1. Tingashanda na Jehovha mu njira japi?

JEHOVHA paakapera kusika vandhu, waida kuti ivona vave vashandi doni vake. Pikija nyamasi uno vandhu avazivi kukwana, vaya vakagondeka vari kuramba vecishanda na Jehovha njiku jese. Inga muezaniso, itisu “tiri vabeseri va Mwari” patinocumaera masoko akanaka o Umambo hwake no kuita vajiji. (1 VaKorinto 3:5-9) I rukujo ukuru kusanwa ngo Musiki wo masimba ese kuti tiite basa iri rinosisira. Pikija zvakadaro, asipi kucumaera basi kunotiita kuti tishande na Jehovha. Pa musoro uno, tinozojija kuti tingashandisavo kudini naye patinobesera mbhuri yedu pomwe no vamweni mu ungano, patinoashira vafambi, patinobesera mabasa ari kuitwa ngo sangano kutenderera nyika yese zve patinoengejera basa redu pa kushandira Jehovha.—VaKolosi 3:23.

2. Ngenyi atitodikani kuezanisira zvatinoitira Jehovha no zvinoitwa ngo vamweni?

² Patinonga tecijija musoro uno, zvinosisira maningi kuceukija kuti tese takasiana. Makore edu, uhomi wedu, mugariro  wedu pomwe no kukwanirisa kwedu azvizivi kuezana. Ngokudaro, mucaezanisira zvamungakwanisa kuitira Jehovha no zvinokwanisa kuita vamweni. Mupostori Pauro wakananga kuti: “Umwe nga umwe ngaasotesese bziito bzake; pondhopo anozowana ndava yo kujikuja yena kamare, asi ngo ndava yo umweni.”—VaGalàsia 6:4.

3. Ngenyi tingananga kuti wese anokorondha mbhuri yake ari kushanda na Mwari?

³ Jehovha anovetera kuti tikorondhe mbhuri yedu. Inga muezaniso, kangaije mungada kuwana mare kuti mukwanise kupa zvinodiwa ku mbhuri yenyu. Majimai akawanda anodikana kugara kanyi kuti angwarire vana vavo. Zve vabari vedu pavanotama kukwanisa kuzvikorondha, tinodikana kuvakorondha. Izvi zvinodikana kamare. Bhaibheri rinoti: “Ndiani acikakorondhi vandhu vake, bzikuru-kuru vo muzi wake, wakarambavo rutendo, ari wakaxata mwoyo kupinda vacikatendi.” (1 Timoti 5:8) Kudari muno mutoro pa mbhuri, kangaije amukwanisi kushandira Jehovha inga zvamaizoda. Asi mucadoremba! Jehovha anodakara maningi pamunopa zvinodiwa ku mbhuri yenyu.—1 VaKorinto 10:31.

4. Vabari vangadirisa kudini zvinodiwa zvo Umambo pa kutanga zve zvicinyi zvinoitika pavanozviita?

⁴ Vabari vo ciKristu vangashanda na Jehovha ngo kubesera vana vavo kuti vave no zvido mu basa rake. Vabari vazinji vakaita zvondhozvo. Inga muviyo, pa kufamba ko nguva vana vavo vakatema civaringo co kushanda mu nguva yakazara, pikija vari ndhambo no kumuzi. Vamweni vanoshanda inga mamisionario, vamweni vanoshanda inga mapiyona kunodiwa maningi vacumaeri zve vamweni vanoshanda ku Bheteri. I zvokadi kuti vana pavanonga vari ndhambo, vabari avapeji nguva yakawanda navo inga zvovaida. Asi ivona no kutama umbau vanovavangisa kuti varambe vecishandira Jehovha kwese kwavari. Ngenyi? Ngokuti ivona vari kudakara maningi ngo kuvona vana vavo vecidira Jehovha pa kutanga mu upenyu. (3 Johani 1:4) Uzinji hwo vabari avo vanojizwa inga ndi Ana, uwo ‘wakapa’ mwana wake Samueri kuna Jehovha. Ivona vanovona kuti i rukujo ukuru kushanda na Jehovha mu njira iyi.—1 Samueli 1:27.

