1, 2. Jesu paakapinda mugore, kangaije zvicinyi zvakarangarihwa ngo vapostori?

VAPOSTORI va Jesu vainga vakaima pa Dundhu ro Maorivhe vecisota tenji zve shamwari yavo, Jesu, paainga ecikhwira mugore zve wofukijihwa ngo makore. (Maitiro o Vapostori 1:9, 10) Jesu wakapeja makore anokhwedera kuita maviri ecivajijisa, kuvavangisa, no kuvatungamirira. Asi wari wainga wapinda. Vaizotisa kudini?

² Acito aenda mugore, Jesu wakabvunja vateveri vake kudari: “Kaveta mukazoaxira mujimu mucena munozowana simba mozoita vafakazi vangu, mu Jerusalema, mu Judeya mwese, mu Samaria, mbhera ku magumo o nyika.” (Maitiro o Vapostori 1:8) Vaizokwanisisa kudini kuita basa iri? Jesu wainga wakavagondisa kuti mujimu mucena waizobesera. (Maitiro o Vapostori 1:5) Waro ndiani waizotungamirira no kuronga basa ro kucumaera pasi pase? Vapostori vaiziva kuti Jehovha wainga wakashandisa vandhu kuti vatungamirire Iziraeri yo kare. Ngo kudaro, kangaije  vakarangarira kuti Iyena waizokhetazve mutungamiriri mupsa.

3. (a) Pasure po kupinda ka Jesu mu gore, civaringo capi cinosisira cakatemwa ngo vapostori? (b) Mubvunjo japi jatinozodavira pamusoro uno?

³ Nguva shomani Jesu naapinda mugore, vajiji vakasota mu Matahwa, voita mukumbiro kuitira besero ra Mwari, zve vakakheta Matia kuti afakeye Judhas Iskarioti, inga mupostori wo ci 12. (Maitiro o Vapostori 1:15-26) Ngenyi kukheta uku kwainga shwiro inosisira maningi kwavari zve kuna Jehovha? Vajiji vakaziva kuti kwainga no dikano yo kuva no 12 vo vapostori. * (Vonanyi masoko o pasi.) Jesu wainga akakheta vajiji no kuvaroveja kuiti vaite basa rinosisira maningi pakati po vandhu va Mwari. Basa rakona rainga renyi zve Jehovha na Jesu vakavanasirira kudini kuitira basa rondhoro? I nasiriro yapi yakafanana iriyovo nyamasi uno? Zve ‘tingaceukijisa’ kudini ‘vatungamiriri vedu’ maningi-ningi, “muranda wakagondeka no wakangwara”?—Vaheberi 13:7; Mateu 24:45.

4. Vapostori no vakuru vamweni ku Jerusarema, vainga no basa renyi?

⁴ Vapostori vakatanga kutungamirira ungano yo ciKristu mu Pentekoste yo gore ro 33. Bhaibheri rinonanga kuti “pondhopo, Pedru wainga akaguma no vogumi na umwe” wotanga kujijisa cokwadi cinoponesa kuno mbungano. (Maitiro o Vapostori 2:14, 15) Uzinji hwo mbungano yondhoyo yakaguma pakuva maKristu. Pasure pazvo, maKristu mapsa ao, akaenderera mberi ‘ecijija bzijijiso bzo vapostori.’ (Maitiro o Vapostori 2:42) Vapostori vainga no mutoro wo kuvonerera mashandisihwe o mare yo ungano. (Maitiro o Vapostori 4:34, 35) Zve ivona vaijijisa vandhu va Mwari no kuvaitira mukumbiro, veciti: “Itisu tinozoita basa ro kunamata [kana kuita mukumbiro] no kujijisa izwi.” (Maitiro o Vapostori 6:4) Zve vaitumira maKristu ainga no uzivi kwenda koocumaera ku ndima imbza. (Maitiro o Vapostori 8:14, 15) Pa kufamba ko nguva, vakuru vamweni vo kuzojwa vakabatana no vapostori pa kuvonerera mu ungano. Inga mukhumbi unotonga, ivona vaipa ndhungamiriro kuno ungano jese.—Maitiro o Vapostori 15:2.

5, 6. (a) Mujimu mucena wakapeja kudini simba mukhumbi unotonga? (Vonanyi pikica yo kutanga.) (b) Ngirozi jakabesera kudini mukhumbi unotonga? (c) Soko ra Mwari rakabesera kudini mukhumbi unotonga?

