1-3. Zvinorevenyi kushandira Jehovha ngo ‘mwoyo wese’? Ipanyi muezaniso.

TESE atizivi kukwana zve tinoposa. Tinobonga maningi Jehovha ngokuti wakativiisira muripo zve wakanasiririka kuti atiregerere. Kudari tinojidodokesa no kukhauya, tinomukumbira kuti atiregerere. Tinova no gwinyiso rokuti Jehovha aatitaji “ngokuteveja kuposa kwedu.” (Nduyo 103:10) Asi tinodikana ‘kumuxandira ngo mwoyo wedu wese.’ (1 Kronike 28:9) Tingazviitisa kudini zvecivoneka kuti atizivi kukwana?

² Tingabesereka ngo kuezanisa upenyu hwa Mambo Aza no hwa Mambo Amazia. Majimambo maviri aya akaita zviro zvaushoni, asi aitoposavo ngokuti aacaikwana. Asi Bhaibheri rinonanga kuti “mwoyo wa Asa wakadakajisa . . . Mwari mu kurarama kwake kwese.” (2 Kronike 15:16, 17; 25:1, 2; Mazwi Akangwara 17:3) Iyena waieja-eja mukuvo  wese kuti adakajise Jehovha zve waizvipira kwaari ‘ngo mwoyo wake wese.’ (1 Kronike 28:9) Asi, Amazia aacaishandira Jehovha ngo ‘mwoyo wake wese.’ Naapera kunyisa vavengi va Mwari, wakaviisa zvithombi zvavo, wotanga kuzvinamata.—2 Kronike 25:11-16.

³ Mundhu anoshandira Jehovha ngo ‘mwoyo wake wese’ anodisisa Jehovha zve anoda kumushandira mbhera narini. Mu Bhaibheri, gama rokuti “mwoyo” kazinji rinonangira zvotiri ngo mukati. Unobatanija marangaririro edu, zvotinoda, zvotinodakarira kuita mu upenyu hwedu, zve zvotinoita, tinozviita ngo thangwe rapi. Pikija atizivi kukwana, tinokwanisa kunamata Jehovha ngo mwoyo wese. Tinomushandira ngokuti tinoda kumushandira kamare, kuciripi ngokuti tinovangirijwa kumushandira kana ngokuti tazviroveja.—2 Kronike 19:9.

4. Ticada kujijenyi wari?

⁴ Tinozwisisa zvakanasa kujeka kuti zvinorevenyi kushandira Mwari ngo mwoyo wese, ngo kujija upenyu hwa Aza no hwo majimambo amweni matatu akagondeka, akatonga mu Judha. Majimambo aya ainga Jozafati, Ezekia, na Josia. Pikija majimambo marongomuna aya akaposa, asi aidakajisa Jehovha. Iyena wakaavona kuti aimushandira ngo mwoyo wese. Waro, ngenyi Mwari waimavona ngo njira iyo, zve tingamatevejeresa kudini?

5. Aza wakaitenyi paakava mambo?

⁵ Aza wakava mambo wo citatu wo Judha, Iziraeri no yapera kukashwa kuita umambo huviri, hwo Iziraeri no hwo Judha. Aza paakava mambo, wakatema civaringo co kupeja kunamata ko kunyepa no uhure unonyangajisa mu umambo hwake. Iyena wakaphwanya-phwanya zvithombi zvainamatiwa ngo vandhu no kugogomera mahure mu temberi. Aza wakatobvisa mbiyake pa cigaro co kuva ‘vahosi, ngokuti vakaita . . . cithombe’ cinonyangajisa. (1 Majimambo 15:11-13) Aza wakavangisazve vandhu “kuti vapsake . . . Mwari” no kuzwira “mupango no matongero.” Aza wakaita zvese zvaaikwanisa kuti abesere vamweni kunamata Jehovha.—2 Kronike 14:3.

6. Aza wakaitenyi vaEtiopia povakahwisa Judha?

⁶ Mukati mo gumi ro makore o kutanga kwa Aza, umambo hwo Judha ahuzivi kuita hondo. VaEtiopia vakazoza kohwisa Judha no gumi ro mazana o zviuru zvo masoca no mazana matatu o ngoro. (2 Kronike 13:23; 14:5, 8, 9) Aza wakaitenyi? Iyena aacaikana-kana kuti Jehovha waizobesera vandhu vake. Ngokudaro, wakaita mukumbiro kuti Jehovha avabesere kuwina pa hondo iyo. (Verenganyi 2 Kronike 14:10.) Pa kufamba ko  nguva, Jehovha wakabesera vandhu vake kuti vanyise vavengi vavo, pikija majimambo avo ainga acizivi kugondeka kwaari. Wakaita izvo kuitira kutatija kuti wainga Mwari wokadi-kadi. (1 Majimambo 20:13, 26-30) Asi pa mukuvo uu, Jehovha wakabesera vandhu vake ngokuti Aza waimuthemba. Wakadavira mukumbiro wa Aza zve ivona vakawina pa hondo iyi. (2 Kronike 14:11, 12) Aza wakazoposa zvakakura paakakumbira besero mambo wo Asiria, kuciripi Jehovha. (1 Majimambo 15:16-22) Pikija zvakadaro, Jehovha wakakwanisa kuvona kuti Aza waimuda. “Mwoyo wese wa Asa wakatevera” Jehovha “mu kurarama kwake kwese.” Tingatevejeresa kudini muezaniso wakanaka wa Aza?—1 Majimambo 15:14.

