1. Makristu anodikana kuitenyi kuti agumise kugogoma kwao?

MAKRISTU ari kugogoma mu upenyu. Kangaije tatanga wari kugogoma uku kana taano makore akawanda. Azvinenyi hazvo, tese tinodikana kuenderera mberi tecigogoma mbhera kumagumo. Mbhangiro yakapa mupostori Pauro ku Makristu o Firipo, inotivangisa kuti tienderere mberi tecigogoma mbhera kumagumo. Vamweni vo ungano yo Firipo vainga vacishandira Jehovha ko makore akawanda povakaashira karata ya Pauro. Ivona vaigogoma ushoni kana kuti vaishandira Jehovha vakagondeka, asi Pauro wakavaceukija kuti vagogome ngo kucungirira. Iyena waida kuti ivona vatevejere muezaniso wake no kushanda ngo simba ‘kuti vazowane mupocero.’—VaFilipi 3:14.

2. Ngenyi ngwajo ya Pauro ku Makristu o Vafiripo yakaguma pa nguva kwayo kamare?

² Ngwajo yakapari Pauro ku ungano yo Firipo yainga yo pa nguva kwayo kamare. Ivona vakasongana no muejo ungano poyakatanga kuumbhwa. Zvese zvakatanga mu gore ro 50 N.V.Y., Pauro paakaashira mukoka wo kwenda “Masedónia.” Ngokudaro, iyena na Sira vakaenda koocumaera kondhoyo masoko akanaka. (Maitiro o Vapostori 16:9) Kondhoyo ivona vakasongana no mwanakaji waizwi Lidhiya, uwo “waivapurukira; nga ibzo, Tenji wakamufunungura mwoyo” kuti azwe masoko akanaka. (Maitiro o Vapostori 16:14) Ngokukasika iyena no vo pamuzi pake, vakabhabhatijwa. Asi Dhiyabhu, ngo kukasika wakatanga kuvateverera. Vanarume vo dhorobha vakakhwekhwereja Pauro na Sira kakuvaendesa ku vatongi zve vakavanyepera kuti vari kuitisa zvineso. Inga muviyo, Pauro na Sira vakatakwa, vofungihwa mukaraboso zve pakupejisira vakabudiswa mu dhorobha. (Maitiro o Vapostori 16:16-40) Ivona vakarembejeka here? Haiwa!  Waro zvicinyi zvakaita hama no hambzaji jo ungano yakaperari kuumbwa? Ivona vakapa muezaniso wakanaka, ngokuti vakacungiriravo! Pacina kukana-kana, muezaniso wa Pauro na Sira wakavangisa hama no hambzaji jo ungano iya.

3. Pauro waizivenyi zve muvhunjo japi jaticazodavira?

³ Pauro wakatema civaringo co kutama kurembejeka. (2 VaKorinto 4:16) Iyena waizviziva kuti ashandire Jehovha naakagondeka, mugumo ucito waviya, waidikana kubatisisa zvido zvaakagaja. Ngokudaro ngatende tidavire muvhunjo iji: Tinojijenyi ngo muezaniso wa Pauro? Muezaniso japi jo vandhu vakagondeka vo mu njiku jedu jinokhombija kuti zvinokwanisika kuvangirira pikija no zvineso? Zve kuimira kwedu zvokumbeji kunotibeseresa kudini kuti titeme civaringo co kutama kurembejeka?

4. Pauro wakakhombijisa kudini kuti waibatikana mu basa ra Jehovha pacinenyi no zvaimuitikira?

⁴ Rangariranyi ngo pamusoro po zvese zvakaita Pauro, paaitara karata kuitira Makristu o Vafiripo. Iyena wainga wakafungihwa mu nyumba ku Roma. Aacainga no rusujunuko wo kuenda kocumaera. Asi waibatikana maningi ngo kucumaera vandhu vaimuvhakacira no kutarira karata ungano jainga ndhambo. Mukuezanavo nyamasi uno, hama no hambzaji jicikakwanisi kubuda pa muzi, jinowana mukana wo kucumaera masoko akanaka ku vese vanovavhakacira pa muzi pavo. Cimwenizve, vanotarira karata jinovangisa vandhu vacikawaniki pa muzi pavo.

