1, 2. Hama imweni yakazwisisenyi ngo pamusoro po mugariro wayo zve yakaitenyi?

ROBERT wakabhabhatijwa paainga aciri muaruki, asi aacaita kuti cokwadi cive cinosisira mu upenyu hwake. Iyena wakati: “Apana cakashata condaiita, asi ndaidikana kucinja basi mazwiro. Ndaivoneka inga kuti ndakavanga kumujimu, ngo kwenda ku musongano jese, ngo kushanda inga piyona wo besero mweji munganani pa gore. Asi painga no ciro caifaratari.”

² Robert aacaizwisisa kuti ndi cinyi caifaratari mbhera paakaguma pa kucadha. Nguva jimweni , iyena no mukaji wake vaiita jhogo wokuitirana mubvunjo jo Bhaibheri. Mukaji wake wainasa kuziva Bhaibheri zve waikwanisa kudavira mubvunjo jese acikanesehwi. Asi Robert kazinji aacaikwanisa kudavira zve wainyowejeka. Iyena wakati: “Zvaiita inga anditozivi ciro. Ndakarangarira kudari: ‘Kudari ndinoda kuva musoro wo kumujimu wo mukaji wangu, ndinodikana kuita ciri cese.’” Ngokudaro iyena wakaita. Iyena wakati: “Ndakajija, ndojija zve ndojija maningi Bhaibheri zve zviro zvakatanga kubatana cimwe pa cimweni. Ndakaguma pa kuzwisisa kuti cinosisira maningi i kuva no ushamwari hwo phedo na Jehovha.”

3. (a) Tingajijenyi kubvira ku zvakaitikari na Robert? (b) Mafundo api anosisira atinozobhuya mu musoro uno?

 ³ Tingava no cijijo cinosisira maningi kubvira ku zvakaitikari na Robert. Zvingaita kuti tino zivo yakati kuti yo Bhaibheri, tinoenda ku musongano nguva jese zve tinotoendavo koocumaera, asi izvi azviiti kuti tive no murangariro wo kumujimu. Kana kuti makatombovangisira kuti mugume pakuva no murangariro wo kumujimu, asi patinozvipopora pacedu, tinovona zviro zvatinodikana kuitisa nane. (VaFilipi 3:16) Pamusoro uno, tinozodavira mubvunjo mutatu jinosisira: (1) Zvicinyi zvinozotibesera kuti tizive kuti tino murangariro wo kumujimu? (2) Tingagumisa kudini pakuva no umujimu hwakavanga? (3) Kuitisa kudini kuva no umujimu hwakavanga zvinotibesera mu upenyu hwedu hwo njiku ngo njiku?

4. Mazano ari pana VaEfeso 4:23, 24, anoshanda kuna iyani?

⁴ Patinotanga kushandira Mwari, tinoita cinjo inopsasa upenyu hwedu hwese. Izvi azviperi patinopera kubhabhatijwa. Bhaibheri rinotibvunja kudari: ‘Kuti tiite vandhu vapsa mu murangariro.’ (VaEfeso 4:23, 24) Mu Cigriki masoko okuti ‘kuti tiite vandhu vapsa’ anoreva ciito co kuederera mberi. Ngo iyo ndava, tinodikana kuenderera mberi, teciitwa vapsa mu simba ro murangariro wedu. Ngokuti tiri vandhu vacizivi kukwana, tinodikana kuenderera mberi ticiita cinjo. Pikija itusu tiri kushadira Jehovha ku makore mazinji, tinodikana kuenda mberi tecivangisa ushamwari hwedu na Jehovha.—VaFilipi 3:12, 13.

5. Mubvunjo japi jingatibesera kuziva kuti tiri vandhu vano murangariro wo kumujimu?

⁵ Azvinenyi kuti tiri vasharuka kana vadoko, tese tinondikana kuzvipopora pacedu ngo mwoyo wese. Tingazvibvujisa kudari: ‘Kunanga kuti inini ndiri kuva mundhu ano murangariro wo kumujimu here? Ndiri kuva inga Kristu? Murangariro wangu no manera andinoita zviro padinonga ndiri pa musongano anovonesenyi? Mabhuyo angu anotatijenyi ngo pamusoro po zvadinoda mu upenyu hwangu? Zvirovejeso zvangu zvokujija, masimiriro no kujinemesa pamwepo no maashirire andinoita mbhangiro anonangenyi ngo pamusoro pangu? Icinyi cadinoita pa dinoejwa kuti ndiite ciro cakashata? Kureva kuti ndiri muKristu wakaibva here?’ (VaEfeso 4:13) Mubvunjo iji jingatibesera kuvona kuti tiri kukurisa kudini kumujimu.

