1-2. Zvicinyi zvakaita kuti Jesu anange magama anowanika pana Johani 4:35, 36?

JESU paaita hwendo hwake, wakafamba ngo mu munda jimweni, zvingaita kuti ijona jairimwa tirigu. (Johani 4:3-6) Kuti mbeu iji jikotohwe, kwaicota mweji murongomuna. Ngokudaro, Jesu wakananga zviro zvicaengepi zvo cirovejeso, paakati: “Musanyi majiso, muringise: Mbeu jaibva kuti jikotohwe.” (Verenganyi Johani 4:35, 36.) Zvaida kurevenyi zvaakanangari?

² Zvinovoneka inga kuti Jesu, aacaibhuyepi ngo pamusoro po kukotora mbeu kamare, asi waibhuya ngo kukotora vandhu. Amborangariranyi basi zvakaitika mukuvo mushoma Jesu acito wananga izvi. Pikija Vajudha avacaizwanana no Vasamaria, Jesu wakacumaera mwanakaji Musamaria zve mwanakaji uwu, wakamupurukira! Zvinovonekazve inga kuti Jesu paakananga kuti “mbeu jaibva kuti jikotohwe,” Vasamaria vazinji vakazwaya mwanakaji wiya ecibhuya ngo pamusoro pa Jesu, vaengepo kuti vajije zvakawanda. (Johani 4:9, 39-42) Masoko amweni anobhuya ngo zvo Bhaibheri akananga kuti: “Cidaka-daka cainga no vandhu ava pa kuda kuzwa zvainanga Jesu . . . cakakhombija kuti ivona vaidari inga mbeu jinoda kukotohwa.”

3. Kudari mukavona vandhu inga zvaiita Jesu, ngozvapi zviro zvaizoitika no basa renyu ro kucumaera?

³ Waro, munovona kudini ngo vandhu vo mu ndima yenyu? Munovavona inga mbeu jaivha jinoda kukotohwa here? Kudari ndizvona, panozoitika zviro zvitatu. Cokutanga, munozocumaera meciziva kuti basa iri ngo ro kukasika. Basa ro kukotora aritori mukuvo wakareba, atidikani kuruza nguva. Cocipiri, munozodakara maningi, pamunozovona vandhu vaciashira masoko akanaka. Bhaibheri rinoti: “Vakotori vanodakara pa kukotora.” (Isaia  9:3) Cocitatu, munozovona mundhu umwe nga umwe kuti anokwanisa kuva mujiji wa Jesu, ngo iyo ndava, munoeja kuitisa nane manera enyu o kucumaera mukuzwirana no kudakarira kwaanoita.

4. Tinozojijenyi ngo muezaniso wo mupostori Pauro?

⁴ Vajiji va Jesu vaivona Vasamaria inga vacikasisiri. Asi Jesu wainga no mavonero akasiyana. Iyena waivona Vasamaria inga vandhu vaizokwanisa kuva vajiji vake kumbejiyo. Ndizvona zvatinodikanavo kuita no vandhu vatinosongana navo mu ndima yedu. Mupostori Pauro wakatigajira muezaniso wakanaka maningi kuti titevejere. Tingamutevejeresa kudini? Pa jijo ya nyamasi, tinozovona kuti Pauro (1) waiziva zvinotendwa ngo vandhu vaimupurukira, (2) waiziva zvavaizodakarira zve (3) kuvona umwe nga umwe wavo inga vandhu vaizokwanisa kuva vajiji va Jesu kumbejiyo.

5. Ngenyi Pauro waikwanisa kuzwisisa vandhu vaaicumaera mu sinagoga?

⁵ Pauro waicumaera maningi mu masinagoga o Cijudha. Inga muezaniso, mu sinagoga ro Tesaronika, Pauro ‘wakaenda kovari wobhuisana na ivona, masabudu matatu, ngo ndava yo Matahwa.’ (Maitiro o Vapostori 17:1, 2) Zvinovoneka inga kuti Pauro aacainesehwa kucumaera mu sinagoga. Ngokuti wainga wakareriwa inga Mujudha. (Maitiro o Vapostori 26:4, 5) Iyena waikwanisa kuzwisisa vandhu vaaicumaera, ngo kudaro, waikwanisa kuvacumaera no kuthemba kwese.—VaFilipi 3:4, 5.

