1. Ngenyi vandhu vamweni vangafanera kuashira rukujo, zve zvicinyi zvatinozojija pa musoro uno?

TINGAKUJISA kudini vamweni? Tinozviita ngo kuvabata ngo maitiro anosisira no kuvareremeja. Kazinji, tinokuja vaya vanonga vaita ciri cese kana vaya vano mutoro kana cigaro cinosisira. Pa musoro uno, tinozojija kuti mbhaani vatinodikana kukuja zve ngenyi.

2, 3. (a) Ngenyi Jehovha ngaanofanera kukujwa maningi? (Vonanyi pikica yo kutanga.) (b) Ndiani Bvuta rinonangwa pa Apokalipsi 5:13, zve ngenyi tinodikana kumukuja?

² Pana Apokalipsi 5:13 panonanga kuti “Wiya anogara pa dendemaro” pomwe no “Bvuta” vanofanera kukujwa. “Wiya anogara pa dendemaro” ndi Jehovha. Pa Apokalipsi cipauko co 4, zvisikwa zvo mugore zvinotipa thangwe rimwe kuti tivone kuti ngenyi Jehovha, Wiya anorarama “makore acikaperi,” anofanera kukujwa. Ijona jinoti: “Tenji, Mwari wedu, ndimwi munonakira kuaxira goja, nderemejo no simba; ngo kuti  makarura bzese. Bzakaruhwa, ngo kuda kwenyu bziriyo, bzvorarama.”—Apokalipsi 4:9-11.

³ “Bvuta” rinonangwa pa Apokalipsi 5:13 ndi Jesu. Tinozvizivisa kudini? Paainga ari pasi pano, Jesu wakadanijwa “Bvuta ra Mwari rinofujura uxaixi hwo nyika.” (Johani 1:29) Ndi mambo wapi wakambojipira kuti afire vatongwi vake? Iri i thangwe rakanaka kuti timukuje. Jesu anofanera kukujwa ngo kuti iyena ndi “Mambo wo majimambo no Tenji wo majitenji.” (1 Timoti 6:14-16) Kangaije munotojizwavo inga zvisikwa zvo mugore izvo zvinoimba zviciti: “Bvuta rakapihwa rinonakira kuaxira utongi, uthende, uzivi, simba ureremejo, goja no kukojwa.”—Apokalipsi 5:12.

4. Ngenyi ngo zvoungwaru kuti tikuje Jehovha na Jesu?

⁴ Johani 5:22, 23 inoti Jehovha wakagaja Kristu kuva mutongi wo vandhu vese. Iri i thangwe guru rinotiitisa kuti tikuje Jesu. Potinomukuja, tiri kutokujavo Jehovha. Potinokheta kukuja Jesu na Baba wake, tinowana upenyu hucikaperi.—Verenganyi Nduyo 2:11, 12, Baiberi Mazwi Akacena aMwari.

5. Ngenyi vandhu vese vanofanera kukujwa no kureremejwa mbhera pakati kuti?

⁵ Vandhu vakasikwa “ngo muezaniso” wa Mwari. (Genesi 1:27) Izvi zvinoreva kuti vandhu vazinji vanokwanisa kukhombija mugariro jakaezana no ja Mwari. Inga muezaniso, vandhu vanokwanisa kukhombija rudo, kunaka mwoyo no kuitira pena vamweni. Vandhu vakasikwazve no mwoyo kana hana, inopa mazwiro okuti cakati cakanaka kana cakashata, kugondeka kana kutama kugondeka, cakati cinotendehwa kana acitendehwi. (VaRoma 2:14, 15) Vandhu vazinji vanodakarira zviro zvakacena no zvakaseja zve vanoda kugara ngo runyararo no vamweni. Izvi azvitishamaisi, ngokuti Jehovha ndi Mwari wakarongeka no wo runyararo. Zvakajeka kuti vandhu vese vakasikwa vacikwanisa kutevejera Jehovha ngo njira jakasiana-siana. Ngo iyo ndava, vandhu vanofanera kukujwa no kureremejwa ndisu.—Nduyo 8:6.

6, 7. Zvapupu zva Jehovha zvakasiana kudini no vandhu vazinji pozvinokuja vamweni?

