1, 2. (a) I shwiro yapi huru maningi inopsasa vandhu vese? (b) Ngenyi shwiro iyo inosisira maningi kwatiri?

KUNO vazinji nyamasi uno, mare ngo inosisira maningi. Ngoyavanorangarira no kuthyira. Vanopeja nguva vecieja kupsaka no kungwarira mare. Kuno vamweni, zvinosisira maningi i mbhuri, uhomi, kana zviro zvavanoda kuita mu upenyu.

² Kuno shwiro imwe inosisira maningi kupinda zvese izvo. Shwiro iyi ngo yo kubesera ukuru-kuru hwa Jehovha. Zvinosisira maningi kuti tirambe takasotesesa pa shwiro iyi. Tikatama kungwarira, tingatoguma pa kubatikana maningi ngo upenyu hwedu hwo njiku ngo njiku, kana kuneseka ngo ndhango jedu, totokanganwa shwiro iyo inosisira maningi. Tikabesera ukuru-kuru hwa Jehovha, tinozokwanisa ushoni kuhwisana no zvineso zvedu zvo njiku ngo njiku, zve tinokhwedera phedo na Jehovha.

3. Sathana wakanangenyi ngo pamusoro po matongero a Mwari?

³ Sathana Dhiabhu wakamusa mubvunjo wo kuti Jehovha  anotendehwa kutonga kana kuti haiwa. Iyena anoda kuti vandhu vese varangarire kuti Jehovha ndi Mutongi wakashata, aadi zvakanaka kwatiri. Sathana wakananga kuti vandhu vaizodakara kudari vakajitonga vega. (Genesi 3:1-5) Wakanangazve kuti akuna mundhu wakagondeka kamare kuna Mwari zve upenyu ukaguma pa kunesa kamare, mundhu anoramba Mwari inga Mutongi wake. (Jobe 2:4, 5) Asi Jehovha ari kutendera kuti nguva idarike kuitira zvinase kuvoneka kamare kuti upenyu hwo vandhu hunonesa maningi pacina Mwari inga Mutongi.

4. Ngenyi shwiro yo ukuru-kuru hwa Jehovha inodikana kunasirihwa?

⁴ Zvokadi, Jehovha anoziva kuti zvese zvakanangari Dhiabhu ngo zvokunyepa. Waro, ngenyi ari kusiya nguva kuti Sathana aeje kucijikira mavonero ake? Mupinguro wo mubvunjo uwu unobatanija vese vanowanika mudenga no pasi pano. (Verenganyi Nduyo 83:19.) Adhamu na Evha vakaramba matongero a Jehovha, zve kubvira pondhopo vazinji vari kuzviitavo. Izvi zvingatoita kuti vandhu varangarire kuti Dhiabhu ngaano razawe. Shwiro iyi icito yanasirihwa mu murangariro mo vandhu no mo ngirozi, akuzowanikizve runyararo no rubatano wokadi kamare. Asi ukuru-kuru hwa Jehovha ukazokhwijirijwa, vese vanozopona pasi po matongero ake mbhera narini. Kunozova no runyararo pasi no mugore.—VaEfeso 1:9, 10.

5. Takabatanijwa kudini pa shwiro yo ukuru-kuru hwa Mwari?

⁵ Ukuru-kuru hwa Mwari hunozokhwijirijwa, zve matongero a Sathana no o vandhu anozokonehwa zve anozopsaihwa. Matongero a Mwari kubvira ku Umambo hwa Mesia anozobudirira. Vandu vakagondeka vanozovonesa kuti zvinokwanisika kuramba vakati nga-nga-nga, vecibesera matongero a Mwari vakagondeka. (Isaia 45:23, 24) Tiri kuda kuva umwe wavo here? Hina kamare! Waro, tinodikana kuzwisisa kuti shwiro iyi inosisira zvakadini.

6. Kukhwijirija ukuru-kuru hwa Jehovha kunosisira zvakadini?

⁶ Kukhwijirijwa ko ukuru-kuru hwa Jehovha kunosisira maningi kupinda mudakaro wedu. Asi, azvirevi kuti ruponeso hwedu ahuna basa kuna Jehovha zve aatotitaji. Tinozvizivisa kudini?

