1-3. (a) Icinyi cakabatanijwa pakati po zvitendwa zvedu zvizinji? (b) Ngenyi rumuko unosisira maningi? (Vonanyi pikica yo kutanga.)

KUDARI ari wese akamubvunjisa kuti gonda renyu rakacinjikira pa jijiso japi, mwaizodavirisa kudini? Zvokadi kamare maizonanga kuti munotenda kuti Jehovha ndi Musiki zve ndiyena wakatipa upenyu. Pacina kukana-kana maizonanga kuti munotenda kuti Jesu Kristu, ndiyena wakapira upenyu hwake. Maizonangavo ngo pamusoro po Paradhiso pasi pano kumbejiyo, mo kuti vandhu va Mwari vanozorarama kwenda no kwenda. Asi maizonanga kuti rumuko iciro camunoda maningi pa zvitendo zvenyu here?

² Tino mathangwe akanaka okubatanija rumuko pa zvitendwa zvedu zvizinji, pikija kudari itusu tiri kuvetera kupokonyoka pa dambujiko guru zve tirarame pasi pano kwenda no kwenda. Mupostori Pauro wakakhombija kuti ngenyi rumuko unosisira maningi. Iyena wakananga kuti: “Kudari akuna kumuka ko vakafa, Jesu Kristu aazivi kumukavo.” Kudari Jesu acizivi kumuswa, aacaizotonga mu matenga  inga Mambo zve kucumaera kwedu akucaizova no revo. (Verenganyi 1 VaKorinto 15:12-19.) Ngokudaro, tinoziva kuti Jesu wakamuswa. Ngokuti tinotenda kumuswa kwake, atizivi kufanana no vaSadhusi vo ciJudha, avo vakaramba kamare kuti vakafa avacazoponizve. Pikija vamweni vakatama kutenda izvi, gonda redu rokuti Mwari anozomusa vakafa rinozoramba rakavanga.—Marco 12:18; Maitiro o Vapostori 4:2, 3; 17:32; 23:6-8.

³ Pauro wakananga kuti majijisiro o “kumuka ko vakafa” ainga divi ro “majijisiro okutanga a Kristu.” (Vaheberi 6:1, 2) Iyena wakakhohomeja rumuko inga ciro cokuti wakatodira gonda mouri. (Maitiro o Vapostori 24: 10, 15, 24, 25) Pikija muripo uri divi ro majijisiro o kutanga, catinojija kubvira mu Soko ra Mwari, tinodikana kuramba tecijija ngo pamusoro pahwo no kunasa kungwarira kwese. (Vaheberi 5:12) Ngenyi?

4. Ngojapi mubvunjo jatingajiita ngo pamusoro po rumuko?

⁴ Vandhu pavanotanga kujija Bhaibheri, kazinji vanotanga kuverenga ngo pamusoro po rumuko jakaitika kare, wakadari inga rumuko hwa Razaro. Ivona vanojijavo ngo pamusoro pa Abhirahama, Jobe naDhanyeri Mwari vaithemba kuti kumbejiyo vakafa vanozoraramazve. Waro, mwaizodavirisa kudini kudari ari wese akamubvunjisa kuti nditatijei kubvira mu Bhaibheri kamare kuti ngenyi tingathemba cigondiso co kumuswa ko vakafa cakanangwa mazana o makore akapera? Zve Bhaibheri rinonanga kuti kumbejiyo rumuko ucazoitika rini? Mupinguro ku mubvunjo iji unozovangisa gonda redu.

5. Pakutanga tinoda kubhuisana ngo pamusoro penyi?

⁵ Zvakareruka kurangarira mundhu acimuswa naaperaro kufa kamare. (Johani 11:11; Maitiro o Vapostori 20:9, 10, Shanduro yeNyika Itsva) Waro tingathembadi kamare kuti mundhu anozomuswa, pikija papera mazana o makore, kumbejiyo here? Tingatenda kuti zvinozoitika ku mundhu wakafa kare kana wafa wari uno here? Zvokadi kamare, imwimwi munotenda rumuko wakaitika mazana o makore nowapikihwa. Ngowapi rumuko hwodhowo? Zve unozwirana kwapi no vetero yenyu yo kumuswa kumbejiyo?

