MUSORO WO KUJIJA WO 14
Muri Kunasa Kuita Basa Renyu ro Kucumaera Here?
“Itai basa ro mujijisi wo Vangeri; itai kamare basa ro wakapuwa.”—2 TIMOTI 4:5.
NDUMBO 57 Kucumaera ku Mushovo Wese wo Vandhu
ZVATICAJIJA *
Pasure po kumuswa kwake, Jesu wakasongana no vajiji vake zve vakavabvunja kuti ‘vaende, . . . Zve vaite vajiji. (Vonanyi ndima 1)
1. Vashandiri vese va Mwari vanoda kuitenyi zve ngenyi? (Vonanyi pikica yo pa kapa.)
JESU KRISTU wakabvunja vateveri vake kuti, ‘endanyi, . . . zve itanyi kuti vandhu vo majinja ese vave vajiji.’ (Mateu 28:19, Shanduro yeNyika Itsva) Vashandiri vese vakagondeka va Mwari vanoda kuziva kuti vangaitisa kudini kuti ‘vaite kamare’ basa iri rovakapuwa kuti vaite. (2 Timoti 4:5) Kusiyapo zvese izvi, basa iri rinosisira maningi zve ngo ro kukasika kamare kupinda zviri zvese zvatingada kuita mu upenyu. Asi, cingava cineso kupeja nguva yakawanda mu basa iri inga zvotaida.
2. Ngozvapi zvineso zvatinosongana nazvo patinonga teciita basa redu ro kucumaera?
2 Kuno mabasa amweni anosisira, anopeja nguva yedu no simba. Kangaije tinodikana kupeja nguva yakawanda kuti tijisapote no kukwanisa kusapota mbhuri yedu. Kangaije tiri kuhwisana no mutoro jimweni jo pa mbhuri, kuhwaja, kusuruvara kana taatova vasharuka kamare. Tinganasa kudini kuita basa redu ro kucumaera patinonga tecisongana no zvineso zvakadari?
3. Tikavona magama a Jesu anowanika pana Mateu 13:23, tingaguma pa mbhejiso yapi?
3 Kudari mugariro wedu unotipejera nguva yotaida kushandisa mu basa ra Jehovha, atidikani kupera simba. Jesu anozviziva kuti asipi tese tinokwanisa kubara mucero jakafanana mu basa redu ro kucumaera. (Verenganyi Mateu 13:23.) Jehovha mukuru-kuru anoreremeja zvese zvatinoita mu basa rake inga zvatinokwanisa. (Vaheberi 6:10-12) Ngo divi rimweni, tingatojizwa kuti mugariro wedu autitenderi kuti tiite zvizinji. Pa musoro uno, tinozovona kuti tingaitisa kudini kuti basa redu ro kucumaera rive pa ndau yo kutanga mu upenyu hwedu, tipungure zvatinazvo mu upenyu no kuitisa nane kucumaera kwedu no kujijisa. Pakutanga, ngativone kuti zvinorevenyi kunasa kuita basa redu ro kucumaera?
4. Kunasa kuita basa redu ro kucumaera kunorevenyi?
4 Ngo magama mashoma, kunasa kuita basa redu ro kucumaera, kunoreva kuita zvese zvatinokwanisa kuti ticumaere no kujijisa. Asi, kunasa kuita basa redu azvirevi kupeja nguva yedu yese tecicumaera. Thangwe rinotiitisa kuti ticumaere rinosisira maningi kuna Jehovha. Zvecivoneka kuti tinoda Jehovha no vandhu, tinoshanda ngo simba rese mu mushando wedu wo ciKristu. * (Marco 12:30, 31; VaKolosi 3:23) Kushandira Mwari ngo simba rese, zvinoreva kunasa kujipira kamare, kushandisa simba redu kuti tiite zvese zvatinokwanisa mu basa rake. Patinobongesera ngo kuita basa iri ro kucumaera, tinozoeja kubvunja vandhu vakawanda ngo pamusoro paro.