⁶ Tinozviziva kuti vandhu vamweni vanodikana kukujwa, asi zvinganesa kuziva kuti makujiro api otinodikana kuvaita zve tinodikana kuvakuja mbhera papi. Izvo zvinoitika ngokuti vandhu vazinji vacizivi kukwana, vanokwevejehwa maningi ngo mugariro jo munyika ya Sathana. Vandhu vazinji vanonamata vanarume kana vanakaji. Kusiyapo kuvakuja no kuvareremeja inga zvaaida Jehovha, vandhu vanonyanya kukuja vandhu vamweni, vovataja inga zvimwari. Vangatevejera masimirire, mugariro no mufambiro jo vo zvomatongehwe o nyika no vatungamiriri vo zviara, vanoita muphikizano, vanoita mafirime no vamweni vano nduma.

⁷ MaKristu o cokwadi anozviziva kuti zvakashata kukuja vandhu mbhera pa mudida uwo. Pa vandhu vese vakararama, ndi Jesu basi wakagaja muezaniso wakakwana kuti tiutevejere. (1 Pedru 2:21) Tinodikana kuceuja kuti “vese vakaxaixa, vokonehwa  goja ra Mwari.” (VaRoma 3:23) Akuna mundhu anofanera kunamatwa. Potinokuja vandhu kupinda zvinodikana, Jehovha anocamwa.

8, 9. (a) Zvapupu zva Jehovha zvinovona kudini vatongi? (b) Pa mugariro wapi woticikadikani kuzwira vatongi?

⁸ Kuno vandhu vamweni vanofanera kukujwa no kureremejwa ngo ndava yo cigaro cavo. Inga muezaniso, rangariranyi basi ngo pamusoro po vatongi no basa ravanomuitira. Ivona vanobesera kuti ndharaundha yenyu ive yakangwaririka zve vanokhorondha zvinodiwa zvo vagari vemo. Zvokadi, mabasa avanoita anobesera maningi. Mupostori Pauro wakananga kuti tinodikana kuvavona inga “vatongi vo nyika.” Wakanangazve kuti tinodikana kuteveja mutemo javo, aciti: “Ipanyi umwe nga umwe bzaanofanera: Xabanyi kwa vaya vomunodika kuxabira,” zve “kujanyi mundhu anodikana kukojwa.”—VaRoma 13:1, 7.

⁹ Inga Zvapupu zva Jehovha, tinoita zvese zvotinokwanisa kuitira titatije vatongi kuti tinovareremeja. Zvokadi, nyika imwe na imwe ina zvirovejeso zvayo, ngokudaro, zvovanoda kuti tivaitire ku ndau imwe zvingasiana no zvovanoda ku ndau imweni. Pikija zvakadaro, tinondoshanda pamwe navo pavanoita basa ravo. Asi, kudari vakatibvunja kuita ciro cicikazwirani no zvinoda Jehovha, aticiiti. Itusu tinozwira no kukuja Jehovha kuciripi mundhu pa shwiro ijo.—Verenganyi 1 Pedru 2:13-17.

10. Vashandiri va Jehovha vokare vakatigajira kudini muezaniso wakanaka?

¹⁰ Tinojija zvijijo ngo vashandiri va Jehovha vokare, vakakuja vatongi no vano zvigaro mu utongi. Muezaniso wakanaka ngo wa Josefa na Maria. VaRoma povaida kuziva kuti vandhu vangana vaigara munyika mavo, Josefa na Maria vakaita hwendo kuenda kootarihwa ku Bheterehema, pikija Maria wainga waaphedo kuti abare. (Luka 2:1-5) Muezaniso umweni wo mundhu wakareremeja vatongi ndi mupostori Pauro. Paakapumbhwa kuti wakaita ciro cakashata, wakazvijivirira ngo nderemejo pambeji pa Mambo Herodhi Agripa no pambeji pa Festo, mutongi wo Roma, waitonga porovhinsia yo Judheya.—Maitiro o Vapostori 25:1-12; 26:1-3.

11, 12. (a) Ngenyi atidikani kukuja vatungamiriri vo zviara ngo maitiro akasiyana? (b) Hama imweni yo ku Austria poyakareremeja umwe wo zvomatongehwe o nyika, zvicinyi zvakaitika?

