1, 2. Dhiabhu wakashandisenyi kuti akhuvaze vandhu vazinji?

ZVIRO ZVIMWENI zvakaumbwa ngo vandhu, zvakadari inga foni, magezi kana rujhu, karu no jharera, zvinoita kuti upenyu uve nane. Zvimweni zvakaumbwa ngo vandhu zvakadari inga unga wo mabara, mina, sigaro no bhomba atomika, zvinodira maningi upenyu pa ngozi. Asi kuno ciro cimweni co kare kupinda zvese izvi zve ciri kukhuvaza maningi vandhu. Ngocapi? I manyepo! Manyepo i kunanga ciro catinoziva kuti asipi cokwadi no cido cokuda kucengeja ari wese. Ndiani wakananga manyepo okutanga? Ndi Dhiabhu! Jesu Kristu wakamudanija kuti “baba wo unyepi.” (Verenganyi Johani 8:44.) Dhiabhu wakananga rini manyepo okutanga?

² Iyena wakazviita ko zviuru zvo makore zvakadarika mu munda wo Edheni. Adhamu na Evha vaibusa upenyu mu Paradhiso yakaseja yavakanasiririhwa ndi Jehovha. Mwari wainga wakavabvunja kuti kudari vakaha “mucero wo muti wo uzivi hwo bzakanaka no bzakaxata,” ivona vaizofa. Pikija Sathana waizviziva izvi, iyena wakashandisa nyoka kuti ibvunje Evha kudari: “Andibzopi, amuzofi!” Uku kwakava kunyepa ko kutanga. Sathana  wakanangazve kudari: “Mwari anoziva kuti, njiku yo munozouha, majiso enyu anozofununguka, nemwi munozoita inga ndi Mwari, meciziva bzakanaka no bzakaxata.”—Genesi 2:15-17; 3:1-5.

3. Ngenyi manyepo a Sathana ainga akashatisisa zve zvicinyi zvakazoitika ngo ndava yo manyepo ondhowo?

³ Kunyepa kwa Sathana kwainga kwashatisisa ngo kuti iyena waiziva kuti kudari Evha akazvitenda woha mucero, iyena waizofa. Zve izvi ngo zvakaitika kamare. Evha, tevere Adhamu vakashaishira mupango wa Jehovha vogumisira ngo kufa. (Genesi 3:6; 5:5) Kupinda zvondhozvo, ngo ndava yo cishaishi ca Adhamu, “hwakangwina uxaixi mu nyika yo pasi” kana ku vandhu vese. Zvokadi, “kufa kwakatonga . . . , panyezeruvo po vandhu vacikazivi kuxaixa kudari ndi Adamu.” (VaRoma 5:12, 14) Ngo iyo ndava, tese atizivi kukwana zve atiripi kupona kwenda no kwenda inga zvaida Mwari. Kusiyapo, tinopona makore anokhwedera ‘makumanomwe; Asi kudari tino simba, tinoguma makore makumasere,’ zve upenyu hwedu ‘wakazara ngo kutambujika no zviro zvinokhuvaza.’ (Nduyo 90:10, Shanduro yeNyika Itsva) Zvese izvi, zviri kuitika ngo ndava yo manyepo a Sathana!

4. (a) Ngojapi mubvunjo jatinodikana kuzviita? (b) Mukuzwirana na Nduyo 15:1, 2, ndiani basi angava shamwari ya Jehovha?

⁴ Jesu wakananga kudari ngo pamusoro pa Sathana: “Aazivi kuvangirira mu bzokadi, ngokuti mwaari amuna bzokadi.” Sathana aazivi kucinja. Iyena aciri kucengeja vandhu vo pasi pese ecishandisa manyepo. (Apokalipsi 12:9) Asi itusu atidi kuti Sathana aticengeje. Ngokudaro, tinodikana kuziva mupinguro wo mubvunjo mutatu. Sathana ari kucengejesa kudini vandhu nyamasi uno? Ngenyi vandhu vanonyepa? Zve tingabhuisa kudini cokwadi nguva jese kuti titame kuruza ushamwari hwedu na Jehovha, inga ndi Adhamu na Evha?—Verenganyi Nduyo 15:1, 2.

5. Sathana ari kucengejesa kudini vandhu nyamasi uno?

⁵ Itusu tingatiza kucengejwa ndi Sathana. Mupostori Pauro wakananga kudari: “Tinoziva macengejero ake.” (2 VaKorinto 2:11) Tinozviziva kuti Sathana ari kuvonerera nyika yese, kubatanijavo ciara co manyepo, mautongi anobirana no vatengesi vo umbau. (1 Johani 5:19) Ngo kudaro, atikahamari ngo kuzwa kuti Sathana no madhimoni ake, vari kukwevejera vandhu vano simba kuti vave “vanyepi.” (1 Timoti 4:1, 2) Inga muezaniso, vatengesi vamweni vanonyepa pavanonga vecizivisa zvavanoda kutengesa kuti vakhuvaze kana kucengeja vandhu no kuvatorera mare.

