1, 2. (a) Ngorapi rainga basa raisisira maningi mu upenyu hwa Jesu zve Ngenyi? (b) Tinodikana kuitenyi kuti tibudirire inga “vabeseri va Mwari”?

JESU KRISTU wainga muvezi zve pa kufamba ko nguva wakava mujijisi. (Marco 6:3; Johani 13:13) Iyena waiita mabasa o mushovo wese mu njira yakakwana. Inga muvezi, iyena wakajijira kushandisa mathurusi ake kuti akwanise kuita ciri cese cinoitwa ngo tabwa. Zve inga mujijisi, iyena wakashandisa zivo yo Matahwa yaainga nayo kuti abesere vandhu kuti vazwisise cokwadi co mu Soko ra Mwari. (Mateu 7:28; Luka 24:32, 45) Jesu paainga waano 30 o makore okubahwa, wakasia basa ro kuveza wova mujijisi ngokuti waizviziva kuti basa iro rainga rinosisira maningi, raaizoita. Iyena wakananga kuti kucumaera masoko akanaka o Umambo hwa Mwari, ndirona thangwe rakaita kuti Mwari amutume pasi pano. (Mateu 20:28; Luka 3:23; 4:43) Mu upenyu hwake hwese, Jesu wakabatikana ngo kucumaera masoko akanaka zve anodavo kuti vamweni vaitevo zvakafanana.—Mateu 9:35-38.

² Uzinji hwedu atiripi vavezi, asi, tese tiri vajijisi avo vanojijisa vamweni masoko akanaka. Basa iri rinosisira maningi zvokuti Mwari anobatanijwavo. Zvokadi, itusu tinodanijwa “vabeseri va Mwari.” (1 VaKorinto 3:9; 2 VaKorinto 6:4) Tinotenderana no mutari wo nduyo wakananga kudari: “Bzokadi, ndiwona  maambo o mazwi enyu.” (Nduyo 119:159, 160) Soko ra Jehovha i cokwadi. Ngo iyo ndava, tinoda kuva no cokwadi co kuti tiri “kujijisa ngo urungami izwi ro bzokadi” mu mushando wedu. (Verenganyi 2 Timoti 2:15.) Ngokudaro, ngatirambe tecieja kuitisa nane kuziva kwedu pa kushandisa Bhaibheri, iro riri thurusi redu guru ro kujijisa vamweni ngo pamusoro pa Jehovha, Jesu zve no Umambo. Kuti tibesereke zve tibudirire mu mushando wedu, sangano ra Jehovha rinotipa mathurusi anoshanda zve tinodikana kumaziva kuti tingamashandisavo kudini. Mathurusi awo anowanika mu Bhokiso Redu ro Mathurusi o Kujijisa.

3. Ngenyi tinodikana kubatikana mu mushando wedu zve Maitiro o Vapostori 13:48, Shanduro yeNyika Itsva, inotibesera kudini kuita zvondhozvo?

³ Kangaije mungarangarira kuti ngenyi rinodanijwa Bhokiso ro Mathurusi o Kujijisa, haiwa Bhokiso ro Mathurusi o Kucumaera. Ngokuti “kucumaera” kunoreva kuzivisa masoko, asi “kujijisa” kunoreva kusanangura masoko kuti mundhu azwisise zvaanonga ecizwa perapo zvomuita kuti aite ciri cese kubvira pazvaajijaro. Mukati mo nguva shoma yasarari mu mugariro uno, tinodikana kubatikana maningi ngo kutanga jijo yo Bhaibheri no kujijisa vandhu cokwadi kuti vagume pa kuva vajiji va Kristu. Izvi zvinoreva kuti tinodikana kuvangisira pa kupsaka vaya ‘vano cido co kuti vaponeswe,’ tovabesera kuti vatange kushandira Jehovha.—Verenganyi Maitiro o Vapostori 13:44-48, Shanduro yeNyika Itsva.

