MUSORO WO KUJIJA WO 32
Rudo Hwenyu Ngauengejeke
“Bzo ndinokumbira nga ibzi: Kuti rudo hwenyu huengejeke, njiku jese.”—VAFILIPI 1:9.
NDUMBO 106 Sakuriranyi Vara ro Rudo
ZVATICAJIJA *
1. Mbhaani vakabesera kuumba ungano yo Firipo?
MUPOSTORI Pauro, Sira, Ruka na Timoti povakaguma ku Roma iyo yaimbzinyirira Vafiripi, vakawana vandhu vakawanda vaidakarira masoko o Umambo. Hama murongomuna iji, jakabesera kuumba ungano zve vateveri vese vakatanga kuita musongano vese, kangaije pa muzi wo mwanakaji waidakarira kuashira vafambi anodanijwa Ridhiya.—Maitiro o Vapostori 16:40.
2. Zvineso zvapi zvovakasongana nazvo ngokukasika?
2 Ungano iyi ngokukasika yakasongana no zvineso. Sathana wakashandisa vandhu vainyenya cokwadi kuti vahwise zvaicumaira Pauro no vadoni vake. Pauro na Sira vakasungwa, votakwa zve vofungihwa mu karaboso. Povakavhiswa mukaraboso, vakavhakacira vajiji vapsa zve vovavangisa. Perapo, Pauro, Sira na Timoti povakabuda mu dhorobhero, zvinovoneka inga kuti Ruka wakasara kondhoyo. Waro zvicinyi zvaidikana kuitwa ngo hama no hambzaji jasarari? Vacibesehwa ngo mujimu wa Jehovha, vakaenderera mberi vecishandira Jehovha ngo kuvangisira kwese. (VaFilipi 2:12) Pauro wainga no thangwe ro kudakara ndivona!
3. Mukuzwirana na VaFilipi 1:9-11, zvicinyi zvakakumbira Pauro?
3 Pasure po gumi ro makore, Pauro wakatara karata kuna ungano yo Firipi. Pavakaverenga karata yondhoyo, vakazwisisa rudo hwainga na Pauro. Iyena wakatara kudari: “Mwari anondiitira fakazi kuti ndinomudisisa mwese, mu mwoyo wa Kristu Jesu.” (VaFilipi 1:8) Kusiyapo kuvatarira karata basi, iyena waivaitirazve mukumbiro. Wakavhunja Jehovha kuti avabesere kuengejera rudo hwavo, vakwanise kudira pakutanga zviro zvinosisira maningi, vave vandhu vacina ushaishi, vacikakhugunyi vamweni zve vazare ngo mucero yo urungami. Amuvoni kuti nyamasi tiri kubeserekavo ngo magama akatarari Pauro here? Ngatende tivone zvicinyi zvakatarira Pauro ku Makristu o Firipo. (Verenganyi VaFilipi 1:9-11.) Ticabhuisana ngo pamusoro po zvakatahwari pa vhesi iji no kuvona kuti tingazvishandisa kudini.
RUDO HWENYU NGAUENGEJEKE
4.(a) Mukuzwirana na 1 Johani 4:9, 10, Jehovha wakatatijisa kudini kuti anotida? (b) Tingadisa kudini Mwari?
4 Jehovha anotida. Ngokudaro, wakutumira mwana wake kuti afire zvishaishi zvedu. (Verenganyi 1 Johani 4:9, 10.) Rudo hwa Mwari hunotitora kuti timudevo. (VaRoma 5:8) Tingadisa kudini Mwari? Jesu wakadavira muvhunjo uu, paakavhunja Mufarisi kudari: “Unozodisa Tenji Mwari wako, ngo mwoyo wako wese, ngo mwiha wako wese, ngo hwiru hwako hwese.” (Mateu 22:36, 37) Atidi Mwari ngo mwoyo umwe basi, asi tinomuda ngo mwoyo wese. Rudo wondhowo, unoengejeka njiku ngo njiku. Pauro wakavhunja Vafiripi kudari: “Rudo hwenyu huengejeke, njiku jese.” Tingaitenyi kuti rudo hwedu kuna Mwari huengejeke?
