PA GORE rakapera, mazana o hama kutenderera pasi pese vakagajwa inga vakuru no vabatiri vanoshandira. Kudari muri umwe wavo, zvokadi muri kudakara ngo kuziva kuti mungashandira Jehovha no hama jenyu ngo maitiro aya mapsa.

Pikija zvakadaro, ngo zvo cibarihwe kuthimwa-thimwa padoko. Jason, mukuru umweni ari mujaha, wakananga kudari: “Pandakagajwa, ndaijizwa padoko kunyiswa ngo mutoro wangu mupsa.” Mosi na Jeremia vaijizwa kuti vainga vacikakwanirisi pavakagajwa basa ibza ndi Jehovha. (Exodo 4:10; Jeremia 1:6) Kudari munojizwavo kudaro, cicinyi camungaita kuti muthembe kuti munokwanisa zve moramba mecienderera mberi? Mungajija zvakawanda ngo muezaniso wa Timoti.—Maitiro o Vapostori 16:1-3.

Kangaije Timoti wainga no 20 o makore o kubahwa paakatanga kuita basa ro kufambira no mupostori Pauro. Paakatanga kuashira mukoka uwu, zvingaita kuti Timoti wakajizwa kuti aacaikwanirisa kuti ajijise no kupa mbhangiro ngo kuti wainga ari mujaha maningi. (1 Timoti 4:11, 12; 2 Timoti 1:1, 2, 7) Asi wakaramba ecienderera mberi zve pasure po gumi ro makore Pauro wakabvunja vaFiripo kudari: “Mwa Tenji Jesu, ndinovetera kumutumira Timoti, njiku jino.” Ngenyi Pauro waijizwa kudaro? Iyena wakasanangura eciti: “Andina mundhu umweni ana mwoyo wakaezana na yena.”—VaFilipi 2:19, 20.

Ngenyi Timoti ndi muezaniso wakanakisisa maningi kuno vakuru? Vonanyi mathangwe matandhatu.

1. Iyena zvokadi waitaja vandhu. Pauro wakabvunja hama jo ku Firipo kuti Timoti ‘waizorangarira bzakadi kupona kwavo’ kana waizovataja. (VaFilipi 2:20) Timoti waida kuti hama jirambe jiri phedo na Jehovha zve wainga no cido co kupira nguva no simba rake kuitira kuvabesera.

William, uwo ari kushanda inga mukuru ko makore anodarika 20, nguva jese anobvunja vakuru vapsa kudari: “Idanyi hama. Sotesesanyi zvinodiwa zvajo, kusiyapo kubatikana maningi ngo kuronga zviro.” Mucaita inga motorista anobatikana maningi ngo kuda kugumisa mashibhomba pa parajhi pa nguva kwayo, wosiya kutendera kuti vandhu vakhwire mu mashibomba.

2. Iyena waidira basa ra Jehovha pa kutanga. Pauro wakananga kuti Timoti wainga wakasiana no vaya ‘vaipsanga bziro bzavo, bziciripi bza Kristu Jesu.’ (VaFilipi 2:21) Pauro wakavona kuti hama jimweni mu mukuvo wa Timoti jaisotesesa maningi upenyu hwavo. Nguva jimweni vaidira zvido zvavo pambeji po kushandira Jehovha. Asi Timoti aacainga wakadaro! Paakandova no mukana wo kuita zvizinji mu basa ra Mwari, iyena wakava no murangariro wakafanana na Isaia, uwo wakati: “Ndiri pano, nditumirenyi!”—Isaia 6:8.

Mungava kudini makaezanana pamunonga mecitaja zvinodiwa zvenyu no zvinodiwa zvo ungano? Cokutanga, tevejeranyi ngwajo ya Pauro iyo inoti: “Mukwanisevo kudaro kusana ibzo bzinodikana.” (VaFilipi 1:10) Diranyi basa ra Jehovha pa kutanga. Cocipiri, siyanyi mabasa anozomuhira maningi nguva no simba. Pauro wakabvunja Timoti kuti: “Tizai bziemuriro bzo muviri wo ujaha; tevejai urungami, rutendo, rudo no rugarisiko.”—2 Timoti 2:22.

