1, 2. (a) Ngocapi ciro cinosisira maningi mu upenyu hwenyu? (b) Ngozvapi zvokadi zvatinoreremeja zve ngenyi? (Vonanyi pikica yo kutanga.)

NGOCAPI ciro cinosisira maningi mu upenyu hwenyu? Inga vandhu va Jehovha, ciro cinosisira maningi catinaco i ushamwari hwedu naye. Atizoucinji ngo ciri cese haco. Cokwadi co Bhaibheri cinosisiravo kwatiri, ngokuti cinotiita kuti tikwanise kuva no ushamwari na Jehovha.—VaKolosi 1:9, 10.

² Jehovha ndi Mujijisi wedu Mukuru, uwo anotijijisa zvokadi zvizinji zvinosisira kubvira mu Soko rake, Bhaibheri. Anotijijisa kusisira ko zina rake zve anotibvunja ngo pamusoro po mugariro jake jinoshamaisa. Anotibvunjazve kuti anotida maningi, ngo iyo ndava wakatipa Mwana wake anodiwa. Jehovha anotijijisa ngo pamusoro po Umambo hwa Mesia. Anotipa vetero kuitira kumbeji, azvinenyi tinovetero yo kwenda mugore inga vokuzojwa, kana mu Paradhiso pasi pano inga ‘mabvuta amweni.’ (Johani 10:16) Jehovha anotijijisa maponere atinodikana kuita. Tinovona zvokadi zvese izvi inga upfumi, ngokuti zvinotibesera  kuti tigume phedo no Musiki wedu no kutipa cinangwa mu upenyu.

3. Jehovha anotikumbira mare kuti tijije cokwadi here?

³ Jehovha ndi Mwari anokova. Iyena anokova zvokuti wakatipa Mwana wake umwe ega. Jehovha paanovona mundhu ari wese acipsaka cokwadi, anomubesera kuti aciwane. Narini aazotikumbiri kuti tipagari mare kuti tijije cokwadi. Pa bvaza imweni, mwanarume umweni waidanwa Simoni wakapa mupostori Pedru mare kuti ave no simba ro kupa vamweni mujimu mucena. Pedru wakamusanangurira kuti murangariro wondhowo wainga wakaposeka zve wakamubvunja kudari: “Mare yako ngaiende na iwewe kokupsejeka, ngokuti unorangarira kutenga cipo ca Mwari ngo mare.” (Maitiro o Vapostori 8:18-20) Waro, zvinoda kurevenyi ‘kutenga cokwadi’?

4. Pa musoro uno, tinozojijenyi ngo pamusoro po cokwadi?

⁴ Verenganyi Mazwi Akangwara 23:23, Shanduro yeNyika Itsva. Zvinoda kuvangisira kuti tijije cokwadi co Bhaibheri. Tinodikana kusiya zviro zvimweni sure ngo ndava yaco. Patinopera ‘kutenga cokwadi,’ kana kuti, kujija cokwadi, tinodikana kunasa kungwarira kuti titame ‘kucitengesa,’ kana kuti, kucisiya. Waro ‘tinotengesa’ kudini cokwadi co Bhaibheri? Cinotengeswa mutengonyi? Mupinguro jo mubvunjo muviri iji, jinozotibesera kamare kuti tireremeje cokwadi no kutiita kuti titame kucisiya. Tinozozwisisa kuti cokwadi ca Jehovha cino mutengo mukuru maningi kupinda ciri cese haco.

5, 6. (a) Tingatengesa kudini cokwadi ticina mare? Sananguranyi. (b) Cokwadi cinotibesera kudini?