5. Rudo hwedu kuna Jehovha unovangisa kudini?
5 Kuti tide Mwari, tinodikana kunasa kumuziva. Bhaibheri rinonanga kudari: “Ndiani acina rudo, aazivi kumuziva Mwari. Ngokuti Mwari, rudo.” (1 Johani 4:8) Mupostori Pauro wakasanangura kuti rudo hwedu kuna Jehovha, unodikana kuengejeka patinotanga kuziva cokwadi, no kuzwisisa manera aanoita zviro. (VaFilipi 1:9) Potakatanga kujija Bhaibheri, takatanga kuda Jehovha pikija ticikazivi zvizinji ngo pamusoro pake. Ngokudaro, potakaengejera kujija kwedu ngo zva Jehovha, rudo hwedu kwaari hwakaguma pa kuvanga maningi. Pacina kukana-kana kujija Bhaibheri nguva jese no kurangarijisisa zvatinoverenga mu Soko ra Mwari zviri pakati po zviro zvinosisira maningi mu upenyu!—VaFilipi 2:16.
6. Zvicinyi zvotajija pana 1 Johani 4:11, 20, 21, ngo pamusoro po kuva no rudo ku hama no hambzaji jedu?
6 Rudo hwa Jehovha kwatiri hunozotiita kuti tide hama jedu. (Verenganyi 1 Johani 4:11, 20, 21.) Kangaije tingatorangarira kuti azvizonesi kuguma pa kuda hama no hambzaji jedu. Indava yokuti, tinonamata Jehovha zve tinoeja kutevejera mugariro jake jakanaka. Tinotevejera muezaniso wa Jesu, ngokuti rudo hwake hwakakura, hwakamuita kuti apire upenyu hwake kuitira itusu. Asi nguva jimweni zvingatonesa kuzwira mupango wo kudisana ngo cedu. Vonanyi muezaniso wo ungano yo Firipo.
7. Tinojijenyi kuvhira ku mbhangiro ya Pauro kuitira hambzaji Evhodhiya na Sintike?
7 Evhodhiya na Sintike jainga hambzaji jaivangisira jakashanda phedo no phedo no mupostori Pauro. Asi, kangaije avacaizwirana zve ushamwari hwavo ahucaingazve hwo cike ndicikevo. Asi pa karata yake ku ungano yaiwanika hambzaji iji, Pauro wakananga ngo mazina avo kamare (Evhodhiya na Sintike) zve wakavangwaja “kuti vazwirane.” (VaFilipi 4:2, 3) Zve Pauro wakavona kuti zvaisisira maningi kuvhunja ungano yese, kuti: ‘Itanyi bzese mucikan’gun’guti no kupipana.’ (VaFilipi 2:14) Pacina kukana-kana, mbhangiro iyi yakabesera kuciripi basi hambzaji iji jakagondeka asi ungano yese kuti vadisane ngocavo.
Zvicinyi zvinobatanijwa kuti tive no mavonero akanaka no hama jedu? (Vonanyi ndima 8) *