5. Mukuzwirana no magama a Pauro anowanika pana VaFilipi 3:12-14, zvicinyi zvakamubesera kuti abatisise cido cake?

⁵ Pauro aazivi kutendera kuphingaijwa ngo zviito zvakanaka kana zvakashata zvokare. Iyena wakananga kudari: “Ndinokanganwa bzakasara sure ndecifambira bziri pambeji,” kana kuti, kugogoma mbhera kumagumo. (Verenganyi VaFilipi 3:12-14.) Ngozvapi zviro zvaizophingaija Pauro? Cokutanga, Pauro wakaita zviro zvizinji zvinodakajisa ku Judheya. Asi Pauro waivona zviro zvese izvi inga “psina.” (VaFilipi 3:3-8) Cocipiri, zvecivoneka kuti wakateverera Makristu, aazivi kutendera kuti murangariro wo zviro zvakashata zvaakaita zvimuite kuti asiye kushandira Jehovha. Cocitatu, iyena aazivi kurangarira kuti wainga aita zvese zvaaikwanisa pa kushandira kwake Jehovha zve aacaidikanazve kuita ciricese. Pauro wakaita zvizinji mu basa rake ro kucumaera pikija waitofungihwa mukaraboso, kutakwa, kufuhwa ngo mapuwe, kudondomera mu jombe, kutambujika ngo njara no kutama zvokusimira. (2 VaKorinto 11:23-27) Pikija no zvese zvaakaita zve no zvese zvaakasongana nazvo, iyena waibatikana ngo kushandira Jehovha. Tingaitavo zvakafanana.

6. Ngozvapi zvimweni ‘zvakasara sure’ zvatingadikana kukanganwa?

⁶ Tingatevejeresa kudini muezaniso wa Pauro wo ‘kukanganwa bzakasara sure’? Kangaije vamweni vedu vari kuhwisana no mazwiro o kujipa ndava, ngo pamusoro po zvishaishi zvovakaita kare. Ngokudaro, itanyi urongwa wo kujija ngo pomusoro po muripo wa Jesu. Patinojija no kurangarijisisa no kuita mukumbiro ngo pamusoro pazvo, zvinozotibesera kuti titame kuva no mazwiro acikabeseri o kujipa ndava. Atizojipanici ngo zvishaishi zvapera kuregerehwa ndi Jehovha. Vonanyi zvimweni zvatingajija kuvhira ka Pauro. Vamweni kangaije vakasiya basa raizovaphingaija, kuti vashandire Jehovha. Ngokudaro, tingakwanisa kukanganwa zvotakasiya sure ngo kuramba kuva no cidaka-daka cokuva no zviro zvotainga nazvo. (Bziverengo 11:4-6; Mucumaeri 7:10) ‘Bzakasara sure’ zvingabatanijazve zviro zvaushoni zvotakaita pa kushandira kwedu Jehovha kana zvineso zvotakahwisana  nazvo. Hina, patinosota sure tovona manera akatikomborera ndiwona Jehovha no kutibesera ko makore akawanda, ushamwari hwedu naye hunovanga. Pikija zvakadaro, atidikani kurangarira kuti zvotaitira Jehovha zvakwana.—1 VaKorinto 15:58.