⁵ Zvokadi kamare, kupuwa ciro mahara azvidi kureva kuti acisisiri. Gama ro ciHebheru rakashandiswa inga ‘kutenga’ pana Mazwi Akangwara 23:23, Shanduro yeNyika Itsva, ringarevavo “kuwana.” Magama ese o maviri anokhombija kuti mundhuwo wakavangisira kana wakasiya zviro zvimweni kuti awane ciro cinosisira maningi. Kuitira kutibesera kuzwisisa kuti tingatengesa kudini cokwadi, rangariranyi kuti kubazari kuri kuphakiswa makobo. Mungavetera kuti makobo aizoviya oga pa meza pedu here? Haiwa, tinodikana kwenda kubazari, tomapuwa toviya nao kanyi. Pikija hazvo, makobo awo atizivi kumatenga, tinodikana kuvangisira kuti timawane. Mukufananavo, atidikani kupagari kuti tijije cokwadi, asi zvinoda kuvangisira no kujipira.

⁶ Verenganyi Isaia 55:1-3. Zvakananga Jehovha zvinotibesera kuzwisisa kuti zvinorevenyi kutenga cokwadi. Mu mavhesi aya, Jehovha ari kuezanisa soko rake ro cokwadi no kumwa, mukaka no vhinyu. Kudari inga kumwa inotondhoja mundhu ano nyota, cokwadi cinotitondhojavo. Zve kudari inga mukaka unoita kuti mwana akure wakavanga, cokwadi co Bhaibheri cinoita kuti ushamwari hwedu na Jehovha uvange. Jehovha anoezanisavo soko rake no vhinyu. Ngenyi? Bhaibheri rinonanga kuti vhinyu inoita kuti vandhu vadakare. (Nduyo 104:15) Ngokudaro, Jehovha paanotibvunja kuti ‘titenge doro’ kana vhinyu, iyena ari kutendera kuti itusu tizive kuti patinoteverera ndhungamiro jake mu upenyu, tinozodakara. (Nduyo 19:8) Jehovha anoshandisa kuezanisira uku kuti atibesere kuzwisisa kuti tinobesereka patinojija no  kushandisa cokwadi. Ngatende tibhuisane ngo zviro zvishanu zvotakasiya sure kuti titenge cokwadi.

7, 8. (a) Ngenyi tinodikana kutora nguva kuti tijije cokwadi? (b) Ngozvapi zvakaita imwe hambzaji zve ngowapi wakava muviyo wakona?

⁷ Nguva. Kuno vamweni zvinotora nguva kuti vazwe masoko o Umambo, kuverenga Bhaibheri no mabhuku akacijikira mu Bhaibheri, kujija Bhaibheri no Zvapupu zva Jehovha, kunasirira musongano no kwenda kondhoyo. Kuti tiite zviro zvese izvi, tinodikana kushandisa nguva yataizoshandisa kuti tiite mabasa amweni acikasisiri. (Verenganyi VaEfeso 5:15, 16.) Unodikana mukuvo wakadini kuti mundhu ajijire zvokadi zvo kutanga zvo Bhaibheri? Zvinosiyana mundhu ngo mundhu. Apana mugano wo zviro zvatingajija ngo pamusoro po ungwaru hwa Jehovha, makwanja ake no zviro zvaakaita. (VaRoma 11:33) Murindiri wo kutanga mu cigenzi, wakaezanisa cokwadi no “mafirori ari pakati po sora” zve wakanangazve kuti: “Mundhu aadikani basi kudakara ngo kuwana firori rimwe ro cokwadi. Kudari rimwe noraikwana akucaizova no amweni. Rambanyi mecimaunganija no kupsaka amweni.” Ngokudaro, tingazvibvunjisa kudari: ‘Kureva kuti ndaanozivo yakawanda ngo pamusoro pa Jehovha here?’ Pikija tikapona kwenda no kwenda, tinozoramba ticijija ngo pamusoro pa Jehovha. Pikija nyamasi uno, zvinosisira maningi kushandisa nguva yatinayo, kuti tijije zvakawanda mbhera patinokwanisa. Ngativone muezaniso wo mundhu wakaita zvondhozvo.

