1. Inga zvinosananguhwa pana VaEfeso 6:10-13, Shanduro yeNyika Itsva, zvicinyi zvinovonesa kuti Jehovha anoneseka ngo vashandiri vake? Durujiranyi.

JEHOVHA anotida maningi zve anoneseka ndisu, ngo iyo ndava, anotibesera kuti tihwisane no vavengi vedu. Vavengi vondhovo, ndi Sathana no madhimoni. Jehovha anotingwaja ngo pamusoro pavo zve anotipa zvatinoda kuti titame kucengejwa. (Verenganyi VaEfeso 6:10-13, Shanduro yeNyika Itsva.) Pakuhwisana no madhimoni, tinobudirira basi, kudari tikatendera besero ra Jehovha no kumuthemba. Tinodikana kuva no murangariro wo mupostori Pauro. Iyena wakatara kudari: “Mwari, kuti ecitirhwira, ndiani anozotinyisa?”—VaRoma 8:31.

2. Zvicinyi zvaticajija pa musoro uno?

² Isusu, maKristu o cokwadi, atibatikani maningi ngo kubhuya ngo pamusoro pa Sathana no madhimoni. Tinobatikana ngo kujijira ngo pamusoro pa Jehovha no kumushandira. (Nduyo 25:5) Kunyange zvakadaro, tinodikana kuziva njira jaanoshandisa Sathana kuitira kucengeja vandhu. Ngenyi? Kuziva njira jaanoshandisa, zvinotibesera kuti titame kucengejwa ndiyena. (2 VaKorinto 2:11) Pa musoro uno, ticazosanangura njira jaanoshandisa Sathana kuti acengeje vandhu. Ticazosanangurazve zvatingaita kuti tibudirire pakuhwisana naye.

3-4. (a) Zvomujimu icinyi? (b) Kupsakisisa kumweni kunonangenyi ngo pamusoro po vandhu vanotenda zvomujimu?

³ Njira inoshandisa maningi Sathana no madhimoni kuitira kucengeja vandhu, zvomujimu. Vaya vanoita zvomujimu,  vanotenda kuti vanokwanisa kuziva zviro zvakafishika. Inga muezaniso, vandhu vamweni vanonanga kuti vanokwanisa kuziva zvo kumbeji vecishandisa kufembera kana ndhondho. Vamweni vanonanga kuti vanokwanisa kubhuya no vakafa. Vamweni vanoshandisa uroi kana zvo masaramuso kuitira kueja kuroya umweni. *

⁴ Nyamasi uno, vandhu vazinji vanotenda simba ro zvomujimu. Kupsakisisa kumweni kwakaitwa munyika jinokwana kuita 18 jo ku Amerika Ratina no Karibhe, kwakavonesa kuti pa vandhu vatatu vaibvunjiswa, umwe wakona waitenda zvo masaramuso, uroi zve kuti zvinokwanisika kubhuya no vandhu vakafa. Kupsakisisa kumwenizve, kwakaitwa mu nyika jinokwana kuita 18 jo mu Afrika. Mu nyika jondhojo, pa vandhu vakabvunjiswa, vazinji vakadavira kuti vanotenda zvo uroi. Zvokadi kamare, azvinenyi tinogara kwapi, tinodikana kunasa kungwarira ngo pamusoro po zvomujimu. Pa zvese izvi, Sathana anoda kucengeja vandhu pa “nyika yese yo pasi pano.”— Apokalipsi 12:9.

5. Jehovha anovona kudini ngo pamusoro po zvomujimu?

⁵ Jehovha ndi ‘Mwari wo cokwadi.’ (Nduyo 31:5, Baiberi Mazwi Akacena Mwari) Waro Jehovha anozwa kudini ngo pamusoro po zvomujimu? Iyena anokunyenya! Jehovha wakananga kudari kuno vaIziraeri: “Pakati pako kucazowanika ariwese anopisa mwana wake worume nokuti wokaji; muringiji nokuti mufemberi, beze nokuti nyamusoro, muiti wo masaramuso, mubvunjisi wo vanyakufa, mudaniji wo vanyakufa. Ngokuti ndiani anoita ibzi anonyangajisa Tenji Mwari.” (Deuteronòmio 18:10-12) MaKristu aadikani kuzwira mutemo wakapuwari vaIziraeri ndi Jehovha. Asi, tinoziva kuti mazwiro ake ngo pamusoro po zvomujimu aazivi kucinja.—Malakia 3:6.

