Pa musoro wo kutanga wo revhista iyi, takabhuya ngo pamusoro pa Kreso. Takavona manera aakacengejwa ngo mupiri Dherfo no manera aakaruza hondo yaakaita no mambo wo Persiya. Asi Bhaibheri rinonanga ngo ciporofita cakanasa kukwanirisika ngo pamusoro pa mambo wo Persiya. Ngatende tivone ciporofita condhoco.

Makore anokwana kuita 200 mambo wo Persiya acito abahwa, muporofita Isaya wakananga manera mambo wo Persiya waizohwisa dhorobha rino simba ro Bhabhironi. Iyena wakatonanga no zina ra mambo waizoitaro zvondhozvo, Siro.

Isaia 44:24, 27, 28: “Anonanga kudaro Tenji . . . Ndinobvunja bahari kuti: “Omai, ndinozoomesa murambu yako!” Ndinobvunja Siro kuti: “Iwewe, muhavisi hwangu”. Yena anozoita kuda kwangu kwese, ecibvunja Jerusalema kuti: “Iwewe unozovakiswabze,” no ku Nyumba ya Mwari kuti: “Unozoimiswabze!””

Mukuzwirana no musumuri umweni wo Cigiriki anozwi Herodhoto, masoca a Siro akaca mugeri kuitira kuti kumwa yo murambo wa Eufrati yaikhirira ngo mudhorobha ro Bhabhironi, itame kupopomazve ngo simba. Izvo zvakaita kuti kumwa iyi ipunguke maningi. Zvakaitari Siro zvakaita kuti masoca ake anghwine mu ndhorobha ecifamba ngo mu murambo uwu ngo soka. Naapera kuhwisa dhorobha, Siro wakasujunura Vaiziraeri vainga ku ushoko. Iyena wakasiyavo kuti Vaiziraeri vaende komusijira Jerusarema, rainga rapera kuparajwa ko makumanomwe o makore adarika.

Isaia 45:1: “Tenji anonanga, ngo ndava yo musanwi wake, Siro, kuti: Ndakamubata ngo mukono wake wo muho, kuti ndiwise pasi majinja, pambeji pake, kuti ndibvise bzijito bzo hondo bzo majimambo, kuti ndibeure musuvo pambeji pake, kuti musuvo yakakura itame kukonywa.”

Masoca o Persiya akanghwina mu Bhabhironi ecishandisa musuvo mukuru jo dhorobha iri, jainga jakasara jakashama vacikazvizivi. Vabhabhironi novaiziva zvaidari kuitwa ndi Siro, ivona vaizofunga musuvo jese jainga jakaringa ku murambo uwu. Asi ivona avazivi kuita kudaro, dhorobha rakagara recikazivi kungwaririka.

Ici ndi cimwe basi pa zviporofita zvizinji zvakanasa kukwanirisika. a Vandhu vazinji vanopsaka kuziva ngo zvo kumbeji, vanozviita ngo besero ro zvimwari zvavo. Asi Bhaibheri rakasiyana, zviporofita zvaro zvinovha ka wiya anonangaya kuti: “Kubvira pakutungamira ndakazivisa bzo pambeji, kubvira kare, ndakatokotesa bziro bzicito bzaitika.”—Isaia 46:10.

Ndi Jehovha basi angakwanisa kunanga izvi. Mukuzwirana no vajiji vamweni vo zvo Bhaibheri, zina iri rino revo yo kuti “Iyena Anoitisa Kuti Zviitike.” Zina iri rinokhombija kuti iyena angakwanisa kuziva zvo kumbeji no kuita kuti izvona zviitike mukuzwirana no kuda kwake. Izvi zvinotikhohwesa kamare kuti anozokwanirisa zvese zvaakagondesa.

Maidakarira kuziva zvinonanga Bhaibheri ngo pamusoro po njiku jedu jino? Pa zviuru zviviri zvo makore akhirira, Bhaibheri rakananga kuti “mu njiku jo kupejisira” kwaizowanika “mukuvo unonesa kucungirira.” Njiku jo kupejisira jenyi? Kureva kuti injiku jo kupejisira jo nyika no vandhu? Haiwa. Injiku jo kupejisira jo kuhwisana, kubzinyirihwa no matambujiko ari kunesari vandhu ko zviuru zvo makore. Ngatende tivone zviporofita zvinganani zvinovonesa kuti tiri kupona “mu njiku jo kupejisira.”

