1. Tinodikana kuitenyi?

MAIZODAKARIRA kuita muphikizano wo kugogoma wamunoziva kuti unonesa, maningi-ningi pamunonga mecihwaja kana makaremba here? Kangaije haiwa. Asi mupostori Pauro wakananga kuti Makristu ese ocokwadi ari kugogoma. (Vaheberi 12:1) Zve tese, majaha kana vasharuka, vano simba kana vakaremba, tinodikana kucungirira mbhera kumagumo kudari tikada mupocero watinozopuwa ndi Jehovha.—Mateu 24:13.

2. Mukuzwirana na 2 Timoti 4:7, 8, ngenyi Pauro waifanera kupa mbhangiro ngo pamusoro po kugogoma ngo kuvangirira?

² Pauro waifanera kamare kupa mbhangiro ngo pamusoro po kugogoma ngo kuvangirira. Ngokuti iyena wainga ‘wapeja mujaho wake’. (Verenganyi 2 Timoti 4:7, 8.) Asi Pauro waibhuya ngo pamusoro po kugogoma kwapi?

3. Icinyi kugogoma kwakanangwari ndi Pauro?

³ Nguva jimweni Pauro waishandisa zviro zvaithwa pa mutambo jo ku Gresia yo kare kuti ajijise zviro zvinosisira. (1 VaKorinto 9:25-27; 2 Timoti 2:5) Pa vhaza jakawanda, iyena wakaezanisa upenyu wo Makristu no kugogoma. (1 VaKorinto 9:24; VaGalàsia 2:2; VaFilipi 2:16) Mundhu anotanga “kugogoma” uku, paanojipira kuna Jehovha zve wobhabhatijwa. (1 Pedru 3:21) Iyena anopejisa kugogoma uku, Jehovha paanomupa mupfupo wo kupona kwenda no kwenda.—Mateu 25:31-34, 46; 2 Timoti 4:8.

4. Tinozovonenyi pa jijo iyi?

⁴ Waro kuva pa muphikizano wo mumango wakareba no kuteveja maponero o Cikristu zvakabatana papi? Pano mathangwe mazinji, asi pa jijo iyi ngativone matatu akona. Rokutanga, tinodikana  kutevera gwanja ra ushoni; rocipiri, tinodikana kuramba tecisotesesa kwatiri kwenda; rocitatu, tinodikana kunyisa zvineso zvatinosongana nazvo mugwanja.

5. I gwanja rapi ratinodikana kutevera zve ngenyi?

⁵ Vagogomi povanonga vecigogoma, vanodikana kutevera gwanja rakaitihwaro zvondhozvo. Kudari vakatama kutevera zvondhozvo, vangavhiswa votoruza mupfupo wavo. Mukufananavo, tinodikana kutevera gwanja raushoni kana maponero o Cikristu. (Maitiro o Vapostori 20:24; 1 Pedru 2:21) Asi andizvopi zvinoda Sathana no vabeseri vake. Ivona vanoeja kuita zvese zvavanokwanisa kuti ‘tiende na ivona mu murambo wo kupsejeka.’ (1 Pedru 4:4) Ivona vanotiseka ngo gwanja ratakakheta kutevera zve vanonanga kuti gwanja ravo ngo rinosisira maningi zve rinopa rusujunuko hwokadi. Asi zvovanonaga ngo zvokunyepa kamare.—2 Pedru 2:19.

6. Majijenyi ngo muezaniso wa hama Braini?

⁶ Mundhu wese anogogoma no vandhu vanokwevejehwa ngo nyika ya Sathana, ngo kukasika vanozovona kuti gwanja ro vakakheta ariendesi ku rusujunuko, asi ku uranda. (VaRoma 6:16) Vonanyi muezaniso wa hama Braini. Vabari vayo vaiivangisa kuti iteveje maponero o Cikristu. Asi payakatanga kuaruka, yakatanga kukana-kana kuti gwanja iri rinopa mudakaro kana kuti haiwa. Ngo kudaro, hama Braini vakasana kufamba na vaya vaiteveja ndhungamiro ja Sathana. Ivona vakati: “Andicaizviziva kuti mudakaro wandaidaya maningi waizonditora kuti ndive muranda wo zvido zvakashata. Pa kufamba ko nguva, ndakazoshandisa mutombo jinodhakwisa, kumwa doro no kuhura. Pa makore akatevera, ndakaeja kushandisa mutombo jinodhakwisa jinothisa maningi zve ndakava muranda wo mutombo muzinji. . . . Ndakatanga kutengesa mutombo jinodhakwisa kuti ndijisapote.” Pakupejisira, hama Braini vakasana kurarama mukuzwirana no ndhungamiro ja Jehovha. Ivona vakasiya gwanja ravainga vecitevera zve vakabhabhatijwa mu gore ro 2001. Wari ngo kuteveja maponero o Cikristu, vari kujizwa vakadakara. *

