1. Isaia wakaporofitenyi ngo pamusoro pa Jesu zve ngenyi izvi zvinotivangisa?

CIPOROFITA ca Isaia ngo pamusoro pa Jesu Kristu cinotivangisa zve cinotipa vetero. Isaia wakaporofita kuti Jesu aacaizotonga “vandhu inga bzo vanovoneka, aazoimisiri ngokuteveja bzaanozwa” waizotonga “vakaremba ngo kururama.” (Isaia 11:3, 4) Ngenyi izvi zvinotivangisa? Ngokuti tiri kupona mu nyika yakazara ngo mukheto zve vandhu vanotongana ngocavo veciteveja zvavanovona. Zvokadi kamare, tinoda mutongi wakakwana, Jesu, iyena aazotitongi eciteveja mavonekero edu o kunja!

2. Jesu wakatipa mupango wapi zve tinozobhuyenyi pa musoro uno?

² Njiku jese, tino mavonero akasiana ngo pamusoro po vamweni. Asi, itusu takasiana na Jesu uwo wakakwana, ngokudaro, mavonero edu aazivi kukwana. Zvakareruka kukwevehwa ngo zvatinovona. Asi, Jesu wakapa mupango uwu, unoti: “Mucatonga ngokuteveja bzokunja basi! Tonganyi ngokuteveja  ururami.” (Johani 7:24) Ngokudaro, Jesu anoda kuti tive inga ndiyena zve titame kutonga vamweni ngo kuteveja mavonekero avo. Pa musoro uno, tinozobhuisana ngo zviro zvitatu zvingakwevejera mazano edu: Ganda ro mundhu kana kwaakabahwa, mutengo wo mare yaanayo zve mupira wake. Pa shwiro imwe nga imwe, tinozojija kuti tingazwira kudini Jesu no kutama kutonga vamweni teciteveja mavonekero avo.

3, 4. (a) Ngenyi Pedru wakacinja mavonero ake no vo Majinja? (Vonanyi pikica yo kutanga.) (b) Cokwadi capi cipsa cakajijisa Jehovha kuna Pedru?

³ Rangariranyi mazwiro akava no mupostori Pedru paakakumbihwa kuti aende Sezareya ku muzi ko umwe mwanarume wo Majinja, waidanwa Kornerio. (Maitiro o Vapostori 10:17-29) Pedru wakakura ecitenda kuti vo Majinja vainga vakangora. Asi, kuno zviro zvimweni zvakaitika zvakamuita kuti acinje murangariro wake. Inga muezaniso, iyena wakava no civoniso caibva kuna Mwari. (Maitiro o Vapostori 10:9-16) Mu civoniso, Pedru wakavona ciro caidari inga nguvo icibva mugore, yaizara ngo zvinyama zvaivoniwa inga kuti zvakangora. Perapo, izwi rakamubvunja kuti: “Pedru, mukai. Urayai, uhe.” Pa bvaza ndhatu, Pedru wakaramba. Pa bvaza imwe nga imwe izwi rainanga kuti: “Ucadana cakangora, cakaceneswa ndi Mwari.” Pakupera kuva no civoniso, Pedru aazivi kuzwisisa kuti izwi raieja kumubvunjenyi. Pasure pazvo, vatumwi vakabva ka Kornerio vakaguma. Mujimu mucena wakatungamirira Pedru kuti aenda ku muzi kwa Kornerio, ngokudaro, wakaenda no vatumwi.

⁴ Kudari Pedru waitonga “ngokuteveja bzokunja basi,” iyena acaizoendepi ku muzi kwa Kornerio. VaJudha avacaienda ku muzi ko vo Majinja. Waro ngenyi Pedru wakaenda? Pikija wainga no mukheto no vo Majinja, civoniso caakava naco pomwe no ndhungamiro yaakapuwa ngo mujimu mucena, zvakacinja murangariro wake. Pedru naapera kupurukira Kornerio, iyena wakananga kuti: “Ndabziziva bzakadi kuti Mwari aasani mundhu, kaveta mu nyika iriyese, ndiani anomuthya no kuita bzakarungama, anomudakajira.” (Maitiro o Vapostori 10:34, 35) Kuzwisisa kupsa uku kwakashamaisa maningi Pedru zve kwakapsasa maKristu ese. Kuitisa kudini?

5. (a) Jehovha anoda kuti maKristu ese azwisisenyi? (b) Pikija tinoziva cokwadi, mazwiro api atingava nao?

