PANO BASA ramaidakarira kuita mu ungano yenyu, asi amuripi kuriita here? Kangaije riri kutoitwa ngo vamweni. Kangaije ritori basa ramakamboita kareko. Asi wari amucariiti ngo ndava yo usharuka, zvineso zvo uhomi, kutama basa. Ngo ndava yo cinjo jakaitwa mu sangano, kangaije makadikana kusiya mabasa omainga meciita. Azvinenyi cakamuitisaro kuti musiye kuita mabasa omainga meciita, kangaije mungarangarira kuti amuripi kuita zvese zvamaidakarira kuita pa kushandira Jehovha. Pa mugariro jakadari, zvinozwisisika kuti nguva jimweni mungasuruvara, kuzvivaza kana kutobararika hwiru. Zvicinyi zvingamubesera kuti mutame kujizwa kudaro? Mungaitenyi kuti murambe muno mudakaro?

Kuti tirambe tino mudakaro, tingajija ciro cinosisira maningi kuvhira ku muezaniso wa Johani Mubhabhatiji. Iyena wakaita basa rinosisira maningi pa kushandira kwake Jehovha. Pikija zvakadaro, wakawanana no zviro zvaacaivetera. Paakapeja gore ecicumaera ngo pamusoro po kuviya ka Mesiya, wakazofungihwa mu karaboso wogaremo mukuwo unopindirija mukuvo waapeja ecicumaera. Pa zvese izvi, Johani aazivi kuruza mudakaro. Iyena wakaenderera mberi akadaro mbhera kufa kwake. Zvicinyi zvakamubesera? Tingaitenyi kuti tirambe tino mudakaro pikija patinosongana no zviro zvaticikaveteri?

Mu ngari yo kutondhora yo gore ro makumaviri na pfumbamwe, Johani Mubhabhatiji wakatanga basa rake ro kunasirira gwanja kuitira Mesiya, eciti: “Tenderukanyi, ngokuti Umambo hwo mugore hwaa phedo.” (Mateu 3:2; Luka 1:12-17) Vandhu vazinji vakadavira. Zvokadi, uzinji wo vandhu vaivha ndhambo maningi kuti vaviye koopurukira masoko aainangaro zve vamweni vakazvidemba voguma pakubhabhatijwa. Johani wakava no cicunge paakashora vatungamiriri vo zviyara vaijivona inga varurami zve wakavangwaja kuti vakatama kucinja mugariro javo, vaizotongwa. (Mateu 3:5-12) Cakadakajisa maningi mu basa ra Johani, cakava ciitiko cakaitika mukupera ko gore makumaviri na pfumbamwe, paakabhabhatija Jesu. Pakupera ko gore rondhoro, Johani waivhunja vandhu kuti vatevere Jesu uwo ari Mesiya wakagondeswa.—Johani 1:32-37.

Basa raiitwa ndi Johani raisisira maningi zvoita kuti Jesu anange kudari: “Pakati po vakabahwa  ngo vanakaji, apazivi kubudirira ariwese anopinda Johani Mubapatizi.” (Mateu 11:11) Tingava no cokwadi cokuti Johani, waidakara ngo makomborero aakaashira. Inga ndi Johani, vazinji nyamasi uno vari kuashira makomborero akawanda. Vonanyi muezaniso wa hama Terry. Ivona no mukaji wavo, Sandra, vakapeja makumashanu o makore mu basa ro nguva yakazara. Hama Terry vakati: “Ndakava no makomborero akawanda. Ndakashanda inga piyona, bheterita, piyona anosisira, muvonereri wo dhistiritu, muvonereri wo ndharaundha zve wari ndiri kushandazve inga piyona anosisira.” Kuashira makomborero mu sangano ra Mwari i mudakaro mukuru kamare, inga zvaticajija ngo muezaniso wa Johani, kuramba tino mudakaro kunoda kuvangisira, mugariro wedu paaunocinja.

Johani Mubhabhatiji wakaramba ano mudakaro ngo kuti waibongesera ngo basa raakapuwa. Vonanyi muezaniso uu. Jesu pakupera kubhabhatijwa, mutengo wo vandhu waitevera Johani wakapunguka asi mutengo wo vandhu waitevera Jesu wakaengejeka. Vecikaya-kaya vajiji va Johani vakamuvhunja kuti: “Ari kubapatiza bzino, vandhu vese vomutevera.” (Johani 3:26) Johani wakadavira kuti: ‘Ano nyamurovohwa ndiyena mukwambo. Kaveta xamwari yo mukwambo, inogara no mukwambo no kumuzwa, anodakara kukuru ngo kuzwa izwi ro mukwambo. Bzino, kudakara kwangu kwazarisika nyamasi.’ (Johani 3:29) Johani aacaida kujiezanisa na Jesu zve aazivi kurangarira kuti basa raaiita aricaisisira kupinda basa ra Jesu. Mukusiyana, Johani wakaramba akadakara ngokuti waibongesera ngo kuva “xamwari yo mukwambo.”

Mavonero a Johani akamubesera kuti arambe ano mudakaro pikija no zvineso zvaakasongana nazvo mu basa rake. Inga muezaniso, Johani wainga mu Naziri kuvhira pa kubahwa. Ndiyo ndava, acaidikana kumwa doro. (Luka 1:15) Ngo pamusoro po upenyu wa Johani, Jesu wakati: “Waza Johani acikahi no kumwa.” Ngo divi rimweni, Jesu no vajiji vake avacainga inga ndi Johani mu Naziri zve vaitoponavo inga vandhu vamweni. (Mateu 11:18, 19) Pikija Johani aacaiita mushamaiso, waizviziva kuti vajiji va Jesu, kubatanija vamweni vakatanga kutevera Johani, vaizowana simba iri. (Mateu 10:1; Johani 10:41) Ngo kutama kutendera kuphingaijwa ngo musiyano uu, Johani waivangisira pa kukwanirisa basa raakapuwa ndi Jehovha.