7. Mukuzwirana na Mateu 7:13, 14, ngo api makwanja maviri ari pamberi pedu?

⁷ Izvo zvinovonesa kusisira ko kutevera gwanja raushoni. Sathana anoda kuti titame kugogoma ngo gwanja rakamanika ‘rinogumisa mu kupona.’ Iyena anoda kuti tigogome ngo gwanja rinotevehwa ngo vandhu vazinji vo nyika ino. Gwanja iri, rinodakarihwa maningi ngo vazinji zve zvakareruka maningi kufamba ndimona. Asi irona ‘rinogumisa mu kupsejeka.’  (Verenganyi Mateu 7:13, 14.) Kuti titame kupauswa mu gwanja raushoni, tinodikana kuthemba Jehovha no kupurukira zvaanonanga.

8. Zvicinyi zvinoita mugogomi paanowa?

⁸ Mugogomi kuti atame kukhugunyika, anodikana kusota maningi kwaari kwenda. Pikija zvakadaro, zvingaita kuwira mu rindi kana mugogomi doni wo mukhugunya. Mugogomi paanowa, anomuka ngo kukasika zve woenderera mberi ecigogoma. Iyena aasotesesi camukhugunyaro, asi anosota kwaanodaro kuguma no mupfupo waanodaro kuashira.

9. Kudari tikakhugunyika, tinodikana kuitenyi?

⁹ Pa kugogoma kwedu kuitira upenyu, tingakhugunyika vhaza jakawanda ngo zvatinovereketa no kuita. Kana vagogomi doni vedu vangaita zviro zvingatinyangaja. Izvi asipi zvipsepi. Tese atizivi kukwana zve tese tiri kugogoma mu gwanja rimwero rakamanika rinoendesa kuupenyu. Tingatovetera kuti pa mukuvo umweni tingatonyangajisa vadoni vedu. Pauro waizviziva kuti nguva jimweni taizoshaishihwa ngo mudoni wedu. (VaKolosi 3:13) Ngo kudaro, kudari mukakhugunyika, mucasotesesa zvamukhugunyaro, asi pa mupfupo wamunozoashira. Sananyi kumuka zve endereranyi mberi mecigogoma. Kudari mukatendera kunyangajwa no kuviga bundu zvomuita kuti mutame kumuka, amuzogumi kwamuri kwenda nokutizve amuzoashiri mupfupo wenyu. Andizvopi zvega, munozova cikhugu kuno vaya vari kueja kugogoma mugwanja rakamanika rinoendesa kuupenyu.

10. Tingaitisa kudini kuti titame kuva “cikhugu” kuvamweni?

¹⁰ Kuno manera amweni okutama kuva “cikhugu” ku vandhu vatinogogoma navo. Zvecikwanisika weya, pavanoda ciricese caticikadakariri, zvirinane kuvatendera kuti vaite zvavanodaro. (VaRoma 14:13, 19-21; 1 VaKorinto 8:9, 13) Ngaiwona musiano mukuru kwatiri no vaya vanoita muphikizano wo kugogoma. Ivona vanonga veciphikizana zve umwe nga umwe wavo anoita zvese zvaanokwanisa kuti aashire ega mupfupo. Vagogomi ava, kazinji vanorangarira zvavanoda basi. Vamweni vanotoguma pa kundunda vadoni vavo kuti vakasikire kuguma ndivona. Asi itisu atiripi kuphikizana  no hama jedu. (VaGalàsia 5:26; 6:4) Mukusiana, tinoda kuti mutengo mukuru wo vandhu vagume kumbhiri zve vawane mupfupo wo upenyu. Ngo iyo ndava, tinoeja kushandisa mbhangiro ya Pauro yo kutama “kupsaka bzinotidakarisa basi, kaveta topsaka bzinodakarisa vamweni.”—VaFilipi 2:4.

11. Ngo zvapi zvinosoteseswa ngo vagogomi zve ngenyi?

¹¹ Vagogomi avasotesesi basi kumbeji kwavo. Ivona vanosotesesa maningi mugumo wavo. Pikija vacikavoni pavanoda kugumira, vanoeja kujivona no vaguma zve veciashira mupfupo. Pavanonga vano murangariro wakadari, zvinovaita kuti vavangisire.

12. Jehovha anotigondesenyi?

¹² Jehovha ngo unyasha hwake, anogondisa vashandiri vake vanogumisa kugogoma kwavo kuti vanozoashira mupfupo wo: Upenyu ucikaperi kudenga kana muparadhiso pasi pano. Bhaibheri rinotipa masoko manganani ngo pamusoro po mupfupo wondhowo, izvi zvinotibesera kuziva kuti upenyu hwedu unozova unoshamaisa zvakadini kumbejiyo! Vetero yedu painoramba iri mu murangariro no mu mwoyo, atizotenderi ciri cese kuti citikhugunye, towa totama kumukazve.