⁵ MaKristu o mu zana ro kutanga ro makore aiziva kuti Jehovha waitungamirira mukhumbi unotonga ecishandisa Jesu. Zvicinyi zvaivathembesa? Cokutanga, mujimu mucena waizopa simba mukhumbi unotonga. (Johani 16:13) MaKristu vakaashira mujimu mucena, asi iwona waipa simba vapostori no vakuru ku Jerusarema kuti vakwanirise mutoro wavo inga vavonereri. Inga  muezaniso, mu gore ro 49, mujimu mucena wakatungamirira mukhumbi unotonga kuti uteme civaringo ngo pamusoro po kusokwa. Ungano jakateverera ndhungamiriro yondhoyo. Inga muviyo, ungano iji jairamba ‘jecivangiswa mu kutenda, kuengejeka vatendi, mazuva ese.’ (Maitiro o Vapostori 16:4, 5) Kubvira pa karata jakatumihwa ku jiungano ngo pamusoro po kusokwa, tinokwanisa kuvona kuti mukhumbi unotonga waitungamirihwa ngo mujimu wa Mwari zve waikhombija mugariro jakadari inga rudo no gonda.—Maitiro o Vapostori 15:11, 25-29; VaGalàsia 5:22, 23.

⁶ Cocipiri, ngirozi jaibesera mukhumbi unotonga. Inga muezaniso, ngirozi imweni yakabvunja Kornerio kuti aende kopsaka Pedhru. Pedhru naapera kucumaera Kornerio no ukama hwake, ivona vakaashira mujimu mucena pikija Kornerio wainga acizivi kusokwa. Ngo kudaro, Kornerio wakava mundhu wo kutanga wo Majinja acizivi kusokwa, wakava muKristu. Vapostori no hama jimweni pavakazwa izvi, ivona vakatendera kuti uku kwainga kuda ka Mwari zve vaiashira ngo nyara mbiri vandhu vacizivi kusokwa vo Majinja pavaiviya mu ungano yo ciKristu. (Maitiro o Vapostori 11:13-18) Nga izvi, tinokwanisa kuvona kuti ngirozi jainasa kubesera basa ro kucumaera, raitungamirihwaya ngo mukhumbi unotongwa. (Maitiro o Vapostori 5:19, 20) Cocitatu, Soko ra Mwari raitungamirira mukhumbi unotonga. Vanarume avo vaishandisa Matahwa kutira kutema zvivaringo zvinosisira ngo pamusoro po zvitendhwa zvo ciKristu pomwe no kupa ndhungamiriro jiungano.—Maitiro o Vapostori 1:20-22; 15:15-20.

7. Ngenyi tinonanga kuti Jesu waitungamirira maKristu okutanga?

⁷ Pikija vo mukhumbi unotonga vainga no mutoro mu ungano, umwe nga umwe wavo waizwisisa kuti Jesu ndiyena wainga Mutungamiriri wavo. Tinozvizivisa kudini? Mupostori Pauro wakananga kuti Kristu wainga wakagaja “vamweni kuita vapostori.” Iyena wakanangazve kuti Kristu wainga “musoro,” kana Mutungamiriri, wo ungano. (VaEfeso 4:11, 15) Kusiyapo kujidanija ngo zina ro mupostori ari wese, ngo kutungamirihwa ndi Mwari, vajiji vakadanijwa ‘vaKristu.’ (Maitiro o Vapostori 11:26) Pauro waiziva kuti zvainga zvinosisira maningi kutevera jijiso jaicijikira mu Bhaibheri jo vapostori no jo vanarume vamweni vaitungamirira. Asi pikija zvakadaro, iyena wakati: “Garanyi meciziva kuti musoro wo vandhu vese [kana wo mwanarume wese] ndi Kristu.” Izvi zvaibatanija umwe nga umwe wo vo pa mukhumbi unotonga. Perepo Pauro wakaengejera eciti: “musoro wa Kristu ndi Mwari.” (1 VaKorinto 11:2, 3) Zviri pambhene kuti Jehovha wakagaja Mwana wake, Kristu Jesu kuti atungamirire ungano.

8, 9. Basa rapi rinosisira rakaitwa ndi Hama Russell?

