VANDHU vanoda kuva no mudakaro. Asi iji ndi njiku jo kupejisira zve vese vari kusongana no zvineso ngokuti ndi “mukuvo wokunesa.” (2 Timoti 3:1) Vandhu vamweni vanoruza mudakaro wavo ngokuti vanoshaisha kutajwa, vari kuhwaja, vari kuruza mabasa avo kana pavanofihwa ngo mudiwa wavo. Vamweni vanoruza mudakaro wavo ngokuti nguva jimweni zvinoitika zviro zvinovaitisa kuti vathye kana kusuruvara. Pikija vanamati va Jehovha nguva jimweni vanoguma pa kupera simba zve padoko ngo padoko vanoruza mudakaro wavo. Kudari izvi zviri kuitika na imwimwi, mungawanisazve kudini mudakaro wenyu?

Kuti tidavire mubvunjo uwu, pakutanga tinodikana kuzwisisa kuti mudakaro wokadi-kadi icinyi zve vamweni vanorambisa kudini vano mudakaro wavo pikija no zvineso zvavanosongana nazvo. Pasure pazvo, tinozovona kuti tingarambisa kudini tino mudakaro wedu no kuuengejera.

Kuva no mudakaro azvizivi kuezana no kudakajihwa. Rangariranyi basi: Mundhu wamwa doro angava mundhu anoseka maningi. Asi kudari doro riya rikapera mu musoro, aazotosekizve ngo ciri cese zve mungatovona kuti ana zvineso zvizinji. Kudakajihwa kwake kwainga ko cimukuvo cidoko basi zve aucainga mudakaro wokadi-kadi.—Mazwi Akangwara 14:13.

Ngo divi rimweni, mudakaro i mazwiro akavanga atinao mu mwoyo mwedu patinokwanisa ciri cese kana potinovetera ciri cese cakanaka. Kuva no mudakaro zvinoreva kuva takadakara azvinenyi mugariro wedu wakanaka kana wakashata. (1 VaTesalònika 1:6) Zvokadi kamare, tingava takacamwa ngo cirecese asi toramba takadakara. Inga muezaniso, vapostori vakatambujwa ngo ndava yo kucumaira ngo pamusoro pa Jesu. Pikija zvakadaro, ivona “vakabuda pa nyasi po Sinedrio, vakazara ngo kudakara, ngokuti vainga vakanakira kutambujwa ngo njio yo zina ra Jesu.” (Maitiro o Vapostori 5:41) Ivona avacaidakara ngo kuti vakatambujwa, asi ngokuti vakakwanisa kuramba vakagondeka kuna Mwari.

Mudakaro asipi ciro catinobahwa naco kana ciro cinoviya cega. Ngenyi? Ngokuti mudakaro okadi-kadi i mucero wo mujimu mucena wa Mwari. Mujimu wa Mwari unotibesera kuti tisakurire “undhu hupsa,” uwo unobatanija mudakaro. (VaEfeso 4:24; VaGalàsia 5:22) Zve patinova no mudakaro, zvinozotirerukira patinozosotana no zvineso.

Jehovha waida kuvona zviro zvakanaka zveciitika pasi pano, haiwa zviro zvakashata zvatiri kuvonari nyamasi uno. Asi pikija vandhu vari kuita zviro zvakashata, Jehovha aaruzi mudakaro wake. Bhaibheri rinonanga kudari: ‘Simba no kudakara zviri ku ndau yake.’ (1 Kronike 16:27, Baiberi Mazwi Akacena aMwari) Mukuengejera, zviro zvakanaka zvinoitwa ngo vashandiri va Jehovha zvinomuita kuti adakare.—Mazwi Akangwara 27:11.

Itusu tinotevejera, kana kueja kuva inga Jehovha potinotama kuruza mudakaro wedu kudari zviro zvakatama kuitika ngo manera otaivetera. Kusiapo kuthya, tingasotesesa zviro zvakanaka zvatinazvo  wari no kuvetera no kusengerera kwese zviro zvakanakisisa kumbejiyo. *—Vonanyi masoko o pasi.