7, 8. Mungatevejeresa kudini Aza?

⁷ Tinozvizivisa kudini kuti tinoda Jehovha ngo mwoyo wese kana haiwa? Tingazvibvunjisa kudari: ‘Ndinozozwira Jehovha pozvinozonesa kumuzwira here? Ndakatemadi civaringo co kuita kuti ungano igare yakacena here?’ Rangariranyi kuti kucunga kwakadini kwaida Aza kuti abvise mbiyake pa kuva vahosi. Pa kufamba ko nguva, mungadavo kucunga kwaezana no kwa Aza. Inga muezaniso, mungaitenyi kudari umwe wo pambhuri yenyu, kana shamwari yenyu yo pamwoyo yakashaisha, wojingwa mu ungano? Maizotema civarngo co kutama kushamwarijana nae here? Mwoyo wenyu unozomundundira kuti muitenyi?

⁸ Inga ndi Aza, nguva jimweni tingajizwa inga kuti vese vari kutizonda. Kangaije vadoni vo kucikora kana vajijisi vangamuseka ngokuti muri umwe wo Zvapupu zva Jehovha. Kana vandhu vo kubasa kwenyu vangarangarira kuti muri rethe ngokuti munobudisa feria kuti muende ku gungano ro ndharaundha kana ngokuti kazinji amushandi kupindirijira nguva jobasa. Pa mugariro jakadari, gondanyi Jehovha inga zvakaita Aza. Itanyi mukumbiro kuna Jehovha, ivanyi makacunga zve rambanyi muciita zvakanaka. Ceujanyi kuti Mwari wakavangisa Aza, zve iyena anozomuvangisavo.

9. Kuti kucumaira kwedu kudakajise Jehovha kunodikana kukwevejehwa ngenyi?

⁹ Aza aacairangarira ngo pamusoro pake basi; iyena waivangisa vandhu “kuti vapsake . . . Mwari.” Itusu tinobeseravo vandhu kuti vanamate Jehovha. Iyena anozvivona potinobhuya no vamweni ngo pamusoro pake. Zve anodakara maningi paanovona kuti tiri kuzviita ngokuti tina rudo nae zve tinokaya-kaya ngo pamusoro po vandhu no kumbeji kwavo.

10, 11. Tingatevejeresa kudini Jozafati?

¹⁰ Jozafati mwana wa Aza “wakatevera mafambiro a baba wake.” (2 Kronike 20:31, 32) Wakazviitisa kudini? Jozafati wakavangisa vandhu kuti varambe vacinamata Jehovha, inga zvakaita babake.  Wakatumira vandhu mu madhorobha o Judha kuti vajijise vandhu vacishandisa “buku ro Mupango wa . . . Mwari.” (2 Kronike 17:7-10) Jozafati waenga mambo “waipsaka . . . Mwari ngo mwoyo wese.”—2 Kronike 22:9.

¹¹ Nyamasi uno, Jehovha anoda kuti vandhu vajijiswe ngo pamusoro pake mu nyika yese, zve tese tinodikana kubesera basa iri. Tina cido co kutora rutivi pa basa iri mweji jese here? Munoda kujijisa Bhaibheri vamweni kuitira kuti vatangevo kunamata Jehovha here? Munoita mukumbiro ngo pamusoro pazvo here? Kudari munovangisira, Jehovha anomubesera kuti mutange jijo yo Bhaibheri. Maizojipira kuti mujije no mundhu pikija zvicidiwa kuti muzviite pa nguva yenyu yo kuzorora here? Mukufanana na Jozafati, wakaeja kubesera vamweni kuti vamusijirezve kushandira kwavo Jehovha, itusu tingaejavo kubesera vaya vacikacaiti basa. Zve vakuru vo ungano vanonasirira kuitira kovhakacira no kubesera vakajingwa vari mu ndima yo ungano yavo, vokuti kangaije vasia zviito zvavo zvakashata.

12, 13. (a) Jozafati wakaitenyi paaithya? (b) Ngenyi tinodikana kutevejera muezaniso wa Jozafati?