⁸ Kutangira mu gore ro 1870, Charles Taze Russell no shamwari jake jimweni vakatanga kueja kunamata Mwari mukuzwirana no Bhaibheri no kubesera vamweni kuti vaitevo kudaro. Izvi zvaibatanija kubesera vandhu vaivereketa ndumi jakasiyana-siyana. Ngo kudaro mu gore ro 1884 sangano raizwi Sociedade de Tratados da Torre de Vigia de Sião rakagajikiswa pa mutemo, zve Hama Russell, vakagajwa inga mutungamiriri. * (Vonanyi masoko o pasi.) Ivona vaijija Bhaibheri no kungwarira kwese zve avacaithya kubvunja  vamweni kuti jijiso jo maceci ngo pamusoro po Utatu zve kutama kufa ko mwiha ajicaibva mu Bhaibheri. Ivona vakajijira kuti kuviya ka Kristu akucaizovoneka kamare zve ‘mukuvo wo vonyikanja’ kana vomajinja waizopera mu gore ro 1914. (Luka 21:24) Hama Russell vakashandisa nguva yavo, simba ravo, no mare yavo kuti vajijise zvokwadi izvi kuno vamweni. Zviri pambhene kuti Jehovha na Jesu vakashandisa Hama Russell kuti vatungamirire pa mukuvo wondhowo waisisira maningi.

⁹ Hama Russell avacaida kubatwa ngo maitiro akasiyana. Mu gore ro 1896, vakatara kuti ivona no vamweni vainga no mutoro, avacaida kukujwa nee padoko. Avacaida kupuwa mazina ari ese o kureremejwa, zve avacaida kuti kuva no zvikwata zvaidanijwa ngo mazina avo. Ivona vakazotara kudari: “Basa iri asipi ro mundhu.”

10. (a) Jesu wakagaja rini “muranda wakagondeka no wakangwara”? (b) Sananguranyi majekere ozvakazoita kuti Mukhumbi Unotonga wakasiyana no Sociedade Torre de Vigia.

¹⁰ Mu gore ro 1919, papera makore matatu Hama Russell no vatamika, Jesu wakagaja “muranda wakagondeka no wakangwara.” No cinangwa cenyi? Co kupa vateveri vake “bzokuha ngo nguva kwayo.” (Mateu 24:45) Pikija mukati mo makore o kutanga ondhowo, cikwata cidoko co hama jakazojwa jo ku cine ro nyika yese ku Brokrini, Novha Yorki, ndicona caipa zvokuha zvo kumujimu kuno vateveri va Jesu. Magama o kuti “mukhumbi unotonga” akatanga kushandiswa mu mabhuku edu kubvira mu gore ro 1940. Mu nguva yondhoyo, mukhumbi unotonga wainga wakabatana no vatungamiriri vo Sociedade Torre de Vigia de Bíblias e Tratados. Asi, mu gore ro 1971, zvakazojekeswa kuti Mukhumbi Unotonga wainga wakasiyana no Sociedade Torre de Vigia, yaivonerara shwiro jakabatana no zvo mutemo. Kubvira pondhopo, hama jakazojwa jaishanda mu Mukhumbi Unotonga ajicaingazve no dikano yo kushandazve inga vavonereri vo Sociedade Torre de Vigia. Mu nguva jino, hama jinoreremejwa jo ‘mabvuta amweni’ jiri kushanda inga vavonereri vo Sociedade Torre de Vigia no masangano amweni anoshandiswa ngo vandhu va Mwari. Izvi zviri kubesera kuti Mukhumbi Unotonga urambe wakasotana no basa ro kupa ndhungamiriro no jijiso jo Bhaibheri. (Johani 10:16; Maitiro o Vapostori 6:4) Mujeura wo Murindiri wo 15 ya Khunguru wo 2013, mu ciShona, wakasanangura kuti, “muranda wakagondeka no wakangwara” i cikwata cidoko co hama jakazojwa jinoumba Mukhumbi Unotonga.

11. Mukhumbi Unotonga unotemesa kudini zvivaringo?

¹¹ Hama jo Mukhumbi Unotonga jinosongana inga cikwata sumana ngo sumana kuti jiteme zvivaringo zvinosisira maningi. Musongano iji jinovabesera kuti vabhuisane vari pamwepo no kuramba vakabatana. (Mazwi Akangwara 20:18) Pa Mukhumbi Unotonga apana hama inosisira maningi kupinda imweni, ngo kudaro, hama inotungamirira musongano iji inocinjwa pa gore. (1 Pedru 5:1) Izvi ngo zvinoitwavo pa cikwata cimwe nga cimwe  co zvikwata zvitandhatu zvo Mukhumbi Unotonga. Apana na umwe wo Mukhumbi Unotonga anojizwa kuva mutungamiriri wo hama jake. Inga vopamuzi, umwe nga umwe wavo anotoashiravo cokuha co kumujimu cinobva ku muranda wakagondeka no kuzwira ndhungamiriro jao.

