NGENYI babangu vainga vakanyagajwa kudaro? Reganyi ndimusanangurire. Inini ndakabahwa mu 29 ya Khunguru wo 1929, zve ndakarebera ku dhorobha ro ku porovhinsia yo Bulacan ku Firipina. Itusu tainga ticina mare yakawanda, zve upenyu wedu wainga wakareruka. Pandainga mujaha, cikwata co masoca o Japau cakangwina mu Firipina zve hondo yakatanga. Asi, dhorobha redu rainga riri ndhambo kamare, ngo kudaro atizivi kubatwa ngo hondo. Itusu tainga ticina radhio, terevhizau, majhoronari, ngo kudaro takazwa ngo pamusoro po hondo ngo vandhu vamweni.

Ndainga no hama zve hambzaji nomwe zve apo pandakava no makore masere, cekuru wangu vakandibvunja kuti ndiyende koogara navo. Pikija tainga maKatoriko, cekuru wangu vainga vano cido co kubhuya ngo pamusoro po ciara no kuashira mabhuku o zviara aiviswa ngo shamwari yavo. Ndinoceukija pavakanditatija zvimabhuku Kubvikirika, Kungwaririka zve no Kupfumbuhwa mu ndumi yo Tagalog, * (vonanyi masoko o pasi) pikija no Bhaibheri. Ndakadakara ngo kuverenga Bhaibheri, maningi-ningi Mavhangeri marongomuna. Ngo kuita kudaro, ndakada kutevera muezaniso wa Jesu.—Johani 10:27.

Cikwata co masoca o Japau cakasiya Firipina mu gore ro 1945. Pa nguva yondhoyo, vabari vangu vakandikumbira kuti ndihwirire kanyi. Cekuru wangu vakandivangisa kuti ndipinde, zve ndakaenda.

Mu mweji wa Mbuji wo 1945, Zvapupu zva Jehovha zvaibva ku dhorobha ro Angat zvakavia kocumaera mu mundharaundha yedu. Cimwe Capupu cainga caamusharuka cakatigumira pamuzi pedu zve cotisanangurira ngo zvinonanga Bhaibheri ngo pamusoro po “njiku jokupejisira.” (2 Timoti 3:1-5) Icona cakatikoka kuti tijije Bhaibheri phedo no ndharaundha yotaigara. Ndakaenda, pikija vabari vangu avazivi kwenda. Painga no 20 o vandhu vakava pondhopo, zve vamweni vakaita mubvunjo ngo pamusoro po Bhaibheri.

Ndainga ndicikazwisisi ushoni ngo pamusoro po zvaibhuiwaro, ndainga ndasunga kumukepo. Asi ivona vakatanga kuimba ndumbo jo Umambo. Ndakadakarira  maningi ndumbo, ngokudaro ndakagara. Pakupera ko ndumbo zve no mukumbiro, itusu tese takakokwa kuti tiende kumusongano ku Angat waizoizwa ngo mudimingu raizotevera.

Musongano wondhowo wakaitwa pa muzi po mbhuri ya Kruz zve vamweni vedu vaidikana kufamba makiromita masere kuti vagume kondhoyo. Painga no vandhu vaikwedera kuita 50 zve ndakashamaisika ngo kuvona vana vadoko vecidavira mubvunjo jinonesa ngo pamusoro po shwiro jo Bhaibheri. Pondaindoenda mukuvo wese kumusongano, Damian Santos, hama imwe piyona yainga yaamusharuka yaianja kushanda inga mutungamiriri wo dhorobha, yakandikoka koovatira ku muzi kwayo. Takapeja nguva zinji pa usikuhwo tecibhuya ngo pamusoro po Bhaibheri.