4. Tingavawanisa kudini vaya ‘vano cido co kuti vaponeswe’?

⁴ Tingavawanisa kudini vaya ‘vano cido co kuti vaponeswe’? Ku maKristu okutanga, njira imwe basi yo kuwana vandhu vondhovo yainga kucumaera. Jesu wakananga kudari kuno vajiji vake: “Mu mutundhu dangani mu muzi wapi no wapi wo munoghwina, psanganyi kuziva ndiani wakanakira.” (Mateu 10:11) Tinodikanavo kuita zvakafanana nyamasi uno. Zvokadi kamare, kudari vandhu avazivi kunaka mwoyo, vanojikuja, kana avatodakariri kuziva ngo zva Mwari, atidikani kuvetera kuti vangada kuzwa masoko akanaka. Tiri kupsaka vaya vakanakira, vaya vanojidodokesa zve vanoda kamare kuziva cokwadi. Tingaezanisa mapsakire atinoita vandhu no zvaidikana kuita Jesu paainga ari muvezi. Cokutanga iyena waidikana kuwana tabwa raushoni raaizoshandisa kuti aite ndirona divi ro mobhiria, musuvo, kanga kana ciri cese haco. Sure kwazvo, waizotora bhokiso rake ro mathurusi, woshandisa uzivi hwake zve woita ciri cese caanoda. Mukufanana nyamasi uno, pokutanga tinodikana kuwana vaya vakanakira perapo tingashandisa mathurusi edu no zivo yedu kuti tivabesere kuva vajiji.—Mateu 28:19, 20, Shanduro yeNyika Itsva.

5. Ngenyi tinodikana kuziva mathurusi ari mu Bhokiso Redu ro Mathurusi o Kujijisa? Ezanisanyi. (Vonanyi pikica yo kutanga.)

⁵ Mu bhokiso ro mathurusi, thurusi rimwe nga rimwe rino cinangwa caro. Inga muezaniso, rangariranyi ngo mathurusi aishandisa Jesu paainga muvezi. * (Vonanyi masoko o pasi.) Iyena waidikana kuva no mathurusi kuitira kumidhiri, kumaka, kuceka, kubovora zve kusipinya tabwa, no kupima zvidimbu zvaro no kuzvibatanija pamwepo. Mukufananavo, thurusi rimwe nga rimwe mu Bhokiso Redu ro Mathurusi o Kujijisa rino cinangwa caro. Waro ngatende tivone kuti tingashandisa kudini mathurusi aya anosisira.

6, 7. (a) Munoshandisa kudini khadhi ro kunghwina mu saiti? (b) Ngenyi tinoshandisa mukoka kuitira musongano jo ungano?

⁶ Khadhi ro Kunghwina mu Saiti. Iri i thurusi dokowane asi rinoshanda maningi ngo kuti rinobvunja vandhu kuti ndisu ani zve rinovaita kuti vanghwine mu saiti yedu jw.org. Mu saiti yedu, ivona vangajija zvizinji ngo pamusoro pedu no kukumbira jijo yo Bhaibheri. Vandhu vanodarika 400.000 vakakumbira jijo yo Bhaibheri vecishandisa jw.org zve mazana amweni, aciri kuita zvondhozvo njiku ngo njiku! Mungafamba henyu no makhadhi manganani zve mopa vandhu vamunosongana navo pa njiku yese.

⁷ Mukoka. Mukoka wakadhindhwa kuitira musongano jedu unonanga kudari: “Muri Kukokwa kuitira kujija Bhaibheri no Zvapupu zva Jehovha.” Perapo unonanga kuti jijo iyi mungaiita “pa musongano jedu kuitira vese” “kana kuti no mujijisi wenyu.” Ngokudaro, mukoka unovonesa vandhu kuti ndisu ani zve unokokavo vese vaya ‘vanoziva zvinodiwa zvavo zvo kumujimu’ kuti vajije Bhaibheri na itusu. (Mateu 5:3, Shanduro yeNyika Itsva) Zvokadi kamare, vandhu vanoashihwa ushoni vakaviya ku musongano jedu pikija vatenda kujija Bhaibheri na itusu kana kuti haiwa. Pavanoviya ku musongano jedu, vanozovona kuti vangajija zvizinji zvinobva mu Bhaibheri.