7, 8. Kukhwijirijwa ko ukuru-kuru hwa Mwari kunozotibeseresa kudini?

⁷ Jehovha anotida maningi kamare. Zvokadi tinosisira maningi kwaari zvo kuti wakatipa Mwana wake kuti tiwanevo upenyu ucikaperi. (Johani 3:16; 1 Johani 4:9) Kudari Jehovha aazivi kuramba ano cigondisa cake ngo pamusoro po kumbeji kwedu, Sathana no vavengi vamweni vaizova no razawe. Sathana anonanga kuti Jehovha anonyepa, anonyima zvakanaka vandhu zve anotonga ngo njira icizivi kurungama.  Vavengi vanoseka cigondiso ca Jehovha, veciti: “Ciri kwapi cigondiso cokuvia kwake? Ngokuti kubvira ngari yaakazorora majibaba edu, bziro bzese bzakandogara bzakadaro, inga pa kutungamira ko nyika!” (2 Pedru 3:3, 4) Asi Jehovha anozokwanirisa cigondiso cake. Wakanasirira kuti kukhwijirijwa ko ukuru-kuru hwake kubatanijwe no kuponeswa ko vandhu vanozwira. (Verenganyi Isaia 55:10, 11.) Ukuru-kuru hwa Jehovha hwakacijikira pa rudo. Ngokudaro, tino gwinyiso ro kuti iyena anozondoramba ecida no kureremeja vashandiri vake vakagondeka.—Exodo 34:6.

⁸ Kuziva kuti shwiro yo ukuru-kuru hwa Jehovha inosisira maningi akurevi kuti ruponeso huno mutengo mushoma. Jehovha anotitaja maningi. Zvatinodikana kuramba teciziva ngo zvo kuti kubesera matongero ake ngakunosisira maningi.

9. Sathana wakanangenyi ngo pamusoro pa Jobe? (Vonanyi pikica yo kutanga.)

⁹ Tinodikana kuva no mavonero akanaka ngo pamusoro po ukuru-kuru hwa Jehovha. Izvo zvinosisira maningi. Tingazvivonera mu bhuku ra Jobe, rimwe ro mabhuku o mu Bhaibheri akatanga kutahwa. Mondhomo tinoverenga kuti Sathana wakananga kuti ngo kutambujika maningi, Jobe waizoramba Mwari. Sathana wakakumbira Mwari kuti atambuje Jobe. Jehovha aacaizoita zvondhozvo, asi wakasiya kuti Sathana aeje Jobe, eciti: “Bzese bzaanabzo bziri mu nyara jako.” (Verenyanyi Jobe 1:7-12.) Pasure pazvo, Jobe wakaruza vashandi no zviro zvake. Perepo, wakazwa kuti vana vake gumi vafa ngo ngozi. Sathana wakaita zvivoneke kuti Mwari ngaakaitisa ngozi iji. (Jobe 1:13-19) Tevere, Sathana wakahwajisa Jobe ngo ndhendha inotambuja maningi no kuzizimusa. (Jobe 2:7) Kuda kunyanyisazve, mukaji wake kamare Jobe no shamwari ndhatu jake jo kucengejera jakamubhuira masoko anohwaja no kurembesa.—Jobe 2:9; 3:11; 16:2.

10. (a) Jobe wakakhombijisa kudini kuti waigondeka kuna Mwari? (b) Ngenyi Jobe waidikana kurungamiswa mavonero ake?

¹⁰ Zvainangaro Sathana zvainga izvona here? Haiwa. Pikija Jobe wakatambujika maningi, aazivi kuramba Jehovha nakamwe. (Jobe 27:5) Asi, pa mukuvo umweni, Jobe wakakanganwa kuti cicinyi caisisira maningi kwaari. Wairamba ecindoti apana cainga ashaisha. Waijizwazve kuti waifanera kuziva ngenyi waitambujika. (Jobe 7:20; 13:24) Tingazwisisa hedu mazwiro a Jobe. Asi, Jehovha wakavona kuti Jobe wainga no mavonero akashata, womubesera kurungamisa mavonero awo. Wakazviitisa kudini?

