1. Muripo unoita kuti tizowane zviro zvapi zvaushoni?

MURIPO wo kujipira wa Jesu Kristu unotiviisira makomborero akawanda. Inga muezaniso, iwona unofunungura musuvo kuitira kuti njiku imweni, vana vese va Adhamu vanoda zvakarungama vazogume pa kuva divi ro mbhuri ya Mwari. Makomborero amweni, ngo okuti tingakwanisavo kuzorarama no kucingaperi mu mudakaro. Kupinda izvo, muripo wakabatana no shwiro jinosisira maningi kuno vese vari mugore no pasi pano.—Vaheberi 1:8, 9.

2. (a) Ngojapi shwiro jinosisira maningi mugore no pasi pano jakabatanijwa ndi Jesu pa mukumbiro wake? (Vonanyi pikica yo kutanga.) (b) Zvicinyi zvoticazobhuya pa musoro uu?

² Pacisara makore anokwekhwedera maviri acito wafa, Jesu wakajijisa vajiji vake kukumbira kudari: “Baba wedu muri nyezuru, zina renyu [‘ngariceneswa,’ Shanduro yeNyika Itsva], Umambo hwenyu ngahuze kwedu, kuda kwenyu ngakuitwe pasi pano inga nyezuru.” (Mateu 6:9, 10) Ngatende tipopore kuti muripo unozwirana kudini no kuceneswa ko zina ra  Jehovha, kutonga ko Umambo hwa Mwari no kuitwa ko kuda ka Mwari.

3. Zina ra Jehovha rinoimirirenyi? Sathana wakahwisisa kudini zina ra Jehovha?

³ Cokutanga, Jesu wakakumbira kuti zina ra Jehovha riceneswe, kana kuti ritajwe ngo njira yakacena. Zina ra Jehovha rinoimirira Jehovha, kuti iyena ndiani kamare. Iyena ano simba rakakura maningi zve ndi Mundhu wakarungama mudenga no pasi. Jesu wakamudanija kuti ‘Baba Wakacena.’ (Johani 17:11) Ngokuti Jehovha wakacena, zvese zvaanoita no mutemo iri yese yaanoita yakacena. Asi mu Edheni, Sathana ecishandisa kucengejera wakaphikisa kufanera ka Mwari kupa ndhungamiro ku vandhu. Iyena wakanyepa ngo pamusoro pa Jehovha zve wakahwisa zina ra Jehovha, kana kumusvipisa.—Genesi 3:1-5.

4. Jesu wakatajisa kudini zina ra Mwari inga rakacena?

⁴ Ngo divi rimweni, Jesu waidisisa zina ra Jehovha no kuita zviri zvese zvaaikwanisa kuti aricenese. (Johani 17:25, 26) Kuitisa kudini? Jesu waibesera vamweni ngo mufambiro no majijisiro ake, kuitira vavone kuti ndhungamiro jese ja Jehovha jakanaka zve zviri zvese zvaanokumbira kuti tiite zvinobeserazve itusu. (Verenganyi Nduyo 40:9-11.) Pikija Sathana paakaitisa kuti Jesu atambujike zve afe mu njira inosuruvarisa, iyena wakaramba wakagondeka. Wakatatija kuti zvaikwanisika kuti mundhu wakakwana ave anozwira Jehovha zvakaperera.

5. Tingatajisa kudini zina ra Jehovha inga rakacena?

⁵ Tingatatijisa kudini kuti tinoda zina ra Jehovha? Ngo mufambiro wedu. Jehovha anoda kuti tive vakacena. (Verenganyi 1 Pedru 1:15, 16.) Izvi zvinoreva kuti tinodikana kunamata iyena basi zve tozwira iyena basi ngo mwoyo wese. Pikija patinonga teciteverehwa, tinoita zvotinokwanisa kuti tirarame ngo njira yaanotijijisa Jehovha. Ngo kurarama mukuzwirana no ndhungamiro ja Jehovha, tinoita kuti zina rake rikujwe. (Mateu 5:14-16) Tinokhombija kuti mutemo jake jakanaka zve Sathana ndi munyepi. Itusu tinoposa ngokuti atizivi kukwana. Asi potinoposa, tinokhauya no kuita zvotinokwanisa kuti tiregere kuitazve zviro zvinopseruja zina ra Jehovha.—Nduyo 79:9.