8. Ngenyi zvinosisira kuti vandhu vamboviyevo ku musongano jedu pikija kamwe hako? Ipanyi muezaniso.

⁸ Zvinosisira kamare kuramba tecikoka vandhu kuti vamboviyevo ku musongano jedu pikija kamwe hako. Ngenyi? Ngokuti pavanoviya, ivona vanozovona kuti Zvapupu zva Jehovha zvinojijisa cokwadi cinobva mu Bhaibheri no kubesera vandhu kuti vazive Mwari, zviro zvicikaithwi ngo zviara zvo manyepo. (Isaia 65:13) Inga muezaniso, pa makore manganani adarika, varovorani vamweni vo ku Estadhus Unidhus vanodanijwa Ray na Linda vakauvona musiano wondhowo. Ivona vaitenda Mwari zve vaida kunasa kumuziva. Ngokudaro, vakatema civaringo co kwenda mu magerejha ese o mu dhorobha ravo zve vaida kuvona zviro zviviri vacito vasana rimwe rawo. Cokutanga, ivona vaida kujija ciri cese mugerejhemo zve cocipiri, vandhu vo mugerejha vaidikana kusimira inga vandhu vanonanga kuti vanoshandira Mwari. Zvakavatorera makore mazinji ngokuti mwainga no magerejha akawanda mu dhorobhemo. Asi, vakasuruvara maningi. Avazivi kujija ciri cese zve vandhu vo mugerejhemo vaisimira zvicikareremejeki. Pasure po kubvakacira gerejha ro kupejisira rainga pa rista yavo, Linda wakaenda kubasa zve Ray wakaenda kanyi. Paaienda kanyi, iyena wakadarika ngo pa Nyumba yo Umambo. Iyena wakarangarira kudari, ‘dakumbonghwinemo ndivone zvinoizwa mukatimo.’ Zvokadi kamare, cakava ciitiko cicikakanganiki! Vese pa Nyumba yo Umambo vakakhombija kunaka mwoyo no ushamwari zve vaisimira ushoni. Ray wakagara kumbeji zve wakadakarira maningi zvaakajija! Izvi zvinoticeukija manera akasanangura mupostori Pauro ecinangira mundhu anoviya pa musongano pa bvaza yo kutanga, wonanga kudari: “Mwari ari pakati penyu.” (1 VaKorinto 14:23-25) Kubvira pondhopo, Ray waienda ku musongano mu ma Dimingu ese. Perapo iyena wakatanga kwenda ku musongano wo pakati po sumana. Linda wakatangavo kwenda ku musongano zve pikija vainga no makore anokhwedera 70, ivona vakajija Bhaibheri zve vobhabhatijwa.

9, 10. (a) Ngenyi mataratadho akareruka kumashandisa? (b) Sananguranyi mashandire anoitwa taratadho Icinyi Umambo Hwa Mwari?

⁹ Mataratadho. Itusu tino mataratadho masere mu bhokiso redu ro mathurusi. Iwona akareruka kumashandisa zve anobesera maningi kuitira kutangisa mabhuyo. Kubvira pakabudiswa taratadho yo kutanga mu gore ra 2013, padindhwa mutengo unokhwedera mabhirioni mashanu awo! Mataratadho ese awo ano mugariro wakaezana. Ngokudaro, mukaziva kushandisa rimwe matoziva kushandisa ese. Mungashandisa kudini taratadho iji kuti mutangise mabhuyo no ari wese?

