1, 2. (a) Jehovha wakatikhombijenyi? (b) Cigondiso capi catinowana pana Isaia 46:10, 11 zve 55:11?

MAGAMA o kutanga-tanga kamare o mu Bhaibheri anobhuya zviro zvishoma asi zvakajika maningi, iwona anoti: “Pakutungamira, Mwari wakarura nyezuru no pasi.” (Genesi 1:1) Pa zviro zvakasika Mwari pasi no mudenga, itusu tinokwanisa kuvona basi zvishoma zvazvo, zve tinoziva zviro zvishoma basi ngo pamusoro po zviro zvakadari inga gore, rubveneko no simba rinokwevera zviro pasi. (Mucumaeri 3:11) Asi Jehovha wakatikhombija cidisiso caanaco no pasi pano pomwe no vandhu. Wakasika vandhu ngo muezaniso wake zve waida kuti vabuse upenyu pasi pano. (Genesi 1:26) Ivona vaizova vana vake zve iyena waizova Baba wavo.

² Kubvira pa cipauko co citatu ca Genesi, tinojija kuti cidisiso ca Mwari cakaphikizwa. (Genesi 3:1-7) Asi, kuna Jehovha akuna ndhango icikatongeki. Akuna anokwanisa kupingaija gwanja rake. (Isaia 46:10, 11; 55:11) Tingava no cokwadi co  kuti cidisiso co kutanga ca Jehovha cinozokwanirisika pa nguva kwayo kamare!

3. (a) Jijiso japi jinosisira maningi jinotibesera kuzwisisa masoko o Bhaibheri? (b) Ngenyi tiri kuda kubhuya ngo jijiso iji? (c) Ngo japi mubvunjo jatiri kuda kudavira?

³ Zvokadi, tinociziva cidisiso ca Mwari no pasi pano pomwe no vandhu zve tinoziva basa ra Jesu mu cidisiso condhoco. Izvi izvokadi zvo mu Bhaibheri zvinosisira maningi zvatakatanga kuziva patakajija Soko ra Mwari. Wari tiri kuda kubesera vamweni kuti vazivevo jijiso iji jinosisira maningi. Tino mukana unosisira wo kuzviita pa mukuvo uwu wo gore, patinonga tecikoka vandhu kuti vaviye ku Cirangarijo co kufa ka Kristu. (Luka 22:19, 20) Kudari vakaviya ku ciitiko ici cinosisira, ivona vanozojijira zvizinji ngo pamusoro po cidisiso ca Mwari cinoshamaisa. Ngo kudaro, wari i nguva yakanaka kuitira kurangarira ngo pamusoro po mubvunjo jatingashandisa kuitira kuvangisa vandhu kuti vaviye pa Cirangarijo. Pa musoro uno tinozodavira mubvunjo mutatu iji: Ngo capi cidisiso ca Mwari no pasi pano zve kuno vandhu? Zvicinyi zvakaposeka? Zve ngenyi muripo wo kujipira wa Jesu nga iwona khiya inofunungura musuvo kuitira kuti cidisiso ca Mwari cikwanirisike?

4. Zvakasikwa zvinotokotesa kudini “goja ra Mwari”?

⁴ Jehovha ndi Musiki anoshamaisa maningi. Zvese zvaakasika zvakakhwirira. (Genesi 1:31; Jeremia 10:12) Tinojijirenyi ngo kuseja no kurongeka ko zvaakasika? Tinojija kuti zvese zvakasika Jehovha, kubvira ku ciro citotori mbhera ku cakakura, zvinobesera. Mukuengejera, pamunorangarira ngo pamusoro po mashamaisire anoita maserura o mundhu, pamunovona mwana wabva kubahwa, pamunosota kuseja ko zuva parinonga recibira, munozwa kudini? Tinokahamara ndizvona ngo kuti Jehovha wakatisika no mugariro wo kukwanisa kuvona zviro zvakaseja.—Verenganyi Nduyo 19:2; 104:24.

5. Jehovha wakaitenyi kuti zvisikwa zvake zvese zvishande ushoni pamwepo?

⁵ No ungwaru hwese, Jehovha wakadira mugano ku zvisikwa zvake. Wakadira mutemo jinovonerera zviro zvaakasika, zve wakagaja mutemo jo mufambiro. Iyena wakajiita kuitira kuti zviro zvese pasi no mugore zvishande ushoni pamwepo. (Nduyo 19:8-10) Zvese pasi no mugore zvino ndau yazvo zve zvino basa razvo. Inga muezaniso, mutemo wo kukwevera zviro pasi unoita kuti mu makore murambe muri phedo no pasi, iwona unovonerera jombe no maji. Kudari akucainga no mutemo uwu, apana caizorarama pasi pano. Mugano jakagaja Jehovha ku zvisikwa zvake jinoita kuti zviro zvinase kushanda pasi no mugore. Izvi zvinokhombija kuti iyena wainga no cidisiso no pasi pano zve no vandhu. Patinonga tecicumaera, tingabesera vamweni kuziva Musiki wo zviro zvinoshamaisa zvinowanika pasi no mugore.—Apokalipsi 4:11.