6. Ngozvapi zvimweni zvingatibesera kuziva kuti tino murangariro wo kumujimu?

⁶ Nguva jimweni tinoda kuti vamweni vatibesere kuvona kuti tiri vandhu vano murangariro wo kumujimu kana kuti haiwa. Mupostori Pauro wakasanangura kuti mundhu wo kunyamai mundhu acikazwisisi kuti maitiro no upenyu hwake auripi kudakajisa Mwari. Asi Mundhu ano murangariro wo kumujimu anozwisisa mavonero a Mwari. Iyena anoziva kuti Jehovha aatenderi upenyu wo kunyama. (1 VaKorinto 2:14-16; 3:1-3) Vakuru vano  murangariro wa Kristu, ngo kukasika povanovona kuti hama iri kutanga kudisisa zviro zvo kunyama, ivona vanoeja kuibesera. Kudari vakuru vakaeja kutibesera, tinozodavira kubeswa ndivona zve toita cinjo jinodikanaro? Kudari tikazviita, tinozotatija kuti tinoda kuva vandhu vano umujimu wakavanga.—Mucumaeri 7:5, 9.

7. Tinozvizivisa kudini kuti mundhu ano murangariro wo kumujimu asipi basi wiya ano zivo yo Bhaibheri?

⁷ Kuva no zivo yo Bhaibheri azvirevi kuti tino murangariro wo kumujimu. Mambo Soromona wainasa kuziva Jehovha zve masoko amweni ake o uzivi akaguma pa kuva divi ro Bhaibheri. Asi pakufamba ko nguva, ushamwari hwake na Jehovha wakaguma pa kurembejeka zve aazivi kuramba wakagondeka. (1 Majimambo 4:29, 30; 11:4-6) Waro, tinodikana kuitenyi kuti tiengejere zivo yo Bhaibheri? Tinodikana kwenderera mberi tecivangisa rutendo hwedu. (VaKolosi 2:6, 7) Tingazviitisa kudini izvi?

8, 9. (a) Zvicinyi zvinozotibesera kuti tivangise gonda redu? (b) Ngo capi cido cedu patinojija no kurangarijisisa? (Vonanyi pikica yo kutanga.)

⁸ Muzana ro kutanga ro makore, Pauro wakavangisa maKristu kuti ‘ngativangisire kuti tive vakaibva.’ (Vaheberi 6:1, Shanduro yeNyika Itsva) Tingashandisa kudini mbhangiro iyi nyamasi uno? Maitiro amwe anosisira ngo o kujija bhuku rinoti Rambanyi Muri mu Rudo hwa Mwari. Izvo zvinozomubesera kuzwisisa mashandisire amungaita zviambi zvo Bhaibheri mu upenyu hwenyu. Kudari makamborijija bhuku iri, mungajija mabhuku amweni, angamubesera kuti gonda renyu rivange. (VaKolosi 1:23) Tinodikanazve kurangarijisisa zvatinojija zve tokumbira Jehovha kuti atibesere kuvona mashandisire atingazviita.

⁹ Potinojija no kurangarijisisa, cido cedu cinodikana kuva co kukurisa cido catinaco co kuzwira Jehovha. (Nduyo 40:9; 119:97) Tinodikanazve kujija kutiza ciri cese cingatiphingaija kuti tiime kukura kumujimu.—Tito 2:11, 12.

10. Majaha no vasikane vangaitenyi kuti vagume pa kuvanga kumujimu?

¹⁰ Kudari muri mujaha kana musikane, muno zvido zvo kumujimu here? Hama imweni iri kushanda pa Bheteri, kazinji inobhuya  no majaha kana vasikane vanonga vecida kubhabhatijwa pa gungano ro ndharaundha yecivabvunjisa ngo pamusoro po zvido zvavo zvo kumujimu. Iyona inovona kuti vazinji vanonasa kurangarira ngo pamusoro po manera ovanoda kushandira Jehovha kumbejiyo. Vamweni vanoronga kushandira Jehovha mu nguva yakazara kana kucinja kwenda kunodiwa maningi vacumaeri. Asi majaha kana vasikane vamweni avakwanisi kudavira mubvunjo wondhowo. Kutama kudavira kwavo, kunoreva kuti avana dikano yo kuva no zvido zvo kumujimu here? Kudari uri mujaha kana musikane, zvibvunjisei kudari: ‘Ndinoenda ku musongano no koocumera basi ngo ndava yo kuti vabari vangu vanoda kuti ndiite kudaro here? Kana kuti ndinozviita ngo kuti ndino ushamwari hwo mundhu ega na Mwari?’ Zvokadi kamare, tese tinodikana kuva no zvido zvo kumujimu, azvinenyi tiri majaha kana vakuru. Zvido izvi zvicazotibesera kuguma pakuvanga kumujimu.—Mucumaeri 12:1, 13.