5-6. Mundhu acina nguva yakawanda angadirisa kudini basa ro kucumaera pa kutanga. Ezanisanyi.
5 Rangariranyi umwe mujaha anodakarira maningi kurija gitari. Iyena anodakarira maningi kurija gitari paanova no nguva yo kuzviita. Pejisire, wakazowana basa ro kurija gitari pa ndau inoizwa khofi, pa kupera ko sumana. Asi, ngo kuita izvo, iyena aacaizokwanisa kuwana mare yakawanda inokwanisa kupagari zvese zvaanoda. Ngokudaro, iyena wakatanga kushanda pa bhanka inga mundhu anoashira mare, kubvira mu ciposa mbhera mu cishanu. Pikija anopeja nguva zinji ari pa bhanka, mwoyo wake uri kuda kurija gitari. Ano cidaka-daka co kuda kuitisa nane upenyu hwake ngo kurija mumbo. Ngokudaro, wakadakara maningi, pikija waizopeja mukuvo mushoma basi ecirija.
6 Mu njira yakafanana, mungasana kuti munozopeja nguva yakadini mu basa ro kucumaera. Hina, zvamunozosanaro ngo zvamunoda. Mungavangisira kuti muitise nane kukwanisa kwenyu kubaya mwoyo jo vandhu ngo masoko akanaka. Zvecivoneka kuti munoneseka ngo zviro zvizinji, mungatotanga kukaya-kaya kuti mungaitisa kudini kuti basa ro kucumaera rive pa ndau yo kutanga mu upenyu hwenyu.
MUNGAITISA KUDINI KUTI BASA RENYU RO KUCUMAERA RIVE PA KUTANGA MU UPENYU HWENYU?
7-8. Tingatevejeresa kudini mavonero aiita Jesu basa ro kucumaera?
7 Jesu wakagaja muezaniso unonasa kuzwisisika pa mavonero aaita basa rake. Ciro caisisira maningi mu upenyu hwake cainga co kubhuya ngo pamusoro po Umambo hwa Mwari. (Johani 4:34, 35) Iyena wakafamba makiromita akawanda kuti acumaere vandhu vazinji. Iyena waibatisisa mukana uri wese waaiwana kuti abhuye no vandhu, azvinenyi pakawanda vandhu kana pa muzi javo. Jesu wakadira basa rake ro kucumaera pa ndau yo kutanga mu upenyu hwake.
8 Tingatevejera Kristu ngo kupsaka mukana wo kubhuya no vandhu ngo pamusoro po masoko akanaka, zvicikwanisika weya. Tino cido co kusiya zviri zvese mu upenyu hwedu, kuti ticumaere masoko akanaka. (Marco 6:31-34; 1 Pedru 2:21) Mu ungano jimweni, vamweni vanokwanisa kushanda inga mapiyona anosisira, o nguva jese kana o besero. Vamweni vakajijira ndumi imweni kana vakatothutha kuti vaende ku ndau inodiwa maningi vacumaeri. Asi, basa guru ro kucumaera rinoitwa ngo vacumaeri vanoshanda nguva jese, mu ungano mwavo. Azvinenyi dangani tinokwanisa kuita zvizinji mu basa redu ro kucumaera kana kuti haiwa, Jehovha aatikumbiri kuti tiite zvizinji kupinda zvatinokwanisa. Iyena anoda kuti tese tidakajihwe ngo kuita basa redu patinonga tecitokotesa ‘masoko akanaka anokujwa, a Mwari wakadakara.’—1 Timoti 1:11, Shanduro yeNyika Itsva; Deuteronòmio 30:11.
9. (a) Pauro wakaitisa kudini kuti adire basa rake ro kucumaera pakutanga kunyange no basa raaita? (b) Maitiro o Vapostori 28:16, 30, 31 inokhombijisa kudini mavonero aiita Pauro basa rake?