6. Ngowapi wainga musiyano wo vandhu vakacumaehwa ndi Pauro pa ndau yakawanda vandhu no vo musinagoga?

⁶ Pauro pakupera kutiza vavengi ku Tesaronika no Bhereya, wakaenda Atena. Iyena wakatanga kubhuya “no vaJuda mu sinagoga pamwepo no vamwebze vaitenda Mwari. Njiku jese waiitavo bzondhobzo no vese vaimugumira.” (Maitiro o Vapostori 17:17) Asi paakaenda koocumaera pa ndau yakawanda vandhu, Pauro wakawana vandhu vakasiyana. Pakati po vaya vaimupurukira, painga no vazivi no vamweni vacainga Vajudha, ivona vakavona kuti masoko aicumaehwa ndi Pauro ainga “majijisiro mapsa.” Ivona vakati kuna Pauro: “Unotibvunja masoko o kutixamaisa.”—Maitiro o Vapostori 17:18-20.

7. Mukuzwirana no Maitiro o Vapostori 17:22, 23, Pauro wakaita cinjo yapi pa kucumaera kwake masoko akanaka?

⁷ Verenganyi Maitiro o Vapostori 17:22, 23. Pauro aazivi kubhuya masoko ake ku vandhu vonyikanja vo Atena inga maitiro aakaita Vajudha vo mu sinagoga. Zvingaita kuti Pauro wakajivhunjisa kudari: ‘Vandhu vo Atena vanotendenyi?’ Iyena wakasotesesa zviro zvainga zvakavatendeneja, wovona zvirovejeso zvo manamatiro  avo. Tevere, wakapsaka zviro zvaizwirana no cokwadi co mu Matahwa. Mwanarume umweni anobhuya ngo zvo Bhaibheri wakati: “Inga Mukristu wo Cijudha, Pauro waiziva kuti Vagerego vo cihedheni avacainamata Mwari wo kadi-kadi wo Makristu o Cijudha. Asi, Mwari waaibhuya ngo zvake acaingepi Mwari acikaziviki ngo vandhu vo Atena.” Pauro wainga no cido cokucinja macumairiro ake. Iyena wakavhunja vandhu vo Atena kuti masoko aaicumaera aivha “ka Mwari acikaziviki,” wovaiejaya kunamata. Vonyikanja avacaizivepi Matahwa, asi Pauro aazivi kurangarira kuti ivona avazovi Makristu. Kusiapo izvo, wakavona vandhuvo inga mbeu jaivha, jainakira kukotohwa. Izvi zvakabesera Pauro kuti acinje matangiro ake okucumaera masoko akanaka.

8. (a) Mungazvizivisa kudini zvinotenda vo mundima yenyu? (b) Kudari ariwese angati ndaano ciara cangu zvicinyi zvamungaita?

⁸ Inga ndi Pauro, ngatisote zvakavatendeneja. Sotesesanyi zviro zvinokhombija zvitendhwa zvo vandhu vo ndima yenyu. Inga muezaniso, pa nyumba kana pa karu yavo pano zviro zvinokhombija manamatiro avo here? Zina ravo, nguvo javo no mavereketero avo anokhombija zvitendhwa zvavo here? Ecimborangariranyi kuti samuzi wamuvhunja kuti ndino ciara cangu, imwimwi maizoitenyi? Hambzaji Frutura vari piyona anosisira, vanoanja kudavira kudari: “Inini andizivi kuza komuvangirija kutenda zvandinotendari, asi ndaza kobhuya ngo pamusoro po shwiro iyi . . . ”

9. Ngozvapi zviro zvakadoezana no zvenyu, zvamungawana pa mundhu ano gerejha rake?

⁹ Mungabhuya ngo pamusoro penyi no mundhu anoendavo ku gerejha? Ejanyi kupsaka zviro zvokuti movaviri munozvitenda. Kangaije iyena anotendavo kuti ari kunamata Mwari umwe ega basi no kutenda kuti Jesu ndi muponesi wo vandhu kana angatenda kuti tiri kurarama mu mukuvo unonesa zve unopera sasambi. Mecishandisa zvamunotenda movaviri, mukhombijenyi masoko ari mu Bhaibheri munjira yaangadakarira.

