KUREVA KUTI IMWIMWI MUNGAKWANISA KUSANA KUTI KUMBEJI KWENYU KUNOZOVA KWAKADINI? Vandhu vamweni vanotenda kuti upenyu wakapera kuimisihwa ndi Mwari, kuciripi ngo zviro zvavanosana kuita. Kudari zviro zvavanoronga zvikatama kubudirira ushoni, vanonanga kudari: “Azvicaitodepi kutoitikavo izvona.”

Vamweni vanocamwa no kuruza soterero yavo ngo ndava yo zviro zvinoitika mu nyika. Zvingaita kuti vakamboeja kuthathanyara kuti upenyu hwavo uve nane. Asi zvese zvavakaita azvizivi kubudirira ngo ndava yo hondo, ugadanga, ngozi jinoitika jega no ndhendha. Zvese izvi, zvinovaita kuti varangarire kudari: ‘Ndiri kutambujikirenyi hangu?’

Ndizvonadi kuti atikwanisi kuziva zvinozoitika mangwana. Ngo ndava yazvo, zvatinoronga zvinodunya. (Mucumaeri 9:11) Asi kudari tikada kuva no kumbeji kwaushoni, zvatinosana zvinosisira maningi. Bhaibheri rinotatija kuti zvatinokheta zvinopsasavo kumbeji kwedu.

Vonanyi zvakaitika kuno jinja ro Iziraeri, porainga recida kunghwina mu Nyika yo Cipikihwa. Mosi uwo waitungamirira Vaiziraeri wakavavhunja zvainga zvakananga Jehovha: “Inini ndakadira pamberi pako uhomi no rufu, rukomborero no cituko. Sanai ndaramo kuti upone iwewe no mbhuri yako, wecida Tenji Mwari wako, wecipurutana izwi rake wecimutevera.”—Deuteronòmio 30:15, 19, 20.

“Inini ndakadira pamberi pako uhomi no rufu, rukomborero no cituko. Sanai ndaramo kuti upone iwewe no mbhuri yako.”—Deuteronòmio 30:19

Mwari wakaponesa Vaiziraeri kuvha muuranda ku Ejipita kuenda ku Nyika yo Cipikihwa. Asi kuti vaashire cingodiso ici, zviripo zvavaidikana kuita. Ivona vaidikana kusana “ndaramo” kana upenyu. Kuitisa kudini? ‘Vecida Tenji Mwari wavo, vecipurutana izwi rake vecimutevera.’

Nyamasivo tinodikana kuita zvakafanana. Zvamunosana ndizvona zvinovonesa kuti kumbeji kwenyu kunozova kwakadini. Waro mungasanisa kudini upenyu? Mungakwanisa kusana upenyu ucikaperi mu nyika yakaseja maningi pasi pano ngo kuita zviro zvinganani: Kuda Mwari, kumupurukira no kuteveja gwanja rake. Mungazviitisa kudini izvi?

Rudo mugariro unosisira maningi wa Mwari. Mupostori Johani wakafemehwa kutara kuti “Mwari i rudo.” (1 Johani 4:8) Ndizvona zvakaita kuti Jesu paakavhunjiswa kuti ngowapi mupango mukuru pa jese, iyena wakati: “Idai Jehovha Mwari wako ngo mwoyo wako wese, upenyu hwako hwese no murangariro wako wese.” (Mateu 22:37) Ushamwari wedu na Mwari auvhiri kucijikira pa kumuthya, asi pa rudo. Waro ngenyi tinodikana kuda Mwari?

Rudo una Jehovha kwatiri wakadari inga rudo uno vabari kuno vana vavo. Pikija vacizivi kukwana vabari vanojijisa, vanobesera no kupangira vana vavo. Vanoita kudaro ngokuti vanoda kuti vave vana vakadakara no kubudirira mu upenyu. Waro ngozvapi zvinovetehwa ngo vabari? Ivona vanovetera kuti vana vavo vavade no kuvavona vecishandisa zvovakavajijisa kuti zviro zvivafambire ushoni. Amuvonivo kuti zvino musoro kuti Baba wedu vo kudenga vavetere kuti itusu tivade no kureremeja zvese zvovakatiitira?