9 Mupostori Pauro wakagaja muezaniso waushoni, ngo kuita kuti basa rake ro kucumaera rive rinosisira maningi mu upenyu hwake. Paainga ku Korinto, pa hwendo hwake hwo cipiri wo misionario, iyena wainga wasara no mare shoma zve waidikana kushanda kuti awane mare. Asi, Pauro aazivi kuita kuti basa rake ro kuvaka tenda rive pakutanga. Iyena wakashanda kuti akwanise kujisapota paainga eciita basa rake ro kuzivisa masoko akanaka ku vaKorinto ‘acikapoceri.’ (2 VaKorinto 11:7) Pikija Pauro waidikana kuita basa rimweni kuti ajisapote, iyena wakaenderera mberi ecidira pakutanga basa rake ro kucumaera zve waicumaera mu ma Sabudu ese. Mugariro wake powakacinja, Pauro wakakwanisa kubatikana maningi mu basa rake ro kucumaera. Iyena wakatanga kuita ‘basa ro kutokotesa vangeri basi, no kuitira vaJudha ufakazi hwokuti Jesu ndiyena Kristu.’ (Maitiro o Vapostori 18:3-5; 2 VaKorinto 11:9) Pa kufamba ko nguva, wakafungihwa mukati mo nyumba yake kamare ku Roma, ko makore maviri. Iyena wakacumaera vaimubvakacira zve waitara karata. (Verenganyi Maitiro o Vapostori 28:16, 30, 31.) Pauro wainga watema civaringo co kutama kusiya kuti ciri cese ciphingaije mushando wake. Iyena wakatara kudari: ‘Zvecivoneka kuti tino basa iri . . . , atirembi.’ (2 VaKorinto 4:1, Shanduro yeNyika Itsva) Inga ndi Pauro, kunyange tinopeja nguva yakawanda ngo kuita basa redu, tinodikana kuita kuti basa ro Umambo rive rinosisira mu upenyu.
Kuno njira jakawanda maningi jingatibesera kuti tikwanirise basa redu (Vonanyi ndima 10-11)
10-11. Tingakwanirisa kudini basa redu ro kucumaera kunyange no zvineso zvo uhomi?
10 Patinocumaera muzi ngo muzi, tingava no zvineso ngo ndava yo mupira kana zvineso zvo uhomi zvingatiita kuti ticumaere mu njira jimweni. MaKristu o mu zana ro kutanga aipsaka vandhu kuri kwese kovaiwanika. Ivona vakabesereka ngo kueja kushandisa mukana uri wese kuti vabhuye ngo pamusoro po cokwadi, muzi ngo muzi, pakawanda vandhu no kuita ucapupu ucikazivi kurongwa. (Maitiro o Vapostori 17:17; 20:20) Kudari atikwanisi kufamba maningi, tingagara hedu pa ndau inofamba vandhu vazinji kuti ticumaere vaya vanofamba ndipona. Kudari tecikwanisa, tingaita ucapupu ucikazivi kurongwa ngo kutara karata kana kuita ucapupu tecishandisa foni. Vacumaeri vazinji vacikakwanisi kucumaera muzi ngo muzi ngo ndava yo zvineso zvo uhomi, vari kubesereka maningi ngo kucumaera vecishandisa njira iji.
11 Pikija no zvineso zvo uhomi, mungakwanisa kuita basa renyu. Vonanyizve muezaniso wo mupostori Pauro. Iyena wakati: “Ndinokwanisa bzese ndiyena anondivangisa weya.” (VaFilipi 4:13) Pauro waida simba rondhoro paakahwaja pa umwe wo hwendo hwake wo misionario. Iyena wakasanangura kudari ku vaGarasia: “Munobziziva uxoni kuti inini ndakamutokotesera vangeri ngo ndava yo ndhenda.” (VaGalàsia 4:13) Mukufananavo, zvineso zvenyu zvo uhomi zvingamupa mukana wo kutokotesa masoko akanaka ku vamweni, vakadari inga mamedhiko, mafurumero pomwe no vamweni vanonga vacibesera kumukhorondha. Vazinji vo vandhu vondhovo vanokwanisa kushanda inga vacumaeri povanonga vari pa muzi.
