1. Zvicinyi zvinotatija kuti Jehovha anokova?

KWAINGA no mukuvo wo kuti Jehovha wainga ari ega kamare. Perapo wakatema civaringo co kupa cipo co upenyu ku zvisikwa zvino hwiru, mugore no pasi pano. ‘Mwari wakadakara,’ Jehovha, anoda kutipa zviro zvakanaka. (1 Timoti 1:11,  Shanduro yeNyika Itsva; Jakobo 1:17) Zve ngokuti Jehovha anoda kuti tidakarevo, iyena anotijijisa kuva vanokova.—VaRoma 1:20.

2, 3. (a) Ngenyi tinodakara patinokova? (b) Zvicinyi zvatinozojija pa musoro uno?

² Mwari wakasika vandhu ngo muezaniso wake. (Genesi 1:27) Izvi zvinoreva kuti Jehovha wakatisika no mugariro jaanajo. Kuti tive no mudakaro wokadi no kuashira makomborero ake, tinodikana kutevejera muezaniso wake. Tinodikana kudakarira zve vanopa ngo mwoyo wese. (VaFilipi 2:3, 4;  Jakobo 1:5) Ngenyi? Ngokuti ao i manera aakatisika ndiwona Jehovha. Pikija atizivi kukwana, tingamutevejera zve tova vanokovavo.

³ Wari tinoda kubhuisana ngo zvijijo zvimweni zvatinowana mu Bhaibheri ngo pamusoro po kukova. Tinozojija kuti ngenyi Jehovha anodakajihwa patinokova. Tinozojijavo kuti kukova kunotibesera kuita basa ratakapuwa ndi Jehovha kuti tiriite zve ngenyi tinodakara patinokova. Zve tinozobhuisana kuti ngenyi tinodikana kuramba tecikova.

4, 5. Jehovha na Jesu vakakovesa kudini zve ngenyi tinodikana kuvatevejera?

⁴ Jehovha anoda kuti timutevejere, ngo kudaro iyena anodakara tikakova. (VaEfeso 5:1) Iyena anodavo kuti tidakare. Izvi tinozviziva ngo kuti wakatisika mu njira inoshamaisa zve wakaita nyika yedu yakaseja pomwe no zvese zvainayo kuti tidakajihwe. (Nduyo 104:24; 139:13-16) Ngokudaro, tinokuja Jehovha patinoeja kudakajisa vamweni.

⁵ Tinotevejeravo Jesu, uwo wakatigajira muezaniso wakakwana wo kuti tingava kudini vanokova. Iyena wakananga kudari: “Mwana wo Mundhu aazivi kuvia kobatihwa kaveta kobatira, no kupa uhomi hwake kuti aponese vazinji.” (Mateu 20:28) Zve mupostori Pauro wakavangisa maKristu eciti: ‘Ivanyi no murangariro uwu, waingavo na Kristu Jesu . . . Wakazvidurura wova muranda.’ (VaFilipi 2:5, 7, Shanduro yeNyika Itsva) Ngokudaro, tingazvibvunjisa kudari, ‘Ndingatevejera muezaniso wa Jesu ngo phedo kamare here?’—Verenganyi 1 Pedru 2:21.

6. Jesu wakatijijisenyi pa ndhorovondho yo wo muSamaria? (Vonanyi pikica yo kutanga.)

⁶ Jehovha anodakajihwa maningi patinotevejera muezaniso wake wakakwana pomwe na Jesu. Tinoita izvo ngo kudakarira vandhu no kupsaka njira jo kuvabesera. Jesu wakavonesa kusisira kwazvo paakabhuya ngo muezaniso wo muSamaria. (Verenganyi Luka 10:29-37.) Iyena wakajijisa vateveri vake kuti vanodikana kubesera vamweni, azvinenyi kuti ndiyani kana kovanobva. Munoceukija kuti ngenyi Jesu wakaita muezaniso uu here? I ndava yo kuti muJudha umweni wainga wakamubvunjisa kudari: “Kani, ndiani mudoni wangu?” Mupinguro wa Jesu unotijijisa kuti kudari tikada kuti Jehovha adakare tinodikana kuva vanokova inga zvakaita muSamaria.

7. Tingatatijisa kudini kuti tinotenda kuti manera a Jehovha okuita zviro akanaka? Sananguranyi.

⁷ Thangwe rimweni rinotiita kuti tive vanokova rinosananguhwa ngo zvakaitika mu munda wo Edheni. Sathana wakananga kuti Adhamu na Evha vaizodakara maningi kudari vakatama kuzwira Jehovha zve vorangarira zviro zvavo basi. Evha wainga no umbau zve waida kuezana na Mwari. Adhamu wainga no umbau zve waida kudakajisa Evha kupinda kudakajisa Mwari. (Genesi 3:4-6) Muviyo wakava unosuruvarisa. Zvakajeka kuti, akuna angawana mudakaro kudari ano umbau. Asi kudari ticina umbau zve tova vanokova, tinotatija kuti tinotenda kuti manera a Jehovha okuita zviro akanaka.