Ngokudaro, kudari tikareremeja mabasa atinopuwa ndi Jehovha nyamasi uno, tingazoramba tino mudakaro wedu. Hama Terry vanangwaya pakutanga vakati: “Ndakashanda ngo simba pa mabasa ese ondaigajwa.” Vacibhuya ngo pamusoro po mabasa ese o mu nguva yakazara o vakaita, vakananga kudari: “Andizvidembi ngo zvandakaita asi ndino zviceukijo zvinodakajisa basi.”

Ciro cimweni cingaengejerazve mudakaro wedu pa kushandira Jehovha, ngo co kurangarijisisa cinoitisa kuti basero rive no mutengo. I cidakajiso co kuva “vabeseri va Mwari.” (1 VaKorinto 3:9) Ciro cakaseja kuti cirambe cakadaro, tinodikana kucitaja ushoni mukuvo wese. Mu njira yakafanana, tinozoramba takadakara patinorangarijisisa cidakajiso co kushanda na Jehovha. Atidikani kuezanisa zvatinokwanisa kuita no zvinokwanisa kuita vamweni. Atidikanizve kurangarira kuti basa rotakapuwa ndi Jehovha, arisisiri kupinda rakapuwa vamweni.—VaGalàsia 6:4.

Johani Mubhabhatiji kangaije waizviziva kuti basa rake raizova ro nguva shomani. Asi kangaije aacaitorangarira kuti raizopera ngo kukasika. (Johani 3:30) Mu gore ro makumatatu N.V.Y., no pakhirira mweji mutandhatu Jesu naapera kubhabhatijwa, Mambo Herodhi wakaita kuti Johani Mubhabhatiji afungihwe mu karaboso. Paaiinga mukatimo, iyena wakaita zvese zvaaiikwanisa kuti arambe eciita basa. (Marco 6:17-20) Zvicinyi zvakabesera Johani Mubhabhatiji kuti atame kuruza mudakaro pa cinjo ii wari? Iyena wakabatikana ngo zviro zvinodakajisa Jehovha.

Paainga mu karaboso, Johani Mubhabhatiji waizwa masoko ngo pamusoro po zvaiita Jesu. (Mateu 11:2; Luka 7:18) Iyena waikhohwa kuti Jesu wainga Mesiya. Asi, waida kuziva kuti Jesu waizokwanirisa kudini zviporofita zvese zvainga zvakanangwa  kuti zvaizoitwa ndi Mesiya. Zvecivoneka kuti Mesiya waizova mambo, kunanga kuti waizotonga ngo kukasika here? Kunanga kuti waizosujunura Johani mu karaboso here? Acida kuziva zvizinji ngo pamusoro pa Jesu, Johani wakatuma vajiji vake vaviri kuti vaende kovhunjisa Jesu kudari: “Ndimwi, kani, wiya anozozari, nokuti tovetera umweni?” (Luka 7:19) Vajiji povakahwirira, Johani wakanasa kuvapurukira povainga vaciverenga zviro zvinoshamaisa zvaiitwa ndi Jesu inga kurapa. Ivona vakamuvhunja kuti: “Mapofu anovona, bzigono bzinofamba, vomapere vanorapika, vano mandondo vanozwa, vakafa vanomuka, no kuti vamasikini vanoziviswa masoko akanaka.”—Luka 7:20-22.

Pacina kukana-kana, Johani wakavangiswa maningi ngo masoko akaviyari no vajiji vake. Iyena wakava no cokwadi co kuti Jesu waikwanirisa zviporofita ngo pamusoro pa Mesiya. Pikija zvaivoneka inga kuti Jesu acaizovhisa Johani mu karaboso, Johani wainga no cokwadi co kuti basa raaingaya waita, raingepi rabiresi. Izvi zvaiita kuti Johani adakare pikija wainga pa mugariro unonesa.

Inga ndi Johani, tikabatikana mu basa ra Mwari, tinozokwanisa kusengerera no mudakaro. (VaKolosi 1:9-11) Tingaita zvondhozvo ngo kuverenga Bhaibheri no kurangarijisisa zvatinoverengaro. Tikaita kudaro, tinozoceukija kuti zvese zvatinoita mu basa ra Mwari asipi zva biresi. (1 VaKorinto 15:58) Hambzaji Sandra vakati: “Kuverenga cipauko cimwe co Bhaibheri njiku jese, kunondibesera kuti ndigume phedo na Jehovha. Izvi zvinondiita kuti tisotesese maningi Jehovha haiwa inini.” Cimwenizve cingatibesera i kusotesesa ripoti jatinoita mu basa redu ro kucumaera. Zve zvinotiita kuti titame kubatikana pa mugariro jedu asi tibatikane pa zviya zviri kuita Jehovha. Hambzaji Sandra vakanangazve kudari: “Urongwa wo mweji ngo mweji wo JW Broadcasting^® unotiita kuti tijizwe tiri phedo no sangano ra Jehovha zve unotibesera kuti titame kuruza mudakaro pa basa redu.”

Pa mukuvo mushoma waakacumaera, Johani Mubhabhatiji wakacumaera ngo “mwiha no simba ra Elia.” Kudari inga ndi Eriya, Johani Mubhabhatiji “wainga mundhu wakarembejeka, kudari inga itisu.” (Luka 1:17; Jakobo 5:17) Kudari tikatevejera muezaniso wake zve tovangisira mu basa ra Jehovha, tingarambavo takadakara azvinenyi ngo zvapi zvatingasongana nazvo mu upenyu hwedu.