⁵ Jehovha wakashandisa Pedru kuti abesere maKristu ese kuti azwisise kuti Iyena aakheti mundhu. Kuna Jehovha, mukhaindi wo ganda redu, nyika, jinja kana ndumi yedu, azvisisiri maningi. Tikathya Mwari no kuita zvakanaka, tinotendehwa ndiyena. (VaGalàsia 3:26-28; Apokalipsi 7:9, 10) Kangaije munotozviziva izvi. Asi, tingati kudini, kudari imwimwi makakurira mu nyika kana pa mbhuri yo kuti vazinji vainga no mukheto? Pikija mungarangarira henyu  kuti amuna mukheto, zvingaitika kuva no mazwiro o mukheto here? Nee Pedru naapera kubesera vamweni kuti vavone kuti Mwari aakheti, iyena waindokhombija mukheto. (VaGalàsia 2:11-14) Waro, tingazwira kudini Jesu zve tosia kutonga vamweni ngo mavonekero avo?

6. (a) Zvicinyi zvingatibesera kubvita mazwiro o mukheto? (b) Ripoti yo imwe hama iri mukuru, yakakhombijenyi ngo pamusoro payo?

⁶ Kuti tivone dangani tino mazwiro ari ese o mukheto, tinodikana kujipopora pacedu. Tinodikana kuezanisa mavonero edu no zvatinojija mu Soko ra Mwari. (Nduyo 119:105) Tingatobvunjisavo shamwari yedu dangani iri kuvona ciri cese cinokhombija kuti tino mukheto, wo kuti tega atikwanisi kuzvivona. (VaGalàsia 2:11, 14) Tingatoguma pa kurovejana no mazwiro awo, zvokuti atizozvivonizve kuti tino mukheto. Ndizvona zvakaitika no imwe hama iri mukuru. Iyona yakatara ripoti ngo pamusoro po varovorani vanoshanda ngo simba mu nguva yakazara. Mwamunevo vainga vo jinja raivoniwa ngo vazinji inga rakaderera. Hama iyi yakatara zvizinji zvakanaka ngo pamusoro po mwamuna vaya, asi iyona yakapejisa ecinanga kuti pikija hama iyana yainga yo jinja raivoniwa ngo vamweni inga rakaderera, manera oyaita zviro no manera oyaipona zvaibesera vamweni kuzwisisa kuti kuva wo jinja riya, azvirevi kuva ano umbhwa zve ano mugariro wakaderera, inga zvovanoita vazinji vo jinjero. Tinojijenyi? Azvinenyi tino mutoro jakawanda zvakadini mu sangano ra Jehovha, tinodikana kuzvipopora pacedu no kutenda besero kuitira kusota dangani ticino mukheto uri wese. Ngozvapi zvatingaitazve?

7. Tingatatijisa kudini kuti takafunungura ‘mwoyo jedu’?

⁷ Kudari tikafunungura “mwoyo wedu,” tinozobvisa mukheto todira rudo. (2 VaKorinto 6:11-13) Munodakarira basi kupeja nguva no vandhu vo jinja renyu, vo nyika yenyu kana vo ndumi yenyu here? Kudari ndizvona, ejanyi kupeja nguva no vamweni. Mungakoka hama no hambzaji jinobva ku ndau jakasiana-siana kuti vashande nemwi mu basa ro kucumaera. Kana mungavakoka kuti vaviye ku muzi kwenyu kuti muhe navo. (Maitiro o Vapostori 16:14, 15) Mu kufamba ko nguva, mwoyo wenyu unozozara ngo rudo zvokuti amuzovi no ndau kuitira mukheto. Wari ngatibhuisane ngo divi rimweni ratingatonga “ngokuteveja bzokunja basi.”

8. VaLevi 19:15 ingatijijisenyi ngo pamusoro po mavonero atinoita mukhupuki kana murombo?

⁸ Ukhupuki kana urombo wo mundhu ungapsasa mavonero atinomuita. VaLevi 19:15 inoti: “Ucazokheta mundhu, wecisia murombo; ucazothya ukuru hwo mundhu; unozotonga mudoni wako ngo kururama.” Ukhupuki kana urombo hwo mundhu ungapsasisa kudini manera atinomuvona?

9. Soromona wakatara cokwadi capi cinosuruvarisa zve cinotijijisenyi?

 ⁹ Soromona wakafemehwa kuti atare cokwadi ici cinosuruvarisa: “Varombo vanonyenywavo ngo vocigarisanovo, asi mukhupuki ano xamwari jakawanda.” (Mazwi Akangwara 14:20) Mazwi akangwara aya anotijijisenyi? Kudari tikatama kungwarira, tinozoda kuita ushamwari no hama jakakhupuka haiwa no varombo. Ngenyi i ngozi kutonga vandhu tecicijikira pa zvavanazvo kana zvavacikana?