Mu Bhaibheri muno muezaniso jakawanda maningi jo vandhu vakaramba vano mudakaro wavo pikija vacihwisana no zvineso zvizinji. Abhirahama wakaramba no mudakaro pikija upenyu hwake wainga pa ngozi zve vandhu vamweni paaivaimuviisira zvineso. (Genesi 12:10-20; 14:8-16; 16:4, 5; 20:1-18; 21:8, 9) Wakazviitisa kudini izvi? Ngo kurangarira ngo pamusoro po vetero yake yo kurarama mu nyika impsa pasi po utongi hwa Mesia. (Genesi 22:15-18; Vaheberi 11:10) Jesu wakati: “Abrahama, baba wenyu, wakadakara ecivetera kuvona njiku yangu.” (Johani 8:56) Tinotevejera Abhirahama patinoramba tecirangarira ngo pamusoro po mudakaro watinozova nawo kumbejiyo.—VaRoma 8:21.

Pauro na Sira vaingavo no gonda rakavanga zve vairamba vano mudakaro wavo pikija no zvineso zvizinji zvavaisongana nazvo. Inga muezaniso, pasure po kutakwa zvakashatisisa zve vodihwa mu jere ivona “vainamata, no kuimbira Mwari ndumbo.” (Maitiro o Vapostori 16:23-25) Ivona vaicungirira zvineso zvavo ngokuti vairamba vacirangarira ngo pamusoro po zvigondiso zvo kumbeji. Zve ngo kuziva kuti ivona vaitambujika ngo kuva vateveri vaKristu zvondhozvo zvakavapa mudakaro. Tinotevejera Pauro na Sira patinoceukija muviyo jaushoni jinovepo ngo kushandira Mwari takagondeka.—VaFilipi 1:12-14.

Nyamasi uno, tinavo muezaniso jakawanda jo hama no hambzaji jiri kuramba no mudakaro pikija no zvineso zvajire kusongana najo. Inga muezaniso, mu mweji wa Cikowe wa 2013, Tufão (bepo guru) yaizwi Haiyan yakaparaja nyumba jinodakarika 1.000 jo Zvapupu zva Jehovha ku Firipina. George, uwo wainga no nyumba yake, yakamuka kuphanyika yese mu dhorobha ro Tacloban, wakananga kudari: “Pikija no zvaingari zvaitika, hama jainga jakadakara. Zvinonesa kwandiri kunanga mudakaro watainga nawo.” Kudari tikarangarira ngo pamusoro po zvaari kutiitira Jehovha no kuramba tecimubongesera, tinozoenderera mberi tino mudakaro wedu pikija patinosongana no zvineso zvikuru. Ngozvapi zviro zvimweni zvaarikutiitira Jehovha zviri kutipa mudakaro?

Ciro cikuru cinotiitisa kuti tidakare ndi ushamwari hwedu hwo phedo na Jehovha. Tinoziva kuti iyena ndi Mambo wo mudenga no pasi. Ndi Baba wedu, Mwari zve Shamwari!—Nduyo 71:17, 18.

Tinodakarazve ngokuti Jehovha anotipa upenyu no kukwanisa kwedu kuubusa. (Mucumaeri 3:12, 13) Ngokuti iyena wakatikwevera kwaari, tinokwanisa kuzwisisa kuda kwake zve tinoziva manera akanaka atingararama. (VaKolosi 1:9, 10) Pikija zvakadaro, vandhu vazinji avazwisisi cidisiso co upenyu. Kuitira kukohomeja musiano uwu, Pauro wakatara kudari: “‘Bziya bzicizivi kuvoneka ngo majiso, nokuti kupurukihwa ngo njeve, nokuti kurangarihwa ngo musoro uriwese, ndibzona bzakanasirihwa ndi Mwari, kwa vaya vanomudisisa.’ Itisuvo tobziziviswa ndi Mwari, ngo mujimu.” (1 VaKorinto 2:9, 10) Kuzwisisa kuda ka Jehovha no cidisiso cake kunotipa mudakaro.

