhabhatijwa paainga aciri mudoko kamare, wakati: “Nguva jese ndinothya kushandisa Bhaibheri patinonga tecibhuisana, vandhu vaizondivona inga ndakasiana.” Perapo wakatanga kuvona zviro mu njira yakasiana. Kunja ko kurangarira basi kuthya kwake, iyena wakati: “Majaha no vasikane vazinji avazivi ciri cese ngo pamusoro po Zvapupu zva Jehovha. Ndisu basi Zvapupu zvinovoneka pambhene. Ngokudaro, njira yatingaita ndiyona zviro ingapsasa njira yavangadavira. Kudari itusu atikwanisi kuvereketa kana kuti tikava no cineso co kubhuya ngo pamusoro po gonda redu kana kuti kucema patinonga tecibhuya keni? Zvikaitika ivona vanozotivona inga kuti atizvikuje ngo zvatiri. Ivona vangatodavira mu njira icikazivi kunaka mwoyo ngo kutama kwedu kuzvithemba. Ngokudaro, tikabhuya takarerukihwa zve tecizvithemba ngo pamusoro po zvitendhwa zvedu, totozviita inga divi ro kubhuisana kwedu, zvinozova zvakareruka kuti vatireremeje.”

18. Zvicinyi zvamunodikana kuita kuti mubatire ruponeso hwenyu?

¹⁸ Tavona kuti i muthwaro mukuru kushandira kuitira ruponeso hwenyu. Kuite tiite izvi, tinodikana kuverenga no kurangarijisisa Soko ra Mwari, kuita mukumbiro kuna Jehovha no kunasa kurangarijisisa njira ingamubesera pacenyu. Kuita zviro izvi zvingamubesera kuti muthembe kamare kuti Jehovha ndi Shamwari yenyu. Izvi zvingaita kuti mude kuvereketa no vamweni ngo pamusoro po zvitendhwa zvenyu.—Verenganyi Nduyo 73:28.

19. Ngenyi kuvangisira kwatinoita tecibatira ruponeso hwedu kuno mutengo?

¹⁹ Jesu wakananga kudari: ‘Ndiani anoda kunditevera, ngaajirambe, atore danda rake ro kutambujikira, arambe ecinditevera.’ (Mateu 16:24, Shanduro yeNyika Itsva) Hina, kuti titevere Jesu, muKrsitu umwe nga umwe anodikana kuzvipira kuna Jehovha zve wobhabhatijwa. Asi, uku i kutanga ko upenyu unoshamaisa zve izvi zvinozomutungamirira ku upenyu ucikaperi mu nyika impsa ya Mwari. Ngokudaro, rambanyi muciita zvese zvamunokwanisa kuti mubatire ruponeso hwenyu!