11, 12. Jehovha wakabesera Jobe kuti abongesere ngo pamusoro penyi? Jobe wakadavirisa kudini?

¹¹ Tingaverenga zvakananga Jehovha ecibvunja Jobe, mu bhuku ra Jobe zvipauko 38 mbhera 41. Jehovha aazivi kusanangurira Jobe zvaimutambujisa. Pa ndau pazvo, Jehovha waida kubesera Jobe kuti azive madodokere ainga pamberi pa Mwari. Jehovha wakamujijisa kuti kwainga no shwiro yaisisira maningi kupinda zvineso zvake. (Verenganyi Jobe 38:18-21.) Magama a Jehovha akabesera Jobe kuti acinje mavonero ake.

¹² Mavereketere akashandisari Jehovha  apa aacaingepi o kukharamusa here, zvecivoneka kuti Jobe wainga atambujika maningi? Haiwa, nee Jobe aazivi kuzvivona kudaro. Jobe wakazwisisa no kureremeja mbhangiro ya Jehovha. Wakatonanga kudari: “Ndatenderuka, ndokhauya mu bukuta no marota.” (Jobe 42:1-6) Mufanan umweni waidanijwa Eriu wainga akambobeserazve Jobe kucinja murangariro wake. (Jobe 32:5-10) Jobe naapurukira mbhangiro yo rudo ya Jehovha, wocinja mavonero ake, Jehovha wakaita kuti vamweni vazive kuti waidakajihwa ngo kugondeka ka Jobe.—Jobe 42:7, 8.

13. Mbhangiro ya Jehovha yaizobesera kudini Jobe pasure po matambujiko ake?

¹³ Mbhangiro ya Jehovha yakaramba yecibesera Jobe pikija pasure po kupera ko matambujiko ake. Jehovha “wakakomborera Jobe pakupera ko kurarama kwake kupinda pakutanga.” Pa kufamba ko nguva, Jobe wakazova no “vana vanomwe vorume no vatatu vokaji.” (Jobe 42:12-14) Pikija Jobe waivada vana ava, zvokadi waindonga no cisuwo no vakafaya. Kangaije aacaikwanisavo kukangawa zviro zvakashatisisa zvakamuitikira no mbhuri yake. Pikaja hazvo wakazoziva thangwe ro matambujiko ake, zvingaita kuti wakaramba andona mubvunjo wokuti ngenyi Mwari wakamutendera kuti ave no matambujiko akawanda maningi. Kudari Jobe waigumihwa ngo murangariro ijo, waidikana kuceukija zvaakabvunjwaya ndi Jehovha. Izvo zvaizomutondhoja no kumubesera kuva no mavonero akarungama.—Nduyo 94:19.

14. Tingajijenyi ngo zvakasongana na Jobe?

¹⁴ Kurangarijisisa zvakasongana na Jobe zvingatibesera kucinja murangariro wedu no kutitondhoja. Bhuku ra Jobe i divi ro zvakatahwa ndi Jehovha “kuti tijije, kuti tivetere, ngo ndava yo kuvangirira no runyarajo bzinobva mu Matahwa, [“tive no vetero,” Shanduro yeNyika Itsva].” (VaRoma 15:4) Zvinotijijisa kuti atidikani kurangarira  maningi ngo pamusoro po zvineso zvedu, totokanganwa kurangarira ngo pamusoro po kukhwijirija ukuru-kuru hwa Jehovha. Inga ndi Jobe, tinobesera ukuru-kuru hwa Jehovha ngo kuramba takagondeka kwaari pikija upenyu ukanesa.

15. Kugondeka kwedu kunotibesera kudini patinonga tino zvineso?

¹⁵ Zvakasongana na Jobe zvingatinyaraja ngokuti zvinovonesa kuti zvineso zvatinosongana nazvo azvirevi kuti Jehovha wakanyangajwa ndisu. Zvineso zvinotipa mukana kuti tibesere ukuru-kuru hwa Jehovha. (Mazwi Akangwara 27:11) Tikacungirira takagondeka, tinodakajisa Jehovha zve vetero yedu yo kumbeji inovanga. (Verenganyi VaRoma 5:3-5.) Zvakasongana na Jobe zvinovonesa kuti ‘Jehovha ano rudo hukuru no nyasha.’ (Jakobo 5:11, Shanduro yeNyika Itsva) Tikabesera ukuru-kuru hwa Jehovha, iyena anozotipfupa. Kuziva izvo kunotibesera kuti ‘tisengerere no kucungirira kwese no mudakaro.’—VaKolosi 1:11, Baiberi Mazwi Akacena aMwari.

