1, 2. Potinoramba tecienderera mberi, tinojijenyi? Ipanyi muezaniso.

RANGARIRANYI kuti ari wese wapa cipo mwana mudoko. Vabari vo mwana wiya vanomubvunja kudari, “nangai tabonga.” Iyena anozviita, maningi-ningi ngokuti vabari vake vakamubvunja kuti azviite. Asi, mwana uu paanokura, anotanga kuzwisisa kuti ngenyi vabari vake vaivona kuti zvaisisira maningi kubonga ari wese pavaimuitira ciri cese cakanaka. Pa kufamba ko nguva, iyena anokwevejehwa kuti abonge vamweni ngokuti wajijira kuva anobongesera.

² Zviro zvakafanana zvakaitikavo na itusu. Potakatanga kujija cokwadi, takajijira kuti zvaisisira maningi kuzwira mupango ja Jehovha. Asi, ngatirambe tecienderera mbheri, takajija zvizinji ngo pamusoro po marangaririre ake kana kuti ngozvapi zvaanoda, ngozvapi zvaacikadi zve ngoapi mavonero aanoita zviro. Potakatendera kuti murangariro wa Jehovha ukwevejere zvisungo zvedu no zviito, takaita kuti murangariro wake uve wedu.

3. Ngenyi zvinganesa kurangarira inga ndi Jehovha?

³ Pikija tiri kudakarira kujija kurangarira inga ndi Jehovha, nguva jimweni zvinganesa kurangarira mu njira yaanovona,  ngokuti atizivi kukwana. Inga muezaniso, tinoziva kuti ngoapi mavonero a Jehovha ngo pamusoro po mufambiro ucikazivi kucena, zviro zvokunyama, basa ro kucumaera, kushaisha kushandisa ngazi no zviro zvimweni hazvo. Asi, zvinganesa kuzwisisa kuti ngenyi iyena anozvivona mu njira yaanovonavo. Waro, tingaengejeresa kudini kurangarira inga ndi Jehovha? Zve izvo zvinozotibesera kudini kuti tiite zviro zvaushoni wari no kumbejiyo?

4. Zvinoda kurevenyi kutenderuja murangariro wedu?

⁴ Verenganyi VaRoma 12:2. Mu vhesi iyi, mupostori Pauro wakasanangura kuti tinodikana kuitenyi kuti tijijire kurangarira inga ndi Jehovha. Iyena wakananga kuti tinodikana kusiya ‘kuteveja bzo nyika yo pasi pano.’ Inga zvotakajija pa musoro wakaperari, izvi zvinoreva kuti tinodikana kuramba mazano o nyika no murangariro wayo. Asi, Pauro wakanangazve kuti tinodikana kutenderuja murangariro wedu. Izvi zvinoreva kuti, tinodikana kujija Soko ra Mwari, kuzwisisa murangariro wake, kurangarijisisa no kushanda ngo simba kuti tive no murangariro wa Mwari.

5. Sananguranyi musiyano wo kuverenga no kujija.

⁵ Kujija kunopinda kuverenga masoko ngo kukasika kana kumarakari mupinguro wo mubvunjo jo kujija. Patinojija, tinorangarira kuti izvi zvinotijijisenyi ngo pamusoro pa Jehovha, zvaakaita zve anozvivona kudini. Tinoeja kuzwisisa kuti ngenyi Jehovha anotibvunja kuti tinodikana kuita cakati kuti, toregera kuita cakati. Tinozovonazve kuti zvicinyi zvatinodikana kucinja mu upenyu hwedu no mu murangariro. Zvokadi kamare, azvikwanisiki kurangarijisisa zvese izvi pa nguva yatinonga tecijija. Asi zvaizova zvaushoni kupeja nguva, kangaije metadhi yo nguva yatinonga tecijija kuti tirangarijisise zvotainga teciverenga.—Nduyo 119:97; 1 Timoti 4:15.

6. Zvicinyi zvinoitika patinotanga kurangarijisisa Soko ra Mwari?

⁶ Patinorangarijisisa Soko ra Mwari nguva jese, panoitika ciro cinoshamaisa. ‘Tinojivonesa pacedu,’ kana kujikohwesa pacedu, kuti murangariro wa Jehovha wakakwana. Patinotanga kuzwisisa njira yaanovona zviro zve pakufamba ko nguva tinotenderana no mavonero ake. Ngokudaro, tinoitisa nane murangariro wedu zve tinotanga kurangarira ngo njira imweni. Padoko ngo padoko, tinoita kuti murangariro wa Jehovha uve wedu.

