Munorangarira kuti kumbeji kwenyu no ko mbhuri yenyu kunozova kwakadini? Munozova no mare yakawanda kana munozova no zvineso zvo mare? Munozova vandhu vanodisana kana vacikadisani? Munozopona makore akawanda kana munozofa ngo civhumbu? Ko zviuru zvo makore, vandhu vanoeja kupsaka mupinguro jo muvhunjo iji.

Nyamasi uno, vazivi vanojija zviro zviri kuitika mu nyika no kunanga zvinozoitika kumbejiyo. Zviro zvimweni zvavanonangari zvakakwanirisika, asi zvimweni azvizivi. Pa mugariro jimweni, zvimweni zvovakanangari zvakamukira kugara zvakadaro. Vonanyi basi zvakaitika na Guglielmo Marconi mwanarume umweni wakaita mucini waitumira mesajhi pacina fiyo jakabatanija. Vamweni vanonanga kuti mu gore ro 1912, iyena wakananga zviro zvaizoitika kumbeji, paakati: “Mucini iji jinoshandari pacina fiyo jinobatanija, jinozoita kuti kutame kuitikazve hondo.” Kuveni mwanarume umweni anoimirira empereza yo kugaravhari inozwi Decca, wairangarira kuti zvikwata zvairija magitari azvicaizobudirirazve.

Vandhu vazinji vanoshandisa zvomujimu kuti vazive zviri zvese ngo pamusoro po kumbeji. Vamweni vanopsaka ndhungamiriro ku vandhu vanojija ngo zvo ndhondho. Inga muezaniso, ivona vanoverenga masoko o vafemberi anowanika mu majhoronari no marevhista. Kuveni vamweni vanopsaka vandhu vamweni vanonangaya kuti vanokwanisa kuziva zvokumbeji vecishandisa karata, numero kana kutosota nyara.

Kare, vandhu vamweni vaieja kuziva zvokumbeji ngo kuvhunjisa vapiri. Vapiri vondhovo ivandhu vanonangwa kuti vanoimirira zvimwari zvavo. Vaitora masoko ovaivhunjwaro ngo zvimwari izvi vovhunja vandhu vari kudaro kumaziva. Inga muezaniso, zvinonangwa kuti Mambo wo Kreso, wo Ridhiya, wakatumira zvipo zvokudhura maningi ku mupiri Dherfo wo ku Gresiya. Iyena waida kuziva kuti ngozvapi zvaizoitika kudari akahwisana na Siro, mambo wo Persiya. Mupiri Dherfo wakananga kuti Kreso waizoparaja “umambo hwakakura” paaizohwisana na Siro. Ecithemba kuti izvi zvaizoitikadi, iyena wakaenda kohwisana naye. Asi umambo hwakakura hwaakaparaja wakavazve wake!

Zvakanangwa ngo mupiri uwu, azvizivi kubesera ciro. Manera aakazvinanga aazivi kunasa kujekesa kuti iumambo hwapi hwaizowina. Krespo wakatambujika maningi ngo zvaakavhunjwari ngo mwanarume wiya, umambo hwake hwakaparajwa. Tingativo kudini nyamasi uno? Vandhu vari kupasakari njira jinozivika jo kuda kuziva zvokumbeji vari kuzvikwanisa?