¹¹ Tingativo kudini ngo vatungamiriri vo zviara? Vanodikana kupuwa rukujo ngo maitiro akasiyana here? Itusu tinovapa rukujo hwakaezana no hotaizopavo ari wese. Zvaizova zvakashata kuvapa rukujo hwakakhwirira, pikija vecitozvida. Ngenyi? Ngo kuti zviara zvo manyepo azvijijisi cokwadi ngo pamusoro pa Mwari no Soko rake, Bhaibheri. Jesu wakavereketera vajijisi vo zviara zvo manyepo no kuvadanija vacengejeri no vatungamiriri vakashata. (Mateu 23:23, 24) Ngo divi rimweni, azvicaizova zvakashata kupa nderemejo yakakhwirira kuno vatongi. Ngo kuita kwedu kudaro, ivona nguva jimweni vanotibesera.

¹² Umwe wo vatongi ava, wainga Dr. Heinrich Gleissner, umwe wo zvomatongehwe o nyika wo ku Austria. Hondo yo Cipiri yo Nyika Yese payainga yeciizwa, iyena wakasungwa ngo ma Nazista. Naari mucitima ecienda ku ndau yavaizounganijwa,  wakasongana na Leopold Engleitner, imwe hama yainga mucumaeri anovangisira wo ku Austria. Hama Engleitner vakasanangurira Dr. Gleissner zvitendwa zvavo, zve iyena wakanasa kupurukira. Hondo poyakapera, Gleissner, ecishandisa cigaro cake, wakabesera kazinji Zvapupu ku Austria. Kangaije imwimwi munotoziva muezaniso jo zviro zvakanaka zvakaitika ngokuti maKristu akareremeja vatongi.

13. Mbhaani vatinofanera maningi kukuja no kureremeja, zve ngenyi?

¹³ Hama no hambzaji jedu jinofanera kukujwa no kurerermejwa ndisu. Rukujo no nderemejo iyo, inodiwa maningi kuikhombijira hama jinotungamirira, vakadari inga vakuru, vavonereri vo ndharaundha, vo Dare ro Cine pomwe no vo Mukhumbi Unotonga. (Verenganyi 1 Timoti 5:17, BMAA.) Vese avowaro, vanoshanda kuitira zvinodiwa zvo vandhu va Mwari, zve Bhaibheri rinovadanija vashandiri avo kuva ‘zvipo zviri vanarume.’ (VaEfeso 4:8) Ngo kudaro, zvino musoro kuti tivakuje no kuvareremeja ticikasoti kovanobva, vakajija mbhera papi, zvicinyi zvavari kana vano mare maningi kana haiwa. MaKristu o kutanga akagaja muezaniso wakanaka kwatiri. Iwona aikuja vanarume vaitungamirira, zve itusuvo tinoitavo kudaro nyamasi uno. I zvokadi kuti patinonga tiri pamwepo no vanarume avo, ativareremeji inga kuti ivona i ngirozi kana kuti vakasiyana na itusu. Asi tinovareremeja no kuvakuja ngo ndava yo basa guru ravanoita no kujidodokesa kwavo.—Verenganyi 2 VaKorinto 1:24; Apokalipsi 19:10.

14, 15. Vakuru vo ungano vakasianisa kudini no vatungamiriri vo zviara?

 ¹⁴ Vakuru ava vakadari inga vahavisi vanojidodokesa. Ivona avadi kutajwa inga vandhu vano nduma. Ngokudaro, ivona vakasiana maningi no vatungamiriri vo zviara, vo nyamasi uno, no vo pamukuvo wa Jesu. Iyena wakananga ngo pamusoro pavo kudari: “Vanoemura ndau jokutanga mu mabuso, no bzigaro bzo goja mu Masinagoga. Vanoda kucungamijwa mu makwanja.”—Mateu 23:6, 7.

¹⁵ Vakuru vo ungano vanodikana kuzwira masoko a Jesu okuti: “Mucadavira kudanwa Rabi, ngokuti mujijisi wenyu ndi umwe ega: imwimwi mwese muri hama no hama. Mucadana ariwese pasi pano baba wenyu, ngokuti Baba wenyu ndi umwe ega: vo mugore. Mucadabze kudanwa [“‘vatungamiriri,’ ngokuti Mutungamiriri,” Shanduro yeNyika Itsva], wenyu ndi umwe ega: Kristu. Mukuru pakati penyu anozova mubatiri wenyu. Wiya anojikuja anozododokeswa, wiya anojidodokesa anozokujwa.” (Mateu 23:8-12) Vakuru vo mu ungano jo mu nyika yese povanojidodokesa no kuzwira masoko a Jesu, hama no hambzaji javo jinozovada, kuvareremeja no kuvakuja.