Mu ndimi yakatahwa Bhaibheri, gama rokuti “kupurukira,” kazinji rinoviisa murangariro wo “kuzwira.” Andizvopi zvatinoda kunanga patinovhunja mwana kuti “purukirai vabari vako”? Ngo kudaro, kupurukira Mwari zvinoreva kujija ngo pamusoro pake no kumuzwira. Asi azvinangi kuti tinokwanisa kuzwa izwi ra Mwari recivereketa. Tingakwanisa kuzwa izwi rake ngo kuverenga no kushandisa zvinowanika mu Soko rake, Bhaibheri.—1 Johani 5:3.

Kuti atatije kusisira ko kuzwira izwi ra Mwari, Jesu wakati: “Mundhu aadikani kupona ngo pau basi, asi anodikana kupona ngo masoko ese anovha pa muromo wa Jehovha.” (Mateu 4:4) Kuha kunosisira kwatiri, asi kujija ngo pamusoro pa Mwari kunosisira maningi kamare. Ngenyi? Mambo Soromona wakasanangura kudari: “Ngokuti cifindariro co uzivi, cakadari inga cifindariro co upfumi; kunaka [ko] uzivi ndikona kuraramisa vaya vanako.” (Mucumaeri 7:12) Uzivi no ungwaru watinopuwa ndi Mwari ungatingwarira wari no kutibesera kutema zvivaringo zvaushoni zvinotibesera kuti tive no upenyu ucikaperi kumbejiyo.

Pa musoro waperari, tavona kuti Jesu wakananga kudari: “Musuvo mudoko no gwanja doko, rinoendesa ku upenyu, vashoma ngo vanoriwana.” (Mateu 7:13, 14) Kuti tikwanise kufamba mu gwanja rakadaro tinodikana kuva no mundhu anonasa kuriziva kuti atitungamirire. Naitusuvo tinoda mutungamiriri waushoni angatibesera kuti tigume kwatinoda kuenda, ku upenyu ucikaperi. Ngo ndava yazvo, tinodikana kugara maningi phedo na Mwari kuti atitatije gwanja. (Nduyo 16:8) Tingazviitisa kudini?

Njiku jese tino zviro zvakawanda zvokuita. Tinobatikana maningi no kuphingaijika ngo zviro zvakawanda, zvokuti aticawani nguva yo kurangarira ngo pamusoro po zviro zvinoda Mwari kuti tiite. Ngo iyo ndava, Bhaibheri rinoticeukija kuti: “Ngwariranyi kuti mutame kufamba inga mapenji, asi muve vakangwara, mecinasa kushandisa nguva yenyu ngokuti mazuva ano ashata.” (Vaefeso 5:15, 16) Tinova phedo na Mwari ngo kuita kuti ushamwari hwedu naye uve ciro cinosisira maningi mu upenyu hwedu.—Mateu 6:33.

Pikija kuti amungakwanisi kucinja zvakaitika kare, mungakwanisa kusana kumbeji kwaushoni kuitira imwimwi no vandhu vamunoda. Bhaibheri rinovonesa kuti Baba wedu vo kudenga Jehovha Mwari, vanotida maningi no kutibesera kuziva zvatinodikana kuita. Vonanyi zvakananga muporofita Mikeya:

“Iwewe, mundhu, wakajijiswa bzakanaka, bzaanoda Tenji kouri: kuti uite ururami, ude unyaxa, ufambe no mwoyo wokupfava pambeji pa Mwari wako.”—Mikeya 6:8.

Jehovha ari kumukoka kuti mufambe naye no kuva no upenyu waushoni wakazara ngo zviro zvakanaka. Munodavira mukoka uwu here?