6, 7. Ngo zvapi zvipo zvimweni zvakapuwa Adhamu na Evha ndi Jehovha?

⁶ Cidisiso ca Jehovha cainga co kuti vandhu vararame no kucingaperi pasi pano. (Genesi 1:28; Nduyo 37:29) Ngo kuva kwake mukovi, Jehovha wakapa Adhamu na Evha zvipo zvakanakisisa zvakasiyana-siyana. (Verenganyi Jakobo 1:17.) Jehovha  wakavapa rusujunuko hwo kujikhetera zve kukwanisa kurangarira, kukhombija rudo zve kuva no ushamwari no vamweni. Musiki wakabhuya na Adhamu womubvunja kuti waizoitisa kudini zvakanaka. Adhamu wakabvunjwavo makhorondhere aaidikana kujiita iyena, zvinyama, pomwe no nyika. Jehovha wakapa Adhamu na Evha mugariro wo kukwanisa kuzwa kunaka, kubata, kuvona, kupurutana, kuzwa kunuhira ko zviro zvakanaka zvaakavaitira. Ngo njira iyi, ivona vaizokwanisa kudakajihwa ngo upenyu mu muzi wavo wainga wakaseja. Adhamu na Evha vainga no basa rakawanda zve rinodakajisa kuti vaite. Zve ivona vaizoramba vecijijira no kufumbhura zviro zvipsa kwenda no kwenda.

⁷ Cidisiso ca Mwari caibatanijenyizve? Jehovha wakaita kuti Adhamu na Evha vakwanise kubara vana vakakwana. Zve vana vavo vaizobaravo vana, zvecindodaro mbhera pasi pese pozara ngo vandhu. Jehovha waida kuti vabari vade vana vavo, kudarivo inga iyena waida vana vake vaikwana, Adhamu na Evha. Iyena wakapa vandhu pasi pano no zvese zvakaseja no zvinosisira zviripo. Ipona paizova muzi wavo mbhera narini.—Nduyo 115:16.

8. Ngenyi Mwari wakapa Adhamu na Evha mutemo unowanika pana Genesi 2:16, 17?

⁸ Zviro azvizivi kufamba maererano no cidisiso ca Jehovha. Zvicinyi zvakaitika? Jehovha wakapa Adhamu na Evha mutemo wakareruka kuitira kuti vakwanise kuziva mugano wo rusujunuko hwavo. Iyena wakati: “Unotendehwa kuha mucero yo miti yese yo mu munda. Kaveta, ucaha mucero wo muti wo uzivi hwo bzakanaka no bzakaxata, ngokuti pa njiku yo unozouha unozofa.” (Genesi 2:16, 17) Mutemo uwu aucaivanesa kuzwisisa. Zve aucaizonesa kuzwira, zvecivoneka kuti vainga no zvakawanda kuti vahe.

9, 10. (a) Sathana wakanangenyi ecipumbha Jehovha? (b) Adhamu na Evha vakatema civaringo capi? (Vonanyi pikica yo kutanga.)

⁹ Sathana Dhiabhu wakashandisa nyoka kuitira kuungisa Evha kuti ashaishire Babake, Jehovha. (Verenganyi Genesi 3:1-5; Apokalipsi 12:9) Sathana wakaita kuti mutemo wa Mwari kuno vana vake wo kuti ‘avacaitendehwa kuha mucero yo miti yese yo mu munda,’ uve shwiro. Ngo magama amweni, iyena wainanga kudari: ‘Zviri kureva kuti amudikani kuita zvamunoda here?’ Tevere, iyena wakabvunja Evha kudari: ‘Andibzopi, amuzofi.’ Uku kwainga kunyepa. Perepo wakaeja kukhohwesa Evha kuti avone kuti apacainga no dikano yo kuzwira Mwari. Sathana wakati: “Mwari anoziva kuti, njiku yo munozouha, majiso enyu anozofununguka.” Sathana wainga ecinanga kuti Jehovha waivarambija kuha mucero wo muti wiyana ngo kuti vaizowana zivo imweni inosisira yovacainga nayo. Pa kupejisira, iyena wakavagondisa zvokunyepa, eciti: “Munozoita inga ndi Mwari, meciziva bzakanaka no bzakaxata.”