7. Mukuzwirana no 1 VaKorinto 9:24-27, ngozvapi zvinodiwa kuti tiwine pa kugogoma kwatiri kuita? Ipanyi muezaniso.

⁷ Pauro wainasa kuzwisisa magama a Jesu, okuti: “Vangiriranyi.” (Luka 13:23, 24) Pauro waizviziva kuti, inga Mukristu, waidikana kuvangirira mu upenyu hwake hwese. Ngokudaro, iyena wakaezanisa upenyu hwo Makristu no kugogoma. (Verenganyi 1 VaKorinto 9:24-27.) Muphikizani paanonga acigogoma anobatikana ngo kuda kuwina zve aatenderi kuphingaijwa ngo ciri cese. Inga muezaniso, vagogomi vanoita muphikizano mu citaka kangaije vangatovona zviro zvecitengeswa pomwe no zviro zvimweni zvingavaphingaija. Mugogomi angaima kuti asote zviro zviri kutengeswa here? Haiwa, kudari ecida kuwina aaiti zvondhozvo! Pa kugogoma kwedu mu upenyu, atidikani kutendera kuphingaijwa ngo ciri cese. Kudari tikabatikana pa cido cedu zve toshandira Jehovha no kuvangisira kwese inga ndi Pauro, tinozowana mupfupo wedu!

8. Ngozvapi zvineso zvitatu zvatinoda kuvona wari?

⁸ Wari, ngatende tivone zvineso zvitatau zvatingasongana nazvo, zvingatiita kuti tipere simba. Zvakadari inga izvi: Zviro zvatinosoterera zvikatama kuitika pa mukuvo watinodaro, kuva no zvineso zvo uhomi pomwe no muejo jinotora nguva yakareba. Tingakwanisa kucungirira zvineso izvi, patinovona zvakabesera hama jedu kuti jihwisane no mugariro jakadari.—VaFilipi 3:17.

9. Zvicinyi zvinoitika kudari zvatinovetera zvikatama kuitika pa mukuvo watinodaro?

⁹ Zvatinosoterera zvikatama kuitika pa mukuvo watinodaro. Tese tiri kuimira kuvona kukwanirisika ko zvigondiso zvese zvakaita Jehovha. Zvokadi kamare, muporofita wa Jehovha Habhakuki, paakananga kuti waida kuvona kupera ko mugariro wakashata wo Judheya, Jehovha wakamuvhunja kudari “cigarirei.”  (Habakuki 2:3) Asi, zviro zvatinovetera zvikatama kuitika pa mukuvo watinodaro, zvingatotiita kuti kuvangisira kwedu kuthuruke. Atee kutotipeja simba kamare. (Mazwi Akangwara 13:12) Ndizvona zvakaitika no Makristu okuzojwa mu gore ro 1914. Uzinji hwajo hwaivetera kwenda kudenga mu gore rondhoro. Pozvakatama kuitika, hama jakagondeka jakahwisana kudini no mugariro uwo?

10. Zvicinyi zvakabesera varovorani vamweni zviro zvovaivetera pozvakatama kuitika pa nguva yo vaidaro?

¹⁰ Vonanyi muezaniso wo vashandiri vaviri vakagondeka vakasongana no cineso ici. Hama Royal Spatz, vakabhabhatijwa mu gore ro 1908 povainga no 20 o makore. Ivona vainga no cokwadi cokuti ngo kukasika vaizoenda mugore. Asi mu gore ro 1911, povakakumbira hambzaji Pearl kuti vacadhe navo, ivona vakati: “Unozviziva zvinozoitika mugore ro 1914. Kudari tikada kucadha, ngatitozviite wari!” Kureva kuti varovorani ava vakarembejeka povakatama kuashira mupfupo wavo wo kwenda kudenga mu gore ro 1914 here? Haiwa, ngokuti ciro cokutanga covaibatikana ndicona, cainga co kushandira Jehovha vakagondeka, kuciripi kwenda mugore. Ivona vainga vasunga kugogoma ngo kucungirira kwese. Pejisire, vakaenderera mberi vakavanga zve vakagondeka ko makore mazinji akatevera, mbhera kufa kwavo. Pacina kukana-kana, tiri kuimira kuti Jehovha acenese zina rake, ukuru-kuru hwake no kukwanirisa zvigondiso zvake zvese. Ivanyi no cokwadi co kuti Jehovha anozokwanirisa zvese pa nguva kwayo kamare. Mbhera kondhoyo, ngatienderere mberi tecishandira Jehovha zve ticasiya kuti kutama kuitika ko zviro zvatiri kuimira, zvitipeje simba.