8. Zvicinyi zvingaitisa kuti zvinese kuda hama jedu zve zvicinyi zvingatibesera?
8 Inga Evhodhiya na Sintike, zvingava zvecinesa kuda hama jedu ngo ndava yo kutama kukwana. Tese tinoposa mukuvo wese. Kudari tikasotesesa kuposa ko vamweni, zvinozotinesera kuguma pa kuvada. Inga muezaniso, kudari hama ikanganwa kutibesa kucenesa Nyumba yo Umambo, tingatoguma pa kunyangajwa. Kudari tikaverenga zvinoposa hama jedu, tinoguma pakunyangajwa maningi zve rudo hwedu kwavari unothuruka. Kudari muri pamugariro uu, zvaizova zvakanaka kurangarira izvi: Jehovha anokwanisa kuvona zvatinoposa no zvinoposa hama jedu. Asi, pikija tinoposa, iyena anoda hama jedu pamwepo na itusu. Ngo ndava yazvo, tinodikana kutevejera rudo hwa Jehovha zve tova no mavonero akanaka ngo pamusoro po hama jedu. Patinoshanda ngo simba kuti tide hama jedu, tinoguma pakuva takabatana.—VaFilipi 2:1, 2.
ZVIRO ZVINOSISIRA MANINGI
9. Ngozvapi zvinobatanijwa pa zviro zvinosisira maningi zvakanangwa ndi Pauro?
9 Mujimu mucena wakafemera Pauro kuti ajijise vese ku Firipi zve no Makristu ese kuti ‘vasane ibzo bzinodikana,’ kana zvinosisira maningi. (VaFilipi 1:10) Izvi zvinobatanija kucenesa zina ra Jehovha, kukwanirisika ko cidisiso cake zve runyararo no kubatana mu ungano. (Mateu 6:9, 10; Johani 13:35) Kudari zviro izvi zvikava zvinosisira maningi mu upenyu hwedu, tinokhombija kuti tinoda Jehovha.
10. Tinodikana kuitenyi kuti tivoniwe ticina ushaishi?
10 Pauro wakanangazve kuti tinodikana kuva vandhu “vacina uxaixi.” Izvi azvirevi kuti tinodikana kuva vakakwana. Itusu aitingavi vandhu vacina ushaishi inga ndi Jehovha. Asi Jehovha anozotivona inga vacina ushaishi kudari tikaita zvatinokwanisa kuti tikurise rudo hwedu no kubatikana pa zviro zvinosisira maningi. Njira imwe yatingakhombija rudo hwedu ngo yo kuita zvatinokwanisa kuti titame kuva cikhugu ku vamweni.
11. Ngenyi atidikani kukhugunya vamweni?
11 Mbhangiro yo kutama kuva cikhugu ku vamweni ngo yokadi. Tingakhugunyisa kudini vamweni? Tingava cikhugu ku vamweni ngo mabungaijo atinosana, masimirire edu kana basa ratinosana. Kangaije zvatinoitaro azvizivi kutoshata. Asi kudari zvatinosana zvinonga zvecipsasa hana jo vamweni zve ivona vokhugunyika, iyo i shwiro. Jesu wakananga kuti zvakashata maningi kudari tikaita kuti umwe wo hama jedu apwanye ushamwari hwake na Jehovha, zviri nane kumusungira ghwiyo mu musipa tomukhandira mu Jombe!—Mateu 18:6.
12. Tinojijenyi kuvhira ku muezaniso wakagajwa ngo varovorani vari mapiyona?
12 Varovorani vamweni vari mapiyona vakashandisa kudini zvakanangari Jesu? Ivona vaishandira ku ungano no varovorani vaivha kubhabhatijwa avo vakarehwa pa mbhuri icaitendera zvimweni kuti zviitwe. Varovorani vapsa ava vaitenda kuti Makristu amadikani kwenda ku sinema kovona mafirimi amweni anotendehwa. Ivona vakapsaswa povakazwa kuti varovorani vari mapiyona vakaenda kusinema. Nga izvi, varovorani vari mapiyona vakatema civaringo co kutama kwenda kusinema mbera varovorani vapsa varoveje hana javo zve vanase kuzwisisa kuti ngocapi cakanaka no cakashata. (Vaheberi 5:14) Mu njira iyi, varovorani vari mapiyona, vakakhombija kuti vaida varovorani vapsa vaya kuciripi ngo magama basi asi ngo zviito.—VaRoma 14:19-21; 1 Johani 3:18.