6. (a) Sathana anoshandisa kudini zvomujimu kuitira kucengeja vandhu? (b) Mukuzwirana no Mucumaeri 9:5, ngocapi cokwadi ngo pamusoro po mugariro wo vakafa?

⁶ Jehovha anotingwaja ngo pamusoro po zvomujimu ngokuti anoziva kuti Sathana anozvishandisa kuitira kukhuvaza vandhu. Sathana anoshandisa zvomujimu kuitira kukhwijirija manyepo, kubatanijavo manyepo o kuti vakafa vari kupona ku ndau imweni. (Verenganyi Mucumaeri 9:5.) Sathana anoshandisazve zvomujimu kuitira kuti vandhu vathye no kuvaitisa kuti vagare ndhambo na Jehovha. Caanoda kamare ngo co kuti vandhu vanoita zvomujimu vathembe madhimoni kusiyapo kuthemba Jehovha.

7. Jehovha anotibvunjenyi?

⁷ Inga zvaperari kunangwa, Jehovha anotibvunja kuti tinodikana kuitenyi kuti titame kucengejwa ndi Sathana no madhimoni. Ngativone zviro zvinganani zvingatibesera kuti tirambe takavanga pa kuhwisana kwedu na Sathana no madhimoni.

8. (a) Ngo yapi njira huru ingatibesera kuhwisana no madhimoni? (b) Kuitisa kudini Nduyo 146:4 inokhombija pambhene manyepo a Sathana ngo pamusoro po vakafa

⁸ Verenganyi Soko ra Mwari no kurangarijisisa ngo pamusoro paro. Iyi i njira huru ingatibesera kuti tihwisane no manyepo anomusijihwa ngo madhimoni. Soko ra Mwari, rakadari inga banga rakapita kana kupinja, irona ringakwanisa kunyisa manyepo  a Sathana no kukhombija kuti cokwadi ngo capi. (VaEfeso 6:17) Inga muezaniso, Bhaibheri rinokhombija kuti vakafa avakwanisi kubhuya no vari penye. (Verenganyi Nduyo 146:4.) Irona rinotingwajazve kuti mundhu umwe anokwanisa kuziva zvo kumbeji ndi Jehovha. (Isaia 45:21; 46:10) Ngo iyo ndava, tinodikana kuverenga Bhaibheri dhiya jese no kurirangarijisisa, tikadaro tinozokwanisa kunyenya manyepo anonangwa ngo madhimoni.

9. Ngozvapi zviro zvimweni zvinobatana no zvomadhimoni?

⁹ Mucanghwinira mu ciri cese cinobatana no zvomadhimoni. MaKristu o cokwadi aadikani kunghwinira mu zviri zvese zvomadhimoni. Inga muezaniso, atidikani kwenda ku nyamusoro nee kueja kuita ciri cese kuti tibhuye no vandhu vakafa. Inga zvakabhuiwa pa musoro waperari, itusu atinghwiniri mu zvirovejeso zviri zvese zvo njaumba zvakabatana no zvitendwa zvo kuti vandhu vakafa vanoramba vecipona ku ndau imweni. Cimwenizve atishandisi ndhondho nee ciro cimweni kuitira kufembera zvo kumbeji kwedu. (Isaia 8:19) Zvirovejeso zvakadari inga izvi, zvinokhuvaza maningi ngokuti zvinotiita kuti tibatane kamare na Sathana no madhimoni.

10-11. (a) MaKristu amweni o ku Efeso akaitenyi poakajija cokwadi? (b) Mukuzwirana no 1 VaKorinto 10:21, ngenyi tinodikana kutevejera muezaniso wo maKristu o muzana ro kutanga zve tingazviitisa kudini?