⁸ Mariko, * (vonanyi masoko o pasi) umwe musikane wo ku Japau, wakathutha kuti aende ku Estadhos Unidhos, kuitira kujija cikora ku Novha Yorki. Njiku imweni, imwe hambzaji iri piyona yakacumaera masoko akanaka kuna Mariko paainga ari pa muzi. Mariko waitoengavo no gerejha raaienda, asi wakatanga kujija Bhaibheri no hambzaji iya. Wakadakarira maningi zvaainga ecijija, zvokuti wakatokumbira kuti ajije kaviri pa sumana. Pikija Mariko wainga wakabatikana maningi ngo jijo yake yo ku cikora pomwe no basa raaita ro pa nguva shoma, wakatanga kwenda ku musongano jo ungano pa mukuvo wondhowo. Kusiyapo kupeja nguva acibungaija, iyena waipeja nguva yakawanda kuti ajije cokwadi. Ngo kuvangisira kwese uku, Mariko wakaguma phedo kamare na Jehovha zve pacito papera gore rimwe, iyena wakabhabhatijwa. No papera mweji mutandhatu, mu gore ro 2006, iyena wakatanga kushanda inga piyona zve aciri kushanda inga piyona mbhera nyamasi.

9, 10. (a) Kuitisa kudini kujija cokwadi kunocinja mavonero atinoita zviro zvo kunyama? (b) Zvicinyi zvakaita musikane umweni zve ngowapi wakava muviyo wakona?

⁹ Zviro zvo kunyama. Kuitira kujija cokwadi, zvingatodikana kusiya basa  rinotiviisira mare yakawanda kana basa rinotiita kuti tibudirire mu nyika ino. Inga muezaniso, Pedru na Andereya vainga vatandi, asi Jesu paakavakoka kuti vave vajiji vake, ivona vakasiya basa ravo ro kutanda. (Mateu 4:18-20) Izvi azvirevi kuti pamunojija cokwadi munodikana kusiya basa renyu. Mundhu anodikana kushanda kuti akorondhe mbhuri yake. (1 Timoti 5:8) Asi, pamunojija cokwadi, manera amunorangarira ngo pamusoro po zviro zvo kunyama anocinja. Munozwisisa kuti ngozvapi zvinosisira mu upenyu hwenyu. Jesu wakati: “Mucadounganija mu nyika upfumi hwenyu.” Kusiapo izvo, iyena wakativangisa kuti: “Unganijanyi upfumi hwenyu mugore.” (Mateu 6:19, 20) Izvi ndizvona zvakaita musikane umweni anodanwa Maria.

¹⁰ Kubvira pa udoko hwake, Maria waidakarira maningi mutambo umweni waizwi golfi. Paainga acijija ku univhersidhadhi, wakazoguma pa kuva shasha pa mutambo wondhowo. Wakaukwanisa zvokuti wakasiya kujija ku univhersidhadhi acikapagari ciro. Cido ca Maria cainga co kuda kuva mundhu anokwanisa kamare kuita mutambo uwo, kuti awane mare yakawanda. Perapo, iyena wakatanga kujija Bhaibheri. Iyena wakadakarira kamare zvaaijija zve wakatanga kuzvishandisa mu upenyu hwake. Iyena wakati: “Pandakatanga kunasirira mufambiro no magariro angu mukuzwirana no ndhungamiro jo Bhaibheri, ndakadakara kamare.” Maria wakazwisisa kuti zvaizonesa maningi kuita zvese zvo zviviri, kuva no ushamwari na Jehovha pamwepo no basa rake. (Mateu 6:24) Ngokudaro, wakatema civaringo co kusiya basa rake ro kutamba golfi kuti aite basa rakanakisisa kamare. Nyamasi uno, Iyena ari kushanda inga piyona zve wakananga kuti “ari kudakara zve ano upenyu uno revo kamare.”

