Ndhungamiriro yo Bhaibheri: “Mucatenda kukweviwa mecidisisa upfumi. Dakaranyi ngo bzo munabzo.”​—Vaheberi 13:5.

Nyika inondhandhanisa masoko anoeja kutikhohwesa kuti titenge zviro zvaticikadi kutenga. Asi Bhaibheri rinotivhunja kuti tive ‘vanodakara ngo zvatinazvo.’ Kuitisa kudini?

‘Mucadisisa upfumi.’ Vandhu vanotendera kuruza upenyu, mbhuri, shamwari, ndhungamiriro jo Bhaibheri no mugariro wakanaka ngo ndava yo ‘kudisisa upfumi.’ (1 Timoti 6:10) Kutambujika kwakadini kovanosongana nako! Pakupejisa, wese anodisa upfumi ‘aadakari.’​—Mucumaeri 5:10.

Disisanyi vandhu, haiwa zviro. Ngo zvokadi kuti zviro zvokunyama zvinoshandavo pa ndau pazvo. Asi vandhu ndivona vanokwanisa kutida no kubongesera haiwa zviro. Kuva tino ‘shamwari inotida’ kunotipa mudakaro mu upenyu.​—Mazwi Akangwara 17:17.

Ndhungamiriro yo Bhaibheri: “Mwoyo wakadakara unodakajisa muviri.”​—Mazwi Akangwara 17:22.

Mudakaro “unodakajisa muviri” unotibesera kuti tigajane patinonga tecihwaja. Asi tingawanisa kudini mudakaro patinonga tecihwaja?

Garanyi mecirangarira zviro zvakanaka. Tikagara tecindorangarira ngo pamusoro po ndhedha yatinayo, ‘mazuva ese’ tinomavona inga akashata. (Mazwi Akangwara 15:15) Bhaibheri rinotivhunja kuti “itanyi vandhu vanobonga.” (VaKolosi 3:15) Ivanyi vandhu vanobonga ngo zviro zvidoko zvo upenyu. Kuvira ko zuva kwakanaka, zvimapepo zvinotondhoja kana kunyemwererera mundhu waunoda—zviro zvakadari zvinoita kuti upenyu uve unodakajisa.

Beseranyi vamweni. Pikija upenyu hwedu auzivi kugajana ushoni, tingaita zviri zvese kuti tibesere vamweni ngokuti “Anodakara anopa, kupinda wiya anopuwa.” (Maitiro o Vapostori 20:35) Vandhu vamweni pavanotibonga ngo zviro zvatinonga tavaitira, tinojizwa kudakara totama kundogara tecirangarira ngo pamusoro po cineso cedu. Upenyu hwedu unova wakanaka tikava tecibesera vamweni kuti vawane upenyu urinane.

Ndhungamiriro yo Bhaibheri: “Kusana ibzo bzinodikana.”​—VaFilipi 1:10

Mukaji no mwamuna vanopeja mukuvo wakareba vakaparajana, vanowira mu ngozi yo kuruza rudo hwavo. Mukaji no mwamuna vanodikana kureremeja mucadho wavo—izvo zvinosisira maningi mu upenyu hwavo.

Itanyi zviro makabatana. Kunja kokupsanga zvatinoda basi, ngenyi atipsaki kuita zviro zvinoda vamweni? Itanyi mazano kuti muite zviro pamwepo. Bhaibheri rinoti: “Vari nane vaviri, kupinda umwe.” (Mucumaeri 4:9) Imwimwi mungabika mwese, kuvhakaca mwese, kuvona vhidhiyo no kumboziva ndau ipsa mwese.

Itanyi kuti wamakacadha naye avone kuti munomuda. Bhaibheri rinovangisa mwamuna no mukaji kuti vadisane no kureremejana umwe kuno umweni. (VaEfeso 5:28, 33) Kunyemwerera, kukumbatira kana kumupa cipo ciri cese, zvingabesera kuvangisa mucadho wenyu. Zvokadi ngozvokuti mukaji no mwamuna vanodikana kukhombijirana rudo hwo vatano vo vaviri basi.​—Vaheberi 13:4.