Inga muezaniso, mwana wo imwe hama wakazviuraya. Babakona vakanyangajwa maningi. Vairangarira kuti dangani Jehovha wakasota zvo kumbeji zve wotemera ivona no mukaji wavo kuti vaizokwanisa kucungirira nyatwa iyi. Uzinji hwedu tinowanana no nyatwa jakawanda mu nyika ino. Waro tinodikana kutenda kuti ndi Jehova ari kuitisa zvinotiitikira mu upenyu hwedu here?

Potinopopora 1 VaKorinto 10:13, tinozovona kuti Bhaibheri aribeseri murangariro wokuti Jehovha anotanga waziva zvotinokwanisa kucungirira, wotitemera kuti zviejo zvapi zvotinozowanana nazvo. Ngenyi tingati kudaro? Ngativone mathangwe marongomuna.

Rokutanga: Jehovha wakatipa rusujunuko hwo kujikhetera, kuti tikhete zvotinoda. Iyena anoda kuti titeme zvivaringo zvedu. (Deuteronòmio 30:19, 20; Joxwa 24:15) Kudari tikakheta kutema civaringo cinodakajisa Jehovha, tinomuthemba kuti atitungamirire. (Mazwi Akangwara  16:9) Asi potinotema zvivaringo zvakashata, tinozova no muviyo wazvo. (VaGalàsia 6:7) Waro kudari Jehovha anokheta zviejo zvotinowanana nazvo, taizovadi no rusujunuko hwo kujikhetera here?

Rocipiri: Jehovha aatijiviriri pa zvinoitika zvoga. (Mucumaeri 9:11) Mundhu angaitikihwa ngo ngozi ngokuti zvaitika naari pa ndau yakashata, no pa mukuvo wakashata. Jesu wakabhuya ngo pamusoro po ngozi yo kuwa ko rusingo kana mufimbiji, yakauraya vandhu 18. Iyena wakajekesa kuti kufa kwavo akuzivi kuitiswa ndi Mwari. (Luka 13:1-5) Azvina shwiro kurangarira kuti ngozi icito yaitika, Mwari anonga wapera kutema kuti ndiani anozopona kana kufa.

Rocitatu: Umwe na umwe wedu anodikana kugara wakagondeka kuna Jehovha. Sathana wakananga kuti vashandiri va Jehovha vanomushandira ngondava yo zviro zvaanovapa. Wakatizve atizorambi takagondeka kuna Jehovha kudari tikawanana no zviejo. (Jobe 1:9-11; 2:4; Apokalipsi 12:10) Kudari Jehovha akatijivirira zviejo zvimweni, zvaizovoneka kuti zvakanangaya Sathana ndizvonadi.

Rocirongomuna: Jehovha aakheti kutanga wavona zvese zvinozoitika kotiri. Kunasa kunanga, Jehovha anokwanisa kuziva zvinozoitika kotiri kudari akada. (Isaia 46:10) Asi Bhaibheri rinotatija kuti aakheti kuziva zvese zvinozoitika kotiri. (Genesi 18:20, 21; 22:12) Jehovha ano rudo zve wakarurama, ngokudaro, aanghwiniri rusujunuko hwedu hwo kukheta toga.—Deuteronòmio 32:4; 2 VaKorinto 3:17.

Waro, Pauro waida kunangenyi paakati Jehovha “aatendi kuti muejwe kupinda simba renyu”? Waisanangura zvaanoita Jehovha potinowanana no zviejo, kuciripi ticito tawanana nazvo. * (Vonanyi masoko o pasi.) Kudari tikagonda Jehovha, anozotibesa pa ciejo ciricese mu upenyu hwedu. (Nduyo 55:23) Ticapopora mathangwe maviri okuti ngenyi Pauro wakananga masoko aya.

Thangwe rokutanga ngo rokuti zvineso zvotiri kuwanana nazvo zviri kuwananavo no vamweni. Poticiri kurarama mu nyika ya Sathana, tinozowanana no mugariro jinonesa, pikija no nyatwa kamare. Kudari tikathemba Jehovha,  tinokwanisa kucungirira zviejo izvi, toramba takagondeka. (1 Pedru 5:8, 9) Kumatangiro ko 1 VaKorinto cipauko 10, Pauro wakatara zviejo zvimweni zvakawanana no vaIziraeri mu zvipare. (1 VaKorinto 10:6-11) Vaya vakathemba Jehovha vakacungirira zviejo izvo. Asi vaIziraeri vamweni avazivi kuzwira Jehovha. Avazivi kuramba vakagondeka ngokuti avacaimuthemba.

Thangwe rocipiri ngo rokuti “Mwari ndi mugondeki.” Zvinoda kurevenyi? Tikavona matajiro aakaita Jehovha vashandiri vake vo makore akapera, tinovona kuti waibesera ngo kugondeka vaya “vanomuda no kungwarira mupango yake.” (Deuteronòmio 7:9) Tinojija kuti Jehovha nguva jese anoita zvaanogondesa. (Joxwa 23:14) Tinova no gwinyiso rokuti (1) Jehovha aazotenderi kuti ciejo citinese zvokuti atikwanisi kucicijikira, zve (2) ‘anozotipsangira gwanja ro kubuda’ pa ciejoco.

Jehovha anopsangira kudini vanomuthemba “gwanja ro kubuda” pa ciejo? Zvokadi, iyena anokwanisa kubvisa ciejo. Asi ceujanyi kuti Pauro wakati Jehovha “anozomupsangira gwanja ro kubuda mu kuejwa uku, no simba ro kunyisa maejo.” Ngokudaro, kazinji Jehovha anotipsangira gwanja ro kubuda pa ciejo ngo kutivangisa kuti tirambe takagondeka. Ngativone njira jimweni jaanozviita ndijona.

• Jehovha “anotinyaraja mu matambujiko ese.” (2 VaKorinto 1:3, 4) Iyena anoporesa murangariro wedu, mwoyo no mazwiro edu acishandisa Bhaibheri, mujimu mucena wake no muranda wakagondeka.—Mateu 24:45; Johani 14:16, VaRoma 15:4.

• Jehovha angashandisa mujimu mucena wake kuti atitungamirire. (Johani 14:26) Mujimu mucena unotibesera kuti ticeuje zviambi no zvinonanga Bhaibheri kuitira kuti titeme zvivaringo zvo ungwaru.

• Jehovha angashandisa ngirozi jake kuti atibesere.—Vaheberi 1:14.

• Jehovha angashandisa hama no hambzaji jedu kuti atibesere. Ijona jingativangisa ngo zvojinobhuya no zvojinoita.—VaKolosi 4:11.

Waro, tajijenyi ngo masoko a Pauro anowanika pa 1 VaKorinto 10:13? Jehovha aatikheteri zviejo zvotinowanana nazvo. Asi tinova no gwinyiso rokuti kudari tikagonda Jehovha, tinokwanisa kucungirira ciejo ciricese. Taziva kuti nguva jese Jehovha anotipsangira gwanja ro kubuda pa ciejo kuitira kuti tirambe takagondeka kwaari.