11-12. Ngenyi tinodikana kwenderera mberi tecishandira Jehovha pikija no zvineso zvo uhomi? Ipanyi muezaniso.

¹¹ Zvineso zvo uhomi. Mukusiyana no mugogomi anoshandisa simba rake kuti awine, itusu atidi simba rondhoro kuti tirambe takavanga ku divi ro umwari. Asi, hama zinji jiri kuita zvajinokwanisa kuti jishandire Jehovha pikija no zvineso zvo uhomi pomwe no usharuka. (2 VaKorinto 4:16) Inga muezaniso, hama Arithuri Secord * vainga no 88 o makore, ivona vakashanda pa Bheteri ko 55 o makore zve vaihwaja maningi. Njiku imweni, furumeru umweni wakaguma pa kama yo vaivataro kuti avabesere. Iyena wakavasota wovavhunja kudari: “Hama Arithuri, imwimwi maita zvizinji pa kushandira Jehovha.” Asi hama Arithuri, avacaisotesesa zvovakaita kareko. Ivona vakasota furumeru wiya, voseka, vomuvhunja kudari: “Hina, izvo ndizvonadi. Asi zvinosisira maningi asipi zvotakaita kare. Ndi zviya zvatinoda kuita kuvhira wari kwenda kumbeji.”

¹² Zvingatoita kuti mashandira Jehovha ko  makore akawanda zve wari muri kuvona inga kuti amucakwanisi kuita zvizinji inga zvomaiita kareko. Kudari mecijizwa kudaro, mucapera simba. Ivanyi no cokwadi co kuti Jehovha anoceukija kushandira kwamakamuita makagondeka. (Vaheberi 6:10) Zve mukasota zvawari uno, ceujanyi kuti kushandira Jehovha akupimwi ngo zvatinoita pa kumushandira. Ngokudaro, tinokhombija kuti tinoda Jehovha ngo kuva no mavonero akanaka no kuita zviya zvatinokwanisa. (VaKolosi 3:23) Jehovha anozwisisa kutama kwedu kukwanisa kuita zvimweni zve narini aatikumbiri kuti tiite zvaticikakwanisi.—Marco 12:43, 44.

13. Muezaniso wa hama Anatoly no mukaji wavo Lidhiya, unotivangisa kudini kuti tienderere mberi pikija patinosongana no muejo jakawanda?

¹³ Muejo jinotora mukuvo wakareba. Vashandiri vamweni va Jehovha vari kuhwisana no zvineso pomwe no kuteverehwa ko makore akawanda. Inga muezaniso, hama Anatoly Melnik * vo Moridhavhia, vainga no 12 ro makore babavo povakasungwa, voendeswa ku ushoko ku Sibheriya, pa makiromita anokwana kuita 7.000 ndhambo no mbhuri yavo. No papera gore rimwe, hama Anatoly, mai wavo pomwe no majicekuru avo, vakatohwavo kwenda ku Sibheriya. Pa kufamba ko nguva, ivona vakakwanisa kwenda ku musongano ku ndharaundha imweni, asi vaidikana kufamba 30 o makiromita mu gwanja rakazara ngo mbhute, kwecithondhora kamare. No papera mukuvo wakati kuti, hama Anatoly vakapeja makore matatu ndhambo no mukaji wavo, Lidiya pomwe no mwanavo ano gore rimwe. Pikija vacihwisana no zvineso pa makore akawanda, ivona no mbhuri yavo vakaramba vecishandira Jehovha vakagondeka. Wari, hama Anatoly vaano 82 o makore zve vari kushanda inga Muvonereri wo Cine wo Aziya Sentrari. Sunganyi kutevejera muezaniso wa hama Anatoly no mukaji wavo Lidhiya. Itanyi zvese zvamunokwanisa kuti mushandire Jehovha zve cungiriranyi inga zvomaindoita kare.—VaGalàsia 6:9.