¹⁰ Siyanyi zvese zvakabatana no zvomadhimoni. Muzana ro kutanga ro makore, vandhu vamweni vo ku dhorobha ro Efeso vainga vabatana maningi no zvomujimu. Asi povakajija Bhaibheri, ivona vakaita zviro zvinokahamarisa maningi. Bhaibheri rinonanga kudari: “Vazinji vainga varingiji vakazisa mabuku avo no kumapisa pa nyasi po vese.” (Maitiro o Vapostori 19:19) Vandhu ava vaida kamare kuhwisana no madhimoni. Mabhuku o masaramuso ovainga nawo akatengwa ngo mare yakawanda maningi. Asi kusiyapo kumapa vandhu vamweni kana kutoeja kumatengesa,  ivona vakamapisa. Kuna ivona, kudakajisa Jehovha kwaisisira maningi kupinda kuruza mare yo vakatenga ndiyona mabhuku ayani.

¹¹ Tingatevejeresa kudini muezaniso wo maKristu o muzana ro kutanga ro makore? Kudari tino ciri cese cakabatana no zvomujimu zvakadari inga ndhimu kana tambo kuitira kujivirira madhimoni, zviri nane kusiyana nazvo.—Verenganyi 1 VaKorinto 10:21.

12. Mubvunjo japi jatinodikana kujiita ngo pamusoro po mabungaijo atinokheta?

¹² Nasanyi kukheta mabungaijo enyu. Jibvunjisenyi kudari: ‘Ndinoanja kuverenga mabhuku no marevhista kana zviri zvese mu interneti zvinobhuya ngo zvomujimu here? Waro, ndumbo jandinozwa, firimi no mavhidhiyo gemi andinovona akadini? Kureva kuti iwona ano ciri cese cakabatana no zvomujimu here? Iwona anokhombija zviro zvakadari inga vandhu vanopsipsina ngazi yo vamweni kana vandhu vanoha vamweni here? Ivona vanoita zviro zvo masaramuso, uroi kuti zvivoneke inga mabungaijo anokhuvaza here?’ Zvokadi kamare, azvirevi kuti mabungaijo ese kubatanija no o kuverenga shitoria jo zvinyama akabatana no zvomujimu. Ngo kudaro, mungada kukheta mabungaijo, sananyi aya o kuti aanyangaji Jehovha. Tinodikana kuita zvese zvatinokwanisa kuti tive ‘no hana yakacena pamberi pa Mwari.’—Maitiro o Vapostori 24:16. *

13. Zvicinyi zvoticikadikani kuita?

¹³ Mucadogara muciverenga shitoria ngo pamusoro po madhimoni. Pa shwiro iyi, tinoda kutevejera muezaniso wakagajwa ndi Jesu. (1 Pedru 2:21) Acito aviya pasi pano,  Jesu waipona kumatenga zve waiziva zviro zvizinji ngo pamusoro pa Sathana no madhimoni. Asi, iyena aacaiverenga shitoria jaiitwa ngo madhimoni. Jesu waida kubhuya no vandhu ngo pamusoro pa Jehovha, haiwa kugara ecindhandhanisa manyepo ngo pamusoro pa Sathana. Tingatevejera Jesu ngo kutama kundhandhanisa zviro zvinonga zvaitwa ngo madhimoni. Kusiyapo zvondhozvo, tinokhombija ngo magama edu kuti ‘mwoyo wedu unokahamara ngo zviro zvakanaka,’ kuda kureva ngo pamusoro po cokwadi.—Nduyo 45:1, Shanduro yeNyika Itsva.

14-15. (a) Ngenyi atidikani kuthya madhimoni? (b) Ngocapi ciro cimwe cinokhombija kuti Jehovha anongwarira vandhu vake?

¹⁴ Mucathya madhimoni. Mu nyika ino icikazivi kukwana, zviro zvakashata zvingatiitikira. Zvakadari inga ngozi, kuhwaja pomwe no kufihwa. Asi, atidikani kurangarira kuti madhimoni ngo anoitisa zviro zvakadari. Bhaibheri rinosanangura kuti “bzakanaka no zvakaxata abzikheti mundhu.” (Mucumaeri 9:11) Jehovha wakakhombija kare kuti ano simba guru kupinda madhimoni. Inga muezaniso, Jehovha aazivi kutendera kuti Sathana auraye Jobe. (Jobe 2:6) Mu njiku ja Mosi, Jehovha wakakhombija kuti wainga no simba kupinda vaiti vo masaramuso vo ku Ejipita. (Exodo 8:18; 9:11) Jehovha wakapavo Jesu, simba ro kugogomera Sathana no madhimoni mugore kuza pasi pano. Kumbeji kwatiri kwendari, iwona aazokwanisi kukhuvaza ari wese ngokuti anonga ari mu rindi guru.—Apokalipsi 12:9; 20:2, 3.