10. Zvicinyi zvatinodikana kueja kuita zve ngenyi?

¹⁰ Ceukijanyi kuti vandhu avatendi zvese zvinojijiswa ngo gerejha ravo. Ngo kudaro, pakupera kuzwa kuti mundhuwo anonamata gerejhenyi, ejanyi kupsaka kuti ngozvapi zvaanotenda. Hama Dhavhidhi vanogara Australia, avo vari piona, vakati: “Vandhu vazinji nyamasi uno, vanobatanija uzivi hwo nyika no gerejha.” Hambzaji Donalta vo Albania, vakati: “Vandhu vamweni vanonanga kuti vano gerejha, asi ngomukati avatendi kuvepo ka Mwari.” Zve misionario umweni wo Argentina, anovona kuti kuno vandhu vanoti vanotenda utatu, asi, avatendi kuti Baba no Mawana no mujimu mucena ndi Mwari umwe basi. Misionario uwu, wakati: “Kuziva izvi, zvinova zvakareruka maningi kuwana zviro zvakaezana no mundhuwo.” Ndiyo ndava,  munodikana kueja kuziva zvinotenda mundhuwo. Mukaita kudaro, mungakwanisa ‘kujipira kuno vese, kuti mukwanise kuwana vamwe.’—1 VaKorinto 9:19-23.

11. Mukuzwirana no Maitiro o Vapostori 14:14-17, Pauro wakacumaeresa kudini mu njira inodakarihwa ngo vagari vo Ristra?

¹¹ Verenganyi Maitiro o Vapostori 14:14-17. Pauro waizviziva zvaidakarihwa ngo vapurutani vake. Ngo kudaro, waikwanisa kucinja manera ake o kucumaera. Inga muezaniso, vagari vo Ristra vaiziva padoko kana avacaiziva ciri cese ngo pamusoro po Bhaibheri. Izvo zvakaitisa kuti Pauro abhuye navo mu njira yo vaizozwisisa. Iyena wakabhuya ngo pamusoro po kukotora zvokurimwa no manera ovaizowana mudakaro mu upenyu. Iyena waishandisa magama no muezaniso jaizoita kuti vanomuzwaro vazwisise ngo kukasika.

12. Mungaitisa kudini kuti muzive zvinodakarihwa ngo vandhu no kucinja manera enyu o kucumaera?

¹² Ejanyi kuvona zvinodakarihwa ngo vandhu vari mundima mwenyu zve cinjanyi manera o kucumaera. Waro pamunoguma pa samuzi, mungazvizivisa kudini zvaanodakarira? Tinophindazve, sotanyi zvakavatendeneja. Kangaije angava acinasirira jhardhim, kuverenga bhuku riri rese, kutojanisa karu kana kutoita zviri zvese. Munovonavo kudini, ngo kushandisa zvaari kuitaro kuti mutange kubhuisana? (Johani 4:7) Pikija nguvo yo mundhu, ingananga zvizinji ngo pamusoro pake. Inga muezaniso, ingananga kuti iyena ngo wo kwapi, anoshanda nenyi kana kuti ngoyapi ekipa yaanodakarira. Hama Gustavho vakananga kudari: “Ndakatanga kubhuya no mujaha ano gumi na mapfumbamwe omakore. Iyena waisimira cikhipa cainga no foto yo muimbi ano nduma. Inini ndakamuvhunjisa ngo pamusoro po cikhipa ciya, iyena wakandivhunja zvaimuitisa kuti ade muimbiwo. Mabhuyo awo, akaita kuti iyena ajije Bhaibheri zve wari ndi imwe yo hama jedu.”