14. Zvicinyi zvaidikana kuita Pauro kuti awine kugogoma kwaaiita?

¹⁴ Pauro wainga no cokwadi cokuti waizopejisa kugogoma kwaaiita no kukwanirisa cido cake. Inga Mukristu wakazojwa, iyena waisoterera kuwana ‘mupocero waakadanijihwa kupuwa ndi Mwari.’ Pikija zvakadaro, kuti akwanise cido cake, waidikana kuenderera mberi. (VaFilipi 3:13) Pauro wakashandisa muezaniso  wakanakisisa kuitira kubesera Vafiripi kuti vabatisise cido cavo.

15. Muezaniso wakapa Pauro wo vagari vo Roma wakabesera kudini Makristu o Firipo kuti aenderere mberi?

¹⁵ Pauro wakaceukija Makristu o firipo kuti ivona vaizoenda kogara kudenga. (VaFilipi 3:20) Ngenyi ivona vaidikana kuceukija izvi? Pa mukuvo uwo, vandhu vaida kuva vagari vo Roma ngokuti vaibesereka maningi. * Asi, Makristu okuzojwa, vaizova pa ndau yakanakisisa kupinda kuva mugari wo Roma ngokuti yaizovaviisira makomberero akawanda maningi. Ngondava yazvo, Pauro wakavangisa Vafiripi kuti ‘vararame basi, inga bzo rinofanera vhangeri ra Kristu.’ (VaFilipi 1:27) Kudari inga Makristu okuzojwa o munguva iya, Makristu nyamasi uno anosoterero yo kwenda kudenga, muezaniso wakanaka kuitira vandhu vari kuenderera mberi kuti vawine.

16. Mukuzwirana no VaFilipi 4:6, 7, tinodikana kuitenyi, azvinenyi vetero yedu?

¹⁶ Azvinenyi kuti tinovetero yo kwenda kudenga kana kugara mu paradhiso pasi pano, tinodikana kuenderera mberi kuti tikwanirise cido cedu. Azvinenyi zvotakasongana nazvo, atidikani kurangarira zviro zvakapera zve atidikani kutendera kuti ciricese citiimise kushandira Jehovha. (VaFilipi 3:16) Kangaije takadikana kuimira ko mukuvo wakareba kuti tivone kukwanirisika ko zvigondiso zva Jehovha kana taavasharuka zve aticina simba. Tingatodikana kucungirira zvineso no kuteverehwa ko makore akawanda. Azvinenyi ngowapi mugariro wedu atidikani ‘kuthimwa-thimwa ngo ndava iriyese.’ Kusiyapo zvondhozvo, ngatitatijenyi Mwari zvatinotama no kupota zve iyena anozotipa runyararo unopinda uzivi hwese.—Verenganyi VaFilipi 4:6, 7.

17. Tinozovonenyi pa musoro unotevera?

¹⁷ Inga mugogomi anoita zvaanokwanisa paanonga acivona kuti waaphedo no kuwina, itusuvo tinodikana kuita zvakafanana kuti tikwanirise kugogoma kwedu mu upenyu. Ngokudaro, simba redu zve mugariro wedu ukatendera, ngatiite zvese zvatinokwanisa kuti tizovone zvigondiso zvese zvo kumbeji. Waro tinodikana kuitenyi kuti tienderere tecigogoma mu njira kwayo zve totama kupungura simba? Musoro unotevera, unozotibesera kuvona zvatinodikana kudira pa ndau yo kutanga no kupsaka ‘kuziva kudaro kusana ibzo bzinodikana.’—VaFilipi 1:9, 10.