KUTAMA kuzwira ko majibaba edu okutanga, Adhamu na Evha, kwakaviisa cishaishi no rufu kumushovo wese wo vandhu, ngo kudaro cinangwa ca Mwari kuno vandhu acizivi kucinja. Mu Soko ra Mwari Bhaibheri, iyena anokhombija kuti cinangwa cake acizivi kucinja.

• “Varurami vanozoita veno vo nyika, vanozogaremo mbhera narini.”​—Nduyo 37:29.

• “Anozopeja kufa mbhera narini. Tenji Mwari anozopukuta musoji yo mumeso mese.”​—Isaia 25:8.

• “Mukorore wokupejisira kufujuhwa, ndihwona rufu.”​—1 VaKorinto 15:26.

• “Akucazovi no kufa nokuti mariji, kurira nokuti kuhwaja.”​—Apokalipsi 21:4.

Mwari anozopejesa kudini muvengi wedu “rufu”? Bhaibheri rakajeka parinonanga kuti: “Varurami . . . vanozogaremo mbhera narini.” Asi irona rinonangazve kuti: “Akuna mu nyika mundhu wakarurama, anoita bzakanaka basi.” (Mucumaeri 7:20) Ngokudaro ngozvapi zvaizoita Mwari kuti apeje rufu? Amborangariranyi kudari! Iyena nguva jese anokwanirisa cinangwa cake ngenyi, ngokuti “ndi Mwari acikanyepi.” (Tito 1:2) Mwari anozoitenyi kuti akwanirise cinangwa cake kuno vandhu?

Jehovha Mwari wakaita nasiriro yo kuponesa vandhu vese kuvha ku rufu, zve wakapagari ngo muripo. Muripo, mutengo unopagahwi kuitira ciri cese cakashata kana kuti pave no ururami. Vandhu vese vakashaisha zve vakatongehwa rufu, Bhaibheri rinonanga pambhene kuti: “Kaveta mundhu aakwanisi kujiripira nokuti kuripira Mwari mutengo wake. Kujiripira kunonesesa: akukwanisiki mbhera narini.”—Nduyo 49:7, 8.

Mundhu acizivi kukwana anopagari zvishaishi zvake kudari akafa, iyena aakwanisi kuzviponesa pacake nee kupagari zvishaishi zvo vandhu vamweni. (VaRoma 6:7) Itusu taida mundhu wakakwana acina cishaishi kuti apire upenyu hwake ku zvishaishi zvedu.—Vaheberi 10:1-4.

Ndizvona zvakaita Mwari kamare. Iyena wakatuma Mwana wake, Jesu, kuti aviye panyika kuti abahwe inga mundhu wakakwana zve acina cishaishi. (1 Pedru 2:22) Jesu wakananga kuti wakaviya ‘kuzopa uhomi hwake kuti aponese vazinji.’ (Marco 10:45) Iyena wakafa kuti atiponese kumuvengi wedu, rufu.—Johani 3:16.

Bhaibheri rinonanga kuti kunozova no “mukuvo wokunesa,” zvineso zvatiri kusongana nazvo nyamasi zvinokhombija kuti tiri kupona mu “njiku jokupejisira” munyika ino yakashata. (2 Timoti 3:1) Njiku jo kupejisira jinogumira pa “njiku yo rutongeso no kuparajwa ko vandhu vakashata.” (2 Pedru 3:3, 7) Asi vandhu vanoda Mwari vanozopona pakuparajwa zve vanozowana “kupona kucingaperi.”—Mateu 25:46.

Zviuru no zviuru zvo vandhu zvinozova no mukana wokuwana upenyu ucingaperi, pavanozomuswa. Jesu wakamusa mundhu paakavhakacira dhorobha ro Naini. Mwana umwe basi wo noni wainga afa, zve Jesu, ngo kumuzwira pena, wakamumusa kuvha ku rufu. (Luka 7:11-15) Mupostori Pauro wakatara kuti: “Ndinovetera cigondiso ca  Mwari . . . cokuti kunozowanika kumuka ko vakafa: vanasi no vacikanasi.” Vetero iyi ngo yokadi zve inokhombija rudo una Mwari kuno vandhu.—Maitiro o Vapostori 24:15.

Zviuru zvo vandhu zvinovetera kupona no kucingaperi. Bhaibheri rinoti: “Varurami vanozoita veno vo nyika, vanozogaremo mbhera narini.” (Nduyo 37:29) Izvo pazvinozoitika, ivona vanozonanga masoko akatojana, akatahwa ngo mupostori Pauro mu makore anodarika 2.000 zvakapera: “Rufu, huri kwapi unyisi hwako? Rufu, ciri kwapi cisomu cako?” (1 VaKorinto 15:55) Muvengi wedu rufu unozoparajwa!