¹⁰ Adhamu na Evha vaidikana kutema civaringo. Vaizozwira Mwari here? Kana kuti vaizopurutana nyoka? Zvinosuruvarisa ngo zvokuti vakatema civaringo co kutama kuzwira Mwari. Vakaramba Jehovha inga Baba wavo, vobatana na Sathana. Pondhopo vakatanga kutojivonera vega, vacina bvikiro ya Jehovha.—Genesi 3:6-13.

11. Ngenyi Jehovha aazivi kusiya hake kudaro zvishaishi zva Adhamu na Evha?

 ¹¹ Adhamu na Evha pavakaphwanya mutemo wa Mwari, vakasiya kuva vakakwana. Kusiyapo izvo, ivona vakava vavengi va Mwari ngo kuti iyena anonyenya zvakashata. ‘Majiso ake akacenesesa, aacijikiri kuvona bzakaxata!’ (Habakuki 1:13) Kudari Jehovha acizivi kuita ciri cese, Adhamu na Evha pavakashaisha, zvisikwa zvake zvese zvaizova pa ngozi. Ngirozi no vandhu vaizokana-kana kuti zvino shwiro here kuthemba zvaanonanga kana kuti haiwa. Asi Jehovha wakagoneka pa zvaakagaja; iyena aacinji magama. (Nduyo 119:142) Pikija Adhamu na Evha vainga no rusujunuko hwo kujikhetera, ivona avacainga no manera o kutiza zvineso zvaiviiswa ngo kupandukira Jehovha. Vakazogumisira ngo kufa, vohwirira ku mabvu kovakasikihwaya.—Genesi 3:19.

12. Zvicinyi zvakazoitika kuno vana va Adhamu?

¹² Adhamu na Evha pavakaha mucero, Jehovha aazivi kutenderazve kuti vaite divi ro mbhuri yake. Wakavagogomera mu munda wo Edheni, zve avazivi kuzohwiriremozve. (Genesi 3:23, 24) Jehovha wakasiya kuti vavone muviyo wo civaringo cavo. (Verenganyi Deuteronòmio 32:4, 5.) Inga muviyo, avaicaizokwanisazve kutevejera mugariro ja Jehovha ngo maitiro akakwana. Adhamu wakaruza upenyu wakanakisisa waaizova nao kumbeji, zve wakaitavo kuti vana vake vauruzevo. Iyena wakapa vana vake, haiwa basi kutama kukwana, asi wakavapavo, ushaishi no rufu. (VaRoma 5:12) Adhamu wakabvisira mukana wo kurarama no kucikaperi. Adhamu na Evha avacaizobara vana vakakwana nee vana vavo avacaizobaravo vana vakakwana. Sathana kubvira paakapausa Adhamu na Evha kuna Mwari, na nyamasi ari kundoeja kuitisa kuti vandhu vese vaite kudaro.—Johani 8:44.

13. Ngo capi cido ca Jehovha kuno vana va Adhamu?

¹³ Jehovha acino rudo no vandhu. Pikija Adhamu na Evha vakamupandukira, iyena aciri kuda kuti vandhu vave no ushamwari hwakanaka naye. Iyena aadi kuti na umwe wavo afe. (2 Pedru 3:9) Ngo iyo ndava, wakaita nasiriro kuti vandhu vawanazve ushamwari naye. Iyena wakazviita ngo njira icaihwisana no ndhungamiriro jake. Kuitisa kudini? Ngatende tivone.

14. (a) Mukuzwirana na Johani 3:16, Mwari wakaitenyi kuti apokonyore vandhu ku cishaishi no rufu? (b) Mubvunjo wapi watingabesera vandhu kuwana mupinguro?

¹⁴ Verenganyi Johani 3:16. Vazinji vatinokoka kuviya ku Cirangarijo vanoiziva kamare vhesi iyi. Asi mupiro wa Jesu unoitisa kudini kuti upenyu hucikaperi hukwanisike? Tino mukana wo kubesera vandhu kuzwisisa mupinguro wo mubvunjo uwu patinonga tecivakoka kuti vaviye ku Cirangarijo,  patinonga tiri navo pa Cirangarijo zve patinovabvakacira pasure po Cirangarijo. Pavanonga vecizwisisa kuti muripo i cinyi, vanongavo veciziva makurire o rudo hwa Jehovha kuno vandhu zve makurire o ungwaru hwake. Mafundo api atingakovana navo ngo pamusoro po muripo?