5. Mungabesera kudini hama no hambzaji mu ungano mwenyu? (Vonanyi pikica yo kutanga.)

⁵ Kudari mucina mutoro wakakura pa mbhuri, mungabesera hama kana hambzaji jiri kuhwaja, musharuka kana mundhu anoda besero here? Kana mungabesera vaya vari kuvakorondha here? Psakanyi mu ungano menyumo vaya vangada besero rondhoro. Inga muezaniso, kangaije kuno hambzaji iri kukorondha vabari vayo vaavasharuka. Mungapeja nguva no mbhuri yayo kuti iwanevo mukana wo kuita zviro zvimweni here? Kangaije mungabesera ari wese ngo komutora moenda naye ku musongano, kana kumubesa kootenga zviro, kana kovona mundhu kucipitari. Pamunoita kudaro, kangaije munonga mecishanda na Jehovha kuti adavire mukumbiro wavo.—Verenganyi 1 VaKorinto 10:24.

6. Tingaashirisa kudini vafambi?

⁶ Vashandi doni va Mwari vanozivika ngo kuashirana. Mu Bhaibheri, gama ro Cigiriki  rokuti “kuashira vafambi” rinoreva “kunaka mwoyo no waucikazivi.” (Vaheberi 13:2) Mu Soko ra Mwari, tingaverenga ngo muezaniso jinotijijisa kuti tingatatijisa kudini kunaka mwoyo uko. (Genesi 18:1-5) Tinokwanisa zve tinodikana kubesera vamweni nguva iri yese patinova no mukana wo kuzviita, azvinenyi i “vatendidoni” vedu kana kuti haiwa.—VaGalàsia 6:10.

7. Tinobesereka kudini ngo kuashira vashandiri vari mu nguva yakazara?

⁷ Mungashanda na Jehovha ngo kuashira vari mu nguva yakazara vanoda po kugumira here? (Verenganyi 3 Johani 5, 8.) Tikaita kudaro, ivona vanobesereka zve itusu tinobeserekavo. Bhaibheri rinodanija zvondhozvo kuti ‘kuvangisana.’ (VaRoma 1:11, 12) Vonanyi zvakaitika na hama Olaf. Pavainga vari mujaha, muvonereri wo ndharaundha acikazivi kucadha wakafambira ungano yavo zve iyena waida ndau yo kugumira, asi mu ungano mwavo amucainga no ari wese waikwanisa kumubesera. Vabari va hama Olaf avacainga Zvapupu, asi ivona vakavakumbira kuti muvonereri wo ndharaundha agumire pa muzi pavo. Ivona vakatenda, asi vakananga kuti hama Olaf vaizodikana kuvata pa kadera yo sofaa. Izvo ngozvakaita hama Olaf zve ivona avazivi kuzvivaza. Vakava no sumana yakanaka maningi no muvonereri wo ndharaundha! Mangwanani ese pavaiha matabicu vaibhuisana ngo mafundo akawanda anosisira maningi. Muvonereri wo ndharaundha wakavangisa maningi hama Olaf zvokuti vakazotema civaringo co kushandira Jehovha mu nguva yakazara. Ko 40 o makore adarika, hama Olaf vari kushanda inga misionario mu nyika jakasiana-siana.

8. Ngenyi tinodikana kunaka mwoyo pikija vamweni avabongeseri pakutanga? Ipanyi muezaniso.

⁸ Itusu tingakhombija kuti tinoda vaya vaticikazivi mu njira jakasiana-siana, pikija vakatama kutibonga pakutanga. Inga muezaniso, imwe hambzaji yo ku Shipanya yakajija Bhaibheri na Yesica, mwanakaji umweni wo ku Ekwadhori. Njiku imweni pavainga vecijija Bhaibheri, Yesica waindorira basi. Ngokudaro hambzaji yakamubvunjisa kuti ngenyi wairira. Yesica wakananga kuti acito avia ku Shipanya, iyena wainga maningi murombo. Njiku imweni iyena aacaingepi no zvokuha kuti ape mwana wake, asi wainga no kumwa basi. Yesica wakaita mukumbiro paainga ecishishijira mwana wake kuti avate. Ngo kukasika, Zvapupu zviviri zvakataka musuvo wake zve zvakamupa revhista. Asi iyena wakavapingura ngo manera akashata zve wakakhandira revhista riya, eciti: “Nga iri saja ramunoda kuti ndipe mwana wangu?” Hambzaji jakaeja kuembejera Yesica, asi aacaida kuzwa ciro. Perepo, hambzaji jakasia sestu yo zvokuha pa musuvo wake. Wari, paainga ecijija iyena wairira ngokuti wakazwisisa kuti wakarerusa  mupinguro wo mukumbiro waakaitira Mwari. Asi Yesica wainga wakasunga kushandira Jehovha. Zvakajeka kuti, kwakava no muviyo wakanaka ngo ndava yo kukova ko hambzaji iji.—Mucumaeri 11:1, 6.