6. Ngenyi Jehovha anotivona inga varurami pikija atizivi kukwana?

⁶ Azvinenyi kuti tiri vokuzojwa kana vo ‘mabvuta amweni,’ Jehovha anoregerera zvishaishi zvedu kudari tikagonda muripo. Iyena anoashira vakazvipira kwaari kuti vave vanamati vake. Anodanija maKristu o kuzojwa zve akarungama inga vana vake no vo ‘mabvuta amweni’ vakarungama inga shamwari jake. (Johani 10:16; VaRoma 5:1, 2; Jakobo 2:21-25) Ngokudaro, pikija wari, muripo uri kuitisa kuti tive no ushamwari hwakanaka na Baba wedu no kucenesa zina ravo.

7. Muripo unoita kuti zvikwanisike kuwana makomborero api?

⁷ Pa mukumbiro wo kuezanisira, Jesu wakananga kudari: “Umambo hwenyu ngahuze.” Muripo unozwirana kudini no Umambo hwa Mwari? Umambo hwa Mwari kana utongi, hwakaumbwa ndi Jesu no vo 144.000 vakakhetwa ku mushovo wese wo vandhu. Muripo ngo unoita kuti zvikwanisike kuti vamusihwe kuenda mugore. (Apokalipsi 5:9, 10; 14:1) Ivona vanozoita majimambo no  vapiri zve vanozotonga pasi pano na Jesu ko ciuru co makore. Pa mukuvo uwo, Jehovha anozoshandisa Umambo kuti aitise pasi pano paradhesi no kubesera vandhu kuti vave vakakwana. Vashandiri va Jehovha vo mugore no vo pasi pano vanozova mbhuri imwe. (Apokalipsi 5:13; 20:6) Jesu anozoparaja Sathana no kupeja zvineso zvese zvaakaitisa.—Genesi 3:15.

8. (a) Jesu wakabesesa kudini vajiji vake kuzwisisa kuti Umambo hwa Mwari hunosisira? (b) Tinobesera kudini Umambo nyamasi uno?

⁸ Jesu wakabesera vajiji vake kuzwisisa kusisira ko Umambo hwa Mwari. Wakazviitisa kudini? Jesu paakandopera kubhabhatijwa, wakatanga kucumaira “masoko akanaka o Umambo hwa Mwari” kuri kwese kwaaienda. (Luka 4:43) Wakabvunjazve vajiji vake kuti vaite ucapupu hwake “mbhera ku magumo o nyika.” (Maitiro o Vapostori 1:6-8) Ngo basa ro kucumaihwa ko Umambo, vandhu vazinji vano mukana wo kujija ngo pamusoro po muripo no kuva vatongwi vo Umambo hwa Mwari nyamasi uno. Tinotatija kuti tiri vatongwi vakagondeka vo Umambo uhu ngo kubesera vokuzojwa pa kucumaira masoko akanaka mu nyika yese.—Mateu 24:14; 25:40.

9. Tinothembesa kudini kuti Jehovha anozokwanirisa cidisiso cake ku vandhu?

⁹ Jesu waida kunangenyi paakananga kuti “kuda kwenyu ngakuitwe”? Jehovha akananga kuti cakati cinozoitika, cinozoitikadi kamare. (Isaia 55:11) Kupandukira kwa Sathana akucaizophinga zvaida Jehovha. Ngokwapi kwaenga kuda kwa Jehovha ngo ndava yo pasi? Waida kuti pasi pano pazare ngo vana vakakwana va Adhamu na Evha. (Genesi 1:28) Cidisiso ca Mwari co kuzaja pasi pese ngo vana va Adhamu na Evha, acicaizoitikepi kudari ivona vakafa vacito vaano vana. Ngokudaro, Jehovha wakavatendera kuti vabare vana. Muripo unopa vese vano gonda mukana wokuti vave vakakwana no wokurarama kwenda no kwenda. Jehovha anotida zve anoda kuti tive no upenyu hunodakajisa, hwaaida weya kuti tive naho.

