Takasikwa Kuti Tipone
NDIANI WEDU acingadi kupona makore akawanda no mudakaro? Amborangariranyi kudari no kwainga kucina kuhwaja nee kufa! Taizopeja nguva yakawanda no vandhu vatinoda, kuvhakaca mu nyika jakawanda, kujijira zviro zvipsa, kuwana uzivi no kujija zvese zvatinoda.
Kunanga kuti kupsaka kupona makore akawanda zvakashata here? Haiwa! Bhaibheri rinonanga kuti Mwari wakatisika no cido condhoco. (Mucumaeri 3:11) Irona rinonangazve kuti “Mwari, rudo.” (1 Johani 4:8) Kunanga kuti Mwari ano rudo wakatisika no cido cicikakwanirisiki here?
Zvakajeka kuti apana anoda kufa. Bhaibheri rinosanangura kuti rufu, muvengi. (1 VaKorinto 15:26) Vamweni vanopona makore mashoma, vamweni akawanda. Asi tese tinondofa. Vandhu vakawanda avadakariri kurangarira ngo pamusoro po rufu, nee kutothyisijihwa. Njiku iri yese muvengi uu anozovhiswa? Kunanga kuti zvinokwanisika?
TINGAZVIZIVISA KUDINI
Imwimwi maizviziva kuti asipi cinangwa ca Mwari co kuti vandhu vafe here? Mu bhuku ro Bhaibheri pana Genesi panokhombija kuti Mwari waida kuti vandhu vararame kwenda no kwenda mu nyika. Jehovha Mwari wakasika nyika no kuita kuti vandhu vawane zvese zvavanoda. Perapo wakasika mundhu wokutanga, Adhamu, no kumudira mu paradhiso, mu munda wo Edheni. Pa zvese, “Mwari wakavona kuti bzese bzaakaita, bzainga bzakanaka.”—Genesi 1:26, 31.
Adhamu wakasikwa akakwana, inga muezaniso wa Mwari. (Deuteronòmio 32:4) Mukaji wa Adhamu, Evha waingavo no murangariro no muviri wakakwana. Jehovha wakananga kudari kwavari: “Barananyi muwande. Muzaje nyika, muitonge. Muite veno vo hove jo mu jombe, xiri jo nyezuru no nyama jinogwebza mu nyika yo pasi.”—Genesi 1:28.
Zvaizotora mukuvo wakareba kuti vazaje nyika. Evha waizova no vana, vanevo vaizovavo no vana, mbhera nyika izare ngo vandhu. (Isaia 45:18) Azvicazova no musoro kudari Mwari naakavhunja Adhamu na Evha kuti vazaje nyika kudari ivona vaizopona mukuvo mushoma kuti vavone vana vavo, kangaije vazukuru vavo vecikura.
Kusiyapo izvo Mwari wakavavhunja kuti vangwarire zvinyama zvese. Rangariranyi kuti mukuvo wakadini waizotora Adhamu kuti adure mazina zvinyama zvese. (Genesi 2:19) Asi iyena waizojijira kuzvingwarira. Izvo zvaizotora mukuvo wakareba.
Ngokudaro, Mwari wakavapa mupango wokuti vazaje nyika no kungwarira zvinyama, izvi zvinokhombija kuti varovorani vokutanga vakasikwa kuti vararame mukuvo wakareba. Zvokadi kamare, Adhamu aazivi kupona makore akawanda.
CINANGWA CA MWARI CAINGA COKUTI VANDHU VAPONE KWENDA NO KWENDA MU PARADHISO PA NYIKA
IVONA VAKAPONA MAKORE AKAWANDA
Adhamu wakararama 930 o makore
Metuzaree wakararama 969 o makore
Nowa wakararama 950 o makore
Nyamasi uno tinorarama 70-80 o makore
Bhaibheri rinokhombija kuti kwakambova no mukuvo wokuti vandhu vakararama makore akawanda kupinda nyamasi. Rinoti: “Kurarama kwese ka Adamu kwainga mazana mapfumbamwe na makumatatu o makore.” Perapo rinonanga vandhu vatandhatu vakararama makore anopindirija 900! Nga ava wari: Sete, Enoki, Kenani, Jaredhi, Metuzaree na Nowa. Vese ava, vakapona Ndambi icito yaita mu njiku ja Nowa, vese vainga no makore anopindirija 600. (Genesi 5:5-27; 7:6; 9:29) Zvingakwanisika kudini izvi?
Vandhu vese ava vakapona phedo no mukuvo wokuti vese vainga vakakwana. Izvi zvakavabesera maningi kuti vapone makore akawanda. Asi kuva wakakwana kwakabatana kwapi no kupona makore akawanda? Zve rufu unozopejeswa kudini? Kuti tiwane mupinguro jakona tinodikana kuziva kuti ngenyi tinoita ukarahwa perapo tofa.