NDINOCEUKIJA pa amwe mangwanani aitondhora, ko makore akawanda akapinda ku Brookingi, ku Dhakota dhu Suri, ku Estadhos Unidhos. Ndaikwanisa kuzwa kuti ndaizotondhorehwa mbai-mbai. Ndainga ndiri mu nyumba inodirihwa zvo kuha no kugara zvinyama, yainga icina cinojiisa, ndainga pamwepo no cikwata co vandhu, tecitetemera ngo mbhepo. Tainga pamberi po zibhokiso rakakura raizara ngo kumwa yaitondhora! Imanyi ndimuverengere padoko zvo upenyu hwangu, kuti muzwisise ngenyi tainga pondhopo.

Ndakabahwa pa njiku 7 ya Nyahwiriri wo 1936. Vabari vangu vainga no vana varongomuna zve inini ndainga cigumaura. Taigara mu ndau imweni doko yairimwa mbeu no kurera zvinyama, ku Dhakota dhu Suri. Kurima no kurera zvinyama zvaitora divi rinosisira ro mbhuri yedu, asi acicainga ciro caisisira maningi kamare. Vabari vangu vakabhabhatijwa inga Zvapupu zva Jehovha mu gore ro 1934. Vakapira upenyu hwavo kuna Jehovha, ngo iyo ndava kuita kuda kwake cainga ciro cinosisira maningi kwavari. Babangu, vaCrerense, vaishanda inga mushandiri wo ungano (anodanijwa nyamasi uno kuti murongi wo dare ro vakuru), pa ungano yedu doko yo ku Konde, ku Dhakota dhu Suri. Pa kufamba ko nguva basa iri rakazoitwa ndi babamudoko wangu va Alfred.

Mbhuri yedu yaienda ku musongano jo ungano zve yaicumaera muzi ngo muzi yecibvunja vandhu ngo pamusoro po vetero yo Bhaibheri yo kumbeji inodakajisa. Muezaniso wo vabari vangu no rovejo yavakandipa yakandibesera kuti ndide Jehovha. Inini na Hambziji yangu Dorothy, takazova vacumaeri vo Umambo patainga no makore matandhatu. Mu gore ro 1943, ndakanghwina pa Cikora co Mushando wo Umwari, pacainga cecibva kutanga kamare.

 Magungano o mutundhu no o ndharaundha ainga divi rinosisira mu upenyu hwedu. Ndinoceukija gungano rimweni rakaitwa mu gore ro 1949, ku Sioux Falls, Dhakota dhu Suri. Pa Gungano rondhoro, Hama Grant Suiter vakaita hurukuro yainga no musoro unoti: “Mugumo Uciri Ndhambo Here?” Ivona vakagogomejera kuti muKristu wese wakajipira, anodikana kushandisa upenyu hwake kuitira kucumaera masoko akanaka o Umambo hwa Mwari. Pasure pazvo, ndakapira upenyu hwangu kuna Jehovha. Ndakabhabhatijwa pa gungano ro ndharaundha rakazotevera, pa njiku 12 ya Cikowe wo 1949. Ndizvona zvakandiitisa kuti ndiwanike pa ndau yaitondhora yandanangaya pa kutanga kamare. Tainga tiri varongomuna tecivetera kubhabhatijwa mu zibhokiso rakaizwa ngo simbi.

Pasure pazvo ndakatema civaringo co kuva piyona. Ndakatanga pa njiku 1 ya Zvita wo 1952, pandainga no 15 o makore o kubahwa. Bhaibheri rinonanga kuti “ndiani anofamba no vazivi, anoita muzivi,” ngo kudaro pa ukama hwangu, ndaitendenejwa ngo vandhu vano uzivi kana ungwaru vaibesera civaringo cangu kuva piyona. (Mazwi Akangwara 13:20) Kazinji ndaicumaera na babamukuru wangu, va Julius, vainga no 60 o makore o kubahwa. Pikija ivona vainga musharuka maningi kamare kupinda inini, taidakara maningi tese mu basa ro kucumaera. Ndakajijira zvizinji na ivona zve no uzivi hwavakawana mu upenyu hwavo. Tevere hambzaji yangu Dorothy, wakavavo piyona.

Pandainga ndiciri muhaja, vabari vangu vaikoka vavonereri vo ndharaundha no vakaji vavo veciviya kogara pa muzi pedu. Vamweni vakona vakava Jesse na Lynn Cantwell. Varovorani avo vakandibesera maningi. Ivona vaindikorondha ushoni zve vaindivangisa. Pavaifambira ungano jo mu phedo, nguva jimweni vaindikoka kuti ndibude navo mu basa ro mu munda. Ndaidakajihwadi kuva pamwepo naivona! Ndakava no cido cokubatikana mu basa ra Jehovha inga ndivona zve kuva piyona.