6. Jesu wakabatanijiswa kudini pa kukwanirisika ko Nduyo 118?

⁶ Tecishandisa Nduyo 118, yokuti kangaije yakatahwa ndi Dhavhidhi, ngatibhuye ngo pamusoro po rumuko wakanangwa makore mazinji nguva iciripo. Nduyo iyo inobatanija magama aya: “Imwimwi, Tenji Mwari, tiponesenyi!” zve “Ngaakomborehwe anoza ngo zina ra Tenji Mwari!” Vandhu vakanokora ciporofita ici ngo pamusoro pa Mesia, Jesu paainga ecifamba kwenda Jerusarema muna 9 ya Nisani, njiku shomani acito wafa. (Nduyo 118:25, 26; Mateu 21:7-9) Asi, Nduyo 118 yaizonangirisa kudini ngo pamusoro po rumuko hwaizoitika makore akawanda kumbejiyo? Vonanyi basi zvinonangazve nduyo iyi: “Buwe rakarambwa ngo vavaki rakaita buwe ro pakhona.”—Nduyo 118:22.

7. VaJudha vakarambisa kudini Jesu?

⁷ “Vavaki” vakaramba Mesia vainga vatungamiriri vo ciJudha. Ivona vakaita zvinopinda  kuramba Jesu kana kutama kumuashira inga Kristu. Vazinji vakamuramba ngo kukumbira kuti Pirato amuuraye. (Luka 23:18-23) Hina, ivona vanopuwavo ndava ngo pamusoro po kufa ka Jesu.

8. Zvakaitisa kudini kuti Jesu agume pa kuva “buwe rinovangisa nyumba”?

⁸ Kudari Jesu wainga wakaurawa zve wakafa, wakazovisa kudini “buwe ro pakhona”? Izvi zvaizoitika basi paaizomuswa. Jesu wakajekesa izvo paakaverenga ndhorovondho yo muno wo munda paakatumira varanda vake kuti vaende kovona basa raitwa ngo varimi. Varimi vakatambuja varanda vaingaiya vatumwa. Pakupejisira, wakatumira mwana wake, ecivetera kuti vaizomupurukira. Asi vakauraya mwana wiya. Paakapeja kunanga ndhoroondho ii, Jesu wakanokora ciporofita ciri pa Nduyo 118:22. (Luka 20:9-17) Mupostori Pedru wakashandisa vhesi yakaezana paakabhuya no vaJudha ‘vaiungana mu Jerusalema vatungamiriri vo nyika, madoda no vatari.’ Iyena wakavereketa ngo pamusoro pa ‘Jesu Kristu wo Nazareta, womakakohomera uwo wakamuswa ndi Mwari ko vakafa.’ Perapo iyena wakati: “Ndirona ‘buwe rakarambwa ndimwi vavaki, rakaguma kuita buwe rinovangisa nyumba.’”—Maitiro o Vapostori 3:15; 4:5-11; 1 Pedru 2:5-7.

9. Ngocapi ciitiko cinoshamaisa cakanangwa pana Nduyo 118:22?

⁹ Zvakajeka kuti, ciporofita cinowanika pana Nduyo 118:22 cainangira rumuko wakaitika mu mazana o makore akapera. Mesia wakazorambhwa zve wakaurawa. Asi iyena wakamuswa kuti aponezve zve agume pa kuva buwe rinovangisa nyumba. Ngo kumuswa kwake, Jesu wakaguma pa kuva no zina “rakapuwa vandhu ro tingaponeswa ndirona.”—Maitiro o Vapostori 4:12; VaEfeso 1:20.