16. Ngenyi tinodikana kujiceukija kuti kubesera ukuru-kuru hwa Jehovha ngakunosisira maningi?

¹⁶ Izvokadi kuti, patinonga tecijipana no matambujiko, zvinganesa kusotesesa pa kukhwijirijwa ko ukuru-kuru hwa Jehovha. Nee zvineso zvidoko, zvingatovoneka kuva zvakakura kudari tikazvirangarira maningi. Ngo iyo ndava tinodikana kujiceukija kuti cinosisira maningi i kubesera ukuru-kuru hwa Mwari, azvinenyi zvineso zvapi zvatiri kusongana nazvo.

17. Kugara takabatikana mu basa ra Jehovha kunotibesera kudini kuti tirambe takasotesesa shwiro inosisira maningi?

¹⁷ Kugara takabatikana mu basa ra Jehovha zvingatibesera kuceukija kuti ngocapi cinosisira maningi. Inga muezaniso, hambzaji imweni inodanijwa Renee yainga no ndhendha imweni yakabatana no uruzvi, waihwajihwa nguva jese, iyena waingazve no kanseri. Paainga ari ku cipitari, waipa ucapupu vashandi vo kondhoyo, vatenda  vamweni no vandhu vaiviya komuvona. Bvaza imweni paakabhashari ku cipitari sumana mbiri no meya, Renee wakacumaera 80 o nguva. Pikija hazvo, waiziva kuti wainga woda kufa, iyena aazivi kumbokanganwa kuti ngozvapi zvaisisira maningi. Kubesera ukuru-kuru hwa Jehovha kwakamupa runyararo.

18. Zvakasongana na Jennifer zvinotijijisenyi ngo pamusoro po kubesera ukuru-kuru hwa Jehovha?

¹⁸ Tingabesera ukuru-kuru hwa Jehovha patinonga tecihwisana no zvineso zvidoko zvo njiku ngo njiku. Hambzaji imweni inodanijwa Jennifer yakapeja njiku ndhatu ku aeroporto ecivetera kupakira ndeki kuti iyende ku muzi. Asi ndeki pajairambijwa kupinda, Jennifer, wakajizwa kuremba no ushongwe. Naainga umweni waizotanga kujizwira urombo ega. Asi pa ndau po kuita kudaro, Jennifer wakaita mukumbiro kuna Jehovha kuti amubesere kucumaera masoko akanaka kuno vamweni vainga veciveteravo ndeki pamwepo. Wakapa ucapupu kuno vandhu vazinji zve wakakovanisa mabhuku mazinji. Iyena wakananga kudari: “Ndakavona kuti Jehovha wakandikomborera pikija no muejo uwo, iyena wakandipa simba rinokwana kuti ndibvikire zina rake ngo njira yaifanera.”

19. Ngo zvapi zvinovonesa vanamati vokadi-kadi?

¹⁹ Vandhu va Jehovha basi ndivona vanozwisisa kusisira ko ukuru-kuru hwa Jehovha. Izvi ngozvinovavonesa kuva vanamati vokadi-kadi. Ngo kudaro, umwe nga umwe wedu anodikana kuva no gwinyiso ro kuti ari kuramba ecibesera ukuru-kuru hwa Jehovha.

20. Jehovha anozwa kudini ngo pamusoro po zvese zvamunoita kuti mubesere ukuru-kuru hwake?

²⁰ Jehovha anovona no kureremeja zvese zvamunoita kuti mubesere ukuru-kuru hwake pamunonga mecimushandira makagondeka zve mecicungirira matambujiko. (Nduyo 18:26) Musoro unotevera unozodurujira zvakawanda ngo ndava yo kuti ngenyi ukuru-kuru hwa Jehovha hunofanera kubesehwa zve mungaubesera kudini ngo maitiro akakwana.