1, 2. Ngenyi vabari vamweni vanokaya-kaya apo vana vavo vanoda kuzvipira pacavo kuna Jehovha zve vo bhabhatijwa?

MAZANA o zviuru zvo vajiji vo Bhaibheri ari kuzvipira pacao kuna Jehovha zve oguma pa kubhabhatijwa. Vazinji vavo majaha no vasikane vakarehwa mu cokwadi zve vanosana kuva no upenyu wakanakisisa. (Nduyo 1:1-3) Kudari muri mubari wo ciKristu, kangaije muri kuvetera njiku inozobhabhatijwa mwana wenyu worume kana wokaji.—Ezanisanyi no 3 Johani 4.

² Pikija zvakadaro, mungakaya-kaya. Kangaije makambovona majaha no vasikane vamweni ecibhabhatijwa asi perepo votanga kukanakana ngo pamusoro po kupona mukuzwirana no ndhungamiro ja Jehovha kuti kwakanakadi kamare. Vamweni vanotogumira pa kusia cokwadi. Ngokudaro mungakaya-kaya ngo kuvona mwana wenyu ecitanga kushandira Jehovha asi iyena oruza rudo wainga nahwo no cokwadi. Mwana wenyu angaguma pakuva inga maKristu o ku Efeso vo muzana ro kutanga ro makore. Jesu wakavabvunja kuti: “Wakarega rudo hwako  hwokutanga.” (Apokalipsi 2:4) Mungabesera kudini mwana wenyu kuti arambe ano rudo hwakavanga zve ‘awane ruponeso’? (1 Pedru 2:2) Tingajija ngo muezaniso wa Timoti.

3. (a) Zvicinyi zvakaita Timoti kuti ave muKristu, zve wakaitenyi no zvaakajija? (b) Ngozvapi zviro zvitatu zvakananga Pauro zvainga zvakajija Timoti?

³ Mupostori Pauro wakabvakacira Ristra pa vhaza yo kutanga mu gore ra 47. Kangaije Timoti wainga waa pa ndanga yo muaruki, paakajija ngo pamusoro po majijisiro a Jesu. Iyena waishandisa zvaijija, zve pa makore maviri akazotevera iyena wakazotanga kufamba na Pauro. Pakandopera 16 o makore, Pauro wakatarira Timoti kuti: “Vangai pa bzese bzo wakajija no kudavira kuti bziri bzokadi. Unoziva Matahwa a Mwari [Matahwa o ciHebheri], kubva udoko hwako; iwona ano simba ro kukupa uzivi hunogumisa ku ruponeso, ngo ndava yo kutenda Kristu Jesu.” (2 Timoti 3:14, 15) Vonanyi kuti Pauro wakati kuna Timoti (1) Unoziva matahwa a Mwari, (2) wozvidavira kuti bziri bzokadi zviro zvowakajija, zve (3) zvokupa uzivi hunogumisa ku ruponeso ngo ndava yo kutenda Kristu Jesu.

4. Ngozvapi zvamunoshandisa pa kujijisa vana venyu vaciri vasikane kana mujaha? (Vonanyi pikica yo kutanga.)

⁴ Inga mubari wo ciKristu, munoda kuti mwana wenyu azive matahwa a Mwari, nyamasi uno awo anobatanija Matahwa o ciHebheri no Matahwa o ciGiriki o ciKristu. Pikija ari mujaha kamare angajija ngo pamusoro po vandhu no zviitiko zvo mu Bhaibheri. Sangano ra Jehovha rinopa mabhuku, mabhurushura, zve no mavhidhio akawanda angashandiswa ngo vabari kuti vabesere vana vavo. Pazvanangwari apa ngozvapi zvinowanika mu ndumi yenyu? Mwana wenyu anoda kuziva kuti zvicinyi zviri mu Bhaibheri no kuenderera mberi ecivaka no kuvangisa ushamwari hwake na Jehovha.

5. (a) Zvinoda kurevenyi “kudavira kuti bziri bzokadi”? (b) Tingazvizivisa kudini kuti Timoti wakadavira kuti ndi okadi masoko akanaka ngo pamusoro pa Jesu?