8. Ngenyi Adhamu na Evha vaidikana kurangarira vamweni?

⁸ Pikija Adhamu na Evha vainga vari vega mu munda wo Edheni, vaidikana kurangarira vamweni. Ngenyi? Jehovha wakavapa basa ro kuita. Iyena wakavabvunja kuti vazaje nyika ngo vana vavo zve vaiite paradhiso. (Genesi 1:28) Adhamu na Evha vaidikana kuda kuti vana vavaizova navo kumbejiyo vave no mudakaro, kudari inga zvaaida Jehovha. Iyena waivetera kuti mbhuri yese ya Adhamu na Evha ishande pamwepo vaite kuti nyika yese ive paradhiso. Iro raizova basa rakakura kamare!

9. Ngenyi vandhu vaizodakajihwa ngo kuita kuti nyika ive paradhiso?

⁹ Inga vandhu vakakwana vaizodikanavo kushanda phedo na Jehovha kuti vaite kuti nyika ive paradhiso zve vakwanirise cidisiso cake. Mu njira iyi, vaizoghwina mu muzororo rake. (Vaheberi 4:11) Rangariranyi kuti kudakajihwa kwakadini kwavaizova nako ngo kuita basa iri! Jehovha waizovakomborera maningi ngo kutama kuva no umbau zve ngo kutaja vamweni.

10, 11. Zvicinyi zvinozotibesera kuti ticumaere no kuita vajiji?

¹⁰ Nyamasi uno, Jehovha ari kutipa basa rinosisira maningi kuti tiite. Iyena anoda kuti ticumaere no kuita vajiji. Kuti tiite basa iri, tinodikana kamare kutaja vandhu.  Zvokadi kamare, tingaramba teciita basa iri kudari tino thangwe rakanaka: rudo kuna Jehovha zve rudo ku vandhu.

¹¹ Pauro wakananga kuti iyena no maKristu amweni vainga “vabeseri va Mwari” ngo kuti ivona vaicumaera no kujijisa vandhu cokwadi. (1 VaKorinto 3:6, 9) Nyamasi uno, tingavavo “vabeseri va Mwari” ngo kupa nguva yedu, simba no zviro zvo kunyama kuti tiite basa ro kucumaera ratakapuwa ndi Mwari. Uwu i rukujo hukuru!

12, 13. Mwaizonanga kuti makomborero okuita vajiji ngo api?

¹² Kukova nguva yedu no simba redu patinocumaera no kujijisa, zvinotiviisira mudakaro mukuru. Izvi ngo zviri kunangwa ngo hama no hambzaji jakava no mukana wo kuitisa jijo jo Bhaibheri. Tiri kudakara maningi ngo kuvona vajiji vedu vecidakara ngo kuzwisisa kuti Bhaibheri rinotijijisenyi, kukurisa rutendo hwokadi, kuita cinjo mu upenyu hwavo no kutanga kubvunja vamweni zvovari kujija. Jesu wakadakaravo maningi, 70 o vacumaeri vaakatumira, ‘povakahwirira vakazara ngo kudakara’ ngo kuti vainga vakasongana no zviro zvinodakajisa.—Luka 10:17-21.

¹³ Hama no hambzaji jedu, kutenderera nyika yese jinodakara maningi pajinovona kuti masoko o mu Bhaibheri ari kubesera vandhu kuti vaitise nani upenyu hwavo. Inga muezaniso, imwe hambzaji icizivi kurovohwa inodanwa Anna yaida kuita zvizinji kuna Jehovha. * (Vonanyi masoko o pasi.) Ngokudaro, yakathutha yoenda ku divi rimweni ro Kumabvazuva ko Europa kwaidiwa maningi vacumaeri. Iyona yakatara kudari: “Kuno, kuna mukana jakawanda jo kuva no jijo jo Bhaibheri zve ndinozvidakarira maningi. Basa rangu rinondipa mudakaro mukuru. Padinoguma kanyi, andina nguva yo kusotesesa upenyu wangu. Ndinorangarira zvineso no kuthimwa-thimwa kwa vaya vandiri kujija navo. Ndinopsaka njira jo kuvavangisa no kuvabesera mu njira jinoshanda. Zve ndiri kukhohwa kamare kuti ‘anodakara anopa, kupinda wiya anopuwa.’”—Maitiro o Vapostori 20:35.

14. Mungawanisa kudini mudakaro pakucumaira pikija vandhu avapurukiri?

¹⁴ Pikija vandhu avadi kumupurukira patinocumaera zve zvikakwanisika vereketanyi no vandhu vakawanda mu ndima yenyu. Ipanyi vandhu mukana wo kuzwa masoko akanaka, pikija vakatama kumupurukira. Jehovha anovetera kuti tiite zvakafanana no zvaakakumbira Ezekieri kuti aite, eciti: “Unozovabvunja mazwi angu, dangani vanomazwa nokuti kutama kumazwa.” (Ezekieli 2:7; Isaia 43:10) Ngokudaro, azvinenyi madavirire anoita vandhu, Jehovha anoreremeja kuvangisira kwedu.  (Verenganyi Vaheberi 6:10.) Hama imweni, yakananga kudari ngo pamusoro po basa rayo rokucumaera: “Inini ndakasima, Apolo wakadirijira, kaveta anorebesa ndi Mwari.”—1 VaKorinto 3:6.