7, 8. (a) Jehovha anovona kudini zviro zvokunyama? (Vonanyi pikica yo kutanga.) (b) Kudari tikavona zviro zvokunyama inga anozvivona Jehovha, ngocapi cinozova nguva jese ciro cinosisira kwatiri?

⁷ Murangariro wedu unopsasa manera atinoita zviro. (Marco 7:21-23; Jakobo 2:17) Ngativone muezaniso munganani jinonasa kujekesa kamare shwiro iyi. Muezaniso wokutanga, tinouwana mu ndhorovondho yo kubahwa ka Jesu, iwona unonasa kujekesa murangariro wa Jehovha ngo pamusoro po zviro zvo zvokunyama. Mwari ndiyena kamare wakasana Josefa na Maria kuti varere Mwana wake pikija ivona avacainga no mare yakawanda. (VaLevi 12:8; Luka 2:24) Jesu paakabahwa, Maria wakamurajika “mu citengu caihira n’ombe, ngokuti apacaiva no ndau kovari mu nyumba yo vayeni.” (Luka 2:7) Kudari Jehovha waizvida,  waizoita kuti Jesu abahwe mu ndau yaushoni. Asi, iyena waida kuti Jesu arehwe mu mbhuri inodira pakutanga kunamata kwayo Mwari. Izvo zvainga zviro zvaisisira maningi kuna Jehovha.

⁸ Ndhorovhondho ngo pamusoro po kubahwa ka Jesu inotijijisa kuti Jehovha anovona kudini zviro zvokunyama. Vabari vamweni vanoda kuti vana vavo vave no zviro zvizinji zvo kunyama, pikija zviro zvondhozvo zvinokhuvaza ushamwari hwavo na Jehovha. Asi, zvakajeka kamare, kuti Jehovha anovona ushamwari hwedu naye inga ciro cinosisira maningi. Munotenderana no mavonero anoita Jehovha shwiro iyi here? Zviito zvenyu zvinokhombijenyi?—Verenganyi Vaheberi 13:5.

9, 10. Tingakhombijisa kudini kuti tiri kuva no mavonero a Jehovha ngo pamusoro po kukhugunya vamweni?

⁹ Muezaniso umweni ngo wo kuti, ngoapi mavonero anoita Jehovha mundhu anokhugunya vamweni, kana kuti mundhu anoita kuti vamweni vashaishe zve vasiye kushandira Jehovha. Jesu wakati: “Ndiani anoxaixisa cimwe co bzivana ibzi bzinotenda, bzaifanera kumusungira gwiyo mu musipa no kumukhandira mu jombe.” (Marco 9:42) Aya i magama akavanga maningi! Zve tinozviziva kuti Jesu wakadari inga Baba wake. Ngokudaro, tingavavo no cokwadi co kuti Jehovha anonyangajwa maningi kudari ari wese akakhugunya umwe wo vateveri va Jesu.—Johani 14:9.

¹⁰ Tinovonavo kukhugunya vamweni mu njira yaanovona Jehovha na Jesu here? Zviito zvedu zvinokhombijenyi? Inga muezaniso, kangaije tinodakarira mushovo wakatikuti wo zvo kusimira no kujinemesa. Asi, zvicinyi zvataizoita kudari zvatinokheta azviripi kudakajisa vamweni mu ungano kana zvinoita kuti vamweni vave no murangariro wo uhure? Rudo hwedu no hama jedu unozotindundira kuti tisiye zvatinoda.—1 Timoti 2:9, 10.

11, 12. Tinozvijiviririsa kudini kudari tikajijira kunyenya zvinonyenywa ndi Jehovha no kuengejera kujibata?

¹¹ Muezaniso wo citatu nga uwu: Jehovha anonyenya zvicikazivi kurungama. (Isaia 61:8) Zvokadi kamare, iyena anozviziva kuti nguva jimweni zvinotinesera kuita zvakanaka ngokuti atizivi kukwana. Iyena anoda kuti tinyenye zvakashata inga zvaanoita. (Verenganyi Nduyo 97:10, Shanduro yeNyika Itsva.) Kudari tikarangarijisisa kuti ngenyi Jehovha anonyenya zvakashata, zvinozotibesera kuti tiite kuti mavonero ake ave edu zve zvinozotivangisa kuti tirambe kuita zviro zvakashata.