16. Ngenyi tinodikana kuramba tecivangisira pa kutatija rukujo?

¹⁶ Zvingatitorera mukuvo wakareba kuti tizive makujire atingaita vamweni. Izvi ngo zvakaitikavo ku maKristu o kutanga. (Maitiro o Vapostori 10:22-26; 3 Johani 9, 10) Asi kuvangisira zvinobesera. Potinokuja vamweni ngo njira yaanoda Jehovha, tinozobesereka maningi.

17. Mabesero api amweni anoviiswa ngo kukuja vano zvigaro zvo utongi?

¹⁷ Patinokuja no kureremeja vaya vano zvigaro zvo utongi mu mutundhu medumo, ivona vangazobvikira kutendehwa kwatinako kuti ticumaere. Vangatova no mavonero akanaka ngo pamusoro po basa redu ro kucumaera. Izvi zvakaitika, pa makore akadarika ku Aremanya, imwe hambzaji iri piyona yaidanijwa Birgit, payakaenda ku musongano wo kupejisa cikora co mwana wayo wokaji. Vajijisi vakabvunja hambzaji iyi kuti wakava mudakaro kujijisa vana vo capupu pa makore ese. Vakananga kuti vana vaya vaiita kuti cikora cive ndau yakanaka. Hambzaji Birgit vakavabvunja kudari: “Vana vedu vanojijiswa kutevera ndhungamiriro ja Mwari ngo pamusoro po mufambiro, jinobatanija kukuja no kureremeja vajijisi.” Mujijisi umweni wakatonanga kuti kudari vana vese vaidari inga vana vo Zvapupu, zvaizoreruka kuvajijisa. Vajijisi ava vakava no mavonero akanaka ngo pamusoro po Zvapupu zvokuti no padarika masumana manganani, umwe wavo wakatoenda ku gungano ro mutundhu.

18, 19. Zvicinyi zvaticikadikani kukanganwa patinokuja vakuru?

 ¹⁸ Zviambi zvinowanika mu Soko ra Mwari zvingatibesera kuzwisisa kuti tingakujisa kudini vakuru vo ungano. (Verenganyi Vaheberi 13:7, 17.) Itusu tingakwanisa zve tinodikana kuvasimba ngo basa guru ravanoiita. Patinoteverera ndhungamiriro javanotipa, zvinovabesera kuti vashande vakadakara. Bhaibheri rinonanga kuti tinodikanazve kutevejera gonda ravo. Asi izvi azvidi kureva kuti tinodikana kueja kutevejera kamare masimirire, mavereketere, majijisire o mukuru ari wese anozivikanwa. Tikavatevejera kudea, zvinozoita inga kuti tiri kutevera vandhu kusiyapo kutevera Kristu. Atibviri kukanganwa kuti vakuru i vandhu vacizivi kukwana inga ndisuvo.

¹⁹ Tikakuja no kureremeja vakuru totama kuvataja inga vandhu vo nduma, izvi zvicazovabesa. Kuitisa kudini? Zvicazobesera kuti varambe vecijidodokesa vacikarangariri kuti ivona ngovakanaka maningi kupinda vamweni zve zvavanoita nguva jese ngozvakarungama.

20. Tinobeseka kudini kudari tikakuja vamweni?

²⁰ Kukuja vamweni kunotibesera kutiza umbau no kuramba tiri vanojidodokesa patinotajwa ngo maitiro akasiyana. Kunoshandazve inga jiviriro kuti titame kukhugunyika kudari ari wese watinoreremeja akaita zviro zvaticikadi. Besero rimweni ratinowana, ngo ro kuenderera mberi takabatana no sangano ra Jehovha. Sangano aripi ari wese rukujo hunopindirija mudida, pikija ave mutendi kana kuti haiwa.

21. Ngo rapi besero rakanakisisa ratinozowana ngo kukuja vamweni?

²¹ Besero rakanakisisa ratinowana ngo kukuja vamweni, ngo ro kudakajisa Mwari. Tinozonga teciita kuda kwake, toramba takagondeka kwaari. Jehovha anozokwanisa kudavira Sathana, wakanangaya kuti akuna anokwanisa kuva wakagondeka. (Mazwi Akangwara 27:11) Mu nyika, vazinji avazwisisi kuti zvinorevenyi kupa rukujo vamweni ngo maitiro akarungama. Tino mudakaro ngo kuziva kupa rukujo mukuzwirana no mavonero a Jehovha!