Mukuvo wondhowo, vandhu vaizobhabhatijwa kudari povaizopeja kujija jijiso huru jinosisira maningi jo Bhaibheri. Pandakapeja kuenda kumusongano pa mukuvo mushoma, hama jakandibvunjisa zve jobvunjisavo vamweni, “Munoda kubhabhatijwa here?” Ndakati, “Hina, Ndinoda.” Ndaizviziva kuti ndaida ‘kushandira Tenji zve Kristu.’ (VaKolosi 3:24, Shanduro yeNyika Itsva) Takaenda ku murambo wainga ngo phedopo zve pamutengo wedu vaviri vakabhabhatijwa mu 15 wa Musekwa wo 1946.

Ndakazwisisa kuti maKristu akabhabhatijwa anodikana kucumaera nguva jese inga ndi Jesu. Babangu vairangarira kuti ndainga ndiri mudoko maningi kuti ndicumaere zve kuva ndakabhabhatijwa basi azvicaireva kuti ndingacumaera. Ndakavasanangurira kuti i kuda ka Mwari kuti ticumaere masoko akanaka o Umambo hwa Mwari. (Mateu 24:14) Ndakanangazve kuti ndinodikana kukwanirisa cigondiso candakaita kuna Mwari. Ndipona pakatanga babangu kundithyisijira kwandaperaya kunanga pakutanga. Ivona vainga vakacunga kundiregeresa kuita basa rokucumaera. Iyi yainga vhaza yo kutanga yo ndakasia sure zviro, kana kuzvipira kuti ndishandire Jehovha.

Mbhuri ya Kruz yakandikoka kuti ndiyende korarama na ivona ku Angat. Ivona vakandivangisa zve vakavangisavo mwana wavo wokaji, Nora, kuti titange basa ro upiyona. Tese takatanga basa ro upiyona mu mweji wo 1 wa Cikowe wo 1947. Nora wakashanda inga piyona ku dhorobha rimweni zve inini ndakasara ku Angat.

Pakapera makore maviri ndecishanda inga piyona, Earl Stewart, hama yakabva ku Bheteri, vakaitira hurukuro vandhu vanodarika 500 ku dhorobha ro square ku Angat. Iyona yaibhuya ngo Cingezi, zve inini ndaiturukira zvayaibhuyaro ngo ndumi yo Tagalog. Iyi yainga vhaza yokutanga yo ndakabhuya maningi pa kuturukijira kupinda makore amweni. Ndakakwanisa kudini kuita izvi? Pikija ndakambojija cikora ko makore manomwe basi, vajijisi vangu kazinji vaishandisa Cingezi. Kusiyapo izvo, ndakajija maningi ngo mabhuku edu o Cingezi ngokuti kwainga no mabhuku akacijikira mu Bhaibheri mashoma mu ndumi yo Tagalog. Zviro izvi zvakandibesera kuti ndinase kuzwisisa Cingezi mbhera pa kuturikira.

 Hama Stewart vakabvunja ungano yo mutundhumo kuti mamisionario aizoenda ku Assembléia Aumento da Teocracia, ku Novha Yorki, E.U.A mu gore 1950. Ngo kudaro, hofise yo cine yaida piyona umwe kana maviri kuti abesere pa Bheteri. Ndainga umwe wo vakakokwa. Apa wari, ndakadikanazve kusiya zviro zvandainga nadarovejana nazvo kuti ndishandire pa Bheteri

Ndakaguma pa Bheteri mu 19 Nyaonga wo 1950. Bheteri yainga nyumba yokare zve yakakura yaitendenejwa ngo mamuti makuru pa ndimbu ro ndau yo kintari 1. Kwainga no gumi na vaviri o hama jicizivi kurovora jaishanda kondhoyo. Cingwanani matete, ndaibesera mu kozinya. Asi, pa nguva mbvumbamwe jo mangwanani, ndaiyenda koopasari nguvo ku ravhandariya. Ndakaitazve zvondhozvo co masikati. Pakandopera kuvia mamisionario ku gungano ro mutundhu ro nyika yese, ndakaramba ndiri pa Bheteri. Ndaita zvese zvaikumbihwa ngo hama kuti ndiite. Ndaiita basa ro kuronga marevhista kuti atumihwe, ndainasirira marevhista kuti atumihwe kuvainga vakatarisa kuti vamashire paaindobuda, zve ndakashanda inga muashiri wo varendo.