10. (a) Nduyo 16:10 yakanangenyi? (b) Ngenyi tingathemba kuti Nduyo 16:10 airipi kunangira Dhavhidhi?

¹⁰ Ngatende tibhuisane ngo pamusoro po vhesi imweni inobhuya ngo rumuko. Iyi yakakwanirisika muna ciuru co makore cakapera. Zviitiko izvi zvinotithembesa kuti rumuko ungaitika pakupera mukuvo muzinji no wapera kunangwa kana kugondiswa. Pana Nduyo 16, tinozwa zvakananga Dhavhidhi eciti: “Ngokuti aazondisii mu iba, amuzoregi kuti mutendi wenyu avore!” (Nduyo 16:10) Dhavhidhi aacaieja kunanga kuti iyena narini aacaizofepi zve aacaizovona iba. Soko ra Mwari rinonanga kamare kuti Dhavhidhi wakaita musharuka zve wakafa perapo “wakavata no majibaba ake,  wovigwa mu guta ra Davidi.” (1  Majimambo 2:1, 10) Waro vhesi iyi iri kunangira ani?

11. Pedru wakasanangura rini ngo pamusoro po Nduyo 16:10?

¹¹ No papera ciuru co makore Dhavhidhi naapera kutara magama aya, Pedru wakasanangura kuti Nduyo 16:10 yainangira ani. Mazuma mashoma Jesu acito wafa no kumuswa, Pedru wakavereketa no zviuru zvo vaJudha no vakatendeukira kuva vaJudha. (Verenganyi Maitiro o Vapostori 2:29-32.) Iyena wakaceukija kuti Dhavhidhi wakafa zve wakacihwa. Zve Bhaibheri arinangi kuti aripo wakaramba zvakanangari pedro paakaengejera kuti Dhavhidhi “wakavona no kuvereketa ngo njio yo kumuka kwa” Mesia.

12. Nduyo 16:10 yakakwanirisika kudini zve izvi zvinganangenyi ngo pamusoro po cigondiso co rumuko?

¹² Pedru wakabesera fundo rake ngo kunokora magama a Dhavhidhi ari pana Nduyo 110:1. (Verenganyi Maitiro o Vapostori 2:33-36, Shanduro yeNyika Itsva.) Kunasa kurangarira kwakaita Pedru kubvira mu Matahwa kwakabesera vandhu vazinji vaengepo kuti Jesu wakaithwa ‘zvese zviri zviviri Tenji zve Kristu.’ Vandhu vakaceukija Nduyo 16:10 yakakwanirisika apo Jesu wakamuswa mu kufa. No papera nguva yakati kuti, Mupostori Pauro wakashandisa zvitatijo zvondhozvo paaivereketa no vaJudha ku Antiokia yo ku Pisidhia. Ciitiko ici cakavakahamaja maningi, zve vakada kuzwa zvizinji. (Verenganyi Maitiro o Vapostori 13:32-37, 42, Shanduro yeNyika Itsva.) Izvi zvinodikana kutikohwesavo kuti zviporofita zvo Bhaibheri ngo pamusoro po rumuko zvinozoitikadi pikija zvapeja mazana o makore.

13. Ngojapi mubvunjo jatingazviita ngo pamusoro po rumuko?

¹³ Zvinovangisa kuziva kuti rumuko ungaitika pikija pakupera mazana o makore no wapera kunangwa. Pikija zvakadaro, vamweni vangabvunjisa kudari: ‘Izvi zvingareva kuti ndinozovetera nguva yakawanda kuti ndivone mudiwa wangu here? Rumuko unozoitika rini?’ Hina, Jesu wakabvunja vapostori vake kuti painga no zviro zvokuti ivona avacaizviziva zve avacaitodikana kuzviziva. Pana zvimuthyandhaya-muthyandhya ngo pamusoro po “nguva no mukuvo bzakasanwa ndi Baba, mu simba ravo.” (Maitiro o Vapostori 1:6, 7; Johani 16:12) Ngokudaro, atina masoko mazinji ngo pamusoro po kuti rumuko ucazoitika rini.