12. Mubvunjo japi jatiri kuda kudavira?

¹² Mukhumbi unotonga aufemehwi nee auumbwi ngo vandhu vakakwana. Unoumbwa ngo vandhu vanotoposavo pavanonga vecisanangura zviri mu Bhaibheri kana kupa ndhungamiriro sangano. Inga muezaniso, bhuku rinozvi Índice das Publicações da Torre de Vigia rino divi rokuti “Esclarecimento de Crenças,” pondhopo pano rista yo kucinjwa ko zwisiso jo Bhaibheri kubvira mu gore ro 1870. Jesu aazivi kutibvunja kuti muranda wakagondeka no wakangwara waizonasirira cokuha co kumujimu cakakwana. Waro tingadavirisa kudini mubvunjo wa Jesu wo kuti: “Ndiani muranda wakagondeka no wakangwara?” (Mateu 24:45) Cicinyi cinovonesa kuti Mukhumbi  Unotonga ngaiwona muranda wakagondeka? Ngatende tivone zviro zvitatu zvakabeseraya mukhumbi unotonga mu nguva yo vapostori.

13. Mujimu mucena uri kubesera kudini Mukhumbi Unotonga?

¹³ Mujimu mucena unobesera Mukhumbi Unotonga. Mujimu mucena uri kubesera Mukhumbi Unotonga kuzwisisa zvokadi zvo Bhaibheri zvaucaizwisisa. Inga muezaniso, rangariranyi zviri pa rista yo zvitendhwa zvakajekeswa yanangwaya. Akuna mundhu waizokwanisa kuzwisisa no kusanangura zviro izvi zvo ‘ujiki hwa Mwari,’ acina besero. (Verenganyi 1 VaKorinto 2:10.) Mukhumbi Unotonga uno mazwiro akadari inga o mupostori Pauro, wakatara kudari: “Itisu atitokotesi bziro bza Mwari ngo mazwi anobva mu uzivi hwo mundhu. Kaveta tinotokotesa ngo mazwi o takajijiswa ngo mujimu.” (1 VaKorinto 2:13) Pasure po mazana o makore veciashira jijiso jo manyepo vacina ndhungamiriro jakajeka, zvingaitisa kudini kuti vakwanise kuengejera zwisiso yo Bhaibheri ngo maitiro anokahamaja kubvira mu gore ro 1919? Thangwe rakona ndi rimwe basi, ro kuti Mwari ari kubesera ngo mujimu mucena wake!

14. Mukuzwirana no Apokalipsi 14:6, 7, nyamasi uno ngirozi jiri kubesera kudini Mukhumbi Unotonga no vandhu va Mwari?

¹⁴ Ngirozi jiri kubesera Mukhumbi Unotonga. Mukhumbi Unotonga uno mutoro wakakura maningi wo kuvonerera vacumaeri vanodarika kuita zviuru zvisere, vari kucumaera pasi pese. Waro ngenyi basa iri riri kubudirira? Thangwe rimwe ngo rokuti riri kubesehwa ngo ngirozi. (Verenganyi Apokalipsi 14:6, 7.) Kazinji, ngirozi jinotungamirira vacumaeri kooguma pa mundhu wabva kuita mukumbiro ecikumbira besero Mwari! * (Vonanyi masoko o pasi.) Basa ro kucumaera no kujijisa riri kuramba recienderera mberi, pikija ku ndau kwaricikadakarihwi. Izvi zviri kukwanisikavo basi ngo ndava yo besero ro ngirozi.