11. (a) Zvicinyi zvatinodikana kuita kuti tive no murangariro wo kumujimu? (b) Muezaniso wapi wo mu Bhaibheri wotingatevejera?

¹¹ Pakupera kuvona potinodikana kuitisa nani, tinodikana kutanga kuita cinjo. Izvi zvinosisira maningi zvokuti zvinopsasa maponero edu, zvingatoreva upenyu kana rufu. (VaRoma 8:6-8) Jehovha aaveteri kuti tive vandhu vakakwana, ngo iyo ndava anotipekeja mujimu mucena wake kuti utibesere. Asi itusu tinodikana kushada ngo simba. Hama John Barr, avo vakashanda inga umwe wo Mukhumbi Unotonga, pa bvaza imweni vakasanangura Luka 13:24 veciti: ‘Vazinji vanokonehwa  kubudirira ngo kuti avavangisiri zvakakwana kuti vakure.’ Itisu tinodikana kuva inga Jakobe, uwo wakatakana no ngirozi zve aazivi kuremba mbhera paakakomborehwa. (Genesi 32:26-28) Pikija jijo yo Bhaibheri ingava inodakajisa, atidikani kuvetera kuti Bhaibheri rive mabungaijo akadari inga o kusumurihwa ngano. Tinodikana kushanda kuti tiwane zvokadi zvinosisira izvo zvinozotibesera.

12, 13. (a) Zvicinyi zvinozotibesera kushandisa zviri pana VaRoma 15:5?, Shanduro yeNyika Itsva (b) Muezaniso wa Pedru no mbhangiro yake zvingatibesera kudini? (c) Mungaitenyi pacenyu kuti mukure no kuvanga kumujimu? (Vonanyi bhokiso rinoti: “Mungaitenyi Kuti Mukure Kumujimu?”)

¹² Patinovangisira kuti tikure kumujimu, mujimu mucena unozotibesera kuti ticinje manera atinorangarira. Padoko ngo padoko, tingatojija kurangarira inga ndi Kristu. (VaRoma 15:5, Shanduro yeNyika Itsva) Mujimu mucena ungatibesera kubzura kana kubvita murangariro jakashata zve unoita kuti tisakurire mugariro jinodakajisa Mwari. (VaGalàsia 5:16, 22, 23) Kudari tikafumbhura kuti takapeamira maningi pa kuda zviro zvo kunyama kana ku zvinodakajisa muviri, ticadoremba. Ngatirambe tecikumbira Jehovha mujimu mucena kuti utibesere kupeamira ku zviro zvakarungama. (Luka 11:13) Ceujanyi mupostori Pedru. Aacairangarira inga ndi Kristu nguva jese. (Mateu 16:22, 23; Luka 22:34, 54-62; VaGalàsia 2:11-14) Asi iyena aazivi kuremba, zve Jehovha wakamubesera. Padoko ngo padoko, Pedru wakajija kurangarira inga Kristu. Izvi zvingaitikavo nesu.

¹³ Pa kufamba ko nguva, Pedru wakadurujira mugariro kamare jingatibeseravo. (Verenganyi 2 Pedru 1:5-8.) Tinodikana kushanda ngo simba kuti tiengejere kujibata, kucungirira, rudo no hama jedu, no mugariro jimweni jakanaka. Njiku ngo njiku tinodikana kujibvunjisa kudari: ‘Mugariro japi jandingasakurira nyamasi jingazondibesera pa kuguma pa kuva ndakavanga kumujimu?’

14. Kudari tikava no murangariro wo kumujimu zvinozopsasa kudini upenyu hwedu?

¹⁴ Tikava no murangariro wa Kristu, zvinozovoneka ngo mufambiro wedu patinonga tiri kubasa, kucikora, pa zvatinovereketa zve pa zvivaringo zvatinotema njiku ngo njiku. Zvivaringo zvedu zvinokhombija kuti tiri kueja kutevejera Kristu. Ngo kuti tino muragariro wo kumujimu, itisu atidi kuti ciri cese cimphwanye ushamwari hwedu na Jehovha. Potinoejwa kuita ciricese cakashata, kuvanga kwedu kumujimu kunozotibesera kuramba tecicungirira muejo uri wese. Ticito tatema civaringo, tinozotanga tambojibvunjisa kudari: ‘Zviambi zvapi zvo Bhaibheri zvingandibesera? Jesu waizoitenyi pa mugariro uu? Ngo zvapi zvinodakajisa Jehovha?’ Tinodikana kuva no cirovejeso co kurangarira kudeya. Ngo kudaro, ngatibhuyisane ngo mugariro jimweni jingakumbira kutanga tarangarira kudaro. Pamugariro umwe nga umwe, tinozosotesesa ciambi cingatibesera kutema civaringo co ungwaru.