14. Kuitisa kudini rumuko hwa Jesu hwakasiana no jimweni jakaitika kare?

¹⁴ Rumuko unosisira maningi wakanangwa mu Bhaibheri i rumuko hwa Jesu. Kudari iyena aazivi kumuswa mo vakafa, na umwe wedu waizova no vetero yo kuzovonazve vadiwa vakafa. Vandhu vakamuswa Jesu acito amuswa, vakadari inga vakamuswa ndi Erija na Erisha avazivi kupona kwenda no kwenda. Ivona vakafazve zve vakaguma pakuva bukuta mu iba. Asi ‘Jesu wakamuka mu kufa.’ Iyena “aacazofi: Kufa akucamunyisi.” Ku matenga iyena ari ‘kurarama makore acikaperi.’—VaRoma 6:9; Apokalipsi 1:5, 18; VaKolosi 1:18; 1  Pedru 3:18.

15. Ngenyi Jesu wakadanijwa ‘mucero wo kutanga’?

¹⁵ Rumuko hwa Jesu hwo kwenda kudenga inga mundhu hwo kumujimu hwakava hwokutanga zve unosisira maningi pa rumuko hwese. (Maitiro o Vapostori 26:23)  Ngokudaro, asipi iyena ega waizomuswa kwenda kudenga. Jesu wakagondisa kuti vapostori vake vakagondeka vaizotonga pamwepo naye. (Luka 22:28-30) Asi, ivona vaizoashira mupfupo uu basi vakafa. Perapo, inga Jesu, ivona vaizomuswa no muviri wo kumujimu. Pauro wakatara kudari: ‘Asi wari, Kristu wakamuswa ko vakafa, wova mucero wo kutanga kuno vaya vakavata mu rufu.’ Pa kufamba ko nguva, Pauro wakananga kuti kwaizova no vamweni vaizomuswa zve vaizoenda kudenga eciti: ‘Asi umwe no umwe pa ndau yake: Kristu mucero wo kutanga, kozotevera vaya vari va Kristu, mu nguva yo kuvepo kwake.’—1 VaKorinto 15:20, 23, Shanduro yeNyika Itsva.

16. Ngocapi citatijo catinajo ngo pamusoro po kuti rumuko hwo kudenga hwaizoitika rini?

¹⁶ Magama a Pauro anotipa citatijo co kuti rumuko hwo kwenda kudenga waizoitika rini. Iwona waizoitika pakuviya kwa Kristu. Ko makore akawanda, Zvapupu zva Jehovha zvakavona kubvira mu Bhaibheri kuti ‘kuvepo’ kwa Kristu kwakatanga muna 1914. Wari ticiri mu nguva yo ‘kuvepo’ kwake zve kupera ko mugariro uwu wakashata kuri phedo maningi.

17, 18. Zvicinyi zvinozoitika ku vokuzojwa vamweni pa nguva yo kuviya kwa Kristu?

¹⁷ Bhaibheri rinosanangura zvizinji ngo pamusoro po rumuko hwo kudenga reciti: “Atidi kuti mugare mucikazivi ciro, ngo ndava yo vandhu vakafa . . . Tikatenda kuti Jesu wakafa no kumuka, ngo maitiro ondhoo, vaya vakafa mwa Jesu anozotohwa ndi Mwari . . . itisu tinoraramari, takasara pa nguva yo kuvia kwa Tenji, atizotungamiriri vakafa; ngokuti Tenji pacake, anozobzuka kubva kudenga ecidaninjira ngo simba, . . . zve vayani vakafa muna, Kristu vanozotanga kumuswa. Sure kwavo, itisu tasarari, ticipenye, tinozotohwavo kuenda na ivona mu makore, nyezuru, tozosongana na Tenji. Ngokudaro, tinozogara na Tenji makore ese.”—1  VaTesalònika 4:13-17.

