Mwari wakati kuna Adhamu: “njiku yo unozouha [mucero] unozofa.” (Genesi 2:17) Ngwajo iyi aicaizova no shwiro kudari Adhamu wakaithwa kuti aite ukarahwa no kufa. Adhamu waizviziva kuti kudari akatama kuha mucero wo muti, aacaizofepi.

Adhamu na Evha avacaidikanepi kuha mucero wo muti kuti varambe vecipona—ngokuti kwainga no mucero yakawanda mu munda. (Genesi 2:9) Kudari no vakatama kuha mucero wo muti wiya, varovorani vo kutanga vaizotatija kuzwira Wiyana wakavapa upenyu. Vaizotatijazve kuti vanozwisisa kuti Mwari ano citendehwa co kuvapa mutemo.

Kuti tiwane mupinguro uu, tinodikana kurangarijisisa mabhuyo akaizwa anotipsasavo nyamasi uno. Sathana Dhiyabho, wakashandisa nyoka kuti anange manyepo akashata. Bhaibheri rinoti: “Nyoka yainga yakangwara kupinda nyama jese jo musora, jakaitwa ndi Tenji Mwari. Nyoka yakati ku mwanakaji: ‘Bzokadi Mwari wakananga kuti: amutendehwi kuha ku miti yese yo mu munda?’”—Genesi 3:1.

Evha wakati: “Tinotendehwa kuha mucero yo miti yo mu munda. Kaveta mucero wo muti uri pakati po munda, Mwari wakati kotiri: mucauha, nokuti kuupsasa, munozofa.” Naapo nyoka yakati ku mwanakaji: “Andibzopi, amuzofi! Mwari anoziva kuti, njiku yo munozouha, majiso enyu anozofununguka, nemwi munozoita inga ndi Mwari, meciziva bzakanaka no bzakaxata.” Ngokudaro, Sathana wakananga kuti Jehovha wainga munyepi zve wainga ecinyima vabari vedu vo kutanga zviro zvakanaka.—Genesi 3:2-5.

Evha wakadavira zvakanangwa ndi Sathana. Iyena wakasotesesa muti. Iwona waikahamaja no kudakajisa kuusota! Iyena wakakava mucero wotanga kuuha. Perapo Bhaibheri rinoti: ‘Wakapavo mwamuna waainga naye, wohavo.’—Genesi 3:6.

Mwari wakanyangajwa maningi ngo kuvona vana vake vaanoda vecikheta kutama kumuzwira! Ngozvapi zvaakaita? Jehovha wakati kuna Adhamu: ‘Unozohwirira ku mabvu ko wakabva. Ngokuti uri bukuta, unozohwirirabze ku bukuta.’ (Genesi 3:17-19) Ngo ndava yazvo, “Kurarama kwese ka Adamu kwainga mazana mapfumbamwe na makumatatu o makore, apo wakafa.” (Genesi 5:5) Adhamu aazivi kuenda kudenga nee aazivi  kuenda kundau imweni yo kumujimu. Acito akasikwa kuvha kumavhu, iyena wainga aciko. Paakafa, iyena wakahwirira kumavhu kwaakavha. Adhamu wakangarangara. Kusuruvarisa kwakadini!

Ngokukheta kwavo kutama kuzwira Mwari, Adhamu na Evha vakava vacizivi kukwana zve vakaruza mukana wo kupona nokucingaperi. Ivona vakabuda pa mugariro wo kukwana kwenda pa kutama kukwana zve vakava vashaishi. Asi cishaishi cokutama kuzwira acizivi kupsasa ivona basi. Mubarihwana wavo wakagara utaka wo cishaishi no kutama kukwana. Pana VaRoma 5:12 panoti: “Inga hwakangwina uxaixi mu nyika yo pasi ngo ndava yo mundhu umwe, ngo uxaixi hwongwinavo rufu; ndibzonavo bzondhobzo rufu hwakagumira vandhu vese, ngokuti vese vakaxaixa.”

Bhaibheri rinosanangura kuti cishaishi no rufu zvakadari inga, “nguvo yo mariji yaifukija vandhu vese, jira raifukutija majinja ese.” (Isaia 25:7) Apana na umwe wakakwanisa kupokonyoka kuvheneno iyi. Ngokudaro “vese vanofa ngo ndava ya Adamu.” (1 VaKorinto 15:22) Ndiyo ndava mupostori Pauro wakazvivhunjisa kuti: “Ndiani anozondisunungura ku muviri wangu wakaimisihwa rufu hwakadari?” Aripo waizozvikwanisa here?—VaRoma 7:24.