¹⁵ Nyamasi uno, tino zviro zvizinji zvinokhombija kuti Jehovha anongwarira vandhu vake. Vonanyi basi: Itusu tinocumaera no kujijisa cokwadi mu nyika yese. (Mateu 28:19, 20) Inga muviyo, basa iri rinobvisa pambhene zviro zvese zvakashata zvinoitwa ndi Dhiabhu. Zvokadi kamare, naaikwanisa, Sathana waizoeja kuita ciri cese kuti arikamise, asi aakwanisi. Ngo iyo ndava, atidikani kuthya madhimoni. Tinozviziva kuti, “majiso a Tenji Mwari, anovona nyika yese, kuti avangise vaya vanomugonda ngo mwoyo yavo yese.” (2 Kronike 16:9) Kudari tikaramba takagondeka kuna Jehovha, madhimoni aazokwanisi kutikhuvaza.

16-17. Ipanyi muezaniso unokhombija kuti kutama kubesera madhimoni kunoda cicunge.

¹⁶ Kutama kubesera madhimoni kunoda cicunge, maningi-ningi paya po kuti shamwari no ukama avazwisisi zvatinotenda. Asi, Jehovha anokomborera cicunge cakadaro. Vonanyi muezaniso wo imwe hambzaji inodanwa Erica, inogara Gana. Poyainga no 21 o makore, iyona yakatenda kujija Bhaibheri. Asi baba wayo vaiita zvo masaramuso, ngo iyo ndava yaivetehwa kuti iwanike pa zvimwe zvirovejeso zvomujimu, ngo kuha nyama yainga yapihwa ku zvimwari zva baba wayo. Hambzaji Erica povakaramba, ukama hwayo wakazvivona inga cituko ku zvimwari zvavo. Ivona vaitenda kuti zvimwari izvi, zvaizovatambuja ngo ndhendha mu njira jakasiyana-siyana.

¹⁷ Ukama hwa hambzaji Erica wakaeja kuivangirija kuti inghwinire mu zvirovejeso zvondhozvo, asi iyona aizivi kutendera, pikija zvondhozvo zvaizoiita kuti ibude pa muzi. Asi, Zvapupu zvimweni zvakaisiya kuti igare pa muzi jazvo. Jehovha wakakomborera hambzaji Erica no mbhuri imbza, vanamati doni, avo vakaguma pa kuva hama no hambzaji jayo. (Marco 10:29, 30) Pikija vakagogomehwa pa muzi no ukama hwavo no kupisihwa zviro zvavo, hambzaji Erica vakaramba vakagondeka kuna Jehovha, vakabhabhatijwa zve wari, vari kushanda inga piyona wo nguva jese. Ivona avazivi kuthya madhimoni. Vecinangira mbhuri yavo, hambzaji Erica vakati, “Ndinoita mukumbiro dhiya jese kuti ukama hwangu uzivevo Jehovha zve udakare ngo kuva no rusujunuko unowanika basi ngo kushandira Mwari wedu wo rudo.”

18. Tinozowana makomborero api, tikathemba Jehovha?

¹⁸ Asipi tese tinozosongana no kuejwa ko rutendo kwakadari inga uku. Asi tese tinodikana kuva takavanga pa kuhwisana no madhimoni, tothemba Jehovha. Tikaita zvondhozvo, tinozoashira makomborero akawanda maningi perapo atizocengejwi ngo manyepo a Sathana. Cimwenizve, atizosii kuti kuthya kwedu madhimoni, kutiite kuti titame kushandira Jehovha. Kusiyapo zvese izvi, tinozova no ushamwari hwakavanga na Jehovha. Mujiji Jakobo wakatara kudari: “Ngokudaro, tendanyi Mwari, vanganyi kurhwa na Sathana, yena anozomutiza. Khwederanyi kuna Mwari, Yena anozomukhwedereravo.”—Jakobo 4:7, 8.