11. Patinojija cokwadi, zvicinyi zvinoitika no ushamwari hwedu no vamweni?

¹¹ Ushamwari no vamweni. Patinotanga kushandisa zvotakajija mu Bhaibheri, ushamwari hwedu no vatinotamba navo pomwe no mbhuri yedu unocinja. Jesu wakatibesera kuzwisisa thangwe rakona paakaita mukumbiro ngo pamusoro po vateveri vake eciti: ‘Vacenesenyi mu cokwadi, soko renyu i cokwadi.’ (Johani 17:17, Shanduro yeNyika Itsva) ‘Kucenesa’ kungarevavo “kudira pa mutivi.” Patinotanga kushandisa cokwadi mu upenyu hwedu, tinodihwa pa mutivi ngo nyika ino, ngokuti tinotevera ndhungamiro jo Bhaibheri. Pikija tinoeja kuva no ushamwari wakanaka no vatinotamba navo pomwe no ukama hwedu, vamweni vavo vangatanga kutinyenya kana kutizonda ngo ndava yo zvitendhwa zvedu zvipsa. Izvi azvitikahamaji. Jesu wakananga kuti: “Ngo ndava yabzo vakorore vo mundhu vanozova vo mbhuri yake.” (Mateu 10:36) Asi, Jesu wakatigondisavo kuti azvinenyi dangani tasiya zviro zvakadini ngo ndava yo cokwadi, tinozoashira zvakawanda!—Verenganyi Marco 10:28-30.

12. Mwanarume umweni muJudha wakasiyenyi ngo ndava yo cokwadi?

 ¹² MuJudha umweni anodanwa Aaron, mu upenyu hwake hwese waitenda kuti zvainga zvakashata kunanga zina Mwari. Asi, iyena waida kamare kuziva cokwadi ngo pamusoro pa Mwari. Njiku imweni, Capupu cimweni cakamubvunja kuti, kudari akaengejera mavhogari pa maretera marongomuna o ciHebheri zina ra Mwari raizozika inga “Jehovha.” Aaron, wakadakara maningi ngo kujija zvondhozvo zvokuti wakaenda kuna majiRabhi mu sinagoga! Iyena wairangarira kuti ivona vaizodakara ngo kujija cokwadi ngo pamusoro po zina ra Mwari, asi avazivi. Kusiyapo zvondhozvo, vakamupfirira zve vomugogomera. Mbhuri ya Aaron, yakamumukiravo. Asi izvo azvizivi kumuita kuti atame kujija zvizinji ngo pamusoro pa Jehovha. Aaron wakaguma pa kuva umwe wo Zvapupu zva Jehovha zve wakashandira Jehovha wakagondeka mu upenyu hwake hwese. Itusu tingaveteravo kuti ushamwari hwedu no vamweni unocinja patinotanga kujija cokwadi.

13, 14. Ngojapi cinjo jatinodikana kuita mu njira yatinorangaira no kuita zviro, patinojija cokwadi? Ipanyi muezaniso.

¹³ Murangariro no zviito zvicikazivi kucena. Patinotanga kujija cokwadi no kutanga kushandisa ndhungamiro jo Bhaibheri, tinodikana kuva no cido co kuda kuitisa nane, manera atinorangarira no kuita zviri zvese. Mupostori Pedru wakatara kudari: “Garanyi inga vana vanopurukira, mucararama meciteveja bziemuriro bzo nyika inga bzomaiita kare, pomaigara mucingazivi ciri cese.” Perapo wakaengejera eciti: “Imwimwivo itanyi vakacena ngo mabasa enyu.” (1 Pedru 1:14, 15) Mu dhorobha ro Korinto ro kare, vandhu vazinji vainga no mufambiro wakashata. Vandhu vondhovo vakaita cinjo huru kamare kuti vagume pa kuva vakacena pamberi pa Jehovha. (1 VaKorinto 6:9-11) Nyamasi uno, vazinji vakaitavo cinjo jakafanana povakajija cokwadi. Pedru wakazvisanangura paakatara kuti: ‘Makapera mukuvo wakarebesesa meciteveja maponero o vo nyikanja, meciita zvakashata, kuhura, kumwisa doro pa mutambo yakanyanyisa, kudhakwa no kunamata zvithombi.’—1 Pedru 4:3, Shanduro yeNyika Itsva.