⁵ Azvikwani basi kujijisa mwana ngo pamusoro po vandhu no zviitiko zvo mu Bhaibheri. Ceujanyi kuti Timoti wakaguma pa “kudavira kuti bziri bzokadi.” Masoko o ciGiriki akashandiswa ndi Pauro apa anoreva “kuva no gwinyiso” kana “kuva anokhohwa zve nokuti zvakati kuti ngo bzokadi.” Timoti waiziva Matahwa o ciHebheri “kubva udoko” hwake, kunanga kuti, kubvira pa nguva yaainga ari mujaha kamare. Pa kufamba ko nguva, wakaguma pakukhohwa kuti Jesu wainga Mesiya. Gonda ra Timoti rainga rakavanga zvokuti iyena wakaguma pa kubhabhatijwa zve wakashanda na Pauro inga misionario.

6. Mungabesera kudini vana venyu kuti vavake gonda ku Soko ra Mwari?

⁶ Mungabesera kudini mwana wenyu kuti avake gonda inga zvakaithwa ndi Timoti, wozovavo acidavira kuti “bziri bzokadi”? Cokutanga, ivanyi anosengerera. Zvinoda nguva kuti muvake gonda rakavanga. Zve  kuva kwenyu mecitenda kuti ici i cokwadi azvirievi kuti vana venyu vanozozvitendavo pacina basa riri rese. Mwana umwe nga umwe anodikana kushandisa ega ‘simba rake ro kurangarira’ kuti avake gonda ku Bhaibheri. (Verenganyi VaRoma 12:1, Shanduro yeNyika Itsva.) Inga mubari, mungaita zvizinji kuti mubesere vana venyu kuti vavangise gonda ravo, maningi-ningi pavanoita mubvunjo. Ngatende tivone kuti zvicinyi zvatingajija kubvira ku muezaniso wo umwe mubari.

7, 8. (a) Baba vamweni vo ciKristu vakatatijisa kudini kusengerera pavaijijisa mwana wavo wokaji?.(b) Ndirini munodikana kuva munosengerera no mwana wenyu?

⁷ Thomas, uwo ano mwana wokaji ano 11 o makore okubahwa, wakananga kuti iyena nguva jimweni anoita mubvunjo jakadari inga iji: “Jehovha waizoshandisa mbhindu-mupindu kuti aite zviro zvinopona pasi pano here? kana kuti “Ngenyi atibatani no vamweni, pa cisungo co zvomatongehwe o nyika inga muezaniso, kuti tieje kuitisa nane zviro?” Nguva jimweni, vanodikana kuramba murangairo wokunanga basi zvaanodikana kutenda. Thomas waiziva kuti zvicinyi zvinokhohwesa mundhu kuti ici ngo cokwadi asipi zviro zvikuru asi zviro zvidoko kamare.

⁸ Thomas waizivazve kuti iyena waidikana kuva anosengerera kuti akwanise kujijisa mwana wake. Zvokadi kamare, maKristu ese anodikana kuva anosengerera. (VaKolosi 3:12) Thomas wakazwisisa kuti zvinotora nguva zve mabhuyo akawanda kuti akwanise kubesera mwana wake ave ecikhohwa kamare. Iyena anodikana kupsakisira nayena ngo zvaanojija kubvira mu Bhaibheri. Thomas wakati: “Maningi-ningi pa shwiro huru kamare, inini no mukaji wangu tinoda kuziva kuti mwana wedu anotenda kamare zvaanojija zve zvinorevo kamare kwaari. Kudari akava no mubvunjo, zvaushoni maningi. Kunasa kunanga, ndaindoneseka maningi kudari iyena akatenda ciri cese acikaiti mubvunjo.”

9. Mungabesera kudini mwana wenyu atende Soko ra Mwari?

⁹ Vabari pavanojijisa no kusengerera, mu kufamba ko nguva vana venyu vanozotanga kuzwisisa kuti “ngo hwapi upambhi, urebu, ukhwiri no ujiki” hwo gonda. (VaEfeso 3:18) Tingavajijisa mu njira yo kuti inozwirana no ndanga yavo no kuzwisisa kwavo. Gonda ravo pazvavanojija rinozoguma pa kuvanga, zvinozova zvakareruka kwaari kujivirira zvitendhwa zvake ku vamweni, kubatanija vadoni vo cikora. (1 Pedru 3:15) Inga muezaniso, mwana wenyu angakwanisa kushandisa Bhaibheri kuti asanangure zvinoitika pa kufa here? Zvinosananguhwa ngo Bhaibheri zvino revo kwaari here? * (Vonanyi masoko o pasi.) Ceujanyi kuti munodikana kusengerera kuti mubesere mwana wenyu kuti avake gonda rake mu Soko ra Mwari, asi izvi zvinozova no mutengo kamare.—Deuteronòmio 6:6, 7.