¹⁰ Kangaije munoda kushandisa taratadho inoti Icinyi Umambo Hwa Mwari? Khombijanyi mundhuwo mubvunjo unowanika pa pheji yo kutanga zve bvunjisanyi kudari: “Makambojibvunjisa kuti Icinyi Umambo hwa Mwari here? Maizonanga kuti ndi. . . ?” Perapo kumbiranyi kuti asane mupinguro waanoda pa mupinguro mutatu. Kunja ko kunanga kuti mupinguro wake wakanaka kana wakaposeka, mucikanonoki fununguranyi taratadho pa divi rinoti “Bhaibheri Rinoti Kudini?” zve verenganyi mavhesi akadihwemo, Danieli 2:44 na Isaia 9:5. Kuti mupejise mabhuyo enyu, itanyi mubvunjo unowanika pa pheji yo kupejijisira, pasi po cimusoro cinoti “Zvokurangarira”: “Upenyu hunozonga hwakadini pa mukuvo wo Utongi hwa Mwari?” Mungadavira mubvunjo wondhowo pahwiririro inotevera. Pamunosonganazve naye, mungashandisa cijijo co 7 co bhurushura rinoti Masoko Akanaka Anobva Kuna Mwari!, iro riri rimwe ro mathurusi edu o kutangisa jijo jo Bhabheri.

11. Marevhista edu anokwevejera vandhu kuti vaitenyi zve tinodikana kuzivenyi ngo pamusoro pavo?

¹¹ Marevhista. Murindiri no Mukai! ndi marevhista anobudiswa no kusandujwa maningi mu nyika yese kupinda amweni ese! Zvecivoneka kuti vandhu vo mu nyika jakasiana-siana vanoverenga marevhista aya, musoro wo pa kapa wakanasirihwa kuitira kukwevejera vandhu vo ku ndau jese. Tinodikana kushandisa marevhista aya kuitira kubesera vandhu kuti vasotesese pa zviya zvinosisira maningi mu upenyu hwavo nyamasi uno. Asi po kutanga, tinodikana kuziva kuti revhista rimwe nga rimwe rakanasirihwa kuitira mushovo wapi wo vandhu.

12. (a) Mukai! wakaitithwa ani zve ngo capi cidisiso cawo? (b) Ngozvapi zvinomudakajisa, zvakamuitikira pa mukuvo waperari ngo kushandisa thurusi iri?

¹² Mukai! wakanasiririhwa vandhu vaya vo kuti vano zivo yakatikuti ngo pamusoro po Bhaibheri kana vaya vacina zivo nee padoko. Kangaije apana cavanoziva ngo pamusoro po jijiso yo maKristu, avatothembi Bhaibheri nee padoko kana avazwisisi kuti Bhaibheri ringavabesera mu upenyu hwavo kamare. Cinangwa cimwe cikuru co revhista Mukai! ngo co kukhohwesa vaverengi kuti Mwari ariyo. (VaRoma 1:20; Vaheberi 11:6) Revhista iri rinobeserazve vaverengi kuti vathembe kuti Bhaibheri ‘bzakadi i izwi ra Mwari.” (1 VaTesalònika 2:13) Mujeura mutatu jakanasirihwa kuitira 2018, jino musoro jo kuti: “Nzira Yekuwana Mufaro,” “Zvinhu 12 Zviri Kubatsira Mhuri Kuti Dzifare” no “Mazano Ekubatsira Vakafirwa.”

13. (a) Murindiri wo vese wakanasiririhwa ani? (b) Ngozvapi zvinomudakajisa, zvakamuitikira pa mukuvo waperari ngo kushandisa thurusi iri?

¹³ Cinangwa cikuru co Murindiri wo mujeura  wo vese ngo co kusanangura jijiso jo Bhaibheri ku vandhu vanoreremeja Mwari pamwepo no Bhaibheri. Zvingaita kuti ivona vanoziva ciri cese ngo pamusoro po Bhaibheri, asi, zvokadi avazwisisi zvarinojijisa. (VaRoma 10:2; 1 Timoti 2:3, 4) Mujeura mutatu jo Murindiri 2018 jakanasirihwa kuitira kudavira mubvunjo iji: “Bhaibheri Richiri Kushanda Here?,” “Ramangwana Rakamira Sei?” pamwepo no “Mwari Anokuda Here?”