3. Shandanyi ngo simba mu basa ra Jehovha. Pauro wakananga kudari ngo  pamusoro pa Timoti: “Yena wakabatira vangeri pamwepo na inini, inga bzaanoita mwana pa divi ra baba wake.” (VaFilipi 2:22) Timoti aacainga no umbhwa kana nungo. Waishanda ngo simba na Pauro zve izvi zvakavangisa ushamwari hwavo.

Nyamasi uno, mu sangano ra Jehovha muno basa rakawanda. Basa rondhoro, zvokadi rinodakajisa zve rinozomubesera kuti mukhwedere phedo no hama no hambzaji jenyu. Ngo kudaro, ivanyi no cokwadi co kuti nguva jese muno ‘zvizinji zvokuita mu basa ra Tenji.’—1 VaKorinto 15:58, Shanduro yeNyika Itsva.

4. Iyena waishandisa zvaaijija. Pauro wakatarira Timoti kudari: “Iwewe, bzakadi, uri kutevera ngo phedo majijisiro angu, bziito, murangariro, rutendo, unyaxa, rudo no kuvangirira.” (2 Timoti 3:10) Timoti waishandisa zvaaijija, ngo kudaro wakagajwa mabasa amwenizve.—1 VaKorinto 4:17.

Ngenyi amupsaki mukuru ano ruzivo wamungatevejera? Tom, uwo ari kushanda inga mukuru ko makore akawanda, anoceukija kuti mukuru umweni ano ruzivo, waimudakarira zve wakamupa rovejo yakanakisisa. Iyena wakananga kudari: “Nguva jese ndaimukumbira zano perepo ndoshandisa. Ngo kukasika izvi zvakavangisa kuthemba kwangu.”

5. Iyena wairamba ecijiroveja. Pauro wakangwaja Timoti kudari: “Zvirovejei pacako ngo kuzvipira kuna Mwari.” (1 Timoti 4:7) Pikija mugogomi ano mundhu anomuroveja, anondodikana kujiroveja pacake. Pauro wakapangira Timoti kuti: “Batai hako mabuku, jijai, pangirai no kujijisa vandhu. . . . Vangai weciita bziro ibzi, vangirirai ngo simba, kuti vese vabzivone.”—1 Timoti 4:13-15.

Munodikana kuramba meciita nani kuziva kwenyu. Ivanyi mujiji wo Bhaibheri anovangisira zve rambanyi mecipsaka kuziva ndhungamiriro jo kupejisira jo sangano. Mucava anojithemba. Zvaizova zvakashata kurangarira kuti maano ruzivo wakawanda maningi zvo kuti mungatonga shwiro iri yese mucizivi kunasa kupsakisisa. Inga ndi Timoti, ‘jirinderenyi zve rindanyi majijisiro’ enyu.—1 Timoti 4:16.

6. Iyena waithemba mujimu wa Jehovha. Ecibhuya ngo mushando wa e Timoti, Pauro wakamuceukija kudari: “Korondhai utaka hwauxoni uhu, wecibeswa ngo mujimu mucena uri motiri.” (2 Timoti 1:14) Timoti waidikana kuthemba mujimu wa Mwari.

Hama Donald, avo vari kushanda inga mukuru ko makore akawanda, vakananga kudari: “Vanarume vakagajwa vanodikana kureremeja ushamwari hwavo na Mwari. Vaya vanoita kudaro ‘simba ravo rinovangiswa.’ Kudari vakakumbira mujimu wa Mwari zve vosakurira mucero wao, vanozova makomborero okadi kuno hama javo.”—Nduyo 84:8; 1 Pedru 4:11.

Zvinovangisa kuvona vabatiri vanoshandira no vakuru vapsa, vakadari inga ndimwi, vari kuenderera mberi mu basa ravo kuna Jehovha. Jason wanangwaya pakutanga wakananga kudari: “Pa mukuvo wandiri kushandari inga mukuru, ndiri kujija zvakawanda zve kuthemba kwangu kuri kuengejeka. Wari, ndiri kudakajihwa kamare ngo basa randakagajwa zve ndiri kurivona inga cidakajiso cinoshamaisa!”

Munozoramba mecienderera mberi here? Mukatevejera muezaniso wa Timoti, munozovavo cikomborero kuno hama no hambzaji jenyu.