10. Zvicinyi zvinodikana kuva divi rinosisira ro kujijisa kwenyu?

 ¹⁰ Zvokadi kamare, muezaniso wenyu unosisira maningi kuti mubesere mwana wenyu kuti akhwijirije gonda. Stephanie, mai wo vana vatatu vokaji, vakananga kudari: “Pikija vana vangu povainga vadoko kamare, ndaizvibvunjisa pacangu kudari: Ndinobhuya no vana vangu ngo pamusoro penyi, Ndinokhohwa kuti Jehovha ariodi, rudo hwake no makwanja ake akarungama here?” Vana vangu vanovona kamare kuti ndinoda Jehovha here? Andingaveteri kuti vana vangu vagume pa kudavira zvokadi kupinda inini.”

11, 12. Ungwaru icinyi zve tinozvizivisa kudini kuti kuva no ungwaru azvifiri pa makore ano mundhuwo?

¹¹ Tajija kuti Timoti wakava no (1))  uzivi hwo Matahwa zve (2)  kukhohwa ngo pamusoro po zvitendhwa zvake. Asi Pauro waida kunangenyi paakananga kuti matahwa a Mwari aizoita kuti Timoti ave no “uzivi hunogumisa ku ruponeso”?

¹² Bhuku Estudo Perspicaz das Escrituras, Vhorume 3, rinosanangura kuti mu Bhaibheri, ungwaru unobatanija “kukwanisa kushandisa uzivi no zwisiso yo kubudirira pa kupeja cineso, kutiza ngozi, kukwanisa kuguma pa cidisiso ciri cese kana kupangira vamweni kuti vazviite. Zvakasiana kamare no upenji.” Bhaibheri rinonanga kuti “Upenji huri mu mwoyo wo mwana mudoko.” (Mazwi Akangwara 22:15) Ungwaru hwakasiana kamare no upenji, ungwaru ndi cimwe citatijo co kuibva kumujimu. Mundhu anoguma pa kuva wakaibva kumujimu ngokuti anothya Jehovha zve anoda kumuzwira, haiwa basi ngokuti arikuita musharuka.—Verenganyi Nduyo 111:10.

13. Majaha no vasikane vangakhombijisa kudini kuti vano ungwaru hunogumisa ku ruponeso?

¹³ Majaha no vasikane vakaibva kamare kumujimu ‘avazotambiswi ngo mavimbi’ ngo zvido zvavo kana kukhwevehwa ngo majaha amweni. (VaEfeso 4:14) Kunja kwa izvi, ‘simba ravo ro zwisiso’ riri ‘kurovejwa kuitira kuziva zvakanaka no zvakashata.’ (Vaheberi 5:14, Shanduro yeNyika Itsva) Ngokudaro ivona vanotema zvivaringo ngo ungwaru, pikija vabari vavo avapo kana avaripi kuvoniwa ngo mundhu ariwese wakura. (VaFilipi 2:12) Mushovo uwu wo ungwaru unodikana maningi kuitira ruponeso. (Verenganyi Mazwi Akangwara 24:14.) Mungabesera kudini vana venyu kuti vakhwijirije ungwaru hwakadaro? Munodikana kuva no gwinyiso ro kuti ivona vanoziva zvamunoreremeja. Ngo zvamunonanga no kuita, ivona vanodikana kuvona kuti muri kueja kurarama mukuzwirana no ndhungamiro jo Bhaibheri.—VaRoma 2:21-23.

14, 15. (a) Mujaha kana musikane anoda kubhabhatija anodikana kurangarira ngo pamusoro penyi? (b) Mungabesera kudini mwana wenyu kuti arangarijisise makomborero anovepo ngo kuzwira mutemo ja Mwari?

¹⁴ Ngokudaro, kuti mubesere vana venyu vavake gonda, azvikwani basi kuvabvunja zvicinyi zvakanaka no zvakashata. Munodikanazve kuvabesera kuti kurangarira ngo pamusoro  po mubvunjo jakadari inga iji: ‘Ngenyi Bhaibheri rinorambija zviro zvingakwevera? Ndingava kudini no gwinyiso ro kuti ndhungamiro jo Bhaibheri nguva jese jakanaka kwandiri?’—Isaia 48:17, 18.