¹² Kudari tikajija kuthya zvakashata, zvinotibesera kuzwisisa ciri cese cakashata, pikija Bhaibheri arinangi kamare ngo maitiro akajeka ngo pamusoro paco. Inga muezaniso, mukhaindi umweni wo mufambiro wo uhure unodanijwa kuti mutambo wo pa mavero uri kuramba weciengejeka mu nyika yese. Vamweni vanorangarira kuti wakasiyana no kuita ruvatano no ari wese, ngo  iyo ndava vanovona kuti auzivi kushata.  * (Vonanyi masoko o pasi.) Munorangarira kuti Jehovha anovonavo kudaro here? Mucakanganwa kuti Jehovha anonyenya mukhaindi wese wo zvakashata. Ngo kudaro, ngatirambe tiri ndhambo no ciri cese cakashata zve tovangisira kuti tiengejere kujibata kwedu ngo kunyenya zvinonyenywa ndi Jehovha.—VaRoma 12:9, Baiberi Mazwi Akacena aMwari.

13. Ngenyi tinodikana kurangarira wari, mavonero aanoita Jehovha zviro, kuitira kuti zvizotibesere kumbejiyo tikada kutema zvivaringo zvo ungwaru?

¹³ Patinojija, tinodikana kurangarira kuti Jehovha anovona kudini shwiro yakati kuti, ngokuti izvi zvingatibesera kutema zvivaringo zvo ungwaru. Perapo, tikava pa mugariro unoda kuti titeme civaringo ngo kukasika, atizopsaki zvokuita. (Mazwi Akangwara 22:3) Ngativone muezaniso munganani jo mu Bhaibheri.

14. Tinojijenyi kubvira ku mupinguro wakapa Josefa ku mukaji wa Potifari?

¹⁴ Mukaji wa Potifari paakaeja kupausa Josefa, ngo kukasika iyena wakaramba. Zvakajeka kuti Josefa, wairangarijisisa mavonero anoita Jehovha mucadho. (Verenganyi Genesi 39:8, 9.) Josefa wakananga kudari kuna mukaji wa Potifari: “Ndingabziitisa kudini kuita bzakaxata no kuxaixira Mwari?” Izvi zvinokhombija kuti iyena wakaita kuti mavonero a Jehovha ave ake. Tinoti kudini ndisu? Zvicinyi zvamaizoita kudari mudoni wo ku basa wakatanga kutamba nemwi eciita inga anomuda? Kana kudari ari wese wamutumira mesajhi inomusijira zvo vatano kana foto mu foni yenyu keni?  * (Vonanyi masoko o pasi.) Zvaizova zvakareruka maningi kuramba takagondeka kuna Jehovha kudari takatanga kujija ngo pamusoro pazvo no kutendera mavonero aanoita shwiro jakadari zve tova takanasirika kuti zvicinyi zvatinozoita.

15. Tingarambisa kudini takagondeka kuna Jehovha, inga zvakaita vaHebheri vatatu ava?

¹⁵ Vonanyizve muezaniso wo vaHebheri vatatu vatinoziva inga Shadhereki, Misheki na Abhedhenego. Mambo Nabhukadhinezari paakavapa mutemo wo kuti vanamate cithombi co goridhe caakaita, ivona ngo kucunga kwese vakaramba. Mupinguro wakajeka wavakapa kuna mambo, wakakhombija kuti vainga varangarira ngo zvaizovaita kuti vadakare kudari vakaramba vakagondeka kuna Jehovha. (Exodo 20:4, 5; Danieli 3:4-6, 12, 16-18) Tingati kudini, nyamasi uno? Mwaizoitenyi, kudari patarawe wenyu vomukumbira kuti mupe mare kuitira kuceukija njiku yakabatana no ciara co manyepo? Kusiapo kuvetera kuti zviro zvakafanana zviitike, zvaizova zvaushoni kwatiri, kurangarijisisa  wari kuti Jehovha anovona kudini zviro zvakadaro. Perapo, kudari tikazova pa mugariro wakadaro, zvinozotirerukira kuita ciri cese no kupa mupinguro wakanaka, inga zvovakaita vaHebheri vatatu.

16. Kuitisa kudini kunasa kuzwisisa murangariro wa Jehovha kunotibesera kuti tinasirire kuitira zvourapi zvinodiwa ngo kukasika?

¹⁶ Kurangarijisisa murangariro wa Jehovha, kungatibeseravo kuti tirambe takagondeka kudari tikadikana kurapwa ngo kukasika. Zvokadi kamare, takatema civaringo co kuramba kudihwa ngazi kana mativi marongomuna ese. (Maitiro o Vapostori 15:28, 29, Baiberi Mazwi Akacena aMwari) Asi, kuno zviro zvinganani zvinobatanijwa pa ngazi, zvokuti zvinoda kuti muKristu umwe nga umwe ateme civaringo cake wakacijikira mu zviambi zvo Bhaibheri. Waro, ngoyapi nguva kwayo yo kuita zvondhozvo? Ndi patinongaya kucipitari, kangaije patinonga tecihwaja zve tecivangirijwa kuti titeme civaringo ngo kukasika here? Haiwa. Wari i nguva yo kupsakisisa, totara dhokumento redu rinobhuya ngo zvokurapwa rakadari inga Diretrizes Antecipadas Relativas a Tratamentos de Saúde, rinonasa kusanangura kamare zviya zvatinoda no kubhuya na medhiko wedu. * (Vonanyi masoko o pasi.)