MUNGAPUNGURISA KUDINI ZVAMUNAZVO MU UPENYU?
12. Zvinoda kunangenyi kuva no jiso rakanaka?
12 Jesu wakananga kudari: “Jiso rako, ruveneko hwo muviri wako. Jiso rako rikanaka, muviri wako wese unozovenekwa.” (Mateu 6:22) Zvinoda kunangenyi? Zvinonanga kuti tinodikana kuramba tecipungura zvatinazvo mu upenyu kana tinodikana kubatikana pa kukwanirisa zvido zvedu, ticikakangaijwi ngo ciri cese. Jesu ambhwine wakagaja muezaniso waushoni pa kubatikana mu basa rake ro kucumaera pomwe no kujijisa vajiji vake kuti varambe vecishandira Jehovha no Umambo hwake. Tinotevejera Jesu ngo kuita kuti basa redu ro kucumaera rive pa ndau yo kutanga mu upenyu hwedu, ngo ‘kuamba kupsanga Umambo no urungami hwa [Mwari].’—Mateu 6:33.
13. Zvicinyi zvingatibesera kuti tibatikane mu basa redu ro kucumaera?
13 Njira imwe yo kubatikana mu basa redu ro kucumaera ngo yo kupungura zvatinazvo mu upenyu, tikadaro, tingakwanisa kupeja nguva yakawanda kuti tibesere vamweni kuti vazive Jehovha zve vagume pa kumuda. * Inga muezaniso, kureva kuti tingakwanisa kupungura nguva yatinopeja teciita basa redu kuti ticumaere masoko akanaka pakati po sumana here? Tingakwanisa kupungura nguva yatinopeja ngo mabungaijo amweni atinoita, awo anotipejera maningi nguva here?
14. Varovorani vamweni vakaita cinjo japi kuti vakwanise kupeja nguva yakawanda mu basa ro kucumaera?
14 Izvi ngo zvakaitwa ngo mukuru umweni anodanwa Elias no mukaji wake. Iyena wakasanangura kudari: “Itusu aticainga mapiyona pa nguva yondhoyo, asi, taidikana kuita cinjo. Ngokudaro, takadikana kuita zviri zvese kuti tikwanise kuengejera nguva yedu mu mushando. Inga muezaniso, takatanga kuviga mare, kusiya mabungaijo aitihira maningi nguva zve takakumbira patarau wedu kuti vatipungurire basa rotaiita. Inga muviyo, takakwanisa kucumaera co usiku, kuita jijo jo Bhaibheri jakawanda zve takakwanisa kucumaera pakati po sumana, kaviri pa mweji. Zvokadi takadakara maningi!”
MUNGAITISA KUDINI NANE MANERA ENYU O KUCUMAERA NO O KUJIJISA?
Kushandisa zvatinojija pa musongano wo pakati po sumana, zvinozotibesera kuti tiitise nane manera edu o kucumaera no o kujijisa (Vonanyi ndima 15-16) *
15-16. Mukuzwirana no 1 Timoti 4:13, 15, tingaitisa kudini nane kuziva kwedu inga vacumaeri? (Vonanyizve bhokiso rinoti “ Zvido Zvingandibesera kuti Ndikwanirise Basa Rangu ro Kucumaera.”)
15 Njira imweni yo kunasa kukwanirisa basa redu, ngo yo kuitisa nane manera edu o kucumaera no o kujijisa. Vandhu vamweni kuti vaite basa ravo, vanodikana kuashira rovejo zve vanotodikana kujija kuti vaitise nane zivo yavo. Izvi ndizvona zvinoitikavo no vacumaeri vo Umambo. Tinodikana kuramba tecijija kuti tiitise nane mushando wedu.—Mazwi Akangwara 1:5; verenganyi 1 Timoti 4:13, 15.