9, 10. (a) Ngojapi mukana jimweni jainga no vaIziraeri kuti vazvipire? (b) Mu njira japi hama jingabesera mu ungano nyamasi uno?

⁹ Kare, vaIziraeri vakava no mukana muzinji jakasiana-siana kuti vazvipire. (Exodo 36:2; 1 Majimambo 29:5; Neemia 11:2) Nyamasi uno, mungashandisa mukana jakasiana-siana kuti mubesere hama no hambzaji jenyu mecishandisa nguva yenyu, zviro zvo kunyama no kuziva kwenyu. Pamunoita kudaro, munozodakara maningi zve Jehovha anozomukomborera.

¹⁰ Soko ra Mwari rinovangisa vanarume mu ungano kuti vashande na Jehovha ngo kushandira vamweni inga vabatiri vanoshandira kana vakuru. (1 Timoti 3:1, 8, 9; 1 Pedru 5:2, 3) Vaya vanoita kudaro vanoda kubesera vamweni mu njira jinoshanda pakunamata kwavo. (Maitiro o Vapostori 6:1-4) Makaamba kukumbihwa ngo vakuru kuti mubesere pa kupa mabhuku, kuvonerera ndima, pa kunasirira-nasirira kana kuita ciri cese here? Hama jinobesera mu njira iji jinonanga kuti jinodakajihwa maningi ngo kuita kudaro.

11. Hambzaji imweni yakabesereka kudini ngo kushanda pa basa ro kuvaka?

¹¹ Vaya vanozvipira kuti vabesere basa ro kuvaka kazinji vanoita shamwari imbza. Imwe hambzaji inodanwa Margie yakashanda mu basa ro kuvaka Nyumba jo Umambo ko makore 18. Mu mabasa ondhowo, iyona yakakwanisa kukhombijira kudakarira hambzaji jo cidoko no kujiroveja. Iyona yakananga kuti, iyi i njira yakanakisisa ku  vaya vanozvipira kuti vavangisane umwe no umweni. (VaRoma 1:12) Zvokadi, payakasotana no zvineso mu upenyu wayo, shamwari jo yakaita mu basa riya ro kuvaka jakaivangisa. Makaamba kubesera mabasa o kuvaka here? Mungashanda mu basa iri, pikija amukwanisi kuita basa riri rese.

12. Mungabesera kudini pa kupera kuitika ngozi?

¹² Tingashandavo na Jehovha ngo kubesera hama jedu kukaitika ngozi. Inga muezaniso, tingaita mupiro ngo mare yedu. (Johani 13:34, 35; Maitiro o Vapostori 11:27-30) Njira imweni yatingabesera ndiyona ngo yo kucenesa kana kutojanisa zvakaphwanyika pa ngozi. Gabriela, imwe hambzaji yo ku Poronia iyo yainga no nyumba yakaphwanyika ngo ndava yo ushau kana usore, iyona yakadakara maningi ngo kuvona hama jo ungano jo muphedo jeciviya koibesera. Painorangarira ngo zvakaitikaya, iyona inonanga kuti aineseki ngo zviro zvo kunyama zvoyakaruza, kunja kwazvo inosotesesa zvo yakawana. Iyona yakati: “Ciitiko ici jakandipa gwinyiso ro kuti kuva divi ro ungano yo ciKristu i cidakajiso cicikaezaniswi zve i cinyuke co mudakaro.” Vazinji vanoashira besero pakupera kuitika ngozi vanojizwavo kudaro. Vaya vari kushanda na Jehovha ngo kubesera hama iji vanojizwa vakadakara maningi.—Verenganyi Maitiro o Vapostori 20:35; 2 VaKorinto 9:6, 7.