Pasure pazvo, muvonereri wo ndharaundha wedu wakava Bud Miller. Iyena no mukaji wake Joan, pavakabvacira ungano yedu ndainga no 18 o makore o kubahwa. Mu nguva yondhoyo ndaidikana kwenda kosongana no cikwata caironga vandhu kuti vaende ku hondo. Cikwata ici caida kuti ndiite basa randaivona kuti raihwisana no mupango wa Jesu unonanga kuti tinodikana kugara ticina kotakapeamira mu shwiro jo zvo matongehwe o nyika. Asi ndaida kucumaera  masoko akana o Umambo. (Johani 15:19) Ngo kudaro, ndakakumbira kuti vandivone inga mushandiri wo ciara.

Ndakadara maningi Hama Miller pavakandibvunja kuti vaizoenda na inini ku cikwata co vairongaya vandhu kuti vaende ku hondo. Ivona vainga mundhu anoseka-seka maningi, ngo kudaro vandhu vaivakhwederera maningi. Vainasa kuziva Matahwa. Kuva pamwepo na ivona kwakandipa maningi cicunge! Mu cirimo co gore ro 1954, pa musongano wotakaita no cikwata co zvo hondo ciyana, icona cakatendera kuti inini ndivoniwe inga mushandiri wo ciara. Kubvira pondhopo, ndainga ndasujunuka kuti ndiengejere basa rangu kuna Jehovha.

Nopapera cimukuvo, ndakakokwa kooshandira ku Bheteri, ku ndau yakazodanijwaya Fazenda da Torre de Vigia, ku Staten Island, Novha Yorki. Ndakashandireyo makore matatu. Ndakaziva zvakawanda maningi kondhoyo ngo kuti ndaishanda no hama no hambzaji zinji jainga no ungwaru.

Ku fazenda yo Staten Island, ndikona kwaiwanikaya misora WBBR. Iwona wakashandiswa ngo Zvapupu zva Jehovha kubvira mugore ro 1924 mbhera 1957. Kodhono kwaishanda vandhu 15 kana 20 vo mbhuri yo Bheteri. Uzinji hwedu tainga majaha zve aticaiziva zvakawanda. Asi hama imwe yakura yo kuzojwa, yaidanijwa, Eldon Woodworth, yaishanda na itusu. Iyona yaidari inga baba kwatiri zve yakajijisa zvakawanda. Nguva jimweni patainesana umwe no umweni, Hama Woodworth, vainanga kudari: ‘Zvokadi zvinoshamisa kuvona zviri kuita Tenji no vandhu vovanoshandisa.’

Hama Frederick W. Franz vaingazve na itusu zve vaibesera tese. Vainga musharuka ano ungwaru zve vainasavo kuziva Matahwa. Ivona vaibatikana ngo umwe nga umwe wedu. Vaitibikira ndi Hama Harry Peterson. Tairerukihwa ngo kuvadanija ngo zina ravo ro kugumisira, kusiyapo kushandisa zina ravo kamare, ro kuti Papargyropoulos. Ivona vaingavo umwe wo vo kuzojwa, zve vaidisisa maningi kucumaera. Hama Peterson vaiita ushoni basa ravo pa Bheteri, avacairerusa basa ro kucumaera. Vaikwanisa kukovanisa mazana no mazana o marevhista mweji ngo mweji. Ivona vainasavo kuziva Matahwa zve vaidavira mubvunjo jakawanda jataivaita.

Ku fazenda, tainasirira mucero no zvirimwa zvimweni (zvakadari inga matimati, senora) tecizvidira mu mathini. Mutengo unokhwedera kuita 45.000 zvo  mathini aizajwa pa gore kuitira mbhuri yo Bheteri. Ndakashanda na hambzaji Etta Huth, hambzaji imweni yainga no uzivi maningi. Iyona ngoyainasirira mujiyo jaishandiswa kuitira kunasirira mucero jiyana pomwe no zvirimwa. Hambzaji jo mundharaundhemo jaiviya kozoshanda nesu, zve hambzaji Etta, ngavaironga basa rajo. Pikija hambzaji Etta vaiziva ushoni basa ro kudira zviro mu mathini, ivona vaireremeja hama jaitungamirira fazenda. Vakagaja muezaniso wakanaka kwatiri tese.

Angela Romano wainga umwe wo vasikane vaiviya kuzobesera basa ku fazenda. Hambzaji Etta vainga vakamubesera paakanghwina mu cokwadi. Inini na Angie takacadha mu mweji wa Nyahwiriri wo 1958, zve tiri kushandira Jehovha no mudakaro ko makore 58. Pa makore ese aya, kugondeka ka Angela kuna Jehovha kuri kuvangisa mucadho wedu. Iyena ano ungwaru, zve ndinotomuthemba kamare azvinenyi patinonga tiri pa cineso cakadini.

Hama pajakatengesa misora WBBR ku Staten Island mu 1957, ndakashandira ku Bheteri ro Brookrini ko nguva shomani. Pasure po mucadho, takabuda pa Bheteri. Ko makore matatu, takashanda inga mapiyona ku Staten Island. Ndakatoguma pa kushandira WPOW, yainga yo veno vapsa vo misora.

