Ngenyi akuna anotendehwa kudira mabhuku o Zvapupu zva Jehovha mu saiti imweni kana mu redhi sosiari?

Vandhu vamweni vanorangarira kudari, ngokuti tinopekeja mabhuku edu acikapagahwi, ivona vangamakhopa kana kumadira mu saiti jimweni kana mu redhi sosiari. Asi, izvi zvingabara zvineso zvikuru kamare zve zvinohwisana no Mutemo wo Kushandisa * (vonanyi masoko o pasi) jo saiti yedu. Mutemo iji jinojekesa ngo kunanga kuti apana anotendehwa “kudira pikica, mabhuku, zvitatijo, ndumbo, mavhidhio, kana mabhuku ecibva mu saiti iyi kana mu Interneti (kubatanijavo saiti iri yese, saiti yo kutumirana madhukumento, vhidhio kana redhi sosiari).” Ngenyi mutemo iji jinodikana?

Zviro zvese zviri mu saiti yedu zviri pasi po mutemo yo veno vazvo. Izvi zvinosisira ngokuti zvinobesera kuti zvitame kushaisha kushandiswa. Vapanduki no vandhu vamweni vanoda kukhuvaza basa redu vangadira mabhuku edu mu saiti javo kuti vakwevere Zvapupu zva Jehovha no vamweni. Asi, mu saiti jondhojo ivona vanodira zviro zvinoita kuti vandhu vatange kukana-kana. (Nduyo 26:4; Mazwi Akangwara 22:5) Vamweni vanoshandisa zvinowanika mu mabhuku edu kana citatijo co jw.org pa kuita zviziviso, vecitengesa zviro kana zvimucini zvo mu nyara. Asi, ngo ndava yo kuti mabhuku edu kana citatijo cedu zvakangwaririhwa ngo mutemo, tingaenda ku utongi zve tovaimisa zvavari kuitaro. (Mazwi Akangwara 27:12) Asi, utongi aukwanisi kutibesera kudari tikatendera kuti vandhu vamweni, pikija hama jedu, jidire mabhuku edu mu saiti jimweni kana vashandise citatijo co jw.org kuti vatengese zviro.

Kudari tikabhashari mabhuku edu mu saiti imweni iciripi jw.org, zvinozova ngozi. Jehovha anotipa zvokuha zvo kumujimu acishandisa basi “muranda wakagondeka no wakangwara.” (Mateu 24:45) “Muranda” uwu unoshandisa basi saiti iji jakatendehwa kuti jitipe zvokuha zvokumujimu—www.pr418.com, tv.pr418.com, no wol.pr418.com. Zve tino apirikativho ndhatu basi jakatendehwa kuitira zvimucini zvo mu nyara—JW Language^®, JW Library^®, no JW Library Sign Language^®. Mu saiti iji no apirikativho iji, atizowani zviziviso zviri zvese kana ciri cese haco cinobva mu nyika ya Sathana. Kudari tikabhashari mabhuku edu mu saiti jimweni kana apirikativho jimweni, zvingaita kuti zviripo zvacinjwa mu njira iri yese.—Nduyo 18:27; 19:9.

Mukuengejera, kudari tikadira zviro mu saiti jo kuti vandhu vangananga mavonero avo, izvi zvingaita kuti vapanduki no vamweni vashore sangano ra Jehovha. Hama jimweni jinopipana no vandhu vakadaro zve zvondhozvo zvinoita kuti Jehovha atame kukujwa. Mabhuyo akadaro ngo mu Interneti asipi njira kwayo yo kuita kuti vandhu vacinje murangariro wavo no kuvabesera kuti vazwisise cokwadi. (1 Timoti 6:3-5; 2 Timoti 2:23-25) Cimweni ngo cokuti, vandhu vamweni vanoita saiti javo no redhi sosiari, zvovoneka inga kuti jo sangano kana jo hama jo Mukhumbi Unotonga. Asi, ngo zvo kunyepa. Na umwe hake wo vo Mukhumbi Unotonga ano Saiti yake kana konta iri yese mu redhi sosiari.

Patinobvunja vandhu kuti vanghwine mu jw.org, tinobesera kucumaera “vangeri ro umambo.” (Mateu 24:14) Saiti jedu no apirikativho jedu jiri kuramba jiciita nane. Tinoda kuti vese vabesereke ndizvona. Ngokudaro, tinotendehwa kutumira mabhuku edu ngo e-mail kana kuvatumira link kuti vanghwine mu saiti yedu. Mu njira iyi tinotungamirira vandhu ku cinyuke cimwe cega, cinoshandiswa ndi Jehovha kuti citipe cokuha co kumujimu, “muranda wakagondeka no wakangwara.”