13. Mungatangisa kudini jijo yo Bhabheri ngo njira inodakarihwa ngo mundhu wamatanga kusongana naye?

¹³ Kuti mutange jijo yo Bhaibheri no mundhu womasongana naye pa vhaza yokutanga, munodikana kuzviita mu njira yaangadakarira.  (Johani 4:13-15) Inga muezaniso, hambzaji Poppy, vaicumaera mwanakaji umweni zve mwanakajiwo wakavakoka kuti vanghwine ngo mumba. Povakanghwina mumba miya, vakavona kuti pa biravira ro nyumba painga no phepha raikhombija kuti mwanakajiwo waijijisa ku univhersidhadhi. Ngo kudaro, hambzaji Poppy vakananga kuti na itusuvo tinojijisavo vandhu tecishandisa jijo yo Bhaibheri no musongano jedu. Izvi zvakaitisa kuti mwanakajiwo atendere kujija Bhaibheri no kwenda ku musongano pa njiku yakazotevera zve wakazoenda ku gungano ro mutundhu rakazotevera. No papera gore rimwe, wakazobhabhatijwa. Wari jivhunjisenyi kudari: ‘Ngozvapi zvinodakarihwa ngo vandhu vandinohwirira? Ndingatangisa kudini jijo yo Bhabheri ngo njira inodakarihwa ngo mundhu wandatanga kusongana naye?’

14. Mungaitisa kudini kuti jijo yenyu yo Bhaibheri izwirane no mundhu wamuri kujijisaro?

¹⁴ Pamunopera kutangisa jijo yo Bhaibheri, nasiriranyi kuitira jijo yo munoda kuitisa. Pamunonga mecizviita vonanyi zvinokwanisa mundhuwo. Cimwenizve, sananyi vhesi jamunoda kuzoverenga, vhidhiyo jamunozoda kuvona no muezaniso jamunozoda kushandisa. Jivhunjisenyi kudari: ‘Ngozvapi zvingadakarihwa maningi ngo mujiji uwu? Ngozvapi zvingabaya mwoyo wake?’ (Mazwi Akangwara 16:23) Ku Arbhaniya, imwe hambzaji iri piyona inodanwa Firora, yainga no mujiji wo Bhaibheri wainanga no kuthemba kwese, kuti: “Anditendi no padodori hapo zvamunojijisa ngo pamusoro po rumuko.” Hambzaji Firora avazivi kwenderera mberi vecibhuya ngo pamusoro pazvo. Ivona vakati: “Ndakavona kuti zvainga zviri nane kuti iyena atange aziva Mwari anogondesaro rumuko.” Kuvhira iponapo, hambzaji Firora vakatanga kubhuya ngo pamusoro po mugariro ja Jehovha, jakadari inga rudo, uzivi no simba. Pa kufamba ko nguva, mujiji wiya wakatanga kutenda kuti kuno rumuko. Wari, iyena waa Capupu ca Jehovha cinovangisira.

15. Mukuzwirana no Maitiro o Vapostori 17:16-18, Pauro wakava no cineso capi paakaguma Atena, asi ngenyi aazivi kuremba?

¹⁵ Verenganyi Maitiro o Vapostori 17:16- 18. Atena rainga dhorobha raizara ngo zvithombi, uhure, majijisiro o uzivi hwo vandhu. Asi, Pauro aazivi kuremba pa kubesera vandhu vo Atena, pikija paakatukwa ndivona. Pauro waiceukija kuti iyena kamare wakambova “muxori wa Mwari no mutevereri wakaxata,” asi pikija zvakadaro, wakaguma pa kuva Mukristu. (1 Timoti 1:13) Kudari inga Jesu wakakwanisa kuvona kuti Pauro waizova muteveri wake kumbejiyo, Pauro wakavavo no mavonero akafanana paakasota vandhu vo Atena. Mavonero awo, akabesera maningi.—Maitiro o Vapostori 9:13-15; 17:34.

16-17. Zvicinyi zvinokhombija kuti vandhu vo mushovo wese vangava vajiji va Kristu? Ipanyi muezaniso.