15. Jesu waisiyana papi na Adhamu?

¹⁵ Jehovha wakaviisa mundhu wakakwana waizopira upenyu hwake inga muripo. Mundhu wakakwana wondhowo waidikana kuva wakagondeka kuna Jehovha. Waidikanazve kuva no cido co kupira upenyu hwake kuitira vandhu. (VaRoma 5:17-19) Jehovha wakathuthisa upenyu hwa Jesu, cisikwa cake co kutanga, kubva mugore kuviya pasi pano. (Johani 1:14) Ngo kudaro, Jesu wainga mundhu wakakwana, kudari zvaainga Adhamu. Asi mukusiyana na Adhamu, Jesu wakazwira ndhungamiriro jaaida Jehovha kuti mundhu wakakwana ateverere. Pikija pakuejwa kunonesa kamare, Jesu aazivi kuphwanya mutemo wa Mwari.

16. Ngenyi muripo i cipo cinosisira maningi?

¹⁶ Ngo kufa ari mundhu wakakwana, Jesu waikwanisa kuponesa vandhu kubva ku cishaishi no rufu. Iyena wakakwanirisa zvese zvaizokwaniriswa ndi Adhamu. Jesu wakava mundhu wakakwana, waigondeka kuna Mwari ngo maitiro akaperera kamare. (1 Timoti 2:6) Iyena wakatifira zve mupiro wake unopa vanarume, vanakaji no vana vadoko, mukana wo kurarama no kucingaperi. (Mateu 20:28) Muripo i khiya inofunungura musuwo kuitira kuti cidisiso ca Mwari cikwanirisike.—2 VaKorinto 1:19, 20.

17. Ngo ndava yo muripo, zvicinyi zvinozokwanisika?

¹⁷ Ngo kujinesa kwese, Jehovha wakapa muripo. (1 Pedru 1:19) Iyena wakativonavo kuva tinosisira maningi zvokuti wakatendera kuti Mwana wake atifire. (1 Johani 4:9, 10) Ngo njira imweni, Jesu wakaguma pa kuva baba wedu pa cinyau ca Adhamu. (1 VaKorinto 15:45) Jesu wakaita kuti zvikwanisike, haiwa basi kuti tirarame kwenda no kwenda, asi kuti njiku imweni tihwirirezve koova mbhuri ya Mwari. Ngo ndava yo muripo, vandhu vanozoguma pa kuva vakakwana zve Jehovha angavatenderazve kuti vave divi ro mbhuri yake, acikaphwanyi mutemo jake. Rangariranayi basi mudakaro unozoveyo apo vese vakagondeka pavanozoguma pa kuva vakakwana! Pakugumisira, vese mugore no pasi pano vanozobatana kuva mbhuri imwe. Tese tinozova vana va Mwari.—VaRoma 8:21.

18. Jehovha anozova rini zviro zvese “ku vese”?

¹⁸ Pikija hazvo vabari vedu vo kutanga vakaramba Jehovha, iyena aazivi kusiya kuda vandhu, zve wakapa muripo. Pikija tiri vacikazivi kukwana, Sathana aakwanisi kutirambija kuti tive vakagondeka kuna Jehovha. Ecishandisa muripo, Jehovha anozotibesera kuva vakarungama ngo maitiro akakwana. Rangariranyi basi kuti upenyu unozova wakadini vese “vanovona Mwana no kumutenda” pavanozowana upenyu hucikaperi! (Johani 6:40) Baba wedu vano ungwaru no rudo vacazokwanirisa cidisiso cavo zve vozobesera vandhu kuguma pakuva vakakwana. Jehovha anozova zviro zvese “ku vese.”—1 VaKorinto 15:28.

19. (a) Kubongesera ngo muripo kunodikana kutikwevejera kuti tiitenyi? (Vonanyi bhokiso rino musoro unoti: “ Ngatirambe Tecipsaka Ndiani wakanakira.”) (b) Tinozojijenyi pa musoro unotevera?

¹⁹ Kubongesera kwedu ngo muripo kunotiita kuti tibhuye no vamweni ngo pamusoro po cipo ici cicikapimiki. Vandhu vanodikana kuziva kuti acishandisa muripo, Jehovha ngo rudo wakapa vandhu vese mukana kuti vararame no kucingaperi. Asi muripo unoita zvinopinda zvondhozvo. Iwona unopingura shwiro yakamusaya Sathana mu munda wo Edheni. Pa musoro unotevera tinozovona kuti unozviitisa kudini.