¹² Inga ndi babake Aza, Jozafati wakathemba Jehovha pakaviya cikwata co masoca akawandisisa kohwisa Judha. (Verenganyi 2 Kronike 20:2-4.) Iyena waithya zve wakakumbira besero Jehovha. Pa mukumbiro, Jozafati wakananga kuti iyena no vandhu vake, avacaizokwanisa kunyisa vavengi. Wakanangazve kuti ivona vainga avacacizivi cokuita. Jozafati waithemba kamare kuti Jehovha waizovabesera. Iyena wakati: “Majiso edu anoringira komuri.”—2 Kronike 20:12.

¹³ Inga ndi Jozafati, tingatama kuziva co kuita nguva jimweni ngo pamusoro po cineso, zve tingatothya. (2 Kronike 4:8, 9) Asi ceujanyi zvakaita Jozafati. Wakaita mukumbiro kuna Jehovha pambeji po vandhu vese, womubvunja kuti iyena no vandhu, vaijizwa kuti vakaremba maningi. (2 Kronike 20:5) Musoro jo mbhuri, jingatevejera muezaniso wa Jozafati. Kumbiranyi Jehovha kuti amubesere no mbhuri yenyu kuti muhwisane no cineso no kuziva kuti ngozvapi zvomungaita. Mucazwa kupseruka kuita mukumbiro iji mbhuri yenyu icizvizwa. Ivona vanozoziva kuti imwimwi munogonda maningi Jehovha. Iyena wakabesera Jozafati zve acazomubeseravo.

14, 15. Ezekia wakagondesa kudini Mwari ngo mwoyo wese?

¹⁴ Mambo umweni “wakagondeka kuna” Jehovha ndi Ezekia. Iyena wakamugonda pikija babake vakagaja muezaniso wakashata zve vainamata zvithombi. Ezekia wakaparaja “ndau jakakhwira, wophwanya mapuwe akaceneswa, wowisa njiki jakaceneswa, woguragura nyoka yo simbi yakaitwa ndi Mosi,” ngokuti vaIziraeri vaiinamata. Ezekia waida Jehovha ngo mwoyo wake wese. Iyena “wakateveja mupango yaakapuwa Mosi ndi” Jehovha.—2 Majimambo 18:1-6.

¹⁵ Paaitonga Ezekia, cikwata co masoca cina simba co Asiria cakahwisa Judha acithyisijira kuparaja Jerusarema.  Senakeribhe mambo wo Asiria, wakashora Jehovha zve wakaeja kuita kuti Ezekia aende kujietha. Pa mukuvo uwo unothyisa, Ezekia wakanasa kugonda Jehovha zve wakamukumbira besero. Iyena waiziva kuti Mwari ana simba maningi kupinda vaAsiria zve waizoponesa vandhu vake. (Verenganyi Isaia 37:15-20.) Mwari wakadavira mukumbiro wake ngo kutumira ngirozi imwe kuti iuraye 185.000 zvo masoca o Asiria.—Isaia 37:36, 37.

16, 17. Tingatevejeresa kudini Ezekia?

¹⁶ Ezekia wakazohwaja zve waenga woda kufa. Pa mukuvo uwo wo kunesa, iyena wakadeketerera Jehovha kuti aceuje ugondeki hwake zve amubesere. (Verenganyi 2 Majimambo 20:1-3.) Jehovha wakazwa mukumbiro wa Ezekia zve wakamubesera. Nyamasi uno, Bhaibheri rinotibvunja kuti atingaveteri kuti Mwari atirape ngo mushamaiso kana kuengejera upenyu hwedu. Asi inga ndi Ezekia, tinothemba Jehovha kuti atibesere. Tingamubvunja kudari: “Mwari! Ceukijanyi, ndapota, kuti ndakafamba ngo kugondeka, ndeciita bzakarurama pambeji penyu.” Munotenda here kuti Jehovha anozomukorondha mukuvo wese, pikija pomunonga mucihwaja?—Nduyo 41:3.