Mugore ro 1952, inini no hama jimweni ndhandhatu jo ku Firipina takakokwa kwenda koojija mu turma yo ci 20 yo Cikora co Gireadhi. Ndakadakajihwa ndizvona! Patainga ku Estadhos Unidhos, takawana no kuvona zviro zvakawanda zvipsa. Upenyu wainga wakasiyana maningi no wandainga nahwo ku cindharaundha cidoko ca ndakabva.

Inga muezaniso, takajija kushandisa zvimucini zvinoshanda ngo magezi no mujiyo jimweni jacitikazivi kumbovonazve. nera o kushandisa mucini zve nomashandisihwe atainga ticikazivi kumbovona wo zvimujiyo. Mugariro jakasiyana kamare! Mangwanani amweni o ndakamuka, ndakavona kunja kwakacena kuti nbuu. Kwainga kutanga kwangu kuvona kuwa ko cando. Kwaiseja, asi ndakakasika kuvona kuti kwainga kutondhora, hina kutondhora kamare!

Ndakadakara maningi ngo kurovejwa kwandakawana kunoshamaisa ku Gireadhi ngo kudaro cinjo ijo ajizivi kundisiya ndicikanakana. Vajijisi vainasa kujijisa kamare zve vakatibesera kukwanisa kupsakisisa no maitiro akanaka o kujija. Kurovejwa kwandakaitwa ku Gireadhi kwakandibesera kuti ndivangise ushamwari hwangu na Jehovha.

Pandakapeja, Ndakagajwa inga piyona anosisira o nguva doko ku Bronx ku dhorobha ro Novha Yorki. Ngokudaro, mu mweji wa Khunguru wo 1953, ndakaenda ku Assembleia da Sociedade do Novo Mundo yakaizihwa ku Bronx. Pakandopera gungano iri, ndakagajwa kuhwirira ku Firipina.

Hama jo ku Bheteri jakandigaja kuti ndishande inga muvonereri wo ndharaundha. Izvi zvakandipa mukana jakawanda kuti nditevejere Jesu, uwo waiita hwendo kwenda kumadhorobha no mu ndharaundha kuti abesere vandhu va Jehovha. (1 Pedru 2:21) Ndharaundha  yangu yaibatanija mutundhu wese wo Luzon, uwo wainga no cirundu cikuru co ku Firipina. Zvaibatanijavo porovinsia yo Bulacan, Nueva Ecija, Tarlac zve Zambales. Kuti ndivhakacire madhorobha amweni, ndaidikana kupinda ngo ku Matundhu o mapuwe o Siera Madhre. Akuzivi kumboguma macimbhombha kana zvitima, ngokudaro ndaikumbira majishafero o karu kuti ndangani ndigagara pa nyezuru po mathimba ovaipakija. Kazinji vainditendera kuti ndizviite, asi uu wainga mukhuva ucikazivi kunaka pa kuita hwendo.

Ungano zinji jainga doko zve ipsa. Ngo kudaro hama jaibonga maningi pandaivabesa kuronga musongano zve no basa ro mundha zvakanaka.

Pa kufamba ko nguva ndakagajwa ku ndharaunha imwei yaibatanija ndharaundha yese yo Bicol. Kodhono kwainga no magrupu mazinji akabararika kwainga no mapiyona anosisira aicumaera mu ndau joku kwainga kucito kwamboguma Zvapupu zva Jehovha. Pa muzi pamweni painga no ratirina yo pasi yaitambikijwa ngo mamuti maviri ngo pakatio pakona. Pandakatononera ngo pamamuti maviri, mamuti akahodhokera mu ratirina pomwe na inini. Pakapera nguva yakawanda ndecizvipukuta kuti ndive ndakanasiririka zve ndiyende pa matabico o mangwanani.