6, 7. (a) Ngenyi manyepo anonangwa ngo vatungamiriri vo zviara akashatisisa? (b) Ngoapi manyepo amakambozwa ecinangwa ngo vatungamiriri vo zviara?

⁶ Manyepo akashatisisa kamare ngo anonangwaya ngo vatungamiriri vo zviara. Ngenyi? Ngokuti kudari ari wese akatenda jijiso javo jo kunyepa zve woita zviro zvinonyenywa ndi Mwari, iyena angaruza mukana wo kupona kwenda no kwenda. (Hoseya 4:9) Jesu waiziva kuti vatungamiriri vo zviara mu njiku jake vaicengeja vandhu. No kucunga kwese, iyena wakavabvunja kudari: “Nyatwa komuri vatari no vaFarisi vajiitisi! Munofambira jombe no nyika ngo kuda kuita mujiji umwe; mukamuwana munomuitisa mwana wo Gehena,”  kuda kunanga kuparajwa mbhera narini. (Mateu 23:15) Jesu wakananga kuti vatungamiriri vo zviara vaya vo kunyepa, vaiezana kamare na Baba wavo Dhiabhu, uwo ari “muurayi.”—Johani 8:44.

⁷ Kuno vatungamiriri vo zviara vakawanda maningi nyamasi uno. Ivona vangadanijwa mapastori, majipadri kana vangava no mazina amweni o kureremeja. Inga Vafarisi, ivona avajijisi cokwadi cinobva mu Soko ra Mwari asi “vakaphinduja bzokadi bza Mwari ngo bzokunyepa.” (VaRoma 1:18, 25) Amweni o manyepo avo ngo okuti “ukaponeswa kamwe, watopona mbhera narini,” vandhu vano mwiha ucingafi, vakafa vari kupona kumweni zve Mwari anotendera maponero o vanarume vanoda kuita inga vanakaji no vanakaji vanoda kuita inga vanarume zve rovorano yo mwanarume no mwanarume kana mwanakaji no mwanakaji.

8. Ngoapi manyepo anozonangwa ngo vatungamiriri vo zvomatonghwe o nyika, asi tinodikana kuitenyi patinomazwa?

⁸ Vo zvomatongehwe o nyika vanoshandisavo manyepo kuti vacengejevo vandhu. Amwe o manyepo makuru anozonangwa ngo okuti ivona vaviisa “kunyarara no kugarisika” mu nyika. Asi “pondhopo apo, cipondhopondho, vanozopejwa.” Ngo kudaro, atidikani kudavira zvinonanga vatungamiriri vo zvomatongehwe o nyika, avo vanonanga kuti zviro zviri kuita nane. Cokwadi ngo cokuti itusu tinoziva “uxoni kuti njiku ya Tenji inozoguma inga magumiro o inoita mbava, usiku.”—1 VaTesalònika 5:1-4.

9, 10. (a) Ngenyi vandhu vanonyepa zve ngowapi muviyo wakona? (b) Tinodikana kuceukijenyi ngo pamusoro pa Jehovha?

⁹ Nyamasi uno, asipi basi vandhu vano simba vanonyepa. Musoro wokuti “Why We Lie” (Ngenyi Tinonyepa?), wakatahwa ndi Y. Bhattacharjee, wakananga kuti “kunyepa, kwaakuvoniwa inga mugariro wo vandhu unonesa maningi kucinja.” Ngo magama amweni, vandhu vari kuvona kuti kunyepa i mugariro wo cibarihwe. Vandhu vazinji vanonyepa kuti vajibvikire, kangaije vavige zvishaishi zvavanoita kana kuphwanya mutemo kovakaita. Vanonyepavo kuti vawane mare kana kuti vabesereke pacavo ngo maitiro ariyese. Musoro wondhowo wakanangazve kuti vamweni avaneseki ngo kunyepera “vandhu vo nyikanja, vashandi doni, shamwari no vadiwa vavo.”