17-19. Ngenyi zvinosisira maningi kujijira kuva no murangariro wa Jehovha wari? Ipanyi muezaniso.

¹⁷ Pejisire, rangariranyi ngo mupinguro wo kukasika wakapa Jesu ku ngwajo yo kutama ungwaru ya Pedru yo kuti: ‘Zviitirenyi unyasha, Tenji.’ Zvokadi kamare, Jesu wainasa kurangarijisisa ngo zvaida Mwari kuti aite no zviporofita ngo pamusoro po upenyu hwake no kufa kwake pasi pano. Zivo iyi yakamuvangisa kuti arambe akagondeka kuna Jehovha zve kuti ape upenyu hwake inga muripo.—Verenganyi Mateu 16:21-23, Shanduro yeNyika Itsva.

¹⁸ Nyamasi uno, Mwari anoda kuti tive shamwari jake zve tiite zvatinokwanisa kuti ticumaere masoko akanaka. (Mateu 6:33; 28:19, 20; Jakobo 4:8) Asi, vamweni vanoita inga vano cido cakanaka vangaeja kutirembesa,  inga zvakaita Pedru kuna Jesu. Inga muezaniso, patarawe wenyu angamupa mare yakawanda asi munozviziva kuti maizodikana kushanda nguva yakawanda zve amucaizova no nguva yo kwenda kumusongano kana kuti muende koocumaera no ungano. Kana kudari muri kucikora, kangaije pirisori wenyu womupa mukana kuti muende koogara ku ndau imweni kuti muengejere kujija kwenyu. Kudari izvi zvikaitika, munozodikana kuita mukumbiro, kupsakisisa no kubhuya no vamweni vo pa mbhuri yenyu kana no vakuru mucito matema civaringo cenyu here? Zvaizova zviri nane kujijira wari kuvona mavonero a Jehovha ngo pamusoro po shwiro iji zve moita kuti murangariro wa Jehovha uve wenyu. Perapo, kudari mukazopuwa zviro izvo, mungatozovona kuti auzovi muejo kwamuri. Munonasa kuziva kuti zvicinyi zvamunozoita, ngokuti matema civaringo cenyu co kuramba mecishandira Jehovha.

¹⁹ Kangaije mungarangarirazve ngo mugariro umweni waizoeja kugondeka kwenyu kuna Jehovha ngo civhumbu. Zvokadi kamare, atikwanisi kunasirira kuitira mugariro jese jinozoitika. Asi, kudari tikarangarijisisa murangariro wa Jehovha patinonga teciita jijo yedu yo mundhu ega, zvinozoreruka kuceukija zvotakajija no kuziva mashandisire atinozozviita pa mugariro uri wese. Ngokudaro, patinojija, ngativone mavonero anoita Jehovha shwiro yakati kuti, toita kuti murangariro wake uve wedu zve torangarira kuti izvi zvinozotibesera kudini kuti titeme zvivaringo zvo ungwaru wari no kumbejiyo.

20, 21. (a) Ngenyi tinozobusa rusujunuko hwedu mu nyika imbza? (b) Tingabusisa kudini upenyu hwedu wari?

²⁰ Zvokadi kamare, tese takasota kumbeji, mu nyika imbza. Vazinji vedu tinovetera kupona kwenda no kwenda mu Paradhiso pasi pano. Pasi po Umambo hwa Mwari, tinozosujunuhwa mu kuhwaja kwese no kutambujika kwese kwatiri kusongana nako mu nyika ino. Zve zvokadi kamare, tinozova no rusujunuko wo kuita zvatinoda takacijikira pa zvido zvedu.

²¹ Asi, izvo azvidi kunanga kuti rusujunuko hwedu auzovi no paunogumira. Vaya vakapfava vanozocijikira pa mutemo ja Jehovha no marangaririro ake. Zve izvi zvinozoviisa mudakaro no runyararo wakakura kamare. (Nduyo 37:11) Mbhera ugume mukuvo wondhowo, ngatirambe takadakara wari ngo kuita kuti murangariro wa Jehovha uve wedu.