15, 16. Kuitisa kudini kurangarira inga Kristu kungatibesera pa kutema zvivaringo zvakanaka ngo pamusoro po (a) kusana waunoda kurovorana naye? (b) kukheta shamwari jedu?

¹⁵ Kusana waunonda kurovorana naye. Ciambi cakhona cinowanika pana 2 VaKorinto 6:14, 15. (Verenganyi.) Pauro wakanasa kujekesa kuti vandhu vano murangariro wo kumujimu avavoni zviro inga maitiro anoita vandhu vo kunyama kana vaya murangariro wo kunyama. Ciambi ici cingamubeseresa kudini  kuti musane mundhu wo kurovorana naye?

¹⁶ Kukheta shamwari. Ciambi cakona cinowanika pana 1 VaKorinto 15:33. (Verenganyi.) Mundhu ano murangariro wo kumujimu aazoiti ushamwari no mundhu waizorembesa gonda rake. Rangariranyi mashandisire omaizoita ciambi ici pa mugariro jakasiyana-siyana. Inga muezaniso, ciambi ici caizomubesera kudini kuti muteme zvivaringo ngo pamusoro po kuita ushamwari ngo mu interneti? Ciamibi ici cingamubesera kudini kuziva kuti zvinoita kana kuti haiwa kutamba jogo jo mu interneti no vandhu vamucikazivi?

17-19. Kuva mundhu ano murangariro wo kumujimu kungamubesera kudini (a) pa kuramba basa ricikasisiri? (b) kuti muve no zvido zvo kumujimu? (c) kuti mutonge kutama kuzwirana?

¹⁷ Mabasa anokhuvaza umujimu hwedu. Pana Vaheberi 6:1. (Verenganyi.) Tinowana ngwajo inosisira maningi. Ngo api “mabasa o kufa” atinodikana kutiza? Ndi mabasa ayani acikashandi acingatibeseri kuguma pakuva vakavanga kumujimu. Ngwanjo iyi ngo pamusoro po mabasa o kufaangatibesera kudavira mubvunjo jakadari inga iji: Mabasa aya anoshanda kana kuti aashandi? Ndinodikana kunghwinira mu nyagoso iyi? Ndinodikana kubatana no cikwata ciri kueja kuitisa nani magariro o nyika ino here?

¹⁸ Zvido zvo kumujimu. Pa Hurukuru yo pa Dundhu, Jesu wakatipa ngwajo yakanaka ngo pamusoro po zvido. (Mateu 6:33) Mundhu ano murangariro wo kumujumu anodira Umambo pakutanga mu upenyu hwake. Ciambi ici cinozotibesera kuti tidavire mubvunjo jakadari inga iji: ‘Kureva kuti ndinodikana kwenda ku univhersidhadhe pondinopera kujija cikora sekundaria here? Ndinodikana kudavira basa riri rese here?’

¹⁹ Kutama kuzwirana. Ngwajo ya Pauro ku maKristu o ku Roma ingatibesera potinotama kuzwirana no vamweni. (VaRoma 12:18) Itusu tinotevejera Kristu, ngokudaro tinoenja ‘kugarisika no vandhu vese.’ Tinoitenyi patinotama kuzwirana no vamweni? Zvinotinesera kudavira mavonero o vamweni here? Kureva kuti tinozivika inga vandhu vanoeja kuita runyararo here?—Jakobo 3:18.

20. Ngenyi munoda kuenderera mberi mucikura kumujimu?

²⁰ Muezaniso iji, jinotitatija kuti zviambi zvo mu Bhaibheri zvingatibesera kutema zvivaringo zvinovonesa kuti tiri kutungamirihwa ngo mujimu wa Mwari. Kudari tiri vandhu vano murangariro wo kumujimu, upenyu hwedu unozova unodakajisa zve unopfaja. Robert, wanangwanya pakutanga, wakati: “Pasure po kusakurira ushamwari wokadi-kadi na Jehovha, ndakava mwamuna wakanaka zve baba vaushoni. Ndainga ndaano mudakaro.” Potinoita zvese zvatinokwanisa kuti tienderere mberi inga vandhu vo kumujimu, tinozobusavo makomborero mazinji. Tinozova no upenyu unodakajisa wari, zve kumbejiyo tinozova no “uhomi hwokadi-kadi.”—1 Timoti 6:19.