¹⁴ Devynn na Jasmine vakaguma pa kumwa doro pa makore mazinji. Pikija Devynn wainga muvonereri wo mabhuku, waikwanirisa ushoni basa rake, iyena aazivi kugara pa nguva yakareba ngo ndava yo kumwisa maningi doro. Jasmine waizivika maningi ngo kunyangajwa pomwe no uphanga. Njiku imweni, pikija wainga wakadhakwa, wakasongana no Zvapupu zviviri zvo mamisionario mu citaka. Ivona wakajipira kuti vajije naye Bhaibheri. Asi, povakaenda ku muzi kwavo pa sumana yakatevera, Jasmine na Devynn vainga vakarejera. Ivona avacaizvitenda kuti mamisionario iya aizoendadi ku muzi kwavo. Asi, povakaenda pa bvaza imweni, zviro zvainga zvacinja. Jasmine na Devynn vainga vakanasirika kuti vatange kujija cokwadi co Bhaibheri zve ngo kukasika vakatanga kushandisa zvovaijija. Pacito papera mweji mutatu, vakaregera kumwa doro zve pakufamba ko nguva vakanasirira mucadho wavo. Vandhu vazinji vo mu ndharaundha yavo vakavona cinjo jakaita Jasmine na Devynn zve ivona vakatangavo kujija Bhaibheri.

15. Ngoyapi cinjo inonesa maningi yatinodikana kuita ngo ndava yo cokwadi zve ngenyi?

¹⁵ Zvirovejeso no zviito zvicikadakajisi Mwari. Cinjo huru inonesa maningi  yatinodikana kuita ngo yo kusiya zvirovejeso no zviito zvicikadakajisi Jehovha. Vamweni, pikija novapera kujija kuti Jehovha anozwa kudini ngo pamusoro pazvo, ivona vanondonesehwa kuzvisiya. Ivona vanothya mazwiro anozova no vo pa mbhuri yavo, vadoni vo ku basa kana shamwari. Ivona vanozviziva kuti vandhu vazinji vano mazwiro akavanga ngo pamusoro po zvirovejeso zvakati kuti, zvakadari inga kugwadamira vakafa. (Deuteronòmio 14:1) Waro, zvicinyi zvingatibesera kuita cinjo jinodikana? Ngatijije ngo muezaniso jakanaka jo vandhu vo kare, vakaita cinjo povakajija cokwadi, vakadari inga maKristu o ku Efeso.

16. Ngozvapi zvakaita maKristu amweni o ku Efeso?

¹⁶ Mu dhorobha ro Efeso ro kare, zvainga zvo cirovejeso kuita zvo masaramuso. Waro, zvicinyi zvakaita vandhu vaya vaiita zvo masaramuso povakava maKristu? Bhaibheri rinosanangura reciti: “Vazinji vainga varingiji vakazisa mabhuku avo no kumapisa pa nyasi po vese. Mutengo wo mabhuku ondhoo wakaita makumaxanu o bziuru zvo mare yo siriva. Izwi ra Tenji raiparajika, rovanga kamare.” (Maitiro o Vapostori 19:19, 20) MaKristu aya akagondeka ainga no cido co kuda kusiya mabhuku avo aidhura, Jehovha wakavakomborera maningi.

17. (a) Ngozvapi zviro zvimweni zvotakasiya ngo ndava yo cokwadi? (b) Ngojapi mubvunjo jatinozodavira pa musoro unozari?

¹⁷ Ngozvapi zvomakasiya kuti mujije cokwadi? Tese takasia nguva yedu. Vamweni vedu vakasia mukana jo kuva vakhupuki. Zve ushamwari hwedu no vamweni ungacinja. Vazinji vedu takaitisa nane manera otairangarira no kuita zviro zve takasiya zvirovejeso no zviito zvicikadakajisi Jehovha. Asi takakhohwa kuti cokwadi co Bhaibheri cinosisira kupinda ciri cese haco. Cokwadi co Bhaibheri cinoita kuti tikwanise kuva no ushamwari wo phedo na Jehovha, uwo uri ciro cinosisira mu upenyu hwedu. Patinorangarira ngo makomborero ese atiri kuwana ngo ndava yo cokwadi, zvinonesa kuzwisisa kuti ngenyi vamweni ‘vanocitengesa.’ Ngenyi zvondhozvo zvinoitika? Zve tingatizisa kudini kuposa kwakadaro? Tinozodavira mubvunjo iji pa musoro unotevera.