¹⁵ Kudari mwana wenyu anoda kubhabhatijwa, mubeserenyizve kuti arangarire ngo pamusoro po muthwaro unovepo ngo kuva anobhabhatijwa. Anozwa kudini ngo pamusoro pahwo? Ngowapi unozova muviyo? Ngozvapi zvinozova zvineso? Ngenyi muviyo jakawanda kupinda zvineso? (Marco 10:29, 30) Zvinosisira maningi kurangarira ngo pamusoro po mubvunjo iji mucito mabhabhatijwa. Beseranyi mwana wenyu kuti arangarijisise ngo makomborero o kuzwira zve muviyo wo kutama kuzwirana. Perapo vanozovona kuti kutevera ndhungamiro jo Bhaibheri nguva jese kwakanaka kwavari.—Deuteronòmio 30:19, 20.

16. Vabari vanodikana kuitenyi kudari mwana wavo wakatanga kuva no gonda rakaremba?

¹⁶ Mungaitenyi kudari mwana wenyu anovonesa kukana-kana ngo pamusoro po cokwadi pasure po kubhabhatijwa? Inga muezaniso, mwana wenyu worume kana wokaji angatanga kudakarira maningi zviro zvo mu nyika. Kana kuti, mwana wenyu angatanga kukana-kana kuti kutevera zviambi zvo Bhaibheri zvinoitadi kuti ave no upenyu hwakanakisisa. (Nduyo 73:1-3, 12, 13) Manera omunodavira  angamupsasa dangani angaramba acishandira Jehovha. Ejanyi kutama kuhwisana no mwana wenyu ngo pamusoro pa izvi, azvinenyi ndangani aciri mujaha kamare kana kuti waamuaruki. Kunja kwa izvo, itanyi kuti iyena azive kuti munomuda zve munoda kumubesera.

17, 18. Kudari mujaha kana musikane akakanakana, vabari vangamubeseresa kudini?

¹⁷ Mujaha kana musikane wakabhabhatijwa wakazvipira kuna Jehovha. Ici cigondiso co kuti anomuda zve anozomushandira kupinda zviri zvese hazvo. (Verenganyi Marco 12:30.) Jehovha anovona kuzvipira uku inga cigondiso cakakura zve itusu tinodikanavo kuvona kudaro. (Mucumaeri 5:4, 5) Ceujanyi mwana wenyu izvi. Asi cokutanga, verenganyi zve jijanyi mathurusi anopuwa majibaba ngo sangano ra Jehovha. Perapo, mu njira yo kunaka mwoyo zve pa nguva kwayo, kohomejanyi ku mwana wenyu kuti cisungo cake co kuzvipira pacake kuna Jehovha no kubhabhatijwa cinosisira maningi asi cinozoviisa makomborero mazinji.

¹⁸ Inga muezaniso, mungawana mbhangiro zinji jingabesera pa masoko o kuengejera panoti “Mibvunzo Inobvunzwa Nevabereki” ngo sure ko bhuku Mibvunzo Inobvunza Vechiduku—Mhinduro Dzinoshanda, Vhorume 1. Irona riinopangira vabari kuti avadikani kukasika kurangarira kuti mwana wavo ari kuaruka watoramba cokwadi, asi vanodikana kupsaka kuwana cinesoco kamare. Izvi zvingaitika ngo kuvangirijwa ngo shamwari kana ngo ushongwe. Kana kuti angajizwa kuti majaha amweni no vasikane vari kuita zvizinji mu basa ra Jehovha kupinda iyena. Masoko o kuengejera anosanangurazve kuti shwiro iji ajirevi kamare kuti mwana wenyu aatendi zvitendhwa zvenyu. Kazinji izvi zvinova muviyo wo cineso cimweni ciri kuitika. Masoko o kuengejera aya anopa mazano amweni ngo pamusoro po kuti mubari angabesera kudini mwana wake pikija ecikanakana ngo pamusoro po cokwadi.

19. Vabari vangabesera kudini vana vavo kuti vagume pa kuva no “uzivi hunogumisa ku ruponeso”?

¹⁹ Inga mubari, muna muthwaro zve cidakajiso cinosisira co kurera vana venyu “mu ureri no mupango wa Tenji.” (VaEfeso 6:4) Inga zvotajija, izvi zvinoreva kuti munodikana kujijisa mwana wenyu zvicinyi zvinonanga Bhaibheri zve kumubesera kuti azvikhohwese ngo pamusoro po zvaanojija. Gonda ravo parinovanga, vanozondundihwa kuti vazvipire pacavo kuna Jehovha zve vonasa kumushandira kamare. Hina, Soko ra Jehovha, mujimu hwake, zve no kuvangisira kwenyu, ngakubesere vana venyu kuti vagume pa kuva no “uzivi hunogumisa ku ruponeso.”