15. Tinodikana kukova kudari vandhu vakatibongesera basi here? Sananguranyi.

¹⁵ Inga ndi Jehovha, Jesu anodavo kuti tidakare. Patinova vandhu vanokova, vandhu vazinji vanokhombijiravo kukova kwatiri. Ngo kudaro, anotivangisa eciti: “Ipanyi, imwimwi munozopuwavo; vanozomudira mu mavero mupimo wauxoni, wakarongwa, wakacindihwa no kuzungunyiswa. Mupimo wo munopimira ndiwona vadoni, munozopimihwavo ndiwona kamare.” (Luka 6:38) I zvokadi kuti pamunokova, asipi vandhu vese vanozomubonga. Asi, pikija vakatama kubongesera, rambanyi mecikova. Amukwanisi kuziva zvicinyi zvingazoitika ngo kukova kamwe basi.

16. Tinodikana kukova kuno ani zve ngenyi?

¹⁶ Zvokadi kamare, vandhu vanokova avapi ngokuti vanovetera kuzoashira ciri cese. Jesu wakananga kuti: “Wecida kuita cirariro, danijai vamasikini, vanothobinya, bzirema no mapofu. Unozopocehwa ndivona, ngokuti avana co kukuhwirijira.” (Luka 14:13, 14) Bhaibheri rinonanga kuti mundhu ano “unyaxa” kana anokova “anozokomborehwa”zve “anomucena wiya anobesa murombo.” (Mazwi Akangwara 22:9; Nduyo 41:2) Tinodikana kukova ngo kuti zvokadi tinoda kubesera vamweni.

17. Ngojapi njira jimweni jatingakova ndijona jinozotiita kuti tidakare?

¹⁷ Pauro paakanokora magama a Jesu okuti: “Anodakara anopa, kupinda wiya anopuwa,” iyena aacainangepi basi ngo  kupa zviro zvo kunyama. Tingapavo vandhu vangiso, mazano akacijikira mu Bhaibheri zve besero rinoshanda. (Maitiro o Vapostori 20:31-35) Zvakanangari Pauro no zvaakaita, zvinotijijisa kuti zvinosisira kuva vanokova nguva yedu, simba redu, kupurutana, no rudo hwedu.

18. Zvicinyi zvakanangwa ngo vapsakisiri vazinji ngo pamusoro po kukova?

¹⁸ Vapsakisiri vanojija ngo zvo mufambiro jo vandhu vakafumbhuravo kuti kukova kunoita kuti vandhu vadakare. Mukuzwirana no musoro umweni, vandhu vanonanga kuti vanojizwa vakadakara maningi pakupera kuita ciro caushoni ku vamweni. Vapsakisiri vanonanga kuti, kudari tikabesera vamweni tinozwa kuti upenyu hwedu uno cinangwa zve uno revo. Ngokudaro, vamweni vano ungwaru vanonanga kuti, vandhu vanoita basa ro kujipira kuti vave no uhomi hwakanaka no mudakaro. Zvokadi kamare, zvavakafumbhuraro azvitikahamaji ngokuti Musiki wedu wo rudo, Jehovha, nguva jese anonanga kuti kukova kunotiita kuti tidakare.—2 Timoti 3:16, 17.

19, 20. Ngenyi munoda kukova?

¹⁹ Vandhu vakatitendeneja pavanozvitaja maningi pacavo, zvingatinesera kuramba tecikova. Asi Jesu wakaticeukija kuti mupango muviri mukuru i kuda Jehovha ngo mwoyo wedu wese, mwiha, murangariro no simba zve kuda mudoni wedu inga manera atinozvida. (Marco 12:28-31) Pa musoro uno tajija kuti vaya vanoda Jehovha vanomutevejera. Jehovha pomwe na Jesu vanokova. Ivona vanotivangisa kuti titevejere muezaniso wavo ngokuti ivona vanozviziva kuti zvinozotiita kuti tive no mudakaro wokadi. Tikava vanokova pazvatinoitira Mwari no vadoni vedu, tinozokuja Jehovha zve tinozobesereka no kubesera vamweni.

²⁰ Zvokadi kamare, muri kuita zvamunokwanisa kuti muve vanokova no kubesera vamweni, maningi-ningi hama no hambzaji jenyu. (VaGalàsia 6:10) Kudari mukaramba meciita kudaro, vandhu vanozomubongesera no kumuda zve munozodakara. Bhaibheri rinoti: “Mwoyo unokova unozokuriswa: Wiya anodirijira anozodirijihwavo.” (Mazwi Akangwara 11:25, Baiberi Mazwi Akacena aMwari) Mu upenyu wedu no mushando, muno njira jakasiana-siana jatingapa ngo mwoyo wese, kukhombijira kunaka mwoyo no kukova. Ngatibhuisane ngo njira nganani pa musoro unotevera.