¹⁰ Ngowapi muviyo wo manyepo ese aya? Vandhu avacathembani umwe no umweni zve ushamwari uri kupera. Inga muezaniso, rangariranyi kuti kusuruvara kwakadini kwaizova no mwamuna wakagondeka paanofumbhura kuti mukaji wake wakaita ruvatano no ari wese perepo womunyepera kuti avige zvaakaitaro. Kana rangariranyi kuti kushata kwakadini kwaizovepo kudari mwamuna anoshaisha kutaja mukaji wake no vana pa muzi asi pamberi po vamweni wokhombijira inga anovada zve anovataja ushoni. Vandhu vakadari vanokwanisa kucengeja vandhu, asi tinodikana kuceukija kuti avakwanisi kucengeja Jehovha. Bhaibheri  rinonanga kuti “bzese bziri mitu no pa mbhene” pamberi pa Jehovha.—Vaheberi 4:13.

11. Muezaniso wakashata wa Anania na Safira unotijijisenyi? (Vonanyi pikica yo kutanga.)

¹¹ Mu Bhaibheri, muno muezaniso wo varovorani vo ciKristu vakakwevejehwa ndi Sathana kuti vanyepere Mwari. Anania na Safira vakaeja kunyepera vapostori. Ivona vakatengesa munda wavo zve vopa divi rimwe ro mare ku vapostori. Anania na Safira vaida kuvoniwa ngo vamweni mu ungano, ngokudaro, vakabvunja vapostori kuti vapekeja mare yese. Asi, Jehovha waizviziva kuti vainga vecinyepa zve wakavapanica.—Maitiro o Vapostori 5:1-10.

12. Zvicinyi zvinozoitika ku vanyepi vacikakhauyi zve ngenyi?

¹² Jehovha anozwa kudini ngo pamusoro po vandhu vaya vanonyepa? Vandhu vese vanonanga manyepo akashata vacikakhauyi vanozoperera mu “gandwa ro muriro,” kudarivo inga ndi Sathana. Ngo magama amweni, ivona vanozoparajwa kwenda no kwenda. (Apokalipsi 20:10; 21:8; Nduyo 5:7) Ngenyi? Ngo kuti Jehovha anovona vanyepi avo inga mavonero aanoita vese vanoitaya inga “imbhwa,” kuda kureva vese vaya vanoita zviro zvinosembhusa pamberi pa Mwari.—Apokalipsi 22:15.

13. Tinozivenyi ngo pamusoro pa Jehovha zve zvondhozvo zvinotindundira kuti tiitenyi?

¹³ Tinoziva kuti Jehovha “asipi mundhu, kuti anyepe,” zve “Mwari aakwanisi kunyepa.” (Bziverengo 23:19; Vaheberi 6:18) Jehovha ‘anonyenya . . . rurimi hwokunyepa.’ (Mazwi Akangwara 6:16, 17) Kudari tecida kumudakajisa, tinodikana kuvereketa cokwadi nguva jese. Ngo kudaro, itusu ‘atinyeperani ngocedu.’—VaKolosi 3:9.

14. (a) Zvicinyi zvinoita kuti maKristu okadi-kadi asiyane no vandhu vo mu zviara zvo manyepo? (b) Sananguranyi ciambi cinowanika pa Luka 6:45.

¹⁴ Ngoyapi njira imwe inovonesa kuti maKristu  okadi-kadi akasiana no vandhu vari mu zviara zvo manyepo? ‘Tinobhuya bzokadi.’ (Verenganyi Zakaria 8:17, 18.) Pauro wakananga kudari: “Tinovangirira kuita vanasi, inga vabatiri va Mwari, . . . tecitokotesa Izwi ro bzokadi.” (2 VaKorinto 6:4, 7) Zve Jesu wakananga kuti vandhu, vanovereketa “bzakazara mu mwoyo.” (Luka 6:45) Izvi zvinoreva kuti mundhu wakagondeka anozovereketa cokwadi. Iyena anozovereketa cokwadi ku vandhu vaacikazivi, vadoni vo ku basa, shamwari no kuno vadiwa vake. Ngatibhuisane ngo muezaniso munganani basi jingakhombija kuti tiri kueja kuva takagondeka pa zviro zvese.

15. (a) Ngenyi zvakashata kutora upenyu huviri? (b) Zvicinyi zvingabesera majaha no vasikane kuti vahwisane no kuvangirijwa? (Vonanyi masoko o pasi.)