14. (a) Vhidhio murongomuna jiri mu Bhokiso Redu ro Mathurusi o Kujijisa jakaitihwenyi? (b) Ngozvapi zvinomudakajisa, zvakamuitikira po makakhombija vhidhio iji?

¹⁴ Mavhidhio. Mu njiku ja Jesu, muvezi wainga no mathurusi aishandiswa ngo nyara basi. Asi wari, vavezi vanoshandisavo mathurusi anoshanda ngo nerejhiya akadari inga motosera, mucini wo kubovora ndiwona zve mucini wokuitisa setete. Patinocumaera nyamasi uno, kusiapo kuva no mabhuku akadhindhwa basi, tino vhidhio jinodakajisa maningi kuti tikhombije vandhu. Jimweni jakona jiri mu bhokiso redu ro mathurusi, ndi vhidhio iji murongomuna: Ngenyi Kujija Bhaibheri?, Zvicinyi Zvinoitwa pa Jijo yo Bhaibheri?, Zvicinyi Zvinoitwa mu Nyumba yo Umambo?, no Zvapupu zva Jehovha—Ndisu Ani? Vhidhio jakafupikaya jicikapeji museswa muviri jinoshanda maningi patinotanga kusongana no mundhu. Vhidhio jiya jakati rebei jingashandiswa pa hwiririro zve kuno vaya vano nguva yakawanda. Vhidhio iji i mathurusi anoshamaisa ngokuti angakwevejera vandhu kuti vajije Bhaibheri zve vaviye ku musongano.

15. Zvicinyi zvingaitika kudari mundhu akavona vhidhio jedu mu ndumi yake? Ipanyi muezaniso.

¹⁵ Inga muezaniso, hambzaji imweni yakasongana no mwanakaji umweni wakathutha kwenda ku Mikronesia zve ndumi yake yo cibarihwe ndi Yapese. Hambzaji iyi yakamukhombija vhidhio inoti Ngenyi Kujija Bhaibheri? mu ndumi yake. Vhidhio poyakatanga, mwanakaji wiya wakati: “Ndi ndumi yangu iyi. Andingazvitendi! Ndingananga kuti ngo kuzwa mavereketero ake iyena anobva ku cirundu cangu. Iyena anovereketa ndumi yangu!” Pasure pazvo, mwanakaji wiya wakananga kuti waizoenda koverenga zvese no kuvona vhidhio jese jiri mu jw.org mu ndumi yake kamare. (Ezanisanyi Maitiro o Vapostori 2:8, 11.) Muezaniso umweni ngo wo hambzaji imweni yo ku Estadhus Unidhus, ino muzukuru anogara ku kontinenti imweni. Iyona yakatumira manghwiniro okuti awane vhidhio inoti: Ngenyi Kujija Bhaibheri? mu ndumi yake, mu jw.org. Iyena wakavona vhidhio iya zve wakatumira e-mail ku hambzaji iya eciti: “Ndadakarira maningi divi riya rainangaya kuti nyika yese iri mu nyara jo wakashata. Ndakaita cikumbiro kuitira kujija Bhaibheri.” Izvi zvinodakajisa maningi ngokuti iyena ari kupona mu nyika yo kuti basa redu riri kurambijwa!

16. Sanangurani cinangwa co bhurushura rimwe nga rimwe: (a) Izwanyi Mwari zve Raramanyi no Kucingaperi. (b) Masoko Akanaka Anobva Kuna Mwari! (c) Ndiani Ari Kuita Zvinoda Jehovha Nyamasi Uno?

