NGOKUTI upenyu uri kunesa maningi mu “njiku jokupejisira” jino, tinodikana kuva tinosengerera maningi kupinda kare. (2 Timoti 3:1-5) Vandhu vazinji vakatitendeneja avasengereri. Ivona vanozvikuja, vanodakarira kupipana zve avajibati. Ngokudaro, tinodikana kuzvibvunjisa kudari: ‘Ndiri kuva acikasengereri inga vandhu vakanditendenejari here? Zvinoda kurevenyi kuva ndinosengerera kamare? Ndingaitenyi kuti kusengerera kuve divi ro undhu hwangu?’

Gama ro kuti “kusengerera” rinoda kurevenyi inga rinonangwa mu Bhaibheri? Rinoreva zvizinji kupinda kupeja cineso basi. Mundhu anosengerera anocungirira no cinangwa, kunanga kuti, anovetera kuti zviro zvinozoita nane. Iyena aandojirangariri ega basi, asi anorangarira ngo pamusoro po mazwiro o vamweni, pikija o vaya vanonga vamunyangaja kana vashaisha kumutaja. Iyena anovetera kuti ushamwari hwake navo unozoita nane. Azvitikahamaji kuti Bhaibheri rinonanga kuti kusengerera kunobva ku rudo. * (Vonanyi masoko o pasi.) (1 VaKorinto 13:4, Baiberi Mazwi Akacena aMwari) Kusengerera i rimwevo divi ro “mucero wo mujimu.” (VaGalàsia 5:22, 23, Shanduro yeNyika Itsva) Waro, tinodikana kuitenyi kuti tive vanosengerera kamare?

Kuti tigume pa kuva vanosengerera tinodikana kuita mukumbiro kuti tibesehwe ngo mujimu wa Jehovha, waanopa vese vanomuthemba. (Luka 11:13) Mujimu wondhowo unosimba maningi, asi tinodikana kuita mukuzwirana no mukumbiro jedu. (Nduyo 86:10, 11) Izvi zvinoreva kuti tinodikana kuita zvatinokwanisa kuti tikhombije kusengerera njiku jese no kuita kuti kuve divi ro undhu hwedu. Asi, nguva jimweni tingaposa. Zvicinyi zvingatibesera?

Tinodikana kujija no kutevejera muezaniso wakakwana wa Jesu. Mupostori Pauro paakavereketa ngo pamusoro po “undhu hupsa,” unobatanija kusengerera, iyena wakativangisa eciti: Siyani kuti “rugarisiko hwa Kristu hugare mu mwoyo menyu.” (VaKolosi 3:10, 12, 15) Kuti tiite kudaro, tinodikana kutevejera muezaniso wa Jesu no kuthemba kamare kuti Mwari anozonasirira zviro pa nguva kwayo. Kudari tikathemba kudaro, atizosiyi kusengerera kwatinako, azvinenyi zvicinyi zviri kuitika.—Johani 14:27; 16:33.

Tese tiri kuda kuti nyika imbza iviye ngo kukasika kamare. Asi tinoengejera kusengerera patinoceukija kuti Jehovha wakasengerera maningi na itusu. Bhaibheri rinotivangisa kudari: ‘Tenji aanonoki kuteveja cigondiso cake, inga vanorangarira vamweni. Kaveta ano unyasha na imwimwi; aadi kuti mundhu afe, anoda kuti vese vaphinduke mwoyo.’ (2 Pedru 3:9) Ngo kudaro, patinoceukija ngo pamusoro po kusengerera ka Jehovha na itusu, tinozovavo vanoengejera kuva vanosengerera no vamweni. (VaRoma 2:4) Ngo japi mugariro jimweni jinoda kuti tisengerere?

Njiku ngo njiku, tino mugariro jakawanda jinoda kuti tive vanosengerera. Inga muezaniso, zvinoda  kusengerera kuti titame kugura mundhu anonga ecivereketa, patinonga tino ciri cese cinosisira kuti tinange. (Jakobo 1:19) Zvinodazve kusengerera patinonyangajiswa ngo ari wese. Kusiyapo kuita zviro mukutama kusengerera, zviri nane kuceukija kuti Jehovha na Jesu vanosengerera marembo edu. Ivona avasotesesi zviro zvidoko zvatinoposaya. Kusiyapo zvondhozvo, ivona vanosotesesa mugariro jakanaka jatinajo zve no kusengerera kwese, vanotipa mukuvo kuti ticinje.—1 Timoti 1:16; 1 Pedru 3:12.

Tinodikanazve kusengerera patinobvunjwa ngo ari wese kuti tananga kana kuita ciri cese cakashata. Kangaije pa kutanga tingakhugunyika tojiinikira. Asi Soko ra Mwari rinotibvunja kuti tiite mu njira yakasiyana. Irona rinoti: “Kusengerera, kwakanaka kupinda kujikuja. Ucakasika kunyangajwa, ngokuti unyangaji hunogara mu mwoyo wo benji.” (Mucumaeri 7:8, 9) Ngo kudaro, pikija tikapumbhwa zviciripi izvona kamare, tinodikana kusengerera zve tonasa kurangarira ticito tadavira. Ngozvakaita Jesu paakapumbhwa zvicina shwiro.—Mateu 11:19.