13. Tingaitisa kudini kuti vamweni vagume pa kushaisha?
13 Njira imweni yotingakhugunya ndiyona vamweni ngo yo kuvaita kuti vashaishe. Zvingaitikisa kudini izvi? Rangariranyi izvi basi. Pakupera mukuvo wakareba ecishanda ngo simba, mujiji umweni wo Bhaibheri wakakwanisa kunyisa mamwiro aiita doro. Iyena wakavona kuti aacaidikanazve kumwa doro. Ngo kukasika iyena wakaita cinjo zinji mu upenyu hwake zve wakabhabhatijwa. Njiku imweni, imwe hama yakamukoka zve yakamupekeja doro iciti: “Iwewe, wari waamukristu; uno mujimu wa Jehovha. Umwe wo mugariro wo mujimu mucena ngo wo kuzvibata. Kudari ukazvibata, unozokwanisa kuziva manera okumwa doro.” Tingakwanisa kurangarira muviyo waizovepo, kudari hama ipsa iya no yakapurukira mbhangiro yakashata here?
14. Musongano jedu jinotibesera kudini kuti tishandise mbhangiro yatinowana pana VaFilipi 1:10?
14 Musongano jedu jinotibesera kuti tishandise mbhangiro yatinowana pana VaFilipi 1:10, mu njira jakasiyana-siyana. Yokutanga, zvatinojija ku musongano wedu, zvinokhombija kuti murangariro hwa Jehovha unosisira maningi. Yocipiri, tinojijira kushandisa zvatinojija kuti kangaije tingatama kushaisha. Zve yocitatu, tinovangiswa kuti tidisane ngo cedu no kuita zviro zvakanaka. (Vaheberi 10:24, 25) Maningi-ningi tinovangiswa ngo hama jedu zve rudo hwedu kuna Mwari no ku hama jedu hunovanga. Kudari tinoda Mwari no hama jedu zvecivha pasi po mwoyo, tinozoita zvese zvatinokwanisa kuti titame kukhugunya hama jedu.
ENDERERANYI MBERI ‘MECIZARA NGO MUCERO YO URUNGAMI’
15. Zvinoda kurevenyi ‘kuzara ngo mucero yo urungami’?
15 Pauro wakakumbira ngo mwoyo wese kuti ungano yo Firipi yaizova ‘yakazara ngo mucero yo urungami.’ (VaFilipi 1:11) Pacina kukana-kana, “mucero yo urungami” yaibatanija rudo hwavo kuna Jehovha no vandhu vake. Izvi zvinobatanijavo mabhuire ovanoita no vamweni ngo pamusoro po rutendo hwavo kuna Jesu pomwe no soterero yavo inoshamaisa. Pana VaFilipi 2:15 pakashandiswa muezaniso umweni wo ‘kumonikira inga nyereji mu nyika yo pasi.’ Magama aya anoticeukija zvakananga Jesu acivhunja vajiji vake, paakati: “Imwimwi muri ruveneko hwo nyika.” (Mateu 5:14-16) Jesu wakavhunjazve vateveri vake kuti ‘vaite vajiji’ zve wakavavhunjazve kuti vaidikana kuita “vafakazi . . . mbhera ku magumo o nyika.” (Mateu 28:18-20; Maitiro o Vapostori 1:8) Patinoita zvese zvatinokwanisa mu basa iri rinosisira, tinobara “mucero yo urungami.”
Paainga akafungihwa pa muzi pake, Roma, Pauro ari kutara karata yake kuitira ungano yo Firipi. Pa mukuvo uwo, iyena wainasa kushandisa mukana waaiwana kuti acumaere vangwariri no vandhu vaiviya komuvona (Vonanyi ndima 16)
16. VaFilipi 1:12-14 inokhombijisa kudini kuti tingamunikira inga nyereji pikija patinosongana no zvineso? (Vonanyi pikica yo pa kapa.)