Inini na Angie takaramba tino upenyu hwakareruka kuti tive vakasujunuka kuti tiende kooshandira kwaidiwa vacumaeri. Inga muviyo, mu gore ro 1961, takadavira mukoka wo kooshanda inga mapiyona anosisira ku Falls City, Nebraska. Asi, nguva shomani notaakondhoyo, takakokwa kwenda ku South Lansing, Novha Yorki, kuti tiende ku Cikora co Mushando wo Umambo, kotaizopeja mweji. Takadakajihwa maningi ngo rovejo yatakaashireyo zve tairangarira kuti cikapera cikora taizohwirira ku Nabraska. Asi takazokahamara ngo kugajwa kwenda kumweni. Takagajwa kooshanda inga mamisionario ku Khamboja. Ku nyika iyo yakaseja, inowanika ku sudhoeste yo ku Azia, takavona, kuzwa no kuha zviro zvainga zvipsa kwatiri. Zvokadi kamare taida kubvunja vamweni ngo pamusoro po masoko akanaka o Umambo.

Asi pasure pazvo, mugariro wo zvo matongehwe o nyika wakacinja ku Khamboja, zve takacinjwa kwenda ka Kusi ko Vhietiname. Nopapera makore maviri, ndakahwaja maningi, zve zvakatisuruvaja ngo kuti takadikana kuhwirira ku Estadhos Unidhos. Ndakadikana kupeja cimukuvo kuti ndiite nane. Nandaita nane, takatangazve basa ro upiyona.

Mu mweji wa Soka ra Baba wo 1965 takatanga basa ro kufambira ungano. Ko makore 33, Inini na Angie, takashanda mu basa ro kufambira ndharaundha no mutundhu, zve taibesera pa magungano o mutundhu. Ndaidakajihwa maningi ngo kuita basa iri ngo kuti ndaida maningi magungano. Takaita makore manganani, tecibvakacira ungano jo mu Dhorobha ro Novha Yorki no jo ndharaundha jairitendeneja, zve magungano mazinji o ndharaunda iji aiitihwa mu Estadhio Yankee.

Ko makore, inini na Angie takagajwa kuita mabasa mapsa zve anonesa. Mu gore ro 1995, ndakakumbihwa kuti ndijijise Cikora co Rovejo yo Mushando (Escola de Treinamento Ministerial.) Nopapera  makore matatu, takakokwa koshandira ku Bheteri. Painga padarika 40 o makore, zve wainga mudakaro kuhwirirazve pa Bheteri, pandakatangiraya basa rangu ro mu nguva yakazara. Kondhoyo ndakashanda mu Bauhwa ro Basa, zve ndakashandavo inga mujijisi wo zvikora zvizinji zvo umwari. Mu gore ro 2007, Mukhumbi Unotonga wakaumba Bauhwa ro Zvikora zvo Umwari (Departamento de Escolas Teocráticas) kuti rivonerere zvikora zvese zvinoitwa pa Bheteri, zve nopapera makore manganani ndakagajwa inga muvonereri wo bauhwa iri.

Mu makore aperari, kwakaizwa cinjo zinji mu zvikora zvo pa Bheteri. Mu gore ro 2008 kwakatangiswa Cikora kuitira Vakuru vo Ungano. Zve papera makore maviri, vakuru vanodarika mutengo wo 12.000 vakajija cikora ici ku Patterson no ku Bheteri ro Brookrini. Cikora ici ciri kuizwa mbhera wari mu ndau jimweni. Mu gore ro 2010, zina ro Cikora co Rovejo yo Mushando rakacinjwa kuva Cikora co Bhaibheri co Hama Jicizivi Kurovora, perepo kwakaumbwa cikora cipsa, cinodanijwa Cikora co Bhaibheri co MaKristu Akarovorana.

Mu mweji wa Cikumiyana wo 2014, zvikora zviviri izvi zvakabatanijwa kuva Cikora Co Vavhangeri vo Umambo. Vanojija cikora ici vangava varovorani, hama jicizivi kurovora zve hambzaji jicizivi kurovohwa. Kutenderera pasi pese, vazinji vakadakajihwa maningi ngo kuzwa kuti cikora ici caizoizwavo mu nyika mavo kamare. Zvinodakajisavo kuziva kuti vazinji vacazovavo no mukana wo kujija zvikora izvi. Zve zvinodakajisa kuziva kuti vazinji vakaita cinjo mu upenyu hwavo kuti vaashirevo rovejo iyi.

Pandinorangarira ngo pamusoro po upenyu hwangu, kubvira ndicito ndabhabhatijwa mu bhokiso ro simbi riyana rainga no kumwa yaitondhora, mbhera nyamasi, ndinobonga Jehovha ngo vandhu vo ungawaru vandakaziva. Vakandibesera kuguma pa kumuziva no kukwanisa kumushandira. Vamweni vainga vadoko kupinda inini zve vamweni vainga vasharuka kupinda inini. Vazinji vainga vo magariro akasiyana no angu. Asi ndaikwanisa kuvona ngo zviito no murangariro javo kuti vaidisisa kamare Jehovha. Ndinobongazve ngo kuti pakati po vandhu va Jehovha ndakawana shamwari jakawanda maningi jino ungwaru jandingajija ndijona.