¹⁷ Tingatevejerazve kudini Ezekia? Kangaije pana ciro ciri cese ciri kuphingaija ushamwari hwedu na Jehovha kana ciri kutitorera nguva yotaizomushandira. Inga muezaniso, vazinji nyamasi uno vanovona vandhu inga zvimwari. Ivona vanoshamaisika ngo vandhu vano nduma no vandhu vamweni vovacikazivi. Vazinji vanopeja nguva yakawanda vaciverenga ngo pamusoro po vandhu avo no kuvona mafoto avo. Kana vanoshandisa zvinofambisa masoko kana mathurusi amweni kuti vabhuye no vandhu ngo mu Interneti. Zvokadi, tingadakarira kushandisa mathurusi aya kuitira kubhuya no ukama hwedu kana no shamwari jedu jo pamwoyo. Asi taizoruza nguva yakawanda mu zvinofambisa masoko. Tingatojikuja kudari vandhu vazinji vakadakarira foto kana masoko otakadira mu Interneti. Kana, tinganyangajwa kudari tikaziva kuti vamweni avacasoti zvotakadira weya mu Interneti. Tina zvotinojija ngo muezaniso wo mupostori Pauro, Akira na Prisira. Munorangarira kuti ivona vaipeja mukuvo njiku jese vaciverenga ciro cimwe na cimwe caiitwa ngo vandhu, maningi-ningi vandhu vacaishandira Jehovha here? Bhaibheri rinonanga kuti Pauro waibatikana maningi ngo “basa ro kutokotesa vangeri basi.” Zve Akira na Prisira vaipeja mukuvo wavo vacicumaira no kudurujira “uxoni gwanja ra Mwari” ku vamweni. (Maitiro o Vapostori 18:4, 5, 26) Tingajibvunjisa kudari: ‘Ndinongwarira kuti nditame kutaja vamweni inga zvimwari here? Ndinongwarira kuti nditame kupeja nguva yakawanda ndiciita zviro zvicikasisiri maningi here?’—Verenganyi VaEfeso 5:15, 16.

18, 19. Tingaitisa kudini inga Josia?

¹⁸ Mambo Josia wakazwiravo mupango ya Jehovha “ngo mwoyo wake wese.” (2 Kronike 34:31) Josia waenga muzukuru-kuruhwe wa Ezekia. Paaenga  muaruki, “wakaamba kupsaka Mwari wa Davidi.” Zve paaenga no 20 o makore, wakatanga kubvisa zvithombi mu Judha. (Verenganyi 2 Kronike 34:1-3.) Josia wakaeja ngo simba kuti adakajise Jehovha kupinda majimambo amweni akatonga mu Judha. Njiku imweni, mupiri mukuru wakawana bhuku ro Mutemo wa Mwari mu temberi. Kangaije iri i bhuku rakatahwa ndi Mosi kamare! Josia paakariverengehwa ngo mutari, wakaziva kuti waidikana kuita zvizinji pa kushandira Jehovha ngo mwoyo wese. Wakavangisazve vamweni kuti vaitevo kudaro. Inga muviyo, vandhu “avazivi kusia . . . Mwari” mu njiku jese jo kupona kwa Josia.—2 Kronike 34:27, 33.

¹⁹ Kudari muri mujaha, mungatevejera Josia no kuguma pa kuziva ushoni Jehovha. Kangaije Josia wakajija ngo kukhauya ka cekuru wake, mambo Manasa, kuti Jehovha ano cido co kuregerera. Mungajijavo ngo vasharuka vari pa mbhuri yenyu no mu ungano menyu. Ivona vangamubvunja ngo pamusoro po zviro zvaushoni zvo vakaitihwa ndi Jehovha. Zve, ceujanyi kuti Josia wakajizwa kudini paakaziva zvinonanga Matahwa. Iyena waenga no cidaka-daka co kudakajisa Jehovha zve wakacinja ngo kukasika. Ngo kuverenga Matahwa, mungajizwa kuti manasa kutema civaringo co kuzwira Jehovha. Inga muviyo, ushamwari hwenyu naye hunozovanga zve munozozwa kudakara. Perepo munozoda kubvunja vamweni ngo pamusoro pa Jehovha. (Verenganyi 2 Kronike 34:18, 19.) Pomunojija Bhaibheri, mungaziva kuti kuna njira jo mungaitisa ndijona nane kushandira kwenyu Mwari. Mukajiziva, ejanyi kuita cinjo iji mbhera panoperera simba renyu, inga zvakaita Josia.

20, 21. (a) Icinyi caenga no majimambo marongomuna aya, caiita kuti aezane? (b) Ticazojijenyi pa musoro unotevera?

²⁰ Tingajijenyi ngo muezaniso jo majimambo marongomuna aya, akashandira Jehovha ngo mwoyo wese? Vanarume ava vakatema civaringo co kudakajisa Jehovha no kumushandira upenyu hwavo hwese. Povakahwiswa ngo vavengi vano simba, ivona vakathemba Jehovha. Cinosisira maningi, vakashandira Jehovha ngokuti vaimuda.

²¹ Pikija majimambo marongomuna aya acaikwana zve aiposa, Jehovha waidakajihwa ndiona. Iyena wakavona zviri mu mwoyo mao zve iyena waiziva kuti iwona ainasa kumuda. Itusuvo atizivi kukwana zve tinoposa. Asi Jehovha anozodakara ndisu paanotivona ticimushandira ngo mwoyo wese. Pa musoro unotevera, ticazovona zvotingajija ngo zvokuposa ko majimambo aya.