Maningi-ningi vabari vanodikana kusengerera pavanonga vecida kubesera vana vavo kuti varungamise murangariro kana kuti vatize zvido zvakashata. Rangariranyi muezaniso wa Mattias, anoshanda ku Bheteri ro ku nyika yo Eskandinavhia. Paainga ari muaruki, vadoni vake vo ku cikora vaindomushora ngo ndava yo zvitendhwa zvake. Pa kutanga vabari vake avacaizviziva zvainga zveciitika. Asi pa kufamba ko nguva, vakavona kuti Mattias wainga wotanga kukana-kana zvitendhwa zvake. Babake Mattias, hama Gills vakananga kuti ivona no mujimai wavo vakadikana kuvonesa maningi kusengerera pa mugariro uwo. Mattias wakazovaita mubvunjo jakadari inga iji: “Ndiani Mwari? Kudari Bhaibheri asipi Soko ra Mwari keni? Tinozvizivisa kudini kuti zvinoda Mwari kamare kwatiri nga izvi kana izvo?” Iyena waitokwanisa kubvunjisa babake kudari: “Ngenyi ndinodikana kutongwa kudari ndikatama kuva no mazwiro pomwe no zvitendhwa zvakadari inga zvenyu?”

Hama Gills vakasanangura kudari: “Nguva jimweni mwana wedu waiita mubvunjo akanyangajwa, haiwa na inini kana na make, asi akanyangajwa no cokwadi, caaivonaya inga kuti caiita kuti upenyu hwake hunese.” Hama Gills vakabesera kudini mwana wavo? Ivona vakati: “Inini no mwanangu taigara pasi topeja nguva yakawanda tecibhuya.”  Kazinji, hama Gills vaipurutana basi no kuita mubvunjo kuti vakwanise kuzwisisa mazwiro no mavonero ake. Nguva jimweni, hama Gills vaisanangurira mwana wavo ciri cese, vomubvunja kuti arangarire ngo pamusoro paco ko njiku imwe kana kudarika, vacito vabhuyazve ngo shwiro yondhoyo. Nguva jimweni, hama Gills vaitobvunja mwana wavo kuti vaidavo njiku nganani kuti varangarire ngo pamusoro po ciri cese caainga akananga. Kubvira pa mabhuyo aya aiitwari nguva jese, Mattias wakatanga kuzwisisa kuti muripo unorevenyi no kuzwisisa kuti Jehovha anotida zve ano citendehwa co kutitonga. Babake vakananga kudari: “Zvakatora nguva zve kazinji zvainesa, asi padoko ngo padoko, rudo hwake kuna Jehovha wakatanga kukura mu mwoyo mwake. Inini no mujimai wangu tiri kudakara maningi ngo kuti takavangisira mukusengerera kuti tibesere mwana wedu paainga ecidarika pa makore ake o kuaruka no kukwanisa kubaya mwoyo wake.”

Hama Gillis no mukaji wavo pavaisengerera vecibesera mwana wavo, ivona vaithemba kuti Jehovha waizovabesera. Hama Gillis vakati: “Kazinji ndaibvunja Mattias kuti rudo hwedu hwakukura naye wakatiita kuti tiite mukumbiro kuna Jehovha kakawanda kuitira kuti amubesere kuzwisisa.” Vabari ava, vari kudakara maningi ngo kusengerera kwavo no kutama kuremba!

Itusu tinodikanavo kusengerera patinonga tecikorondha mundhu wo pa mbhuri kana shamwari ino ndhendha iri kunesa kupera. Vonanyi muezaniso wa Ellen * (Vonanyi masoko o pasi), anoponavo ku Eskandinavhia.

Makore masere adarika, mwamuna wa hambzaji Ellen vakawiswa kaviri ngo trombozi, izvi zvakaita kuti vakhuvazike mu uruzvi. Ngo ndava yazvo, ivona avacajizwi vakadakara, vakasuruvara kana kuzwira pena. Mugariro uwu uri kunesa maningi kuna hambzaji Ellen. Ivona wakati: “Zvakadikana kusengerera kamare no kuita maningi mukumbiro.” Ivona wakaengejera eciti: “Vhesi yandinodakarira maningi, inondiembejera ndi VaFilipi 4:13, iyo inoti: ‘Ndinokwanisa bzese ndiyena anondivangisa weya.’” No simba rinobva ka Jehovha no kubesehwa ndiyena, hambzaji Ellen vari kukwanisa kusengerera pa mugariro uwu.—Nduyo 62:6, 7.

Zvokadi kamare, muezaniso wakanakisisa wo kukhombija kusengerera ndi Jehovha ambhwine. (2 Pedru 3:15) Mu Bhaibheri, kazinji tinoverenga ngo kusengerera kukuru ka Jehovha. (Neemia 9:30; Isaia 30:18) Munoceukija kuti Jehovha wakadavirisa kudini Abhirahama paakamuita mubvunjo jakawanda ngo pamusoro po cisungo cake co kuparaja Sodhoma here? Jehovha aazivi kuphingaija Abhirahama. No kusengerera kwese, Jehovha wakapurukira mubvunjo no kuthimwa-thimwa ka Abhirahama. Perapo, iyena wakakhombija kuti wakapurukira kuthimwa-thimwa kwa Abhirahama zve wakamugondesa kuti aacaizoparaja Sodhoma pikija kudari mukawanika gumi ro varungami mu dhorobhemo. (Genesi 18:22-33) Nguva jese Jehovha anopurukira no kusengerera, narini iyena aapindiriji mudida!

Kusengerera ndi divi rinosisira maningi ro undhu hupsa unodikana kuva no maKristu ese. Kudari tikaita zvatinokwanisa kuti tive vanosengerera kamare, tinokuja mukorondhi wedu zve Baba wedu vokusengerera, Jehovha zve tinozova pakati po “vaya vanonakira utaka hwakagondeswa, ngo kutenda no kuvangirira.”—Vaheberi 6:10-12.