Pandainga ndecishanda inga muvonereri wo ndharaundha, ndakatanga kurangarira Nora, wakatanga kushanda inga piyona pandakatangavo. Pa mukuvo uwu, iyena wainga waapiyona anosisira ku dhorobha ro Dumaguete zve inini ndakaenda komuvona kondhoyo. Pasure pazvo, takatarirana karata pa nguva yakati kuti zve mu gore ro 1956 takacadha. Takapeja sumana yokutanga pasure po mucadho wedu tecivhakacira ungano yo kucirundhu co Rapu Rapu. Kondhoyo takakhwira matundhu zve tofamba mumamungo waireba maningi, asi takadakara ngo kuva tese zve kubesera hama jinogara ndhambo.

Takaita basa ro kuvonerera ndharaundha ku makore maronngomuna, takakokwazve ngo hama kuhwirira ku hofise ro cine. Takatanga kushanda mu mweji wa Zvita 1960. Pakati po makore mazinji tiri pa Bheteri, ndakajija maningi kubata basa no hama jinomutoro mukuru musangano ra Jehovha. Zve Nora ari kudakara maningi ngo mabasa akasiana-siana o pa Bheteri.

Ndakava no kuvona makomborero akawanda zve vandhu vazinji vecishandira Jehovha ku Firipina. Pandakaguma pa Bheteri ndiciri mujaha, hama jicizivi kurovora, vacumaeri vaikwana kuita 10.000 mu ndharaundhemo. Wari variyo vacumaeri vanodarika 200.000 mu Firipina zve zana ro hama no hambzaji jiri kushanda jecibesera pa basa ro kucumaera.

Pa nguva yaperari, taidia ndu huru kuita basa ro pa Bheteri. Mukhumbi Unotonga wakatikumbira kuti tisote ndau kuitira kuti tivake cine guru. Mutungamiriri wo zvo kudhindha na inini takaenda nyumba ngo nyumba jo vocigarisano tecibvunjisa vagari vemo kuti vaidakarira kutengesa ndau javo. Akuna waida. Mundhu umweni wakatibvunja kudari: “Vashina avatengesi. Itusu tinototengavo.”

Asi, njiku imweni ciro cimweni cicaivetehwa cakatanga kuitika. Umwe wo zvigarisano zvedu zvakabva ku Estadhos Unidhus, ngo kudaro wakatibvunjisa kuti taida kutenga ndau yake kana haiwa. Pasure pazvo, cigarisano cimweni cakatema civaringo co kutengesa ndau yaco, ngo kudaro caivangisa vamweni kuti vatendesevo ndau javo. Takazototenga ndau yo mwanarume wakananga kuti “Vashina avatengesi.” Pa mukuvo mushomani basi, ndau yo cine redu yakazokura kakapetwa katatu. Ndino cokwadi co kuti Jehovha waida kuti izvo zviitike.

Mugore ro 1950, pa Bheteri inini ndainga mudoko maningi kupinda vese. Wari uno, inini no mukaji wangu ndisu vasharuka kupinda vese. Andizvivazi kana kujidemba ngo kuteverera Jesu azvinenyi kwapi kwaaindiendesa. Pikija vabari vangu, vakandigogomera pamuzi pavo, Jehovha wakandipa ukama hwakawanda maningi hunoumbwa ngo vandhu vanomuda. Ndinothemba kuti Jehovha anokwanisa kutipa zvese zvatinoda, azvinenyi kwaanotigaja. Nora na inini tinobonga maningi Jehovha ngo nasiriro jake jese jo kunaka mwoyo, zve tinovangisa vamweni kuti vaejevo kuti vavone unaki hwa Jehovha.—Malakia 3:10.

Bvaza imweni Jesu wakakoka mushabisi waidanijwa Mateu Revhi kuti ave muteveri wake. Mateu wakaitenyi naakokwa? “Yena wakaregera bzese, womuka, womutevera.” (Luka 5:27, 28) Ndakava no mukana wo kusiya zvese sure ndotevera Jesu, zve ndiri kuvangisa vamweni kuti vaitevo zvondhozvo kuti vawane makomborero akawanda.