Tese tiri phedo kuti tisongane no “bepo” rinozophwanya zviro zvakawanda, Jesu ecinangira mbhepo iyi wakainanga kuti “matambujiko makuru.” (Mateu 24:21) Atidikani kutiza basi matambujiko aya. Asi tinodikana kuita zviri zvese kuti tijingwarire. Waro ngozvapi zvatinodikanaro kuita?

Pa Hurukuro yake yo pa Dundhu, Jesu wakati: “Ambanyi kupsanga Umambo hwa Mwari no urungami hwavo.” (Mateu 6:33) Tingazviitisa kudini izvi?

Tanganyi kupsaka Umambo hwa Mwari. Izvi zvinoreva kuti Umambo hwa Mwari unodikana kuva unosisira maningi mu upenyu hwedu. (Mateu 6:25, 32, 33) Ngenyi Umambo hwa Mwari unodikana kuva pakutanga? Ngokuti Umambo hwa Mwari ndiwona basi unozokwanisa kupeja zvineso zvakaviiswa ngo utongi hwo vandhu.

Tanganyi kupsaka ururami hwa Mwari. Tinodikana kuita zvese kuti tipone mukuzwirana no mutemo jakarurama ja Mwari. Ngenyi? Ngokuti kudari tikatama kuzwira mutemo iji kana tozvisanira tega zvakanaka kana zvakashata, zvingaviisa zvineso zvizinji. (Mazwi Akangwara 16:25) Mukusiyana, kudari tikazwira Mwari, tinozomudakajisa zve tinozova no upenyu hunodakajisa.—Isaia 48:17, 18.

Rambanyi mecitanga kupsaka Umambo hwa Mwari no ururami hwake. Jesu wakananga kuti vamweni vaizobatikana maningi ngo zviro zvokunyama, vecirangarira kuti kuwana mare yakawanda  ndikona kwaizovaita kuti vave no kumbeji kwakanaka. Vamweni vanoneseka maningi ngo zviro zvavanoda mu upenyu hwavo, voguma pakutama kuwana nguva yokupsaka Umambo hwa Mwari.—Mateu 6:19-21, 25-32.

Asi Jesu wakananga kuti vandhu vaya vanobesera Umambo hwa Mwari nguva jese vaizowana zvinodiwa mu upenyu, cimwenizve vanozowana makomborero akawanda kumbejiyo.—Mateu 6:33.

Vajiji va Jesu vo muzana ro kutanga ro makore vakatanga kupsaka Umambo hwa Mwari no ururami hwake. Ivona avazivi kuvona kupera ko zvineso no matambujiko mu upenyu hwavo. Asi ivona vakangwaririhwa. Zvakaitikisa kudini izvi?

Ivona vakapona mukuzwirana no ndhungamiriro ja Mwari. Ngokudaro, ivona vakatiza zvineso zvizinji zvaiviiswa ngo vandhu vainga vacikazwiri Mwari. Ivona vainga no rutendo hwakavanga hwokuti Umambo hwa Mwari unozoviya, izvi zvakavabesera kuti vahwisane no zvineso zvakawanda. Mwari wakavapa “simba rakakura,” ngokudaro vakakwanisa kunyisa zvineso.—2 VaKorinto 4:7-9.

Makristu o muzana ro kutanga ro makore, akazwira zvakananga Jesu ngo pamusoro po kutanga kupsaka Umambo hwa Mwari. Ivona vakacumaera masoko akanaka o Umambo kwese kwavaiwana vandhu. (VaKolosi 1:23) Kureva kuti kuno vandhu vari kuita basa ro kucumaera nyamasi uno?

Hina! Zvapupu zva Jehovha zvinoziva kuti kwasara mukuvo mushoma kuti Umambo hwa Mwari uparaje nyika iyi yakashatari. Ngo kudaro, Zvapupu zviri kuita zvese zvazvinokwanisa kuti zvikwanirise masoko a Jesu anoti: “Vangeri iri ro Umambo rinozotokoteswa pasi pese, kuita ufakazi ku vandhu vese. Pondhopo kunozovia kupejwa ko bzese.”—Mateu 24:14.

Munozoitenyi pakupera kuzwa masoko akanaka? Tinomuvangisa kuti mutevejere zvakaithwa ngo vandhu vaigara mu dhorobha ro kare rinozwi Bheriya ku Masedhoniya. Mupostori Pauro paakavacumaera masoko akanaka ngo pamusoro po Umambo hwa Mwari, ivona “vakaaxira mazwi a Mwari vakadakara.” Perapo ivona vakajija “mazuva ese Matahwa, kuda kuziva kuti bzainga ibzona kamare,” zve vakatanga kupona mukuzwirana no zvavakajija.—Maitiro o Vapostori 17:11, 12.

Imwimwi mungaitavo zvakafanana. Kudari mukatanga kupsaka Umambo hwa Mwari no ururami hwake, munozowana “ndau yakangwaririka.” Nyamasi uno munozowana runyararo no rugarisiko kubatanijavo no kumbejiyo.