¹⁵ Kudari uri mujaha kana musikane, ungada kuti shamwari jako jikudakarire. Asi, ngo ndava yo cido condhoco, majaha no vasikane vamweni vari kutora upenyu huviri. Ivona vanocengejera kuva no mufambiro wakacena pavanonga no ukama hwavo zve no vandhu vo ku ungano, asi pavanonga vari mu interneti kana no vandhu vacikashandiri Jehovha, vanonga vaamundhu umweni. Ivona vangashandisa mavereketero akashata, kuva no masimiriro akashata, kupurukira mumbo jinobhuya zvinopseruja, kudhakwa, kushandisa mutombo jinodhakwisa, kunomorari mucifise-fise kana kutoita zviro zvimweni zvakashata. Ivona vanonga vecinyepera vabari vavo, hama no hambzaji javo pamwepo na Jehovha. (Nduyo 26:4, 5) Asi, Jehovha anoziva patinonanga kuti tinomukuja perepo toita zvaanonyenya. (Marco 7:6) Zvakanaka maningi kuita zvakatahwa pa mazwi akangwara: “Mwoyo wako ucaitira thima vaxaixi; kaveta njiku jese uthye Tenji Mwari.”—Mazwi Akangwara 23:17. * (Vonanyi masoko o pasi.)

16. Tinodikana kudavirisa kudini mubvunjo jo petisau kuitira kunghwina mu basa ro nguva yakazara?

¹⁶ Kudari munoda kuva piyona wo nguva jese kana kunghwina mu basa ro mu nguva yakazara, inga muezaniso pa Bheteri, munodikana kutara petisau. Ngo kugondeka kwese, zvinosisira maningi kunasa kupingura mubvunjo ngo pamusoro po uhomi hwenyu, mushovo wo mabungaijo amunosana, no mufambiro wenyu. (Vaheberi 13:18, Shanduro yeNyika Itsva) Asi, zvakadini kudari makaita ciri cese cinonyenywa ndi Jehovha kana ciri cese ciri kubharusa hana yenyu zve amuzivi kubvunja vakuru ngo pamusoro pazvo keni? Vakumbirenyi kuti vamubesere, ngokudaro mungashandira Jehovha no hana yakacena.—VaRoma 9:1, Shanduro yeNyika Itsva; VaGalàsia 6:1.

17. Tinodikana kuitenyi vateveri vedu pavanopsaka kuziva ngo pamusoro po hama jedu?

¹⁷ Munodikana kuitenyi kudari basa redu riri kurambijwa kwamunogararo zve mosungwa  ngo utongi perepo moitwa mubvunjo ngo pamusoro po hama jenyu? Munodikana kuvabvunja zvese zvamunoziva here? Jesu wakaitenyi mutongi wo ciRoma paakamuita mubvunjo? Jesu wakashandisa ciambi co mu Bhaibheri co kuti kuno “mukuvo wo kunyarara, no mukuvo wo kuvereketa,” zve nguva jimweni iyena aazivi kuvereketa ciri cese! (Mucumaeri 3:1, 7; Mateu 27:11-14) Kudari tikava pa mugariro wakafanana, tinodikana kuva no ubhasopa zve vakangwara kuti titame kudira hama jedu pa ngozi.—Mazwi Akangwara 10:19; 11:12.

18. Ngowapi mutoro watinawo kudari vakuru vakatiita mubvunjo ngo pamusoro po hama jedu?

¹⁸ Kudari mu ungano muna mundhu waita cishaishi cikuru zve toziva ciri cese ngo pamusoro paco keni? Vakuru vano mutoro wo kuita kuti vo mu ungano varambe no mufambiro wakacena, ngokudaro, vangamubvunjisa ngo zvamunoziva ngo pamusoro pazvo. Maizoitenyi, maningi-ningi kudari mundhuwo i shamwari yenyu yo phedo? Bhaibheri rinonanga kudari: “Ndiani anonanga bzokadi, anotokotesa bzakarurama.” (Mazwi Akangwara 12:17; 21:28) Ngokudaro, muno mutoro wo kuvabvunja cokwadi cese camunoziva, mucikavigi ciri cese. Vakuru, vano citendehwa co kuziva zvese zvinobatanijwepo kuti vawane manera akanakisisa o kubesera mundhu wiya kuti awanezve ushamwari hwake na Jehovha.—Jakobo 5:14, 15.

19. Mu musoro unotevera tinozojijenyi?

¹⁹ Dhavhidhi wakakumbira kudari kuna Jehovha: “Munodisisa mwoyo uno bzokadi.” (Nduyo 51:8) Dhavhidhi waizviziva kuti zvinosisira maningi ndi zviya zvatiri ngo mukati. Nguva jese, maKristu okadi-kadi ‘anonanga bzokadi umwe nga umwe ku mudoni wake.’ Njira imweni inokhombija kuti takasiana no vandhu vo mu zviara zvo manyepo, i kujija cokwadi cinobva mu Bhaibheri. Mu musoro unotevera, tinozobhuisana kuti tinozviitisa kudini mu mushando wedu.