10. Muripo unobesesa kudini vakafa weya?

¹⁰ Tingativo kudini ngo pamusoro po mamiriau o vandhu vakafaya vacizivi kuva no mukana wo kuziva Jehovha? Jehovha anoda kuti vandhu vapone. Ngokudaro, anozomusa vese vakafa weya. Muripo unozoitisa kuti vazoponezve. Ivona vanozokwanisa kujija ngo pamusoro pa Jehovha no kurarama mbhera narini. (Maitiro o Vapostori 24:15) Jehovha i Cinyuke co upenyu. Paanozomusa vakafa, anozova Baba wavo. (Nduyo 36:10) Pa mukumbiro wo kuezanisira, Jesu wakananga kuti Jehovha ndi “Baba wedu muri nyezuru.” (Mateu 6:9) Jesu wakapuwa ndi Jehovha basa rinosisira maningi ro kumusa vakafa. Jesu wakati: “Inini ndini kumuka ko vakafa no uhomi.”—Johani 6:40, 44; 11:25.

11. Mwari anodenyi ku mbungano huru?

¹¹ Jesu wakanangazve kudari: “Wiya anoita kuda ka Mwari ndiyena munukuna wangu hama yangu na mai wangu.” (Marco 3:35) Kuda ka Mwari ngo kokuti vandhu vanobva ku majinja ese, mabvumbo ese, no ndimi jese vave vanamati vake. Vanonangwa inga “uzinji hukuru” kana mbungano huru icikaverengeki. Ivona vanogonda muripo zve vanoda kuzwira Mwari. Vanomusimba, vaciti: “Unyisi nghwa Mwari wedu, wakagara pa dendemaro, no hwo Bvuta.”—Apokalipsi 7:9, 10.

12. Kubvira pa mukumbiro wa Jesu, tinojijenyi ngo pamusoro po cidisiso ca Jehovha kuno vandhu?

 ¹² Tajija zvakawanda ngo pamusoro pa Jehovha no cidisiso cake ku vandhu, ngo mukumbiro wo kuezanisira wa Jesu. Cokutanga, tinodikana kuita zvese zvotinokwanisa kuti ticenese zina ra Jehovha no kumureremeja. (Isaia 8:13) Muripo wo kujipira wa Jesu ngo unoitisa kuti tiponeswe zve unoreremeja zina ra Mwari. Zvokadi kamare, zina ra Jesu rinoreva kuti “Jehovha Ndi Ruponeso.” Cocipiri, Jehovha anozoshandisa Umambo hwake kuti aviise makomborero o muripo ku vandhu vanozwira. Zve cocitatu, tinothemba kuti apana cinokwanisa kuphinga kuda ka Jehovha kuti kucadoitika.—Nduyo 135:6; Isaia 46:9, 10.

13. Ngenyi tinobhabhatijwa?

¹³ Njira imwe inosisira maningi yatingakhombija ndiyona kuti tiri kubonga maningi ngo muripo ngo yo kupira upenyu hwedu kuna Jehovha no kubhabhatijwa. Ngo njira iyi, tinokhombija kuti tino gonda no muripo zve kuti “tiri va” Jehovha. (VaRoma 14:8) Potinobhabhatijwa, tinokumbira Jehovha kuti atipe “hana yakanaka.” (1 Pedru 3:21, Shanduro yeNyika Itsva) Jehovha anotidavira ngo kutipa makomborero anoviiswa ngo muripo. Zve tina gwinyiso rokuti iyena anozotipa zvese zvaakatipikira.—VaRoma 8:32.