¹⁸ Rumuko hwokutanga hwaizotanga nguva shomani pasure po nguva yo kuvepo kwa Kristu. Vokuzojwa vanonga varipo pa dambujiko guru vanozotohwa “mu makore nyezuru.” (Mateu 24:31) Zvinorevenyi izvi? Vaya “vanozotohwa” ‘avacazofizve’ kureva kuti, ivona avazogari mukuvo wakareba novafa. Kunja kwa izvi, ivona pavanofa ‘vanozophindujwa, pa nguva doko, pa kuboira ko jiso, pa nguva yo kurira ko mbayapaya yo kupejisira.—1  VaKorinto 15:51, 52, Biblia Mazwi Akacena AMwari.

19. I cinyi “kumuka ko uhomi hwokadi-kadi”?

¹⁹ Nyamasi uno, maKristu akagondeka maningi asipi vokuzojwa zve avazivi kusanwa kuti vatonge na Kristu ku matenga. Kusiapo zvondhozvo, ivona vari kuvetera no cidaka-daka cese ‘njiku ya Jehovha,’ paanozopeja mugariro uwu wakashata wo nyika. Apana anoziva kamare kuti mugumo unoviya rini, asi zvitatijo zvinovonesa kuti uri phedo. (1  VaTesalònika 5:1-3) Nyika impsa ya Mwari ikaviya, kunozova no rumuko hwakasiana kamare. Pa mukuvo wondhowo, vandhu vanozomuswa kuti vapone pasi pano kwenda no kwenda zve vanozova no vetero yo kuguma pa kuva vakakwana zve narini avazofizve. Uku kunozova “kumuka ko uhomi hwokadi-kadi” kupinda rumuko wo vaya vakamuswa kare asi vakazofazve pa kufamba ko nguva.—Vaheberi 11:35.

20. Ngenyi tingathemba kuti rumuko ucazova wakarongeka?

 ²⁰ Bhaibheri rinonanga kuti vese vaya vanoenda kudenga vanozomuswa “Mundhu no mundhu pa nguva yake.” (1  VaKorinto 15:23) Ngokudaro tingava no cokwadi co kuti rumuko pasi pano unozova wakarongeka kamare. Izvi zvingatitora pa mubvunjo wo kuti: Vari kufaya wari, vacazomuswa Muutongi wo Ciuru co Makore mu kutanga ko utongi wa Kristu zve toashira umwe nga umwe wo vadiwa vedu vatinoziva here? Vanarume vakagondeka vokare vaingaya vatungamiriri vaushoni, vacazomuswa kuti vazobesere pa kuronga vandhu va Mwari mu nyika imbza here? Zvicinyi zvinozoitika ku vandhu vacikazivi kumboshandira Jehovha? Ndirini zve vanozomusihwa kwapi? Tingava no mubvunjo jakawanda jatingabviita. Asi atidikani kugara tecikaya-kaya ngo pamusoro po zviro izvo, wari. Zvakanaka maningi kuvetera zve tizvivone. Tingathembadi kuti tinozodakajihwa ngo kuvona manera anozoda kuita Jehovha zviro.

21. Ngoyapi vetero yenyu?

²¹ Kubvira wari, tinodikana kuvangisa gonda redu kuna Jehovha. Iyena wakazvingondisa ecishandisa Jesu kuti vakafa vari mu murangariro Wake zve vacazoponazve. (Johani 5:28, 29, Shanduro yeNyika Itsva; 11:23) Inga citatijo co kuengejera co kuti Jehovha anozomusa vakafa, Jesu mukuvo umweni wakananga kuti Abhirahama, Izaki, na Jakobe “pa meso pake vese vanorarama.” (Luka 20:37, 38) Zvakajeka kuti, tino mathangwe mazinji akanaka okunanga, inga zvakananga Pauro okuti: “Ndinovetera cigondiso ca Mwari . . . cokuti kunozowanika kumuka ko vakafa.”—Maitiro o Vapostori 24:15.