¹⁶ Mabhurushura. Tingajijisa kudini cokwadi mundhu acikaverengi ushoni kana kuti aana mabhuku akacijikira mu Bhaibheri mu ndumi yake? Tingashandisa bhurushura Izwanyi Mwari zve Raramanyi no Kucingaperi. * (Vonanyi masoko o pasi.) Thurusi rimweni rakanakisisa kuti titangise jijo yo Bhaibheri i bhurushura Masoko Akanaka Anobva Kuna  Mwari! Mungatatija mundhuwo musoro jinokwana kuita 14 jiri pa pheji yo kupejisira zve momubvunjisa kuti ngowapi waadakarira maningi. Perapo motanga kujija pa cijijo condhoco. Makamboeja kuzviita pa hwiririro yenyu here? Bhurushura ro citatu riri mu bhokiso redu ro mathurusi ngo ro kuti Ndiani Ari Kuita Zvinoda Jehovha Nyamasi Uno? Irona rakanasirihwa kuti tijijise vajiji vo Bhaibheri ngo pamusoro po sangano redu. Kuti mujijire mashandisire amungaita bhurushura iri pa jijo imwe nga imwe yo Bhaibheri, vonanyi masoko ari pa Co Kutarira zvo Musongano-Upenyu Hwedu hwo CiKristu no Mushando, co mweji wa Maio wo 2017.

17. (a) Ngocapi cinangwa co bhuku rimwe nga rimwe ro kujija? (b) Ngozvapi zvinodikana kuitwa ngo vese vanobhabhatijwa zve ngenyi?

¹⁷ Mabhuku. Mukandotangisa jijo no mundhu mecishandisa bhurushura, pa nguva iri yese mungacinja motangisa jijo mu bhuku Bhaibheri Ringatijijisenyi? Thurusi iri ringabesera vandhu kuti vajije jijiso huru jo mu Bhaibheri. Kudari mujiji wenyu akaenderera mberi zve wopejisa bhuku rondhoro, mungaederera mberi mucijija naye bhuku rinoti Rambanyi Muri mu Rudo hwa Mwari. Thurusi iri rinozobesera mujiji wenyu kuti azive mashandisire aangaita zviambi zvo Bhaibheri mu upenyu hwake hwo njiku ngo njiku. Ceukijanyi kuti, pikija pasure po kubhabhatijwa, mundhu mupsa anodikana kuramba ecijija mbhera kupeja mabhuku ese o maviri. Izvi zvinozomubesera kuti ave no rutendo hwakavanga kuna Jehovha no kuramba akagondeka kwaari.—Verenganyi VaKolosi 2:6, 7.

18. (a) 1 Timoti 4:16 inotivangisa kuti tiitenyi inga vajijisi vo cokwadi zve ngowapi unozova muviyo wakona? (b) Ngocapi cinangwa cedu patinonga tecishandisa Bhokiso Redu ro Mathurusi o Kujijisa?

¹⁸ Inga Zvapupu zva Jehovha, tino mutoro wo kujijisa vandhu “izwi ro bzokadi, bzinoti vhangeri” kana masoko akanaka, angavatungamirira ku upenyu ucikaperi. (VaKolosi 1:5; verenganyi 1 Timoti 4:16.) Kuitira kutibesera kuti tiite izvo, tino Bhokiso Redu ro Mathurusi o Kujijisa rino mathurusi atinoda. (Vonanyi bhokiso rinoti: “ Bhokiso Redu ro Mathurusi o Kujijisa.”) Ngatishandise mathurusi ese aya, mbhera patinokwanisa. Umwe nga umwe wedu angasana kuti i thurusi rapi riri mu bhokiso ro mathurusi raangashandisa zve ndi papi paangarishandisira. Asi, ceukijanyi kuti, cinangwa cedu asipi co kukovanisa mabhuku zve atipekeji mabhuku edu vandhu vacikazivi kudakarira masoko edu. Cinangwa cedu ngo co kuita vajiji no vandhu vaya vakanaka mwoyo, vaya vanojidodokesa zve vanoda kuziva Mwari, vandhu vaya ‘vano cido co kuti vaponeswe.’—Maitiro o Vapostori 13:48, Shanduro yeNyika Itsva; Mateu 28:19, 20.