13. Ngocapi ciro catinaco cicina vaya vanogogoma pa muphikizano?

¹³ Vagogomi vo Gresiya yo kare, vakadikana kuhwisana no zvineso zvakati kuti, inga kuremba no kuhwaja. Ivona vaidikana basi kubatisisa zvovakajijiswa no simba ravo. Inga vagogomi ava, itusu takajijiswa manera atingagogoma mu gwanja ro Cikristu. Asi itusu tino ciro cavacikana: Tino simba ricikaperi rinovha kuna Jehovha. Kudari tikathemba Jehovha, iyena aazotijijisi basi, asi anotipa simba!—1 Pedru 5:10.

14. Kuitisa kudini 2 VaKorinto 12:9, 10, inotibesera patinosongana no zvineso?

¹⁴ Pauro wakadikana kuhwisana no zvineso zvakawanda maningi. Kusiyapo kutukwa no kuteverehwa ngo vamweni, nguva jimweni waitojizwavo wakaremba. Cimwenizve, waihwisanazve no zvaaidanijaya kuti “muzwa mu muviri.” (2 VaKorinto 12:7) Asi, Pauro aacaivonepi zvineso zvake inga thangwe ro kusiya kushandira Jehovha. Iyena waizvivona inga mukana wo kuthemba Jehovha. (Verenganyi 2 VaKorinto 12:9, 10.) Ngo kuva no mavonero akadaro, Pauro wakabeswa ndi Jehovha pa zvineso zvake zvese.

15. Kudari tikatevejera muezaniso wa Pauro, tinozovonenyi?

¹⁵ Itusu tingatotukwavo kana kutoteverehwa. Kangaije tiri kuhwaja kana kuti tinojizwa takaremba. Asi, kudari tikatevejera muezaniso wa Pauro, tinozovona kuti zvineso zvese zvatinosongana nazvo, zvinotipa mukana wo kuvona kuti Jehovha, anotida zve anotibesera.

16. Pikija pamunonga mecihwaja, zvicinyi zvamungaita?

¹⁶ Imwimwi makavata ngo kuhwaja kana munofamba ngo kadera yo marodha here? Muri kuzwa inga kuti mukumbo jenyu jakaremba kana kuti amucavoni ushoni here? Kudari ndizvona zvamuri kusongana nazvo, kureva kuti imwimwi mungakwanisavo kugogoma no majaha kana vaya vano uhomi uri nani here? Ndizvona kuti mungazvikwanisa! Hama zinji jaavasharuka kana jiri kuhwaja jiri kukwanisa kugogoma ngo gwanja rinoendesa ku upenyu. Asi, ivona vanozviziva kuti ndi Jehovha anokwanisa kuvapa simba kuti vaenderere mberi vecigogoma. Pikija no zvineso zvavanosongana nazvo, hama iji jinozwa musongano jecishandisa foni kana kutojivona jeciitwa ngo mu interneti. Ijona jinoenderera mberi jecicumaera mamedhiko, mafurumero no ukama.

17. Jehovha anovona kudini vaya vano zvineso zvo uhomi?

 ¹⁷ Mucatendera kuti kusuruvara kana kutama kwenyu kukwanisa kuita zvimweni, kumukhohwese kuti imwimwi amucafaneri kwenderera mberi mecigogoma mu gwanja rinoendesa ku upenyu. Jehovha anomuda ngo ndava yo rutendo hwamunahwo no kucungirira kwamunoita. Pa mukuvo wakadari, imwimwi munoda maningi kubesehwa ndi Jehovha zve iyena aazomusii. (Nduyo 9:10) Mukusiyana, Jehovha anozoramba ari phedo nemwi. Vonanyi basi zvakananga imwe hambzaji ino zvineso zvo uhomi: “No zvineso zvese zvandinazvo wari, andiwani mukana wo kucumaera. Asi inini ndinozviziva kuti zvishoma zvandinokwanisari kuita zvinodakajisa maningi Jehovha zve izvo zvinodikajisavo.” Rangariranyi muezaniso wakasiiwa ndi Pauro pomwe no magama ake anodakajisa, paakati: “Inini ndinodakara mu kurembejeka, . . . Ngokuti ndikava wokurembejeka, ndiri wo kuvanga.”—2 VaKorinto 12:10.