2 Timoti 3:1-5: “Mu njiku jo kupejisira . . . , vandhu vanozojida pacavo, vanozodisisa mare, vanojitundhumaja, vanojikuja, vatuki, vacikazwiri vabari, vacikabongi, vacikagondeki, vacikadi ukama, vacikadi kuzwirana no vamweni, vashori, vacikajibati, vanothyisa, vacingadi zvakanaka, vacikathembeki ku vamweni, vano ndhija, vakazara ngo kujikuja, vanodisisa zvinodakajisa muviri kupinda kuda Mwari ivona vanojiita inga vanonamata Mwari asi vanokonehwa kurarama mukuzwirana no simba rakwo.”

Imwimwi amutenderani nazvo kuti mugariro jo vandhu nyamasi uno jakaezana no jotaverengari pa vhesi iji? Makambovona kuti itusu takatendenejwa ngo vandhu vanojikuja, vanojida pacavo no kudisa maningi mare? Makambovona kuti vandhu wari uno vanoda maningi kutonga vamweni no kuita zviro mu njira yavanoda basi? Pacina kukana-kana, imwimwi makambovona kuti vana avaripi kuzwira vabari vavo, nokutizve vandhu vazinji vanodakarira maningi mabungaijo kupinda kuda Mwari. Zviro zviri kutonyanyisa njiku jese.

Mateu 24:6, 7: “Munozozwa ngo zvo hondo no marehwa-rehwa o hondo. . . . Majinja no majinja anozomukirana, umambo no umambo hunozomukirana.”

Mukuzwirana no jijo imweni yakaitwa, mutengo wo vandhu vanofa ngo hondo no kuhwisana ko masoca kuvhira mu gore ro 1914 unopindirija mazana o mamiriyau. Mutengo uwu unopindirija vandhu vo nyika jakawanda. Amborangariranyi kuti vandhu vangana vakacema, vakasuruvara no kutambujika ngo kufa ko vandhu vese ava. Waro, kunanga kuti vandhu vakajija ciri cese ngo zvakaitikari, vosiya kuita hondo?

Mateu 24:7: “Kunozova no njara.”

Vavonereri vo Zvokuha Kutenderera Nyika Yese vakananga kudari: “Mu nyika inowanika zvokuha kuitira vandhu vese, mundhu umwe pa vandhu vafumbhamwe anovata no njara njiku jese. Tikabatanija vese ava vanokwana kuita 815 o mamiriyau. Kusiyapo zvondhozvo, pa vandhu vatatu umwe anotambujika ngo ndhendha jinobahwa ngo kutama kuwana zvokuha zvinovaka muviri.” Zvinonangwa kuti vana vanokwana kuita mamirirau matatu vanotamika makore ese ngo ndava yo njara.

Ruka 21:11: “Kunozova no kuzungunyika kukuru ko nyika.”

Makore ese, kunoitika kuzungunyika ko nyika kunokwana kuita 50.000. Kuzungunyika kunokwana kuita 100 kunoparaja nyumba jakawanda. Cimwenizve, gore rimwe nga rimwe kunoitika kuzungunyika ko nyika kwakavanga maningi. Mukuzwirana no kupsakisiswa kumweni kwakaitwa, kuvhira mu gore ro 1975 no 2000, kuzungunyika ko nyika kwakauraya vandhu vanokwana kuita 471.000.

Mateu 24:14: “Masoko akanaka o Umambo aya, anozocumaehwa pasi pese, kuti vandhu vese vamazwe, perepo kunozoviya kupejwa ko zvese.”

Zvapupu zva Jehovha zvinodarika zviuru zvisere zviri kucumaera masoko akanaka o Umambo hwa Mwari kutenderera pasi pese, mu nyika jinokwana kuita 240. Ivona vanocumaera mu madhorobha akakura, mu ndharaudha jiri ndhambo, mu makwasha no mu matundhu. Ciporofita ici cinonanga kuti, kudari basa iri rikapera mu mavonero a Mwari “kunozoviya kupejwa ko zvese.” Izvi zvinoda kurevenyi? Izvi zvinoreva kuti utongi hwo vandhu unozopera, wozofakeiwa ngo Umambo hwa Mwari. Ngozvapi zvinozokwanirisika Umambo hwa Mwari ukatanga kutonga? Endereranyi mberi muciverenga revhista iyi, munozozvivona.