14. Ngenyi Jehovha anotipa mupango wo kuda vamweni?

¹⁴ Zviro zvese zvaanotiitira Jehovha, anozviita ngo rudo hwaanahwo. Iyena anoda kuti vanamati vake vamutevejere, vecidisana ngo cavo. (1 Johani 4:8-11) Potinoda vandhu, tinokhombija pambhene kuti tiri “vana va Baba [vedu] vari mugore.” (Mateu 5:43-48) Pa mupango muviri mukuru, wokutanga ngo wokuda Jehovha, zve wocipiri ngo wokuda vamweni. (Mateu 22:37-40) Njira imwe yotingatatija ndiyona rudo ku vandhu, ngo yo kuvacumaira masoko akanaka o Umambo hwa Mwari. Kudari tikazwira mupango wa Jehovha wo kuda vamweni, maningi-ningi hama jedu, rudo hwedu kwaari hunozova “hwakaperera.”—1 Johani 4:12, 20.

15. (a) Makomborero api otiri kuashira anobva ka Jehovha? (b) Makomborero api otinozowana kumbejiyo?

¹⁵ Ngokuti tinogonda muripo, Jehovha anotigondesa kuti ‘watikungurira uxaixi’ hwedu. Anotiregerera zvishaishi zvedu mukuperera kamare. (Verenganyi Maitiro o Vapostori 3:19-21.) Kudari ngo zvotabhuya pakutanga, muripo unoita kuti zvikwanisike kuti Jehovha aite vandhu vamweni vave vana vake mugore. Avo ngo vokuzojwa. (VaRoma 8:15-17) Iyena ari kukoka vo ‘mabvuta amweni’ kuti vave divi ro mbhuri yake pasi pano. Vakazova vakakwana, kunozoviya kuejwa ko kupejisira. Kudari vakazogondeka kuna Jehovha, anozovaitavo vana vake. (VaRoma 8:20, 21; Apokalipsi 20:7-9) Jehovha anozoda vana vake mukuvo wese. Muripo unozogara uciviisa makomborero mbhera narini. (Vaheberi 9:12) Jehovha wakatipa cipo ici co mutengo mukuru zve apana anokwanisa kutitorera.

16. Muripo unotibesesa kudini kuti tive vakasujunuka?

¹⁶ Kudari tikakhauya pa zvishaishi zvedu, Dhiabhu apana caanokwanisa kuita kuti atiphingaije kuti tizogumirevo pa kuva divi ro mbhuri ya Jehovha. Jesu wakafa “kamwe basi.” Muripo wakapagahwi kamwe mbhera narini. (Vaheberi 9:24-26) Adhamu wakativiisira rufu, asi muripo wa Jesu unozotiviisira upenyu hucikaperi. Muripo unokwanisa kutisujunura mu nyika ya Sathana no pa kuthya rufu.—Vaheberi 2:14, 15.

17. Zvicinyi zvinokhombija kuti Jehovha anomuda?

¹⁷ Cipikihwa ca Mwari acizokoneki. Mutemo jaakadira mu zvaakasika ajicinji, na iyenavo aazocinji. Jehovha aazoticengeji. (Malakia 3:6) Jehovha ari kutiitira zvinopinda kutipa cipo co upenyu basi. Iyena ari kutida maningi. “Itisu takaziva kare rudo hwa Mwari, tohutenda. Mwari, rudo.” (1 Johani 4:16) Zvipikihwa zvake mukuvo wese zvinoitika. Sambi-sambi, pasi pano pacazova paradhiso yakaseja. Vandhu vese vanozorarama vacitevejera Jehovha no kudisana ngocavo. Vashandiri vake vo kumatenga no vopasi pano, vanozonanga kudari: “Nderemejo no goja, uzivi no kubonga, ureremejo, utongi no simba mbza Mwari wedu, [ko] makore acingaperi. Amen.”—Apokalipsi 7:12.