18. Ngozvapi zvineso zvinganesa maningi kuzwisisa?

¹⁸ Vamweni vari kugogoma mu gwanja ro upenyu, vanosongana no zvineso zvakasiyana-siyana. Vanosongana no zvineso zvicikakwanisi kuvoneka nee azvizwisisiki ngo vamweni. Inga muezaniso, kuhwisana no kusuruvara kana kuthimwa-thimwa kukuru. Ngenyi zvineso izvi zvinganesa maningi? Ngokuti, mundhu paanoguka mukono kana paanofamba ngo kadera yo marodha, vandhu vese vanokwanisa kumuvona zve vanoita zviri zvese kuti vamubesere. Asi, mundhu anohwisana no ndhendha yo mu musoro kana yo kugara akasuruvara, kutambujika kwake akuvoneki maningi. Kuhwajihwa kwake akuzivi kusiyana no kuhwajihwa kuno mundhu wakaguka mukono, asi iyena kangaije aashiri rudo no kutajwa ushoni kwaanofanera.

19. Tinojijenyi ngo muezaniso wa Mefibhosheti?

¹⁹ Kudari muno zvineso zvo uhomi zve munovona kuti vandhu avamuzwisisi ushoni, muezaniso wa Mefibhosheti unozomuvangisa maningi. (2 Samueli 4:4) Kusiyapo kuva cirema basi, iyena wakashaisha kutajwa ndi Mambo Dhavhidhi. Mefibhosheti aacainga aita zviro zvakashata kuti asongane no zvineso izvi. Pikija zvakadaro, aazivi kuva no mazwiro acikabesi. Mukusiyana, wakabatikana maningi pa zviro zvaushoni zvaiitika mu upenyu hwake. Mefibhosheti waidakara maningi ngo unyasha waakakhombijihwa ndi Dhavhidhi kareko. (2 Samueli 9:6-10) Ngo iyo ndava, Dhavhidhi paakashaisha kumutaja, Mefibhosheti wakavona zvese zvaibatanijwepo. Iyena aazivi kutendera kuti kuposa kwa Dhavhidhi kumuite mundhu wakashata. Iyena aazivi kupa ndava Jehovha ngo zvakaita Dhavhidhi. Mefibhosheti, wakabatikana maningi pa zviya zvaizokwanisa kuita kuti abesere mambo wakazojwa wa Jehovha.  (2 Samueli 16:1-4; 19:24-30) Kuti tibesereke ndizvona, Jehovha wakaita kuti muezaniso wa Mefibhosheti utahwe mu Bhaibheri.—VaRoma 15:4.

20. Vamweni vanopsasiswa kudini ngo kuthimwa-thimwa, asi vangava no cokwadi cenyi?

²⁰ Hama no hambzaji jimweni jinohwisana no kuthimwa-thimwa, jinonyangajwa maningi zve ajijizwi ushoni kugara phedo no vandhu vamweni. Kwavari, zvinonesa maningi kugara pano vandhu vakawanda. Pikija zvakadaro, vanoviya kumusongano nguva jese no kwenda ku magungano ese. Zvinovaneserazve, kubhuya no vandhu vavacikazivi, azvinenyi hazvo, vanobhuya no vandhu vondhovo pavanonga vecicumaera. Kudari ndizvona zviri kumuitikira, ivanyi no cokwadi co kuti amuripi mega. Vazinji vari kuhwisanavo no zvineso zvakafanana. Ceujanyi kuti Jehovha, ari kudakara maningi ngo kumuvona meciita zvese zvamunokwanisa kuti mumushandire. Ngo kutama kwenyu kuremba kushandira Jehovha, muri kuvonesa kuti Jehovha ari kumukomborera no kumupa simba ramunoda. * (VaFilipi 4:6, 7; 1 Pedru 5:7) Kudari no zvineso zvamunosongana nazvo muri kwenderera mberi mecishandira Jehovha, ivanyi no cokwadi cokuti iyena anodakara maningi ndimwi.

21. Ngo besero ra Jehovha, tese tinozokwanisa kuitenyi?

²¹ Zvinodakajisa ngo zvo kuti, pano musiyano pa kugogoma kwatiri kuita inga Makristu no kugogoma kunoitwa ngo vo muphikizano, vakanangwari ndi Pauro. Kugogoma kwaiitwa mu nguva jo Bhaibheri, ndi mundhu umwe basi waiashira mupfupo. Mukusiyana, pa kugogoma ko Cikristu, vese vaya vanocungurira, vanozoashira mupfupo wavo, upenyu ucikaperi. (Johani 3:16) Cimwenizve, kugogoma kuri kuitwari ngo vazinji nyamasi uno, vandhu vanogogomaro vanodikana kuva no uhomi hwakanaka, vakatama kuva vakadaro, avazokwanisi kuwina. Kuveni pa kugogoma ko Cikristu, asipi vese vano uhomi hwaushoni, pikija zvakadaro, tese tiri kucungirira. (2 VaKorinto 4:16) Ngo besero ra Jehovha, tese tinozopejisa kugogoma kwedu!