15. Mukhumbi Unotonga wakasiyana kudini no vatungamiriri vo ciKristodhomu? Ipanyi muezaniso.

¹⁵ Soko ra Mwari riri kutungamirira Mukhumbi Unotonga. (Verenganyi Johani 17:17.) Vonanyi zvakaitika mu gore ro 1973. Mujeura wo Murindiri wo njiku 1 ya Mbuji, mu ciPutukezi, waibvunjisa kuti ‘mundhu ari wese acizivi kusiya kamare cirovejeso cake co kubhema foha waizokwanirisa kuti abhabhatijwe here’ kana kuti haiwa. Mupinguro wo mubvunjo uwu wainga wakacijikira mu zviambi zvo Bhaibheri zve wainga wo kuti haiwa! Murindiri wondhowo wakashandisa mavhesi akawanda wecisanangura kuti ngenyi mundhu acikaregeri kubhema anodikana kujingwa. (1 VaKorinto 5:7; 2 VaKorinto 7:1) Iwona wainanga kuti mupango uwu wakavanga aubvi ku vandhu asi, ‘unobvadi kamare kuna Mwari, uwo anovereketa ecishandisa Soko rake rakatahwa.’ Akuna sangano rimweni riri kukhombija kuva no cido co kuthemba Soko ra Mwari zvakaperera, pikija pazvinongaya zvecinesa kamare kuzviita kuno vamweni vavo. Bhuku rimweni rawari, rinobhuya ngo shwiro jo zviara ku Estadhos Unidhus, rakananga kudari: ‘Vatungamiriri vo ciKristu, kuti vawane besero, kazinji vanocinja jijiso javo kuti jizwirane no zvinotendwa kana mavonero o vatendi doni vavo no uzinji hwo vandhu.’ Asi, Mukhumbi Unotonga autungamirihwi ngo zvinodakajisa uzinji hwo vandhu.  Kusiapo, umwe nga umwe wavo, anotungamirihwa ngo Soko ra Mwari zve izvo zvinovonesa kuti ndi Jehovha kamare ari kutungamirira vandhu vake nyamasi uno.

16. Ngo yapi njira imweni yatingaceukija ndiyona Mukhumbi Unotonga?

¹⁶ Verenganyi Vaheberi 13:7. Bhaibheri rinonanga kuti “ceukijanyi vatungamiriri venyu.” Njira imweni yatingazviita ndiyona ngo yo kubatanijavo hama jo Mukhumbi Unotonga pa mukumbiro jedu. (VaEfeso 6:18) Ijona jino mutoro jakawanda manigi, jinobatanija kupa cokuha co kumujimu, kutungamirira basa ro kucumaira pasi pese, zve kuvonerera mashandisihwe o mupiro jinoitihwa sangano. Zvokadi kuno dikano yo kuti tijiitire mukumbiro nguva jese!

17, 18. (a) Tinoteveresa kudini ndhungamiriro jo Mukhumbi Unotonga? (b) Kuti tibesere Jesu no Mukhumbi Unotonga, tinodikana kucumaeresa kudini?

¹⁷ Tingaceukijazve Mukhumbi Unotonga ngo kutevera ndhungamiro jawo. Iwona unotipa ndhungamiriro ucishandisa mabhuku edu, musongano, magungano o ndharaundha no o mutundhu. Iwona unogajazve vavonereri vo ndharaundha, vaya vanogajavo vakuru. Vavonereri vo ndharaundha no vakuru, vanokhombija kuti vari kuceukija Mukhumbi Unotonga ngo kunasa kuteverera ndhungamiriro jovanopuwa ndiwona. Zve tese tinokhombija kureremeja Mutungamiriri wedu, Jesu, ngo kuzwira vanarume vaari kushandisa nyamasi uno.—Vaheberi 13:17.

¹⁸ Njira imwezve yatingaceukija ndiyona Mukhumbi Unotonga ngo yo kuvangisira mu basa ro kucumaera. Vaheberi 13:7 inotibvunja kuti titevejere rutendo hwo vanotitungamirira. Mukhumbi Unotonga uri kuvonesa rutendo hwakavanga ngo kuvangisira pa kucumaera no kubesera kutokoteswa ko masoko akanaka. Tiri kubesera hama ijo pa basa iri rinosisira here? Kudari tiri kubesera, tinozodakajihwa ngo kuzwa Jesu ecitibvunja kudari: “Ngari yese, yo makabziita ku umwe wo hama jangu doko iji, makabziitira inini.”—Mateu 25:34-40.

19. Ngenyi matema civaringo co kutevera Mutungamiriri wedu Jesu?

¹⁹ Jesu paakahwirira mugore, aazivi kusiya vajiji vake vari vega. (Mateu 28:20) Iyena waiziva kuti mujimu mucena, ngirozi no Soko ra Mwari zvaimubesera kutungamirira paainga pasi pano. Iyena ari kubesera muranda wakagondeka nyamasi uno. Mukhumbi Unotonga uri kuramba ucitevera “Bvuta,” Jesu, “kwese korinoenda.” (Apokalipsi 14:4) Ngo kudaro, patinoteverera ndhungmiriro jo Mukhumbi Unotonga, tinonga teciteverera Mutungamiriri wedu, Jesu. Mbai-mbai pano, iyena anozotiendesa ku upenyu hucikaperi. (Apokalipsi 7:14-17) Akuna no mutungamiriri ari wese wo vandhu angatithembesa zvondhozvo!