¹⁶ Mu zana ro kutanga ro makore, vandhu vo mushovo wese vakava vajiji va Jesu. Pauro paakatarira Makristu aigara ku dhorobha ro Cigiriki ku Korinto, iyena wakananga kuti vandhu vamweni mu ungano iya, vainga maphanga kana vainga no upenyu wakashata kamare kareko. Zve iyena wakaengejera eciti: “Vamweni venyu vainga vakadaro. Kaveta makasambijwa.” (1 VaKorinto 6:9-11) Makristu aya, akaita cinjo kuti ave vajiji va Jesu. Waro, kudari makaponavo mu nguva iya, maizokwanisa kuvona kuti vangava vateveri va Jesu here?

¹⁷ Nyamasi uno, vazinji vano cido co kuda kucinja maponero avo kuti vave vajiji va Jesu. Inga muezaniso, ku Austraria, imwe hambzaji inoshanda inga piyona anosisira, inodanwa Yukina, vakajijira kuti vandhu vese vangatenda kuashira masoko akanaka. Pa vhaza imweni, hambzaji Yukina vainga mu rojha inotengeswa mujiyo, vovona umwe musikane wainga wakaitwa pika  zve wosimira mu njira yokujiregejera. Hambzaji Yukina, vakati: “Ndakarangarira pa cimukuvo cakati kuti, ndoti: ‘Ndoenda kobhuya naye kana kuti haiwa?’ Ngokudaro, ndakatanga kubhuya naye. Ndakazovona kuti iyena waidakarira maningi Bhaibheri. Ngokuti pika jimweni jaainga najo jainga vhesi jo bhuku ra Nduyo!” Musikane wiya wakatanga kujija Bhaibheri no kuviya ku musongano. *

18. Ngenyi atidikani kutonga vandhu?

¹⁸ Kuna Jesu, mbeu jainga jaivha kuti jikotohwe, kureva kuti iyena waivetera kuti vandhu vazinji vamutevere? Haiwa. Ngokuti Bhaibheri rainga rakananga kare kuti vashoma basi vaizomutenda. (Johani 12:37, 38) Cimwenizve, Jesu waivona zviri mu mwoyo mo vandhu. (Mateu 9:4) Pikija zvakadaro, iyena waibatikana maningi no vandhu vaimutenda, ngo kudaro, waivangisira pa kuvacumaera. Jesu aacaitonga vandhu pikija waikwanisa kuvona zviri mu mwoyo mavo. Waro ngenyi itusu ticinari simba ro kuvona mwoyo jo vandhu, tingatonga vamweni? Kusiyapo kutonga ndima yedu kana samuzi, vonanyi kuti iyena angakwanisa kuva mujiji wa Jesu. Hama Marko, vanoshanda inga misionario ku Burkina Faso, vakati: “Vandhu vandinovona kuti vanoenderera mberi, kazinji ndivona vanosiya kujija. Kuveni vaya vandinorangarira kuti avagumi ndhambo kazinji ndivona vanoenderera mberi. Ngokudaro, ndakaguma pa mbhejiso yo kuti, zviri nane kusiya mujimu wa Jehovha utitungamirire.”

19. Tinodikana kuvona kudini vandhu vo ndima yedu?

¹⁹ Pakutanga, kangaije mungavona kuti vashoma basi mu ndima mwenyumo vakadari inga mbeu joda kukotohwa. Asi, ceujanyi zvakananga Jesu kuno vajiji vake. Mbeu jaivha kuti jikotohwe. Vandhu vangakwanisa kucinja, vova vateveri va Kristu. Kuna Jehovha, vajiji avo, vakadari inga “upfumi.” (Hagayo 2:7) Kudari mukavona vandhu vo ndima yenyu inga manera anoita Jehovha na Jesu, munozodakarira kuziva zvineso zvavo no zvavanodakarira. Amuzovavoni inga vandhu vacikaziviki, asi vavonenyi inga vandhu vanozova hama no hambzaji kumbejiyo.