13. Tingavangisa kudini rudo hwedu kuno Jehovha patinozvipira? Ipanyi muezaniso.

¹³ Imwe hambzaji inodanwa Stephanie pomwe no vacumaeri vamweni vo mu ndharaundha yayo vakashanda na Jehovha ngo kubesera Zvapupu zvakatiza kwenda ku Estadhus Unidhus ngo ndava yo hondo mu nyika mwavo. Ivona vakabesera vatizi vo nyatwa ava kuti vawane ndau yo kugara no mobhiria. Iyona yakati: “Takapsaswa maningi ngo mudakaro wavo no kubongesera ngo kuvona rudo wo ukama hwo nyika yese. Mbhuri iji jairangarira kuti itusu takavabesera, asi kunasa kunanga, ivona vakatibesera maningi kamare. Rudo hwavo, rubatano, rutendo no kuthemba kwavo Jehovha, kwakavangisa rudo hwedu na Jehovha zve izvo zvakatiita kuti tibongesere zvecibva pasi po mwoyo kamare ngo zvese zvatakaashira ngo sangano rake.”

14, 15. (a) Ngowapi wainga mugariro wo muporofeti Isaia? (b) MaKristu angatevejeresa kudini mugariro wondhowo?

¹⁴ Mwaidakarira kuengejera kushanda kwenyu na Jehovha here? Mwaizodakarira  kwenda kunodiwa maningi vacumaeri here? I zvokadi kuti itusu atidikani kucinja kwenda ndhambo kuti tive vanokova. Asi kuno hama no hambzaji jimweni jingakwanisa. Ijona jino mugariro wakaezana no muporofeti Isaia. Paakabvunjiswa ndi Jehovha kuti: “Ndingazotuma ani? Ndiani anotiendera?” iyena wakati: “Ndiri pano, nditumirenyi!” (Isaia 6:8) Imwimwi munokwanisa zve muna cido co kubesera sangano ra Jehovha here? Mu njira japi jimweni jamungabesera ndijona?

¹⁵ Jesu wakananga kudari ngo pamusoro po kucumaera no kuita vajiji: “Munda mukuru, kaveta vabati vaxoma. Kumbiranyi muno wo munda kuti atumire vabati ku munda wake.” (Mateu 9:37, 38) Mungashanda inga piyona ku ndau inodiwa maningi vacumaeri here? Kana mungabesera ari wese kuti aitevo kudaro here? Hama no hambzaji zinji jinovona kuti njira yakanaka kuti jitatije rudo hwajo kuna Mwari no ku vadoni i kuva piyona ku ndau inodiwa maningi vacumaeri. Mungarangarira njira jimweni kuti muengejere basa renyu here? Mukaita kudaro, munozodakara maningi.

16, 17. Ngojapi njira jimweni jamungaengejera basa renyu kuno Jehovha?

¹⁶ Muno cido co kushanda ku Bheteri kana pa basa ro kuvaka inga muzvipiri anoshanda nguva shoma kana njiku imwe kana njiku nganani pa sumana here? Nguva jese sangano ra Jehovha rinoda vandhu vanojipira kuti vashande kuri kwese kovangadiwa zve vanotendera kuita zvese zvavanokumbihwa, pikija vano ruzivo mu basa rimweni rakasiana. Jehovha anoreremeja ari wese ano cido co kujipira zve anoshanda kwese kuno dikano.—Nduyo 110:3, Shanduro yeNyika Itsva.

¹⁷ Mwaidakarira kuengejera kurovejwa kwenyu kuti mukwanise kushandira Jehovha zvakakwana here? Kangaije mungatara petisau kuti muende ku Cikora co Vavhangeri vo Umambo. Cikora ici cinoroveja hama no hambzaji jakaibva jiri kushanda mu nguva yakazara kuti jikwanise kushandiswa makasiana-siana ngo sangano ra Jehovha. Vaya vanoenda ku cikora ici, vanodikana kujipira kuti vashande kuri kwese kovanotumihwa. Mwaidakarira kuita zvizinji kuna Jehovha mu njira iyi here?—1 VaKorinto 9:23.

18. Ngowapi muviyo wo kushanda na Jehovha njiku jese?

¹⁸ Ngokuti tiri vandhu va Jehovha, itusu tinokova, tiri vaushoni, takanaka mwoyo zve tino rudo. Tinotaja vamweni njiku jese. Izvo zvinoviisa runyararo no mudakaro. (VaGalàsia 5:22, 23) Azvinenyi mugariro wenyu, munozodakara pa munotevejera undhu wo kukova wa Jehovha no kuva umwe wo vashandi doni vake vanosisira!—Mazwi Akangwara 3:9, 10.