10. Jakobo wakangwaja maKristu ngo pamusoro penyi?

¹⁰ Kudari tikatonga hama jedu tecicijikira pa zviro zvavanazvo, tingaita kuti ungano iparajane. Izvi zvakaitika mu ungano jimweni jo muzana ro kutanga zve Jakobo wakangwaja maKristu ondhowo ngo pamusoro pazvo. (Verenganyi Jakobo 2:1-4.) Atidikani kutendera kuti ungano yedu iparajane. Waro, tingasiisa kudini kutonga vandhu tecicijikira pa zviro zvavanazvo?

11. Zviro zvo kunyama zvinopsasa ushamwari hwo mundhu na Jehovha here? Sananguranyi.

¹¹ Tinodikana kuvona hama jedu inga Jehovha anojivona. Mundhu aasisiri kuna Jehovha ngokuti wakakhupuka kana i murombo. Ushamwari wedu na Jehovha aufiri pa zviro zvatinazvo, dangani tino maningi mare kana zviro zvo kunyama. I cokwadi kuti Jesu wakananga kuti, “bzinonesa  mukhupuki kunghwina mu Umambo hwo mugore,” asi, aazivi kunanga kuti azvicaizokwanisika. (Mateu 19:23) Jesu wakanangazve kuti: “Muno mucena imwimwi vamasikini, ngokuti Umambo hwa Mwari ngo hwenyu.” (Luka 6:20) Asi, izvi azvidi kunanga kuti varombo vese vaizopurukira Jesu zve vaizoashira makomborero anosisira. Kwainga no varombo vazinji avacaitevera Jesu. Cokwadi ngo cokuti, atidikani kuvona mundhu kuti ano ushamwari na Jehovha kana kuti haiwa takacijikira pa zviro zvavanazvo.

12. Bhaibheri rinojijisenyi ku vakhupuki no varombo?

¹² Pakati po vandhu va Jehovha, pano hama no hambzaji jakakhupuka zve jimweni i varombo. Asi vese vanoda Jehovha zve vanomushandira ngo mwoyo wese. Bhaibheri rinonanga kuti vakhupuki avadikani “kujikukumuja no kugonda uthende hunopera; ngavagonde Mwari.” (Verenganyi 1 Timoti 6:17-19.) Soko ra Mwari rinongwajavo vashandiri vese va Jehovha, vakhupuki no varombo, kuti i ngozi kudisa mare. (1 Timoti 6:9, 10) Patinovona hama jedu inga ndi Jehovha, atizojitongi tecicijikira pa zvavanazvo kana zvovacina. Waro, tingati kudini ngo mupira wo mundhu? Ndi thangwe ro kutonga ndirona vamweni here?

13. Bhaibheri rinotijijisenyi ngo pamusoro po kureremeja vasharuka?

¹³ Kazinji Bhaibheri rinonanga kuti tinodikana kureremeja vasharuka. VaLevi 19:32 inoti: ‘Munozomuka pambeji po muxaruka, munozoreremeja madoda, munozothya Mwari wenyu. Ndini Tenji.’ Pana Mazwi Akangwara 16:31, Baiberi Mazwi Akacena aMwari, panotibvunja kuti “musoro uno invhi, i junguja ro useji; kudari riri mu njira yakarurama.” Pauro wakabvunja Timoti kuti atame kushora vasharuka asi avataje inga majibaba. (1 Timoti 5:1, 2) Pikija Timoti wainga no mutoro yakakhwirira kupinda hama jainga jaavasharuka, iyena nguva jese waijizwira usizi zve waijireremeja.

14. Ndi papi patingadikana kubesera mundhu waamusharuka kupinda itusu?

¹⁴ Waro, kudari musharuka akashaisha ngo cabomo kana kuita ciri cese cicikadakajisi Jehovha keni? Jehovha aazoregereri mushaishi anoshaisha ngo cabomo, pikija mundhuwo waamusharuka zve anoreremejwa. Vonanyi ciambi cinowanika pana Isaia 65:20, Shanduro yeNyika Itsva: ‘Mushaishi anozotukwa pikija ano zana ro makore.’ Tinowanavo ciambi cakafanana pa civoniso ca Ezekieri. (Ezekieli 9:5-7) Cinosisira maningi ndi kureremeja Jehovha, Musharuka wo Mazuva. (Danieli 7:9, 10, 13, 14) Nderemejo yatinayo naye inozotipa cicunge catinoda kuti tibesere mundhu anoda besero, azvinenyi mupira wake.—VaGalàsia 6:1.

