RANGARIRANYI kuti muri kuvona vhidhio ngo pamusoro po mundhu ano nduma, kangaije muimbi anozivikanwa maningi zve anomushamaisa. Vhidhio yotanga yecikhombija uhwana udoko hwake, ecijija kuimba mumbo, zve ecizvijijira kazinji. Waro motanga kumuvona ecienda munoitihwa mutambo, ecienda mu nyika jakawanda zve opejisira ngo kuva mundhu anozivikana mu ndau zinji. Tevere, vhidhio inotatija zviro zvaakaita paainga mundhu anozivika, asi ngokukasika anoita harahwa, pakupejisira—wofa.

Vhidhiyo iyo, inokhombija zvakaitikadi kamare no mundhu, zvokuti wari uno wakafa. Kudari zvakaitika no muimbi, zvingaitikavo no muzivi o zvo siensia, mugogomi kana mundhu anozivikanwa maningi. Vandhu vangaita zviro zvakawanda, asi makamborangarira kuti ngozvapi zvavaizoita kudari no kwainga kucina ukarahwa no rufu?

Izvi zvinosuruvarisa, asi ndizvona zvatinovetera. (Mucumaeri 9:5) Azvinenyi zvatingaeja kuita, atikwanisi kutiza ukarahwa no rufu. Kusiyapo ukarahwa no rufu, mu upenyu hwedu tingasongana no ngozi kana ndhendha icikarapiki. Inga zvinonangwa mu Bhaibheri, takadari inga mbhute ‘inovoneka padoko cikamwe, yongarangara.’—Jakobo 4:14.

Ku vandhu vamweni, upenyu uri kunesa zve auna cinangwa, voguma pakunanga kudari: “ngatihe no kumwa, ngokuti tinozofa mangwana.” (1 VaKorinto 15:32) Asi vandhu vanopona kudaro ngokuti vanoziva kuti vanozofa pa nguva iri yese zve avana vetero kana soterero iriyese yo kumbeji. Kangaije wari kana kumbejiyo pamunozosongana no muejo munozozvivhunjisa kudari: Kunanga kuti rufu, kupera ko zvese here? Ngo kwapi kwamungawana mupinguro?

Vandhu vazinji vanopsaka mupinguro mu zvo siensia. Kubudirira mu zvo kurapa zvaengejera cidaka-daka cedu co kupona. Masientista amweni ari kundoeja kuti vandhu vararame makore akawanda. Pikija zvakadaro, tinoenderera mberi tecizvivhunjisa kudari: Ngenyi tinoita ukarahwa perapo tofa? Tingava no vetero yokuti muvengi wedu rufu, unozoparajwa here? Revhista iyi inozosanangura shwiro iyi no kudavira muvhunjo uu: Ngo capi cinangwa co upenyu?