Jehovha ari kuita zvizinji kwatiri. Iyena wakaita kuti zvishaishi zvedu zviregerehwe. (1 Johani 2:12) Iyena wakatipa vetero yo kurarama mu nyika imbza, iyo iri kuviya sasambi wari. (VaRoma 12:12) Pikija wari, Jehovha ari kutipa shamwari jakawanda kuti timunamate pamwepo. (Nduyo 133:1) Anotingwariravo ka Sathana no madhimoni. (Nduyo 91:11) Kudari tikaramba tecirangarira ngo pamusoro po zviro izvi zvinoshamaisari zvaanotipari Jehovha, tinozova no mudakaro muzinji.—VaFilipi 4:4.

Zvingaita here muKristu ano mudakaro woengejerazve mudakaro wake? Jesu wakati: “Ndakamubvunja ibzi kuti kudakara kwangu kuve komuri, no kuti kudakara kwenyu kuite kwakaperera.” (Johani 15:11) Izvi zvinotatija kuti mukuvo wese tingauwana mudakaro. Tingaezanisira mudakaro wedu no  muriro. Kudari tikada kuti muriro ubwake, tinodikana kugara tecidira huni. Ceujanyi kuti: Mujimu mucena unotibesera kuwana mudakaro. Asi kudari itisu tikada mudakaro muzinji, tinodikana kuramba tecikumbira mujimu mucena wa Mwari patinoita mukumbiro. Tinodikanavo kuramba tecirangarijisisa zviri mu Bhaibheiri, iro rakafemehwa ngo mujimu mucena.—Nduyo 1:1, 2; Luka 11:13.

Zviro zvimweni zvingativiisira mudakaro muzinji i kugara takabatikana ngo zviro zvinodakajisa Jehovha. (Nduyo 35:27; 112:1) Ngenyi? Bhaibheri rinoti takasikwa kuti ‘tithye Mwari no kuteveja mipango yake, ngokuti nga ibzi bzaanodika kuita mundhu.’ (Mucumaeri 12:13) Ngokuti itusu takasikwa kuti tiite kuda kwa Jehovha. Ngokudaro, potinoshandira Jehovha, tinozova no mudakaro wokadi-kadi mu upenyu hwedu. *—Vonanyi masoko o pasi.

Potinonga teciengejera mudakaro wedu, tinozobesereka maningi. Inga muezaniso, Jehovha anozodakara maningi ndisu, tikaramba tecimushadira ngo mudakaro wese pikija patinosongana no zvineso. (Deuteronòmio 16:15; 1 VaTesalònika 5:16-18) Cimwenizve, ngokuti tino mudakaro wokadi-kadi, itusu atirangariri kuti kuva no upfumi uzinji i zviro zvinosisira maningi mu upenyu. Mukusiana na izvo, tinoeja kujipira no kuita zvatinokwanisa kuitira Umambo hwa Mwari. (Mateu 13:44) Zve potinovona muviyo wakanaka unovepo ngo kushandira kwedu Jehovha, tinozodakara maningi tojizwa ushoni mu upenyu pacedu zve toita kuti vamweni vadakarevo.—Maitiro o Vapostori 20:35; VaFilipi 1:3-5.

Cimwenizve, tingava no mudakaro mukuru, zvingaitavo kuti tivevo no uhomi hwakanaka. Bhaibheri rinoti: “Mwoyo wakadakara unodakajisa muviri.” (Mazwi Akangwara 17:22) Umwe mupsakakisiri wakajija ngo zvo uhomi ku Univhersidhadhe yo ku Nebraska ku Estadhus Unidhus wakananga zvimweni zvinozwirana no Bhaibheri. Iyena wakati: “Kudari muno mudakaro zve mupfaro mu upenyu hwenyu wari, zvingaita kuti kumbejiyo munozovavo no uhomi hwakanaka.”

Ngokudaro, pikija tiri kupona mu nguva jinonesa, itusu tingawana mudakaro wokadi-kadi patinoashira mujimu mucena ngo kuita mukumbiro, kujija, no kurangarijisisa Soko ra Mwari. Tinozowanavo mudakaro muzinji kudari tikarangarira ngo pamusoro po zviro zvizinji zvakanaka zvaanotipekeja Jehovha wari, kudari tikatevejera rutendo wo vamweni zve no kueja kuita kuda kwa Mwari. Perapo tingatozovona zvakasananguhwa pana Nduyo 64:10, iyo inoti: “Mururami anodakara na Tenji Mwari, wotizira kwaari.”