15. Tinojijenyi ndi mupostori Pauro ngo pamusoro po kureremeja hama jo cidoko?

¹⁵ Kudari hameyo i mujaha keni? Izvi zvinoreva kuti aifaneri kureremejwa here? Haiwa. Pauro wakatarira Timoti kuti: “Ucaxohwa ngo ndava yo kuita mujaha. Kaveta, pa nyasi po vatendi, ivai muezaniso ngo mazwi, maitiro, unyaxa, rutendo no uceni bzako.” (1 Timoti 4:12) Pauro paakatara izvi, zvingaita kuti Timoti wainga no 30 o makore. Asi Pauro wainga wakamupa mabasa anosisira maningi. Tinojijenyi? Atidikani kutonga hama jo cidoko ngo kusota mupira  wajo. Rangariranyi ngo zvese zvakaita Jesu paainga no 33 o makore!

16, 17. (a) Vakuru vanodikana kucijikira papi kuti vavone dangani hama inokwanirisa kuti ive mubatiri anoshandira kana mukuru? (b) Mavonero o mundhu ega kana zvirovejeso zvo mu ndharaundha zvingahwisana kudini no zvinonanga Matahwa?

¹⁶ Ku ndharaundha jimweni, vandhu avareremeji majaha. Inga muviyo, vakuru vamweni, vangatama kukonokeja mujaha kuti ashande inga mubatiri anoshandira kana mukuru, pikija ano zvikwaniriso zvinodikana. Asi, Bhaibheri apana parinonanga kuti hama inodikana kuva no mupira wakati, kuti igajwe inga mubatiri anoshandira kana mukuru. (1 Timoti 3:1-10, 12, 13; Tito 1:5-9) Kudari mukuru ari wese akananga kuti zvinodikana kuithwa kudari ngo ndava yo ndharaundha yake, aaripi kutevera Soko ra Mwari. Vakuru vanodikana kucijikira mu ndhungamiro jo Soko ra Mwari kuti vavone kuti mujaha uwu anoita kukonokeja kana kuti aaiti, asi avadikani kucijikira pa mavonero avo kana pa zvirovejeso zvo mu ndharaundha mwavo.—2 Timoti 3:16, 17.

¹⁷ Kudari vakuru vakatama kuteverera ndhungamiro jo Bhaibheri jinobhuya ngo kugaja vabatiri vanoshandira kana vakuru, vaizoita kuti hama ino zvikwaniriso itame kugajwa. Mu nyika imweni, umwe mubatiri anoshandira waiita ushoni mabasa anosisira zve vakuru vakavona kuti ano zvikwaniriso zvinowanika mu Bhaibheri kuti ave mukuru. Asi, vakuru vamweni vaavasharuka vakananga kuti waivoneka kuva mujaha maningi kuti ave mukuru, ngo iyo ndava avazivi kumukonokeja. Zvinosuruvarisa ngo zvokuti, hama iyi aizivi kugajwa, ngo ndava yo mavonekero ayo. Zvinovoneka inga kuti vazinji vano murangariro wakadari mu mativi mazinji o nyika. Zvinosisira maningi kuthemba Bhaibheri kusiapo pa mavonero edu kana mu zvirovejeso zvo mu ndharaundha mwedu. Perapo, tinozozwira Jesu zve totama kutonga vamweni tecisota mavonekero avo.

18, 19. Zvicinyi zvinozotibesera kuvona hama jedu inga ndi Jehovha?

¹⁸ Atizivi kukwana, asi tingajijira kuvona vamweni tecingakheti, mukutevejera Jehovha. (Maitiro o Vapostori 10:34, 35) Ngokudaro, nguva jese tinodikana kunasa kusotesesa zviceukijo zvo mu Soko ra Mwari. Patinozvishandisa, tinozwira mupango wa Jesu wo kutama ‘kutonga ngo kuteveja bzokunja basi!’—Johani 7:24.

¹⁹ Sambiri pano Mambo wedu, Jesu Kristu, anozotonga vandhu vese. Kutonga kwake kunozocijikira mu ndhungamiro jakarungama ja Mwari, haiwa pa zviro zvaanovona kana zvaanozwa. (Isaia 11:3, 4) Zvokadi kamare tiri kuvetera nguva iyi inoshamaisa!