16 Azvinenyi kuti tiri pa mugariro wakadini tingamunikira inga nyereji. Nguva jimweni, zviro zvatingavona kuti zvingatiphingaija pa basa redu ro kucumaira masoko akanaka, zvingatipa mukana wo kucumaira. Inga muezaniso mupostori Pauro, wainga akafungihwa pa muzi pake ku Roma paakatarira karata ku ungano yo Firipo. Pikija wainga akafungihwa, Pauro aazivi kusiya kucumaera varindiri no vandhu vaimuvhakacira. Pauro wakacumaera ngo kuvangisira pa mugariro uu zve izvi zvakaita kuti hama jive no cokwadi no cicunge kuti ‘jitokotese ngo simba vhangeri, jicingathyi.’—Verenganyi VaFilipi 1:12-14; 4:22.
Nguva jese ngatiwane njira jo kucumaera vamweni (Vonanyi ndima 17) *
17. Hama no hambzaji jimweni jakaitisa kudini kuti jienderere mberi jecicumaera pikija no zvineso?
17 Hama no hambzaji jedu jino mukana wo kutevejera muezaniso wa Pauro wo cicunge. Ijona jinopona mu nyika inorambijwa kucumaera, asi jinowana manera okucumaera masoko akanaka. (Mateu 10:16-20) Ku imwe na imwe yo nyika iji, muvonereri wo ndharaundha wo nyikeyo waipa mazano o kuti mucumaeri umwe nga umwe waidikana kukwakwatija ndima yake pa kucumaera, kubatanija ukama hwake, vocigarisano, vadoni vo kucikora, vadoni vo kubasa no vamweni vaanoziva. Mukati mo makore maviri, ungano jainga jawanda mu ndharaundhemo. Kangaije atiripi kugara mu nyika inorambijwa kucumaera. Pikija zvakadaro, tingava no cijijo cinosisira maningi kuvhira ku muezaniso wo hama no hambzaji jedu jakanaka. Nguva jese ngatipsake manera o kucumaera, teciva no cokwadi cokuti Jehovha anozotipa simba ratinoda kuti ticumaere pikija no zvineso.—VaFilipi 2:13.
18. Wari masunga kuitenyi?
18 Wari i nguva yatinodikana kusunga kushandisa mbhangiro yatinowana pa karata ya Pauro ku Vafiripo. Tinodikana kuva no cokwadi cokuti tiri kusana zviro zvinosisira maningi, tiri kuva vacina ushaishi, atiripi kukhugunya vamweni zve tozara ngo mucero yo urungami. Pejisire tinozozara ngo rudo no kureremeja Baba wedu, Jehovha.
NDUMBO 17 “Ndinoda”
^ ndim. 5 Wari tinodikana kuva no rudo wakavanga ku hama jedu. Karata ya Pauro ku Vafiripi, inotibesera kuti tivone kuti tingaengejeresa kudini rudo hwedu ku hama jedu pikija patinosongana no zvineso.
^ ndim. 54 KUDURUJIHWA KO PIKICA: Pa nguva yo kucenesa Nyumba yo Umambo, imwe hama inozwi Joe, yaima kushanda zve iri kubhuya no hama no mwana wayo. Izvi zvakanyangajisa hama Mike, avo vari kuvhisa bukuta ngo mucini. Hama Maike vanorangarira kuti: ‘Joe waidikana kushanda, kuciripi kubhuya.’ Pa mukuvo umweni, hama Maike vari kuvona mabesere ari kuita hama Joe, hambzaji yaamusharuka. Izvi zvinoita kuti hama Maike varangarire maningi ngo pamusoro po mugariro jakanaka ja hama Joe.
^ ndim. 58 KUDURUJIHWA KO PIKICA: Mu nyika yokuti basa redu ro kucumaera rinorambijwa, hama iri kucumaera masoko o Umambo ku mundhu wainoziva. Perapo, pa nguva yo kuzorora, hama iyi iri kucumarera mudoni wo kubasa.