16 Tingarambisa kudini tecienderera mberi mu mushando wedu? Ngo kunasa kupurukira ndhungamiro jatinopuwa pa musongano wo pakati po sumana, Musongano Upenyu no Mushando. Musongano uu, unotipa rovejo inodikana kamare kuitira kutibesera kuti tiitise nane basa redu ro kucumaera. Inga muezaniso, tikavona mazano anopa mutungamiriri kuno vaya vapera kuita mativi ovakagajwa, zvingatibesera kuitisa nane basa redu. Tingatotanga kushandisa mazano ondhowo pa bvaza inotevera patinoenda kocumaera masoko akanaka. Kangaije tingatokumbira muvonereri wedu wo cikwata co basa ro kucumaera kuti atibesere, tingatoshanda naye, kana kutoshanda no mucumaeri ano ruzivo, kutoshanda no piyona kana no muvonereri wo ndharaundha. Patinoenderera mberi teciitisa nane, ngo kushandisa mathurusi anowanika mu Bhokiso Redu ro Mathurusi o Kujijisa, tinozodakara ngo manera atinocumaera no kujijisa.
17. Munobesereka kudini pamunonasa kukwanirisa basa renyu ro kucumaera mu mushando?
17 I cidakajiso kamare kutendehwa ndi Jehovha kuti tive ‘vabeseri vake.’ (1 VaKorinto 3:9) ‘Pamunokwanisa kusana ibzo bzinodikana’ zve mosana kubatikana ngo basa renyu, ‘munozoshandira Tenji Mwari makadakara.’ (VaFilipi 1:10; Nduyo 100:2) Inga umwe wo mushandiri wa Mwari, mungathemba kuti iyena anozomupa simba ramunoda kuti mukwanirise basa renyu azvinenyi zvineso zvamunosongana nazvo kana kutama kwenyu kukwanisa kuita zvimweni. (2 VaKorinto 4:1, 7; 6:4) Kunyange basa renyu rinomutendera kuti mucumaere padoko kana maningi, imwimwi ‘mungava no thangwe ro kudakara’ pamunoriita ngo mwiha wese. (VaGalàsia 6:4) Pamunonasa kukwanirisa basa renyu, munokhombija kuti munoda Jehovha no mudoni wenyu. “Mukaita kudaro munozopona imwimwi, moponesavo vanomupurukira.”—1 Timoti 4:16.
NDUMBO 58 Kupsaka Shamwari jo Rugarisiko
^ ndim. 5 Jesu wakatipa basa ro kucumaera masoko akanaka o Umambo no kuita vajiji. Musoro uno, unozovonesa kuti tingaitisa kudini basa redu ro kucumaera pikija patinosongana no zvineso mu upenyu. Tinozovonazve kuti tingaitisa kudini basa redu ro kucumaera mu njira inobudirira no inodakajisa.
^ ndim. 4 MAGAMA AKASANANGUHWA: Kusiyapo basi kucumaera no kujijisa, basa redu kuna Jehovha rinobatanijavo kuvaka, kunasirira-nasirira zvikora zvo umwari no kubesera vaya vanowihwa ngo ngozi jinoitika jega.—2 VaKorinto 5:18, 19; 8:4.
^ ndim. 13 Vonanyi njira nomwe jakandandaniswa pa bhokiso rinoti “Zvaungaita Kuti Usava Nezvakawanda Muupenyu Hwako,” mu Murindiri wa Julho wo 2016, pheji 10, mu ciShona.
^ ndim. 62 KUDURUJIHWA KO PIKICA: Hambzaji iri kukhombijira maitihwe o hwiririro pa musongano wo pakati po sumana. Tevere, mutungamiriri paanonga ecipa mbhangiro, iyona iri kutarira zviri zvese pa bhurushura rinozwi kujijisa. Pejisire, pa kupera ko sumana, iyona iri kushandisa mu basa ro kucumaera zviya zvoyakajija pa musongano.
